Números 23:1-30
23 Chai qꞌuipami Balaamca Balactaca: “Canchis altarcunata caipi rurai. Shinallataj canchis torocunata, canchis carnerocunata ñucapaj huañuchi” nirca.
2 Balacca chai ratomi Balaam nishca shinallataj rurarca. Balacpish, Balaampishmi cada altarpi shuj torota, shuj carnerota rupachircacuna.
3 Chai qꞌuipami Balaamca Balactaca: “Canca cambaj rupachishca ofrendapaj cꞌuchullapi saquiri, ñucaca rigrinimi. Jehová Dios ñucahuan parlangapishchari. Pai imata nishcatami ñucaca canman huillasha” nirca. Chashna nishpaca paica shuj chaquishca lomamanmi rirca.
4 Chai qꞌuipami Diosca Balaamhuan parlarca. Chaimi Balaamca: “Canchis altarcunatami filapi churarcani. Cada altarpimi shuj torota, shuj carnerota rupachircani” nirca.
5 Jehová Diosca Balaammanca ima nina cashcatami huillarca. Paitaca: “Balac maipi cashcaman tigrai. Paimanca caitami nina cangui” nircami.
6 Chaimi Balaam tigrashpaca Balacpish, moabitacunata tucui mandajcunapish rupachishca ofrenda cꞌuchupi shayacujta ricurca.
7 Chaimi paica cashna nishpa huillai callarirca:
“Moab llajtata mandaj rey Balacca Arammantami ñucata pushamurca.Inti llujshin lado urcucunamantami pushamurca. Paica:
‘Shamui, ñucapaj randi Jacobta maldici.
Ari. Shamui, Israelta juchachi’ nircami.
8 ¿Dios mana maldicishcacunataca ima shinataj ñucaca maldicishari?
¿Jehová Dios mana juchachishcacunataca ima shinataj juchachishari?
9 Paicunataca jatun rumicuna jahuamantami ricucuni,lomacuna jahuamantami ricucuni.
Chai puebloca paillami chaipi causan.Paica shujtaj llajtacunamantami chꞌicanyarishca.
10 Jacobpaj huahua huahuacunaca ñutu allpa shina achcacunami, ¿pitaj yupai tucungari?Israelitacunataca chuscupi chaupishca shuj partellatapish, ¿pitaj yupai tucungari?
Ñucaca cashcata rurajcuna shinami huañusha nini.Paicuna shinami tucurisha nini” nircami.
11 Chaimi Balacca Balaamtaca: “¿Imatataj rurashcanguiyari? Ñuca contracunata maldicichunmi pushamurcani. Ashtahuanpish paicunataca bendiciashcanguimi” nirca.
12 Chashna nijpimi Balaamca: “¿Manachu ñucaca Jehová Dios ima nishcallata huillana cani?” nirca.
13 Balacca Balaamtaca: “Ama shina caichu, shujtaj lugarman ñucahuan jacu. Chai lugarmantami paicunataca ricui tucungui. Mana tucuicunata ricunguichu, shuj partellatami ricungui. Chai lugarmanta paicunata maldicipai” nircami.
14 Chashna nishpaca Balacca Balaamtaca Pisgá urcu jahuapi saquirij Zofim nishca campomanmi pusharca. Chaipimi canchis altarcunata shayachishpa cada altarpi shuj torota, shuj carnerota rupachirca.
15 Balaamca Balactaca: “Ñuca chaipi Dioshuan parlangacama canca cambaj rupachishca ofrendapaj cꞌuchullapi saquiri” nircami.
16 Jehová Diosca Balaamhuan parlashpaca ima nina cashcatami huillarca. Paitaca: “Balac maipi cashcaman tigrai. Paimanca caitami nina cangui” nircami.
17 Chaimi Balaamca Balac maipi cashcaman rirca. Chaiman rishpaca Balac paipaj rupachishca ofrendapaj cꞌuchullapi shuyacujtami ricurca. Moabitacunata mandajcunapish paihuanmi carca. Balacca: “¿Jehová Diosca imatataj nirca?” nishpami tapurca.
18 Chaimi Balaamca cashna nishpa huillai callarirca:
“Balac jatari, caita uyapai.
Ziporpaj churilla, ñucata uyapai.
19 Diosca llullacunata ningapajca mana runachu.Paipaj yuyaita cambiangapajpish mana runapaj churichu.
Pai imata nishpaca, ¿manachu chaitataj ruran?
Pai imata rurasha nishpaca, ¿manachu chaitataj pajtachin?
20 ¡Ricui! Paicunata bendiciangapajmi shamushcani.Diosmi paicunataca bendiciashca, chaitaca mana cambiai tucunichu.
21 Jacobta magiata rurashpa llaquichichunca Diosca mana munanchu.Israelta ima llaqui japichunpish mana saquinchu.
Paicunapaj Jehová Diosca paicunahuanmi can.Diostaca ñucanchij reymi can nishpami alabancuna.
22 Diosmi paicunataca Egipto llajtamanta llujshichicun.
Paica jatun huagrapaj* gachucuna shinami paipaj poderhuan paicunataca ayudan.
23 Jacobpaj contraca ima mana allitaca* ni pi mana rurai tucunchu.Adivinaj runapish Israeltaca mana jarcai tucunchu.
Cunanca Jacobmantapish, Israelmantapish:
‘¡Dios imata rurashcata ricuichij!’ ni tucunchijmi.
24 Cai puebloca shuj león shinami jataringa,shuj león shinami shayaringa.
Pai japishca animalta micungacamami mana siriringa.Pai huañuchishca animalpaj yahuarta ubyangacamami mana siriringa” nircami.
25 Chaimi Balacca Balaamtaca: “Paicunata mana maldici tucushpaca ama bendiciaichu” nirca.
26 Chashna nijpimi Balaamca Balactaca: “¿Manachu ñucaca Jehová Dios ima nishcallatami rurasha nircani?” nirca.
27 Balacca Balaamtaca: “Shamui, shujtaj lugarman pushachun saquipai. Dios verdaderopaj ñaupajpica chai lugarmanta paicunata can maldicichun alli cangapishchari” nircami.
28 Chashna nishpaca Balacca Balaamtaca Peor nishca urcu jahuamanmi pusharca. Chai urcumantaca Jesimón* ladotami ricunalla carca.
29 Chaipi cashpami Balaamca Balactaca: “Canchis altarcunata caipi rurai. Shinallataj canchis torocunata, canchis carnerocunata ñucapaj huañuchi” nirca.
30 Chaimi Balacca Balaam nishca shinallataj rurarca. Paica cada altarpimi shuj torota, shuj carnerota rupachirca.
Notacuna
^ O “urcu toropaj”.
^ O “mana alli señaltaca”.
^ Caitaca “chaquishca pamba” nishpapishmi traducishcacuna.
