2 Crónicas 19:1-11
19 Chashnami Judá llajtamanta rey Jehosafatca Jerusalenpi saquirij paipaj huasimanca* sano, tranquilo tigramurca.
2 Chaipimi muscuipi shina ricushcacunata huillaj Hananipaj churi Jehuca rey Jehosafatta tupanaman rirca. Paihuan tupashpaca cashnami nirca: “¿Mana allita rurajcunata ayudana, Jehová Diosta pꞌiñajcunata cꞌuyanaca alli cashcatachu yuyangui? Can chashna rurashcamantami Jehová Diosca canhuanca pꞌiñarishca can.
3 Shinapish canca adorana postecunatami cai llajtamanta anchuchishcangui. Diosta mashcangapajpish cambaj shungutami allichishcangui. Chashna rurashcamantami Diosca canpica alli cashcata ricushca” nircami.
4 Jehosafatca Jerusalenpimi causashpa catirca. Chaimantami cutinllataj Beer-Sebamanta Efraín urcucunacama gentecunata visitanaman rirca. Chashna rishpami paicunapaj ñaupa yayacunapaj Jehová Diosta cutin adorachun gentecunata animarca.
5 Shinallataj Judapi tiyaj muyundijta pircashca tucui llajtacunapimi juezcunata churarca.
6 Chai juezcunataca cashnami nirca: “Cancunallataj imata ruracushcatapish alli ricuichij. Cancunaca mana runacunapajchu juzgacunguichij. Ashtahuanpish Jehová Diospajmi juzgacunguichij. Cancuna juzgacujpica Diosca cancunahuanmi canga.
7 Cunanca Jehová Diosta manchaichij. Cancuna imata ruracushcamantapish cuidaringuichij. Jehová Diosca cashcata mana rurajcunata, ñahuillata ricushpa imatapish juzgajcunata, camaricunata japijcunataca manataj ricunachinchu” nircami.
8 Shinallataj Jerusalenpica Jehosafatca huaquin levitacunata, sacerdotecunata, Israelmanta yayacunapaj familiacunata pushajcunatami Jehová Diospaj juezcuna cachun, Jerusalenpi causajcunapajpish demandacunata allichichun agllarca.
9 Shinallataj cashna nishpami mandarca: “Jehová Diosta manchashpa, tucui shunguhuan paita cazushpami caita rurana canguichij:
10 caishuj llajtapi causaj huauquicuna shamushpa huañuchishcamanta, shuj leymanta, mandamientocunamanta, mandashcacunamanta, imallata rurachun nishcacunamanta demandanaman shamujpica, cancunaca Jehová Diospaj ñaupajpi ama culpayuj cachunmi paicunata advirtina canguichij. Mana chashna rurajpica paica cancunahuan, cancunapaj huauquicunahuanpishmi pꞌiñaringa. Cancunapish culpayuj ama cangapajca caitami rurana canguichij.
11 Sacerdotecunata mandaj Amariasca Jehová Diosta cancuna ima shina adorana cashcata yachachingapajmi encargado canga. Cutin Ismaelpaj churi Zebadiasca Judapaj familiamanta pushajmi canga. Paica reypaj tucui ruraicunapimi encargado canga. Shinallataj levitacunami cancunataca ayudangacuna. Cancunaca sinchi sinchi caichij, trabajai callarichij. Jehová Diosca allita rurajcunahuan cachun” nircami.
Notacuna
^ O “palaciomanca”.
