2 Crónicas 17:1-19
17 Chai qꞌuipaca Asapaj churi Jehosafatmi catij rey tucurca. Paipaj mandanaca Israel llajtapica sinchi tucushpami catirca.
2 Shinallataj Judapi tiyaj muyundijta pircashca llajtacunapimi soldadocunata churarca. Judá allpacunapipishmi grupo soldadocunata churarca. Paipaj yaya Asá macanacuipi mishashpa japishca Efrainpi tiyaj llajtacunapipishmi grupo soldadocunata churarca.
3 Jehosafatca paipaj ñaupa yaya David ñaupa tiempopi causashca shinallatajmi Diosta cazushpa catirca. Baal dioscunatapish mana sirvircachu. Chaimantami Jehová Diosca Jehosafathuan catirca.
4 Paica paipaj yayapaj Diostami mashcashpa catirca.* Israelitacunapaj ruraicunata catinapaj randica Diospaj mandashcacunatami catirca.
5 Jehová Diosca Jehosafatpaj mandana sinchi tucuchunmi ayudarca. Judapi causaj gentecunapish Jehosafatpajca achca regalocunatami apamushpa catircacuna. Chaimantami paica achcata charij tucurca. Gentecunapish paitaca achcatami respetarcacuna.
6 Paipaj shungupi mana manchaj cashcamantami Jehová Diosta cazurca. Shinallataj Judá llajtamantaca adorana lugarcunata,* adorana postecunatami anchuchirca.
7 Quimsa huatata Jehosafat mandacushpami Judá llajtapi tiyaj llajtacunapi yachachichun paipaj mandana ucupi caj pushaj Ben-Hail, Abdías, Zacarías, Netanel, Micayata pushanaman cacharca.
8 Paicunahuanca cai levitacunami carca: Semaya, Netanías, Zebadías, Asahel, Semiramot, Jehonatán, Adonías, Tobiya, Tob-Adoniasmi carca. Shinallataj paicunahuanca sacerdote Elisamá, Jehorammi carca.
9 Paicunaca Jehová Diospaj Leyta quillcashca librota apashpami Judá llajtapi yachachi callarircacuna. Judá llajtapi tiyaj tucui llajtacunaman rishpami gentecunamanca yachachircacuna.
10 Judá llajtapaj muyundijpi caj tucui llajtacunapaj mandajcunaca Jehová Diosmantami achca manchaita charircacuna. Chaimantami Jehosafatpaj contraca mana macanacurcacuna.
11 Filisteocunaca Jehosafatpajca regalocunata, cullquitami tributota* shina apamurcacuna. Shinallataj arabecunaca paicunapaj corralmantaca 7.700 carnerocunata, 7.700 cꞌari chivocunatami apamurcacuna.
12 Jehosafatca ashtahuanmi poderyuj tucushpa catirca. Judapica sinchi pircayuj lugarcunatami shayachishpa catirca. Shinallataj granocunata huaquichina llajtacunatapishmi shayachishpa catirca.
13 Judá llajtapi tiyaj llajtacunapica Jehosafatca jatun obracunatami rurarca. Jerusalenpipish soldadocunatami charirca. Chai soldadocunaca sinchi macanacujcunami carca.
14 Cai soldadocunaca yayacunapaj familiacunamanta grupocunapimi chaupishca carcacuna. Judapaj familiamantaca 1.000 gentecunata pushajcunami tiyarca. Pushaj Adná, paihuanca 300.000 sinchi macanacuj soldadocunami tiyarca.
15 Adná runaca paipaj mandana ucupica pushaj Jehohanán runatami charirca. Jehohananhuanca 280.000 soldadocunami carca.
16 Shinallataj Adná runaca paipaj mandana ucupica Zicripaj churi Amasíah runatapishmi charirca. Paica tucui shunguhuanmi Jehová Diosta sirvinata agllashca carca. Amasíah runahuanca 200.000 sinchi macanacuj soldadocunami carca.
17 Cutin benjaminitacunamantaca sinchi macanacuj Eliadami carca. Eliadá runahuanca arcocunata, escudocunata charij 200.000 runacunami carca.
18 Eliadaca paipaj mandana ucupica Jehozabad runatami charirca. Jehozabadhuanca 180.000 runacunami carca. Chai runacunaca macanacuipi sirvingapajmi allichirishca carcacuna.
19 Paicunami reyta sirvijcuna carca. Shinallataj tucui Judá llajtapi tiyaj muyundijta pircashca llajtacunapipishmi reyca paita sirvichun shujtajcunata churashca carca.
Notacuna
^ Hebreo rimaipica: “purirca” ninmi.
^ Hebreo rimaipica: “alto lugarcunata” ninmi.
^ “Tributo” shimita huasha diccionariopi ricui.
