Josué 9:1-27
9 Hititacunamanta, amorreocunamanta, cananeocunamanta, perizitacunamanta, heveocunamanta, jebuseocunamanta tucui reycunami ima tucushcata uyarcacuna. Cai llajtacunaca Jordán jatun yacu inti huashicun ladopi, urcucunapi, Sefelapi, Jatun mama cucha* uricunapi, Líbano urcucuna chꞌimbapurapimi saquirij carca.
2 Chashna tucushcata yachashpami paicunaca Josuepaj, israelitacunapaj contra macanacungapaj tandanacurcacuna.
3 Gabaón llajtapi causajcunapishmi Jericó llajtahuan, Hai llajtahuan Josué imata rurashcata yachaj chayarcacuna.
4 Gabaonitacunaca yallitaj yachaisapa cashcamantami paicunapaj burrocunapica mauca sacocunapi micunacunata aparcacuna. Maucayashca, remendashca vinota churana capachucunatapishmi apachircacuna.
5 Shinallataj paicunaca mauca, remendashca sandaliacunata churashcami carca. Paicunapaj churanacunapish maucayashcami carca. Paicuna apashca tucui tandapish chaquishca, ñuturishcami carca.
6 Chashnami Guilgal llajtapi caj carpa huasicunaman, Josué maipi cashcaman rircacuna. Paicunaca Josuemanpish, Israelmanta cꞌaricunamanpish: “Ñucanchijca caru llajtamantami shamushcanchij. Ñucanchijhuan shuj ari ninacuita ruraichij” nircacunami.
7 Pero Israelmanta cꞌaricunaca heveocunataca:* “Tal vez cancunaca cai cꞌuchullapimi causanguichij. ¿Ima shinataj cancunahuanca shuj ari ninacuita rurashunyari?” nircacunami.
8 Chaimi paicunaca Josuemanca: “Ñucanchijca canta sirvijcunami* canchij” nishpa cutichircacuna.
Chashna nijpimi Josueca paicunataca: “¿Cancunaca picunataj canguichij? ¿Maimantataj shamunguichij?” nishpa tapurca.
9 Chaimi heveocunaca cashna nircacuna: “Ñucanchijca cambaj Jehová Diospaj shutita respetashcamantami caru llajtamanta shamushcanchij. Cambaj Diosca tucuicuna rijsishcami can. Egipto llajtapi pai tucui imata rurashcatapishmi uyashcanchij.
10 Shinallataj Jordán jatun yacu caishuj ladoman* caj amorreocunata mandaj ishqui reycunahuanpish tucui imallata rurashcatami uyashcanchij. Hesbonmanta rey Sehonhuan, Astarotpi causaj Basanmanta rey Oghuan tucui ima tucushcatapishmi uyashcanchij.
11 Chaimi ñucanchij autoridadcunapish,* tucui ñucanchij llajtapi causaj gentecunapish, ‘Viajepaj micunata apashpa paicunata ricunaman richij. Shinallataj “Cancunata sirvijcunami tucushun. Ñucanchijhuan shuj ari ninacuita ruraichij” ninguichij’ nircacuna.
12 Viajepaj apashca cai tandaca ñucanchij huasimanta llujshishpa cancunapajman shamungapajca cunujllami carca. Pero ricuichij, cunanca chai tandaca chaquishca, ñuturishcami can.
13 Cai vinota churana capachucunapish vinota churacui horasca mushujmi carca. Pero cunanca ñami lliquirishca. Ñucanchij churanacunapish, ñucanchij sandaliacunapish achcata purimushcamantami viajepica tucui maucayashca” nircacunami.
14 Chashna nijpimi Israelmanta cꞌaricunaca paicuna apamushca huaquin micunacunata japircacuna. Pero imata rurana cashcataca Jehová Diosta mana tapurcacunachu.
15 Chaimi Josueca paicunahuan sumajta cuasangapaj parlanacurca. Paicunata ama huañuchingapajpish shuj ari ninacuitami paicunahuan rurarca. Israelitacunata pushajcunapish chai ari ninacushcata pajtachinatami jurarcacuna.
16 Israelitacunaca paicunahuan ari ninacushcata rurashca quimsa punllacuna qꞌuipami paicunaca cꞌuchullapi causajcuna cashcata, paicunapaj vecinocuna cashcata yachaj chayarcacuna.
17 Chaimi israelitacunaca chaimanta rishpa paicunapaj llajtacunaman quimsa punllacunapi chayarcacuna. Paicunapaj llajtacunaca Gabaón, Kefirá, Beerot, Quiryat-Jearim shuticunami carca.
18 Pero israelitacunata pushajcunaca israelitacunapaj Jehová Diospaj shutipi jurashcamantami paicunataca mana huañuchircacuna. Chaimi tucui gentecunaca israelitacunata pushajcunamanta quejari callarircacuna.
19 Chaita ricushpami israelitacunata tucui pushajcunaca tucui gentecunamanca cashna nircacuna: “Ñucanchijca israelitacunapaj Jehová Diospaj shutipimi jurarcanchij. Chaimantami paicunataca mana huañuchi tucunchij.
20 Caitami ñucanchijca rurashun. Shuj juramentota rurashcamanta Dios ñucanchijhuan ama pꞌiñarichunca paicuna causashpa catichunmi saquishun” nircacunami.
21 Israelitacunata pushajcunaca: “Ñucanchij jurashca shina paicuna causashpa catichun saquichij. Pero paicunaca yantata tandajcuna, tucui gentecunapajpish yacuta mashcajcuna cachun” nircacunami.
22 Josueca paicunata cayashpaca cashnami nirca: “¿Imamantataj cancunaca ‘Caru llajtamantami canchij’ nishpa ñucanchijtaca umarcanguichijyari? Cancunaca ñucanchij cꞌuchullapimari causashcanguichij.
23 Cunanmantaca maldicishcami canguichij. Shinallataj cancunaca yantata tandangapaj, ñuca Diospaj huasipaj yacutapish mashcangapajmi siempre esclavocuna* canguichij” nircami.
24 Gabaonitacunaca Josuemanca cashnami cutichircacuna: “Canta sirvijcunamanca cambaj Jehová Dios paita sirvij Moisesman tucui cai allpata cancunaman cuchun, cancunapaj ñaupajpi chai llajtacunapi causajcunatapish tucuchichun mandashcatami achijta huillarcacuna. Chaimantami ñucanchijta cancuna huañuchinata manchashpa chaitaca rurarcanchij.
25 Cunanca cambaj maquipimi canchij. Cambaj imapish alli cajpi, cashcata rurana cajpica ñucanchijhuanca can munashcata rurailla” nircacunami.
26 Chaitami Josueca paicunahuan rurarca. Paica israelitacunapaj maquimanta quishpichishpami paicunataca mana huañuchirca.
27 Pero Josueca chai punllami gabaonitacunataca yantata tandachun, gentecunapaj yacuta mashcachun mandarca. Shinallataj pai* agllashca lugarpi, Jehová Diospaj altarpi churangapaj yacuta mashcachunmi mandarca. Chaitami paicunaca cunan punllacunacama rurashpa catincuna.
Notacuna
^ Caipica mar Mediterraneomantami parlacun.
^ Chai punllacunaca Gabaón llajtapica heveocunami causajcuna carca.
^ O “cambaj esclavocunami”.
^ Caipica inti llujshin ladomantami parlacun.
^ Hebreo rimaipica: “ancianocunapish” ninmi.
^ O “netineocuna”. “Netineocuna” shimita huasha diccionariopi ricui.
^ Caipica Jehová Diosmantami parlacun.
