2 Reyes 14:1-29
14 Israel llajtamanta rey Jehoacazpaj churi Jehoás ishqui huatacunata mandacujpimi Judá llajtamanta rey Jehoaspaj churi Amasiasca mandai callarirca.
2 Amasiasca 25 huatacunata charishpami mandai callarirca. Paica 29 huatacunatami Jerusalenpi mandarca. Paipaj mamaca Jerusalenmanta Jehoadín shuti huarmimi carca.
3 Paica Jehová Diospaj ñaupajpica allicunatami ruraj carca. Pero paipaj ñaupa yaya David shinaca mana rurarcachu. Amasiasca paipaj yaya Jehoás rurashca shinami tucuita chashnallataj rurarca.
4 Shinapish Amasiasca adorana lugarcunataca* mana anchuchircachu. Chaimantami gentecunaca chaicunapi sacrificiocunata ruranatapish, sacrificiota rupachishpa cushnichinatapish mana saquircacuna.
5 Amasiasca ña tucuita mandai callarishpaca paita sirvijcunatami huañuchirca. Cai sirvijcunaca paipaj yaya reytami huañuchishca carcacuna.
6 Pero Amasiasca Jehová Dios Moisesman cushca leyta quillcashca libropi mandashca shinami huañuchijcunapaj churicunataca mana huañuchirca. Chaipica: “Yayacunataca churicunapaj culpamantaca mana huañuchinachu can. Churicunatapish yayacunapaj culpamantaca mana huañuchinachu can. Ashtahuanpish cada unomi paicunapaj juchacunamantaca huañuna can” nircami.
7 Amasiasca Cachi pugru pambapimi 10.000 edomita cꞌaricunata tucuchirca. Chai macanacuipica Sela llajtatami mishashpa japirca. Chai llajtaca cunan punllacamami Jocteel shuti can.
8 Chai qꞌuipami Amasiasca Israelmanta rey Jehoasman huillajcunata cachashpaca: “Ñucahuan macanacunaman* shamui” nirca. Jehoasca Jehoacazpaj churimi can. Jehoacazca Jehupaj churimi can.
9 Israelmanta rey Jehoasca Judá llajtamanta rey Amasiasman caita nichunmi mandarca: “Líbano urcucunapi tiyaj casha mana alli qꞌuihuaca, Líbano urcucunapi tiyaj cedro yuramanca: ‘Cambaj ushushita ñuca churipaj huarmi cachun cui’ nichunmi cacharca. Pero Líbano urcucunamanta shuj sacha animal shamushpami casha mana alli qꞌuihuataca sarurca.
10 Canca Edomta mishashcamantami cambaj shungupica jatun tucushcangui. Can jatun tucushcamanta cushicushpa cambaj huasipi* saquiri. ¿Canca imamantataj shuj llaquita callarichishpa Judá llajtatapish canhuan llaquipi urmachisha ninguiyari?” nircami.
11 Pero Amasiasca chashna nishcataca mana cazurcachu.
Chaimi Israelmanta rey Jehoasca paipajman huichiyarca. Rey Jehoasca Judá llajtamanta rey Amasiashuanmi Bet-Semes llajtapi macanacurcacuna. Bet-Semes llajtaca Judapimi saquirirca.
12 Israel runacunaca Judá runacunatami misharca. Chaimi Judamanta caj soldadocunaca cada uno paicunapaj huasiman* tigrarcacuna.
13 Israelmanta rey Jehoasca Bet-Semes llajtapimi Judamanta rey Amasiastaca prezu japirca. Amasiasca Jehoaspaj churimi carca. Jehoasca Ocoziaspaj churimi carca. Qꞌuipaca paicunami Jerusalenman shamurcacuna. Chaipimi Jehoasca Jerusalenpi tiyaj shuj parte pircata urmachirca. Paica Efraín Pungu nishcamanta Esquina Pungu nishcacamami urmachirca. Urmachishca pircaca 178 metrocunatami* charirca.
14 Shinallataj Jehová Diospaj huasimantapish, reypaj huasipi tiyaj achca valij cosascunata huaquichina cuartocunamantapishmi orota, cullquita, tucui cosascunata apashpa rirca. Gentecunatapishmi prezu aparca. Chai qꞌuipaca Samaria llajtamanmi tigrarca.
15 Jehoaspaj causaipish, pai imalla rurashcapish, paipaj poderpish, Judá llajtamanta rey Amasiaspaj contra macanacushcapish Israel llajtamanta reycunapaj causaimanta parlaj libropimi quillcashca tiyacun.
16 Jehoasca huañurcami.* Paitaca Israel llajtamanta reycunahuanmi Samariapi pambarcacuna. Chai qꞌuipaca paipaj churi Jeroboanmi* catij rey tucurca.
17 Israelmanta rey Jehoacazpaj churi Jehoás huañushca qꞌuipami Judamanta rey Jehoaspaj churi Amasiasca 15 huatacunahuan causashpa catirca.
18 Amasiaspaj causaica Judá llajtamanta reycunapaj causaimanta parlaj libropimi quillcashca tiyacun.
19 Qꞌuipamanca Jerusalenpimi paipaj contra jatarircacuna. Chaimi Amasiasca Lakís llajtaman miticushpa rirca. Pero paitaca Lakís llajtaman catishpa richunmi huaquin cꞌaricunata cacharcacuna. Chai llajtapimi paitaca huañuchircacuna.
20 Qꞌuipaca paitaca caballopi apashpami Jerusalenpi paipaj ñaupa yayacunahuan, Davidpaj Llajtapi pambarcacuna.
21 Judá llajtapi tucui causajcunaca Azariastami* rey cachun churarcacuna. Paica 16 huatacunatami charirca. Azariasca paipaj yaya Amasiaspaj randimi mandai callarirca.
22 Rey Azariasca Elat lugarta cutin shayachishpami Judaman tigrachirca. Chaitaca paipaj yaya Amasías huañushca qꞌuipami chashna rurarca.
23 Judamanta rey Jehoaspaj churi Amasías 15 huatacunata mandacujpimi, Israelmanta rey Jehoaspaj churi Jeroboanca Samaria llajtapi mandai callarirca. Jeroboanca 41 huatacunatami mandarca.
24 Paica Jehová Diospaj ñaupajpica mana allicunatami ruraj carca. Shinallataj Nebatpaj churi Jeroboán juchacunata rurashpa, israelitacunatapish juchacunapi urmachishca shinallatajmi rurashpa catirca.
25 Jeroboanca Israel llajta linderocunataca Lebó-Hamatmanta* Arabá* pugru pambapi tiyaj mama cuchacamami cutin shayachirca. Chaitaca israelitacunapaj Jehová Dios paita sirvij Amitaipaj churi Jonasman huillachishca shinami rurarca. Jonasca Gat-Héfer llajtamanta profetami carca.
26 Jehová Diosca Israel llajtapi gentecuna yallitaj sufricujtami ricurca. Israelpica paicunata ayudajca ni pi mana tiyarcachu. Mana difindiri tucujcunallapish, debilcunallapish ña mana tiyarcachu.
27 Jehová Diosca Israelpaj shutitaca allpamanta mana anchuchina cashcatami ari nishca carca. Chaimantami Jehoaspaj churi Jeroboanhuan paicunataca quishpichirca.
28 Jeroboanpaj causaipish, pai tucui imalla rurashcapish, paipaj poderpish, pai ima shina macanacushcapish, Damasco llajtata, Hamat llajtata Israel llajtapi Judaman tigrachishcapish Israel llajtamanta reycunapaj causaimanta parlaj libropimi quillcashca tiyacun.
29 Jeroboanca huañurcami.* Israel llajtamanta reycunahuanmi paitaca pambarcacuna. Qꞌuipaca paipaj churi Zacariasmi catij rey tucurca.
Notacuna
^ Hebreo rimaipica: “alto lugarcunataca” ninmi.
^ O “ñahui ñahui tupanacunaman”.
^ O “palaciopi”.
^ Hebreo rimaipica: “paicunapaj carpa huasiman” ninmi.
^ Hebreo rimaipica: “400 codos” ninmi. Ayuda B14-ta ricui.
^ O “paipaj ñaupa yayacunahuanmi samarirca”.
^ Caipica Jeroboán II mandajmantami parlacun.
^ “Azarías” shutica ‘Jehovami ayudashca’ nisha ninmi. Azariastaca 2Re 15:13; 2Cr 26:1-23; Is 6:1, y Zac 14:5 versocunapica Uzías ninmi.
^ O “Hamat yaicunmanta”.
^ Caipica mar Salado o mar Muertomantami parlacun.
^ O “paipaj ñaupa yayacunahuanmi samarirca”.
