Josué 11:1-23
11 Hazor llajtata mandaj rey Jabín chaita yachaj chayashpaca Madón llajtata mandaj rey Jobabman, Simrón llajtata mandaj reyman, Acsaf llajtata mandaj reymanmi huillajcunata cacharca.
2 Janaj lado urcucunapi mandaj reycunamanpishmi huillajcunata cacharca. Shinallataj Kinéret ura ladoman saquirij pambacunapi* causajcunaman, Sefelapi causajcunaman, inti huashicun ladopi saquirij Dor quinricunapi causajcunaman,
3 inti llujshin ladopi, inti huashicun ladopi causaj cananeocunaman, urcucunapi causaj amorreocunaman, hititacunaman, perizitacunaman, jebuseocunaman, Mizpá allpapi saquirij Hermón urcu chaquipi causaj heveocunamanpishmi huillajcunata cacharca.
4 Chaimi chai reycunaca tucuicuna paicunapaj soldadocunata pushashpa achca caballocunandij, macanacuna carretacunandij rircacuna. Paicunaca mama cucha uripi tiyaj arena shina achcacunami carca.
5 Tucui chai reycunaca maipi tandanacunata yuyarishca qꞌuipami israelitacunahuan macanacungapaj Merom yacucuna cꞌuchullaman rircacuna. Chaipimi tandalla paicunapaj carpa huasicunapi saquirircacuna.
6 Jehová Diosca Josuetaca: “Ama manchaichu. Caya cai horas shinallatajmi tucui paicunataca israelitacunapaj maquipi cusha. Chaimi paicunataca huañuchingui. Paicunapaj caballocunatapish patojotami saquingui. Paicunapaj carretacunatapish ninapimi rupachingui” nircami.
7 Chashna nijpimi Josuepish, tucui soldadocunapish chai gentecunataca mana yuyashcapi Merom yacucuna cꞌuchullapi huañuchircacuna.
8 Jehová Diosca chai gentecunataca israelitacunapaj maquipimi curca. Chaimi paicunaca paicunata mishashpaca Jatun llajta Sidoncama, Misrefot-Maimcama, inti llujshin ladopi saquirij Mizpé pugru pambacama catishpa rircacuna. Chaipimi tucuicunata huañuchircacuna, shujllapish causashpa catichunca mana saquircacunachu.
9 Josueca Jehová Dios mandashca shinallatajmi paicunapaj caballocunatapish patojota saquirca. Paicunapaj carretacunatapish ninapimi rupachirca.
10 Ashtahuanpish Josueca cutin tigrashpami Hazor llajtata mishashpa japirca. Chai llajtata mandaj reytapishmi espadahuan huañuchirca. Hazor llajtaca tucui chai llajtacunamanta ashtahuan jatun llajtami carca.
11 Chai llajtapi causaj gentecunatapish espadahuanmi huañuchircacuna. Chashnami tucuita tucuchirca, shujllapish causashpa catichunca mana saquircachu. Chai qꞌuipaca Hazor llajtataca ninahuanmi rupachirca.
12 Josueca chai reycunapaj tucui llajtacunatami mishashpa japirca. Chai llajtapi mandaj tucui reycunatapishmi espadahuan huañuchirca. Paica Jehová Diosta sirvij Moisés mandashca shinallatajmi paicunataca tucuchirca.
13 Ashtahuanpish israelitacunaca loma jahuapi caj llajtacunataca ni maijanta mana rupachircachu. Josueca Hazor llajtallatami rupachirca.
14 Israelitacunaca chai llajtacunapi causaj gentecunapaj tucui quichushca cosascunahuan, paicunapaj huagracunahuan, ovejacunahuanmi saquirircacuna. Pero gentecunataca tucuicunata tucuchingacamami espadahuan huañuchircacuna. Shujllapish causashpa catichunca mana saquircacunachu.
15 Israelitacunaca paita sirvij Moisesman Jehová Dios imata mandashcatami rurarcacuna. Moisesmi Josuemanca imata ruranata mandarca. Chaimi Josueca pai mandashca shinallataj rurarca. Josueca Moisesman Jehová Dios imata mandashcatami tucuita rurarca.
16 Josueca tucui cai allpacunatami macanacushpa japirca. Urcucunata, tucui Neguebta, Gosén allpata, Sefelata, Arabata, Israel urcucunata, chaipi tiyaj lomacunatapishmi* japirca.
17 Chai allpacunaca Seír chꞌimbapi saquirij Halac urcumanta callarishpaca Baal-Gadcamami carca. Baal-Gadca Líbano pugru pambapi, Hermón urcu chaquipimi saquirij carca. Josueca tucui reycunata japishpami paicunata mishashpa huañuchirca.
18 Josueca achca tiempotami cai reycunahuanca macanacurca.
19 Israelitacunahuan sumajta causangapajca ni maijan llajtamanta mana parlanacurcacunachu. Gabaón llajtapi causaj heveocunallami sumajta cuasangapaj parlanacushca carca. Tucui caishuj llajtacunataca macanacushpami japircacuna.
20 Chai gentecuna israelitacunahuan macanacunaman llujshichunmi Jehová Diosca chai gentecunapaj shungu rumi shina tucuchun saquirca. Chashnami Diosca paicunata mana llaquishpa tucuchirca. Jehová Dios Moisesman mandashca shinami chai gentecunaca tucuchishca cana carca.
21 Chai tiempopica Josueca Anacpaj huahua huahuacunatami tucuchirca. Paicunaca urcucunapi, Hebronpi, Debirpi, Anabpipishmi causajcuna carca. Shinaca Josueca Judá tucui urcucunapi, Israel tucui urcucunapi causaj Anacpaj huahua huahuacunatami tucuchirca. Josueca paicunataca tucui paicunapaj llajtacunandijmi tucuchirca.
22 Israelitacunapaj llajtapica Anacpaj huahua huahuacunamantaca ni shuj mana saquirircachu. Paicunaca Gaza, Gat, Asdod llajtacunallapimi saquirircacuna.
23 Chashnami Josueca Jehová Dios Moisesman nishca shinallataj tucui chai allpacunata japirca. Chai qꞌuipami Josueca chai allpacunataca israelitacunapaj familiacunaman cada familia japina cashcata shuj herenciata shina chaupishpa curca. Israelitacunapaj llajtapica macanacui ña mana tiyashcamantami tranquilo causai tiyarca.
