2 Reyes 11:1-21
11 Ocoziaspaj mama Ataliaca paipaj churi huañushcatami ricurca. Chaimi Ataliaca reycunapaj tucui huahua huahuacunata tucuchirca.
2 Rey Jehorampaj ushushi Jehoseba huarmica Ocoziaspaj panimi carca. Reypaj churicunata huañuchigrijpimi Jehoseba huarmica Ocoziaspaj churi Jehoastaca miticuchishpa aparca. Jehoseba huarmica Jehoastaca paipaj huiñachij mamahuanmi shuj cuartopi churarca. Chashnami Ataliamanta pacashpa Jehoasta huañuchichunca mana saquirca.
3 Atalía Judá llajtata mandacujpimi Jehoasca paipaj huiñachij mamahuan Jehová Diospaj huasipi sujta* huatacunata pacalla saquirirca.
4 Séptimo huatapimi Jehoiadá runaca reypaj guardiacunata* pushajcunata, palaciopi tiyaj guardiacunata* pushajcunatapish mashcanaman cacharca. Cai pushajcunaca 100 soldadocunata pushajcunami carca. Paicunahuanmi Jehoiadaca Jehová Diospaj huasipi tandanacurcacuna. Chashnami Jehová Diospaj huasipi paicunahuan shuj ari ninacuita* rurarca. Chai ari nishcata pajtachichunmi paicunataca jurachirca. Chai qꞌuipami reypaj churi Ocoziasta paicunaman ricuchirca.
5 Jehoiadaca paicunataca: “Caitami cancunaca rurana canguichij: quimsapi chaupishca shuj parte soldadocunaca sábado punllapimi sirvina canguichij. Shinallataj reypaj huasitapish* allimi cuidana canguichij.
6 Cutin quimsapi chaupishca shujtaj parteca Fundamento Pungu nishcapimi cana canguichij. Cutin quimsapi chaupishca caishuj parteca palaciopi tiyaj guardiacunapaj pungu huashapimi cana canguichij. Chai huasitaca turnopimi cuidana canguichij.
7 Cancunamanta ishqui grupocuna sábado punllapi mana sirvicujcunaca Jehová Diospaj huasitami alli ricurana canguichij. Chashnami reytaca cuidai tucunguichij.
8 Reypaj tucui ladocunataca cada uno cancunapaj maquicunapi macanacunacunahuan muyundijta shayaringuichij. Maijanpish soldadocunapaj chaupiman yaicujca huañunatajmi can. Rey maiman rijpipish* paihuanmi cana canguichij” nircami.
9 100 soldadocunata pushajcunaca sacerdote Jehoiadá mandashca shinami tucuita rurarcacuna. Cada grupota pushajcunami sábado punllapi sirvijcunatapish, mana sábado punllapi sirvijcunatapish tandachircacuna. Chashnami paicunaca sacerdote Jehoiadá maipi cashcaman yaicurcacuna.
10 Sacerdote Jehoiadaca 100 soldadocunata pushajcunamanca Jehová Diospaj huasipi tiyacuj lanzacunata, redondo escudocunatami curca. Caicunaca rey Davidpajmi cashca carca.
11 Palaciopi tiyaj guardiacunaca huasi alli ladomantaca huasi lluqui ladocamami shayarircacuna. Paicunaca cada unomi paicunapaj maquipi macanacunacunata charicurcacuna. Chashnami paicunaca altar cꞌuchupi, huasi cꞌuchupi reypaj muyundijpi carcacuna.
12 Chaipimi Jehoiadaca reypaj churita llujshichishpa coronatapish, Diospaj leyta quillcashcatapish paipaj uma jahuapi churarca. Chashnami paitaca agllashpa reyta rurarcacuna. Shinallataj maquicunapi huajtarishpami: “¡Viva rey!” nircacuna.
13 Atalía huarmica gentecuna callpacujtami uyarca. Chaita uyashpami chai rato Jehová Diospaj huasipi caj gentecunapajman rirca.
14 Chaipimi Ataliaca huasi pungupi caj columna cꞌuchupi rey ima shinami shayarij carca, chashnallataj rey chaipi shayacujta ricurca. Pushajcunapish, trompetapi tocajcunapish reyhuanmi carcacuna. Tucui chai llajtamanta gentecunapish yallitaj cushicushpa trompetacunapimi tocacurcacuna. Chai ratomi Ataliaca paipaj churanata lliquirishpa: “¡Contramari jatarishca! ¡Contramari jatarishca!” nishpa caparirca.
15 Shinapish sacerdote Jehoiadaca 100 soldadocunata mandajcunataca: “¡Ataliataca soldadocunapuramanta llujshichichij. Paita pi catijtapish espadahuan huañuchinguichij!” nircami. Shinallataj sacerdote Jehoiadaca “Paitaca Jehová Diospaj huasipica ama huañuchinguichij” nishcami carca.
16 Chaimi paicunaca Ataliataca japircacuna. Reypaj huasiman caballocuna yaicuna lugarman chayashpami Ataliataca huañuchircacuna.
17 Qꞌuipaca Jehoiadaca Jehová Dioshuanpish, reyhuanpish, chaipi caj gentecunahuanpishmi Jehová Diospaj pueblo shina catingapaj shuj ari ninacuita rurarcacuna. Shinallataj reyhuan, chai llajtapi causaj gentecunahuanpishmi shuj ari ninacuita rurarcacuna.
18 Chai huashaca chai llajtapi caj tucui gentecunaca Baal diospaj huasimanmi rircacuna. Chaipica chai diospaj altarcunatami urmachircacuna. Rurashcalla dioscunatapish tucuimi ñutuchircacuna. Shinallataj Baalpaj sacerdote Matán runatapish chai altar ñaupajpimi huañuchircacuna.
Qꞌuipaca sacerdote Jehoiadaca Jehová Diospaj huasita ricujcunatami nombrarca.
19 Shinallataj 100 soldadocunata pushajcunata, reypaj guardiacunata, palaciopi tiyaj guardiacunata, chai llajtapi caj tucui gentecunatami reyta compañachun tandachirca. Paicunami reyhuanca Jehová Diospaj huasiman uriyarcacuna. Reypaj huasimanca palaciopi tiyaj guardiacuna yaicuna punguta pasashpami chayarcacuna. Chaipimi reyca reycunapaj jatun tiyarinapi tiyarirca.
20 Tucui chai llajtapi causaj gentecunaca yallitajmi cushicurcacuna. Atalía huarmita reypaj huasi cꞌuchupi espadahuan huañuchishcamantami chai llajtapica tranquilo causai tiyarca.
21 Jehoasca canchis huatacunata charishpami rey tucurca.
Notacuna
^ O “seis”.
^ Hebreo rimaipica: “caria guardiacunata” ninmi.
^ Hebreo rimaipica: “callapajcunata” ninmi.
^ O “pactota”.
^ O “palaciotapish”.
^ Hebreo rimaipica: “yaicujpipish, llujshijpipish” ninmi.
