2 Crónicas 26:1-23
26 Judá llajtapi tucui causajcunaca Uziastami rey cachun churarcacuna. Paica 16 huatacunatami charirca. Paica paipaj yaya Amasiaspaj randimi mandai callarirca.
2 Rey Uziasca Elot lugarta cutin shayachishpami Judaman tigrachirca. Chaitaca paipaj yaya Amasías huañushca* qꞌuipami chashna rurarca.
3 Uziasca 16 huatacunata charishpami mandai callarirca. Paica 52 huatacunatami Jerusalenpi mandarca. Paipaj mamaca Jerusalenmanta Jecolías shutimi carca.
4 Uziasca paipaj yaya Amasías rurashca shinami Jehová Diospaj ñaupajpica allita ruraj carca.
5 Uziasca Zacarías causacui punllacunapimi Diosta mashcarca. Zacariasmi Diosta manchachun Uziasmanca yachachirca. Uzías Jehová Diosta mashcashpa catijpica Diosca paitami bendiciarca.
6 Uziasca filisteocunahuan macanacunaman rishpaca Gad llajtapaj, Jabné llajtapaj, Asdod llajtapaj pircacunatami jutcushpa pasarca. Chai qꞌuipaca Asdod allpapi, filisteocunapaj allpapimi llajtacunata shayachirca.
7 Uzías filisteocunahuan, Gurbaal lugarpi causaj arabecunahuan, meunimcunahuan macanacuchunmi Diosca ayudashpa catirca.
8 Ammonitacunaca Uziasmanmi tributota pagai callarircacuna. Paica achca poderyujmi tucurca. Chaimantami Uziasca Egiptocama rijsishca tucurca.
9 Shinallataj Uziasca Jerusalenpica Esquina Pungu nishca cꞌuchupi, Pugru pamba Pungu nishca cꞌuchupi, Pircacunata jarcaj Pilar nishca cꞌuchupimi torrecunata shayachishpa sinchiyachirca.
10 Chaquishca pambapipish torrecunatami shayachirca. Shinallataj yacuta tandangapajmi achca jutcucunata allarca.* (Paica achca huagracunata, ovejacunatami charirca). Sefelapipish, pugru pambapipish chashnallatajmi rurarca. Uziasca chagrapi trabajajcunata, uva chagrata cuidajcunatami urcucunapi, Carmelo lugarpipish charirca. Paica chagracunapi trabajanatami munaj carca.
11 Shinallataj Uziasca macanacungapajmi allichirishca soldadocunata charirca. Paicunaca macanacunamanca grupocunapimi llujshijcuna carca. Paicunataca secretario Jeiel, pushaj Maaseyami yupashpa registrarcacuna. Hananiasmi Maaseyataca mandaj carca. Hananiasca rey churashca shuj mandajmi carca.
12 Yayacunapaj familiacunata pushajcunaca tucuica 2.600-mi carcacuna. Paicunami sinchi macanacuj runacunata mandajcuna carca.
13 Shinallataj paicunaca 307.500 macanacunapaj allichirishca cꞌaricunatami mandajcuna carca. Cai sinchi macanacuj runacunaca reypaj contra shamuj enemigocunahuan macanacushpami reyta ayudajcuna carca.
14 Uziasca macanacuj cꞌaricunataca escudocunahuan, lanzacunahuan, cascocunahuan, pechopi fierro churanacunahuan, arcocunahuan, rumicunata shitana huaracahuan macanacuchunmi allichirca.
15 Shinallataj Jerusalenpica alli ruranata yachaj runacunamanmi macanacungapaj maquinacunata rurachun mandarca. Chashna rurachishpaca torrecunapi, pirca esquinacunapimi churarca. Shinallataj chai maquinacunaca flechacunata, jatun rumicunatapishmi shitaj carca. Chashnami Uziasca tucui ladocunapi rijsishca tucurca. Paica yallitaj achca ayudacunatami chasquirca. Dios paita ayudajpimi sinchi tucurca.
16 Shinapish Uziasca sinchi tucushpami paipaj shungupica jatun tucurca. Chashnami paillataj llaquipi urmarca. Uziasca Jehová Diospaj huasiman yaicushpami inciensota rupachina altar jahuapi inciensota rupachinaman yaicurca. Chashnami paica paipaj Jehová Diospaj ñaupajpi juchata rurarca.
17 Sacerdote Azariaspish, Jehová Diospaj 80 shujtaj mana manchaj sacerdotecunapishmi utca Uziasta catishpa yaicurcacuna.
18 Paicunaca rey Uziasta jarcashpami: “¡Uzías, canca Jehová Diospaj inciensotaca mana rupachinachu cangui! Inciensotaca sacerdotecunallami rupachina can. Aaronpaj huahua huahuacunamanta chuyayachishca sacerdotecunallami inciensotaca rupachina can. Canca juchatami rurashcangui, Diospajlla chꞌicanyachishca ucumanta llujshi. Can caita rurashcamantaca Jehová Diosca cantaca mana jatunyachingachu” nircacuna.
19 Pero Uziasca paipaj maquipica inciensota rupachingapaj shuj inciensota rupachinata* charicushpami yallitaj pꞌiñarirca. Sacerdotepaj contra pai pꞌiñarishca cajpimi ñapish paipaj frentepi lepra ungüi llujshirca. Paica sacerdotecunapaj ñaupajpi Jehová Diospaj huasipi caj inciensota rupachina altar ladopimi carca.
20 Sacerdotecunata mandaj* Azariaspish, tucui chaipi caj sacerdotecunapish, ¡Uziaspaj frentepi lepra llujshishcatami ricurcacuna! Chaimantami paitaca rato chaimanta llujshichircacuna. Uziaspish Jehová Dios paita castigashcata yachashpami chaimanta chai rato llujshirca.
21 Rey Uziasca pai huañuna punllacamami lepra ungüihuan causarca. Shinallataj paitaca Jehová Diospaj huasiman yaicuchunca mana saquircacunachu. Uziasca lepra ungüimantami chꞌicanyachishca huasipi causarca. Reypaj huasipica* paipaj churi Jotanmi mandacurca. Paimi chai llajtapi causaj gentecunataca juzgaj carca.
22 Uziaspaj causaimantaca callarimanta tucuringacamami Amozpaj churi profeta Isaías registrarca.
23 Uziasca huañurcami. “Paica lepra ungüitami charin” nishpami paipaj ñaupa yayacunahuan, reycunapaj pambana allpapi Uziastaca pambarcacuna. Qꞌuipaca paipaj churi Jotanmi catij rey tucurca.
Notacuna
^ O “paipaj ñaupa yayacunahuan samarishca”.
^ O “labrarca”. Chaitaca rumipimi rurashca canga.
^ “Braserillo” shimita huasha diccionariopi ricui.
^ “Sacerdotecunata mandaj” shimita huasha diccionariopi ricui.
^ O “palaciopica”.
