Josué 7:1-26
7 Israelitacunaca tucui tucuchishca cana cosascunata mana tucuchishpami Diosta mana cazurcacuna. Judapaj familiamanta Acán shuti runami huaquin cosascunata pacarca. Acanca Carmipaj churimi carca. Carmica Zabdipaj churimi carca. Zabdica Zerahpaj familiamantami carca. Acán runa huaquin cosascunata pacashcamantami Jehová Diosca israelitacunahuanca yallitaj pꞌiñarirca.
2 Chaimi Josueca huaquin cꞌaricunataca Jericó llajtamanta Hai llajtaman cacharca. Hai llajtaca Bet-Aven llajta cꞌuchupi, Betel inti llujshin ladopimi carca. Chashna cachashpami paicunataca: “Chai llajtaman huichiyashpa ima shina cashcata pacalla ricumugrichij” nirca. Chai cꞌaricunaca Hai llajtaman huichiyashpami ima shina cashcata ricurcacuna.
3 Chai runacuna tigramushpaca Josuemanca: “Tucui soldadocuna chai llajtaman rinaca mana minishtirinchu. Hai llajtapi causajcunata tucuchingapajca 2.000 mana cashpaca 3.000 cꞌaricunallatami minishtinchij. Chai llajtapi causajcunaca ashacunallami, chaimanta tucui soldadocuna chaiman rishpa shaicurichunca ama saquichu” nircacunami.
4 Chaimi casi 3.000 soldadocunalla chai llajtaman rircacuna. Pero paicunaca chai llajtaman chayashpaca Hai llajtamanta soldadocunamantami miticushpa rircacuna.
5 Hai llajtamanta soldadocunaca 36 israelitacunatami huañuchircacuna. Paicunaca israelitacunataca Hai llajta pungumanta Sebarim* lugarcamami catishpa rircacuna. Chai ñan uripimi paicunaca israelitacunataca huañuchishpa catircacuna. Chaimi Israelmanta gentecunaca paicunapaj shungupi yallitaj mancharishpa fuerza illaj saquirircacuna.*
6 Chaita ricushpami Josueca paipaj churanata lliquirishpa Jehová Diospaj Arca ñaupajpi pambacama cumurirca. Paipish, israelitacunata pushajcunapish* chishicamami chashna cumurishca carcacuna. Shinallataj paicunapaj umapi ñutu allpata shitarinatapish mana saquircacunachu.
7 Josueca cashnami nirca: “¡Aij Tucuita Mandaj Amito Jehová Dioslla! ¿Ñucanchijtaca imapajtaj Jordán jatun yacuta chꞌimbachishpa cai ñanta pushamurcangui? ¿Amorreocunapaj maquipi entregashpa paicuna ñucanchijta tucuchichunchu pushamurcangui? ¡Jordán jatun yacu caishuj ladopi* ñucanchij saquirishca cashpachari alli canman carca!
8 Aij Jehová Dioslla, perdonahuai, ¿cunanca israelitacuna paicunapaj contracunamanta miticushpa rishcamantaca imatataj nishayari?
9 Cananeocunapish, cai llajtapi causaj tucui gentecunapish ima tucushcata yachashpaca ñucanchij muyundijta shayarishpami ñucanchij shuticunataca cai allpamanta anchuchingacuna. Shinapish ¿cambaj jatun shutimantaca canca imatataj ruranguiyari?” nircami.
10 Chaimi Jehová Diosca Josuemanca cashna nishpa cutichirca: “¡Jatari! ¿Imamantataj chaipi pambacama cumurishca tiyacunguiyari?
11 Israelitacunaca juchatami rurashcacuna. Paicunaca ñucahuan ari ninacushcatami* pajtachishun nircacuna. Pero chaitaca mana pajtachishcacunachu. Ñuca tucuchichun nishpa mandashcacunamantamari huaquin cosascunahuan saquirishcacuna. Paicunaca shuhuashpami paicuna charishca cosascunapaj chaupipi huaquichishcacuna.
12 Chaimantami israelitacunaca paicunapaj contracunataca mana mishai tucungacuna. Paicunaca tigrashpami contracunamantapish miticushpa ringacuna. Israelitacunaca tucuchishcami cangacuna. Tucuchichun nishpa mandashca runata mana tucuchijpica ñucaca ña mana cancunahuan cashachu.
13 ¡Jatari, gentecunata chuyayachi! Paicunamanca cashna ni: ‘Caya tutamantapajca chuyayarishpa jucha illaj tucuichij. Israelitacunapaj Jehová Diosmi cashna nin: “Israelitacuna, cancunapurapica shuj runami tucuchishca cana can. Paita mana tucuchishpaca cancunapaj contracunataca manataj mishai tucunguichijchu.
14 Caya tutamantaca tucui 12 jatun familiacunami tandanacuna canguichij. Jehová Dios agllashca shuj jatun familiamantaca según paicunapaj familiami cꞌuchuyana can. Jehová Dios agllashca familiamantaca según paicunapaj huasimi cꞌuchuyana can. Jehová Dios agllashca huasimantaca según paipaj huasi ucumantami cada runa cꞌuchuyana can.
15 Tucuchishca cana cosascunata maijan charicujta japishpaca paitami ninapi rupachina can. Paipish, pai tucui charishca cosascunapish ninapimi rupachishca cana can. Jehová Dioshuan ari ninacushcata saquishcamanta, Israelpaj yallitaj pinganai cosascunata rurashcamantami tucuchishca cana can” ninmi’ ningui” nircami.
16 Cayandij punllaca Josueca utca jatarishpami Israelmanta cada jatun familiata cꞌuchuyachirca. Chashna cꞌuchuyachijpica Judapaj jatun familiami agllashca llujshirca.
17 Chaimi Josueca Judapaj familiacunata cꞌuchuyachirca. Paicunamantaca zerahitacunapaj familiami agllashca carca. Zerahitacunapaj familiamantaca cada zerahitatami cꞌuchuyachun mañarca. Paicunamantaca Zabdimi agllashca carca.
18 Ultimopica Zabdipaj familiamanta caj cada cꞌaritami cꞌuchuyachirca. Chashna cꞌuchuyachijpica Acanmi agllashca carca. Acanca Carmipaj churimi carca. Carmica Zabdipaj churimi carca. Zabdica Zerahpaj churimi carca. Paica Judapaj familiamantami carca.
19 Chaimi Josueca Acantaca: “Ñuca huahualla, israelitacunapaj Jehová Diosta jatunyachipai. Can rurashca juchata paiman huillai. Imata rurashcata ñucaman huillahuai. Ama pacaichu” nirca.
20 Chashna nijpimi Acanca Josuemanca cashna nishpa cutichirca: “Ari, ñucami israelitacunapaj Jehová Diospaj ñaupajpi juchata rurashcani. Caitami rurarcani:
21 quichushca cosascuna chaupipica Sinarmanta shuj sumaj churanata, 200 siclo* cullquita, 50 siclota pesaj orotapishmi ricurcani. Chaita munashpami ñucaca apashpa rircani. Chaicunaca cunanca ñuca carpa huasi allpa ucupimi pacashca tiyacun. Cullquipish chai ucupimi can” nircami.
22 Chaita uyashpami Josueca chai rato huillajcunataca Acanpaj carpa huasiman cacharca. Chaiman chayashpaca paicunaca Acanpaj carpa huasipica sumaj churanata, chai ucupi pacashca cullquitapishmi japircacuna.
23 Chai carpa huasipi japishca cosascunataca surcushpami Josuepaj ñaupajman, tucui israelitacunapaj ñaupajman aparcacuna. Jehová Diospaj ñaupajpipishmi churarcacuna.
24 Chaimi Josuepish, tucui israelitacunapish Zerahpaj churi Acantaca cullquindij, sumaj churanandij, orondij, paipaj churicunandij, ushushicunandij, paipaj torocunandij, paipaj burrondij, ovejacunandij, chivocunandij, paipaj carpa huasindij, pai tucui imalla charishca cosascunandij Acor pugru pambaman apashpa llujshircacuna.
25 Chaimi Josueca: “¿Imamantataj ñucanchijpajca cai jatun llaquita apamurcangui? Cunanca Jehová Diosca cantaca llaquimanmi apanga” nirca. Chaimi tucui israelitacunaca Acantapish, paipaj tucui familiatapish rumicunahuan shitashpa huañuchircacuna. Qꞌuipaca paicunataca ninapimi rupachircacuna. Chashnami israelitacunaca paicunataca rumicunahuan shitashpa huañuchircacuna.
26 Chai qꞌuipaca Acanpaj cuerpota rupachishca jahuapimi rumicunata montonarcacuna. Chai montonashca rumicunaca cunan punllacunacamami tiyan. Chashnami Jehová Diosca pai yallitaj pꞌiñarishca canata saquirca. Chaimantami chai lugarca cunan punllacunacama Acor* pugru pamba nishca shutita charin.
Notacuna
^ “Sebarim” shutica ‘rumicunata llujshichina lugarcuna’ nisha ninmi.
^ Hebreo rimaipica: “gentecunapaj shunguca yacuyashpa yacu shina tucurca” ninmi.
^ Hebreo rimaipica: “ancianocunapish” ninmi.
^ Caipica inti llujshin ladomantami parlacun.
^ O “rurashca pactotami”.
^ Shuj sicloca 11.4 gramocunatami charirca. Ayuda B14-ta ricui.
^ “Acor” shutica ‘llaqui’ o ‘problema’ nisha ninmi.
