2 Reyes 17:1-41
-
Hoseaca Israel llajtata mandajmi carca (1-4)
-
Israelitacunata mishashcamanta (5, 6)
-
Israelitacunataca rurashcalla dioscunata adorashcamantami prezu shina aparca (7-23)
-
Samaria llajtamanmi shujtaj llajtamanta cajcunata cachan (24-26)
-
Samaritanocuna rurashcalla dioscunahuan Diosta adorashcamanta (27-41)
17 Judamanta rey Acaz 12 huatacunata mandacujpimi Elapaj churi Hoseaca Samariapi israelitacunapaj rey tucurca. Hoseaca iscun huatacunatami mandarca.
2 Paica Jehová Diospaj ñaupajpica mana allicunatami ruraj carca. Shinapish Hoseaca paipaj ñaupa Israel llajtamanta reycuna shinaca mana allicunataca mana tanto rurarcachu.
3 Asiria llajtamanta rey Salmanasarca paihuan macanacunaman llujshijpimi Hoseaca paita sirvi callarirca. Paica tributotapishmi pagai callarirca.
4 Shinapish Asiriamanta reyca Hosea paipaj contra jatarishpa Egipto llajta reyman huillajcunata cachashcatami yachaj chayarca. Shinallataj Hoseaca ñaupa huatacuna shinami tributocunata paganatapish saquishca carca. Chaimantami Asiriamanta reyca paita japishpa prezupi churashpa chaipi huatashpa saquirca.
5 Asiriamanta reyca Israel llajtapaj contra macanacungapajmi shamurca. Samariaman chayashpaca chai llajta muyundijta shayarishpami quimsa huatacunata chaipi saquirirca.
6 Hosea iscun huatacunata mandacujpimi Asiria llajtamanta reyca paita mishashpa Samariata japirca. Chashnami Israel llajtapi causajcunataca Asiriaman prezu shina aparca.* Shinallataj paicunataca Halá llajtapi causachunmi churarca. Gozán jatun yacu cꞌuchupi caj Habor llajtapi causachunpishmi saquirca. Shinallataj Media llajtacunapi tiyaj llajtacunapipish causachunmi saquirca.
7 Israel llajtapi causaj gentecunaca paicunapaj Jehová Diospaj ñaupajpi juchacunata rurashcamantami chashna tucurca. Diosmi paicunataca Egipto allpacunamanta, rey faraonpaj maquimantapish cacharichishca carca. Israelitacunaca shujtaj dioscunatami adorarcacuna.*
8 Shinallataj paicunaca israelitacunapaj ñaupajmanta Jehová Dios llujshichishpa cachashca shujtaj llajta gentecuna shinami millanana ruraicunata rurashpa catircacuna. Israel llajtamanta reycuna churashca costumbrecunatapishmi catircacuna.
9 Israelitacunaca paicunapaj Jehová Dios millanayachishca cosascunatami mashcashpa catircacuna. Tucui paicunapaj llajtacunapi, chapana torrecunapi, muyundijta pircashca llajtacunapipishmi* adorana lugarcunata* rurarcacuna.
10 Shinallataj adorana pilarcunata, adorana postecunatami jatun lomacunapi, tucui pꞌangasapa yuracuna ucupi rurajcuna carca.
11 Paicunapaj ñaupajmanta Jehová Dios llujshichishpa cachashca shujtaj llajta gentecuna shinami tucui adorana lugarcunapica sacrificiocunata rupachishpa cushnichijcuna carca. Chashnami Jehová Diosta pꞌiñachingapaj millanana cosascunata rurajcuna carca.
12 Paicunaca millanana* rurashcalla dioscunatami sirvijcuna carca. Jehová Diosca paicunataca “¡Chaicunata amataj adoranguichij!” nishcami carca.
13 Jehová Diosca Israelpi cajcunamanpish, Judapi cajcunamanpish paipaj tucui profetacunahuan, muscuipi shina ricushcata huillajcunahuanmi advirtirca. Paica: “¡Cancunapaj mana alli ñanta saquishpa ñucapajman tigraichij! Cancunapaj ñaupa yayacunaman cushca leypi quillcashcacunata, ñuca mandashcacunata, ñuca leycunata cazuichij. Cai tucui leycunataca ñucata sirvij profetacunamanmi cacharcani” nircami.
14 Shinapish paicunaca mana cazurcacunachu. Paicunapaj ñaupa yayacuna shinallatajmi rumi shungu tucurcacuna. Paicunaca Jehová Diospi feta charishcataca mana ricuchircacunachu.
15 Paicunaca mandashcacunatapish, paicunapaj ñaupa yayacunahuan ari ninacushcatapish, advirtishpa paicunaman yuyachishcatapish mana cazushpami catircacuna. Mana vali rurashcalla dioscunata adoranatapish mana saquircacunachu. Paicunapish mana valimi tucurcacuna. Chashnami paicunaca muyundijpi caj shujtaj llajtacuna shina rurarcacuna. Jehová Dios shujtaj llajtacuna shina ama ruranguichij nishpa mandashcatami mana cazurcacuna.
16 Jehová Dios tucui mandashcacunatapishmi ladoman saquircacuna. Fierrota yacuyachishpami biziman rijchaj ishqui fierro dioscunata rurarcacuna. Shuj adorana postetapishmi rurarcacuna. Shinallataj intipaj, lunapaj, estrellacunapaj* ñaupajpimi cumurircacuna. Baal diostapishmi sirvircacuna.
17 Ashtahuanpish paicunapaj churicunata, ushushicunatapish ninapimi rupachircacuna. Paicunaca adivinajcuna, shamuj punllacunapi ima tucuna cashcata ricujcunapishmi tucurcacuna. Chashnami Jehová Diospaj ñaupajpi mana allicunata rurashpa Diosta pꞌiñachircacuna.
18 Jehová Diosca israelitacunahuanca yallitajmi pꞌiñarirca. Chashnami Diosca paipaj ñaupajmanta paicunata anchuchirca. Paicunamanta shujllatapish chai allpapi saquirichunca mana saquircachu. Judapaj familiallatami saquirca.
19 Judapi causajcunapish Jehová Diospaj mandashcacunataca mana cazurcacunachu. Ashtahuanpish Israelpi rurashca costumbrecunallatatajmi paicunapish rurashpa catircacuna.
20 Jehová Diosca Israelpaj tucui huahua huahuacunatami mana chasquirca. Paicunataca humillashpami shuhuacunapaj maquipi entregarca. Chashnami paicunataca chai llajtamanta llujshichishpa cacharca.
21 Diosca Davidpaj familiamantami Israeltaca anchuchirca. Paicunaca Nebatpaj churi Jeroboantami reyta rurarcacuna. Pero Jeroboanca Israeltaca Jehová Diosmantami caruyachirca. Jatun juchacunapipishmi urmachirca.
22 Israelitacunaca Jeroboán juchacunata rurashca shinallatajmi juchacunata rurajcuna carca. Paicunaca chai juchacunamantaca manataj caruyarcacunachu.
23 Chai juchacunamanta paicuna mana caruyashcamantami Jehová Diosca paita sirvij tucui profetacunaman huillashca shina israelitacunataca paipaj ñaupajmanta llujshichirca. Chashnami israelitacunaca paicunapaj llajtamanta Asiriaman prezu shina apashcacuna carca. Paicunaca cunancamami chaipi causacuncuna.
24 Asiria llajtamanta reyca Babilonia, Cutá, Avá, Hamat, Sefarvaim llajtacunamanta gentecunata apamushpami israelitacunapaj randi Samaria llajtapi tiyaj llajtacunapi causachun churarca. Chashnami paicunaca Samaria llajtata dueñoyashpa chai llajtacunapi causarcacuna.
25 Paicuna Samariapi causanaman shamushpaca Jehová Diosta mana adorarcacunachu. Chaimantami Jehová Diosca leoncunata cachashpa chai leoncunahuan huaquin gentecunata huañuchirca.
26 Chaimi Asiriamanta reymanca: “Can cachashca llajtacunata Samaria llajtapi tiyaj llajtacunapi causachun churashcacunaca chai llajtapi tiyaj Diosta ima shina adoranataca mana yachancunachu. Chai llajtapaj Diosta ima shina adoranata ni pi mana yachashcamantami Diosca gentecunata huañuchingapaj leoncunata cachacun” nishpa huillachun cacharcacuna.
27 Caita uyashpami Asiriamanta reyca: “Prezu shina apashca sacerdotecunamantaca shujta chaipi cutin causachun cachaichij. Chashnami chai sacerdoteca chai llajtapi tiyaj Diosta ima shina adoranata gentecunaman yachachinga” nishpa mandarca.
28 Chaimi Samaria llajtamanta prezu shina apashca shuj sacerdoteca Betelpi causangapaj tigramurca. Paimi Jehová Diosta ima shina adoranata yachachi callarirca.
29 Shinapish cada llajtamanta shamujcunaca paicunapaj propio dioscunatami rurarcacuna. Chashna rurashpami paicunaca samaritanocuna adorana lugarcunapi templocunata shayachishcapi paicunapaj dioscunata churarcacuna. Cada llajtamanta shamuj gentecunami paicuna causaj llajtapica chashna rurarcacuna.
30 Babiloniamanta caj runacunaca Sucot-Benot diosta, Cut llajtamanta caj runacunaca Nergal diostami rurarcacuna. Hamat llajtamanta cajcunaca Asimá diostami rurarcacuna.
31 Avá llajtamanta causajcunaca Nibhaz, Tartac dioscunatami rurarcacuna. Sefarvaimmanta cajcunaca paicunapaj churicunatami Adramélec, Anamélec dioscunaman rupachishpa curcacuna. Chai dioscunaca Sefarvaim llajtamanta dioscunami carca.
32 Shujtaj llajtamanta causanaman shamujcunaca Jehová Diosta adorashpapish, chai llajtamanta huaquin runacunatami adorana lugarcunapi sacerdotecuna cachun agllarcacuna. Chai agllashca runacunami adorana lugarcunapica templocunapi sirvijcuna carca.
33 Chashnami paicunaca Jehová Diosta adorashpapish paicunapaj dioscunata adorarcacuna. Chaitaca paicunapaj propio llajtacunapi dioscunata ima shinami adorajcuna carca, chashnallatajmi adorarcacuna.
34 Shujtaj llajtamanta causanaman shamujcunaca cunancamami paicunapaj religioncunapaj ruraicunata caticuncuna. Paicunamantaca ni maijanpish Jehová Diostaca mana adorancunachu. Shinallataj Dios cushca leycunatapish, imallata rurachun nishcacunatapish mana pajtachincunachu. Jehová Dios Jacobpaj huahuacunaman Leyta, mandamientota cushcatapish mana pajtachincunachu. Diosmi Jacobtaca paipaj shutita cambiashpa Israel shutita churarca.
35 Jehová Diosca israelitacunahuan shuj ari ninacuita rurashpaca cashna nishpami mandarca: “Shujtaj dioscunata amataj adoranguichij. Paicunapaj ñaupajpipish amataj cunguringuichij. Paicunataca amataj sirvinguichij. Paicunapajpish ni ima sacrificiota amataj ruranguichij.
36 Ñuca, cancunapaj Jehová Diosmi Egipto llajtamanta ñuca jatun poderhuan, ñuca poderyuj rigrahuan cancunataca llujshichircani. Ñucallatami cancunaca adorana canguichij. Ñuca ñaupajllapimi cungurina canguichij. Ñucallamanmi sacrifiocunatapish cuna canguichij.
37 Shinallataj mandashcacunatapish, imallata rurachun nishcacunatapish, Leytapish, mandamientotapish alli ricurashpa pajtachinguichij. Chaicunataca cancunapajmi ñucaca quillcachircani. Shujtaj dioscunatapish ama adoranguichij.
38 Ñuca cancunahuan ari ninacushcatapish ama cungaringuichij, shujtaj dioscunatapish ama adoranguichij.
39 Ashtahuanpish cancunapaj Jehová Diosllatami adorana canguichij. Ñucami cancunata tucui contracunapaj maquimantaca quishpichisha” nircami.
40 Shinapish cai llajtacunaca mana cazushpami paicunapaj ñaupa religionpaj ruraicunata rurashpa catircacuna.
41 Cai llajtacunaca Jehová Diosta adorashpapish rurashcalla dioscunatami sirvishpa catircacuna. Shinallataj paicunapaj churicunapish, paicunapaj nietocunapish paicunapaj ñaupa yayacuna rurashca shinallatajmi cunan punllacama rurashpa causancuna.
Notacuna
^ “Prezu shina apana” shimita huasha diccionariopi ricui.
^ Hebreo rimaipica: “mancharcacuna” ninmi. Cai versopipish, catij versocunapipish manchanamantami parlacun.
^ Caipica achca gentecuna o ashalla gentecuna causashca tucui lugarcunamantami parlacun.
^ Hebreo rimaipica: “alto lugarcunata” ninmi.
^ Hebreo rimaipica millanana shimica ismamanta parlacuj shinami yuyachin. Cai shimica yallitaj millanayachishcata ricuchingapajmi can.
^ Hebreo rimaipica: “jahua pacha tucui soldadocunapaj” ninmi.
