Josué 23:1-16
23 Jehová Diosca israelitacunapaj muyundijpi caj contracunamanta paicunata quishpichishpami achca punllacunata sumaj causaita curca. Chai tiempopica Josueca yuyajyashcamantami causangapajca ashalla causaita charirca.
2 Josueca tucui israelitacunatami tandachirca. Paicunapaj ancianocunata, pushajcunata, juezcunata, autoridadta charijcunata tandachishpami cashna nirca: “Ñucaca ñami yuyajyashcani, causangapajpish ashalla causaitami charini.
3 Ñucanchij Jehová Dios cancunamanta tucui cai llajtacunata imata rurashcataca cancunallatajmi ricushcanguichij. Ñucanchij Jehová Dios cancunamanta macanacucushcamantami chashna tucurca.
4 Ricuichij, ñucaca Jordán jatun yacu cꞌuchucunamanta inti huashicun ladopi caj Jatun mama cuchacamami* allpacunata sorteashpa* cancunapaj familiacunaman herenciata curcani. Chai allpacunaca ñuca tucuchishca tucui llajtacunamanta, saquirij shujtaj llajtacunamantapishmi carca.
5 Shinallataj ñucanchij Jehová Diosca paicunataca cancunapaj ñaupajmantami anchuchishpa catirca. Chashnami paica cancunamanta chai llajtacunapi causajcunataca llujshichishpa cacharca. Cancunaca ñucanchij Jehová Dios nishca shinami chai allpacunata japircanguichij.
6 Alli ladomanpish, lluqui ladomanpish mana nunca anchurishpami Moisesman cushca leyta* quillcashca libropi tucui imalla tiyashcataca mana manchashpa cazuna canguichij.
7 Cancunapurapi saquirij llajtacunahuanpish mana chagrurinachu canguichij. Paicunapaj dioscunapaj shutitapish mana ninachu canguichij. Ni chai dioscunapaj shutipipish mana juranachu canguichij. Chai dioscunapaj ñaupajpi cumurishpa mana nunca sirvinachu canguichij.
8 Ashtahuanpish cunan punllacama ima shinami sirvishpa caticunguichij, chashnallataj cancunapaj Jehová Diosta sirvishpa catinguichij.
9 Jehová Diosmi cancunapaj ñaupajmantaca achca poderta charij jatun llajtacunata llujshichishpa cachanga. Cunan punllacunacamaca ni maijan runa cancunata mana mishai tucushcacunachu.
10 Ñucanchij Jehová Dios nishca shinallatajmi paica cancunamanta macanacucun. Chaimantami cancunapuramantaca shujlla runa mil runacunata catinguichij.
11 Tucui tiempopi ñucanchij Jehová Diosta cꞌuyanataca amataj saquinguichij.
12 Pero cancuna Diosmanta caruyajpi, cancunapurapi saquirij llajtacunahuan tandanacujpi, cancunapaj familiacunatapish paicunahuan cazarachijpi, cancuna paicunahuan tandarijpi, paicunapish cancunahuan tandarijpica
13 ñucanchij Jehová Diosca cancunapaj ñaupajmantami cai llajtacunataca manataj llujshichishpa cachanga. Paicunaca cancunapajca shuj trampa shina, cancunapaj huashacunapipish azoticuj shina, cancunapaj ñahuicunapipish tujsicuj shinami canga. Chaica ñucanchij Jehová Dios cushca cai sumaj allpamanta cancuna chingaringacamami chashna canga.
14 Cunanca ricuichij, ñucaca ñallami huañugrini. Ñucanchij Jehová Dios tucui cusha nishcacunamanta shuj palabrallapish mana pajtarishpaca mana saquirishcachu. Chaitaca cancunaca tucui shunguhuan, tucui almahuanmi* alli yachanguichij. Cancunapaj allipajmi tucui pajtarishca. Pai nishca shimicunaca shuj palabrallapish mana pajtarishpaca mana saquirishcachu.
15 Pero ima shinami ñucanchij Jehová Dios nishca shimicuna cancunapi tucui pajtarirca, chashnallatajmi Jehová Diosca pai cachasha nishca tucui llaquicunatapish* cachanga. Chashnami ñucanchij Jehová Diosca pai cushca cai sumaj allpamanta cancunata tucuchinga.
16 Cancuna ñucanchij Jehová Dioshuan ari nishcata mana pajtachishpa, shujtaj dioscunata sirvinaman rijpi, paicunapaj ñaupajpi cumurijpica Jehová Diosca yallitaj pꞌiñarishpami cancunataca pai cushca sumaj allpamantaca chai rato chingachinga” nircami.
Notacuna
^ Caipica mar Mediterraneomantami parlacun.
^ O “chaupishpa”.
^ “Moisesman cushca ley” shimita huasha diccionariopi ricui.
^ “Alma” shimita huasha diccionariopi ricui.
^ O “tucui laya maldicioncunatapish”.
