2 Samuel 11:1-27
11 Chai huata callaripica reycuna macanacunaman llujshina punllacunapimi Davidca Joabtapish, paita sirvijcunatapish, Israelmanta tucui soldadocunatapish ammonitacunata tucuchichun mandarca. Chaimi paicunaca Rabá llajta muyundijpi shayarircacuna. Chaicamaca Davidca Jerusalenpimi carca.
2 Shuj punlla ña tutayacujpimi Davidca camamanta jatarishpa paipaj mandana huasi* jahua terrazapi puri callarirca. Chashna puricushpami chai terrazamanta shuj huarmi armacujta ricurca. Cai huarmica yallitaj sumajmi carca.
3 Davidca chai huarmi pi cashcata yachangapajmi shuj tapujta cacharca. Davidmanca: “Eliampaj ushushi Bat-Sebami can. Paica hititacunapuramanta Uriaspaj huarmimi can” nircacunami.
4 Davidca chai huarmita pushamuchunmi huillajcunata cacharca. Chaimi chai huarmica David maipi cashcaman yaicurca. Chaipimi Davidca paihuan chayarirca. (Leypi nishca shina chai huarmi chuyayaricujpimi chashna tucurca).* Chai qꞌuipaca chai huarmica paipaj huasimanmi tigrarca.
5 Chai huarmica chichumi saquirirca. Paica Davidmanca: “Chichumari cani” nishpami huillanaman cacharca.
6 David chaita yachaj chayashpami: “Hititacunapuramanta Uriasta ñucapajman cachai” nishpa Joabman huillachun cacharca. Chashna nijpimi Joabca Uriasta cacharca.
7 Davidca Urías chayamujpimi Joabpish, soldadocunapish ima shina cashcata tapurca. Shinallataj macanacuitapish paicuna mishacushcata o mana mishacushcatami tapurca.
8 Chai qꞌuipaca Davidca Uriasmanca: “Cambaj huasiman uriyashpa chaipi samarigri”* nircami. Reypaj mandana huasimanta Urías llujshijpimi paita catishpa reypaj regalota* cungapaj rircacuna.
9 Shinapish Uriasca paipaj amitopaj tucui sirvijcunahuanmi reypaj huasi pungu yaicunpi dormirca. Chashnami Uriasca paipaj huasiman mana uriyarca.
10 Davidmanca: “Uriasca paipaj huasiman mana uriyarcachu” nishpami huillarcacuna. Chashna huillajpimi Davidca Uriastaca: “¿Manachu canca shuj viajemanta tigramushcangui? ¿Imamantataj cambaj huasiman mana uriyarcangui?” nishpa tapurca.
11 Chaimi Uriasca Davidmanca: “Arcapish, Israelpaj shujtaj familiacunamanta runacunapish, Judapaj familiamanta runacunapish carpa huasicunapimi saquiricuncuna. Ñuca amito Joabpish, ñuca amitopaj sirvijcunapish pugru pambapimi carpa huasicunapi saquiricuncuna. ¿Ima shinataj ñuca huasiman rishpa, micushpa, ubyashpa, ñuca huarmihuanpish chayarishayari? ¡Cambaj shutipimi jurani ñucaca chaitaca manataj rurashachu!” nirca.
12 Davidca Uriasmanca: “Cunanpish caipi saquiri. Cayaca can richun saquishallami” nircami. Chaimi Uriasca chai punllata, cayandij punllatapish Jerusalenpi saquirirca.
13 Qꞌuipaca Davidca paihuan micuchun, paihuan ubyachunmi Uriastaca cayachun cacharca. Cashnami paitaca machachirca. Shinapish tutayajpica Uriasca paipaj huasiman mana uriyarcachu. Ashtahuanpish paica paipaj amitota sirvijcunahuanmi dorminaman rirca.
14 Tutamanta ladoca Davidca Joabpajmi shuj cartata escribirca. Chai cartataca Urías cuchunmi cacharca.
15 Chai cartapica: “Uriastaca ashtahuan sinchita macanacuna punta filapi churaichij. Chai qꞌuipaca paillata llaquichishpa huañuchichun chaimanta anchunguichij” nishpami quillcarca.
16 Joabca chai llajtatami ricucushca carca. Chaimantami sinchi macanacuj amonitacuna maipi cashcata yacharca. Paica Uriastami chaipica churarca.
17 Chai llajtamanta runacuna llujshishpaca Joabpaj contrami macanacurcacuna. Chai macanacuipica Davidpaj huaquin sirvijcunami huañurcacuna. Paicunapurapica hititacunapuramanta Uriaspishmi huañushca carca.
18 Joabca Davidmanca macanacuipi tucui imalla tucushcatami huillarca.
19 Joabca huillajmanca cashna nishpami mandarca: “Macanacuipi tucui imalla tucushcata reyman huillajpica,
20 rey pꞌiñarishpaca cashnachari ninga: ‘¿Imamantataj chai llajta cꞌuchullapi macanacunaman rina carcanguichij? ¿Paicuna pirca jahuamanta flechacunahuan shitanataca manachu yacharcanguichij?
21 ¿Jerubesetpaj churi Abimelectaca pitaj huañuchirca? ¿Manachu shuj huarmi jahua pircamanta cutana rumita* shitashpa Tebez llajtapi paitaca huañuchirca? ¿Imamantataj cancunaca pircaman yallitaj cꞌuchuyana carcanguichij?’ ningachari. Chashna nijpica: ‘Canta sirvij hititacunapuramanta Uriaspishmi huañurca’ ningui” nircami.
22 Chaimi huillajca chaimanta rishpa, Joab tucui imata huillachun mandashcata Davidman parlarca.
23 Qꞌuipaca huillajca Davidmanca cashnami nirca: “Chai runacunaca ñucanchijtapish yalli ashtahuan sinchi macanacujcunami carca. Shinallataj ñucanchijpaj contrami campopi macanacunaman llujshircacuna. Pero ñucanchijca paicunataca chai llajta pungu yaicuncamami tigrachishpa cacharcanchij.
24 Chashna cajpipish flechacunata shitajcunamari pirca jahuamanta canta sirvijcunata flechacunahuan shitarcacuna. Chaimi reypaj sirvijcunamanta huaquincunaca huañurcacuna. Canta sirvij hititacunapuramanta Uriaspishmi huañurca” nircami.
25 Chaita uyashpami Davidca huillajmanca: “Joabmanca: ‘Chashna pasashcamanta ama yallitaj sustarichu. Macanacuipica pipish huañui tucunmi. Ashtahuanpish chai llajtapaj contra sinchita macanacushpa chai llajtata mishashpa japi’ ningui. Joabtapish animangui” nishpa mandarca.
26 Uriaspaj huarmica Urías huañushcatami yachaj chayarca. Chaimantami paipaj cusamanta llaquilla carca.
27 Llaquilla cana punllacuna tucurijpimi Davidca chai huarmitaca paipaj huasiman pushanaman cacharca. Chai huarmica Davidpaj huarmi tucushpami shuj churita curca. Pero David rurashcacunaca Jehová Diospajca mana alli ricurircachu.
Notacuna
^ O “palacio”.
^ Caipica quilla ungüimanta chuyayaricushcamantami parlacuj yuyachin.
^ Hebreo rimaipica: “chaquicunata maillagri” ninmi.
^ Caica pai munashca invitadoman huasiyuj cachashca micunami cashca canga.
^ Caipica maquihuan cutana huahua rumimantami parlacun.
