1 Samuel 16:1-23
16 Tiempo qꞌuipaca Jehová Diosca Samueltaca: “¿Ima horacamataj Saulmantaca llaquilla cangui? ¿Manachu Israel llajtapi pai rey shina mandashpa catichun ña mana munashcataca cuentata cungui? Gachupi* aceiteta jundachishpa ñanta japishpa ri. Betlemitacunapuramanta Jesepajmanmi richun munani. Paipaj churicunamantami shujta rey cachun agllashcani” nircami.
2 Shinapish Samuelca: “¿Ima shinataj rishayari? Ñuca chaiman rishcata Saúl yachaj chayashpaca huañuchingamari” nircami. Chashna nijpimi Jehová Diosca cashna cutichirca: “Shuj vaquillata apashpa: ‘Jehová Diosman shuj sacrificiota cungapajmi shamuni’ ningui.
3 Chai sacrificiota ruranamanca Jesé runatapish invitai. Chaipimi ñucaca can imata rurana cashcata huillasha. Canca maijanta ñuca ricuchishcatami ñucapaj agllana cangui” nircami.
4 Samuelca Jehová Dios nishca shinami rurarca. Samuel Belén llajtaman chayajpica chai llajtata pushajcunaca* paita ricushpaca yallitaj mancharishpami chujchui callarircacuna. Chaimi paicunaca: “¿Canca tranquilo causaita mashcanamanchu shamungui?” nircacuna.
5 Samuelca: “Tranquilo causaita mashcanamanmi shamuni. Jehová Diosman shuj sacrificiota cungapajmi shamuni. Cancunapish chuyayarishpa ñucahuan sacrificiota cungapaj shamuichij” nishpami cutichirca. Jesetapish, paipaj churicunatapish chuyayachishca huashami sacrificiota cungapaj paicunatapish chaipi cachun invitarca.
6 Paicuna chayajpica Samuelca Eliabta ricushpami: “Paitatajmi Jehová Diosca agllashca”* nirca.
7 Pero Jehová Diosca Samuelmanca: “Pai ima shina cashcallata, alto cashcallataca ama ricuichu. Paitaca ñucaca mana agllashcanichu. Diosca gentecunataca runa ricushca shinaca mana ricunchu. Runaca paipaj ñahuipi ima ricushcallatami ricun. Pero Jehová Diosca shungupi ima tiyashcatami ricun” nircami.
8 Chai qꞌuipaca Jeseca paipaj churi Abinadabta cayashpami Samuelman rijsichirca. Pero Samuelca: “Paitapish Jehová Diosca mana agllashcachu” nircami.
9 Chai huashaca Jeseca paipaj churi Samatami Samuelman rijsichirca. Shinapish Samuelca: “Paitapish Jehová Diosca mana agllashcachu” nircami.
10 Chashnami Jeseca paipaj canchis churicunata Samuelman rijsichirca. Pero Samuelca Jesemanca: “Jehová Diosca paicunamantaca ni pita mana agllashcachu” nircami.
11 Qꞌuipaca Samuelca Jesetaca: “¿Tucui caicunachu cambaj churicuna can?” nishpami tapurca. Chashna tapujpimi Jeseca: “Mana, ashtahuan joven churimi faltanraj. Paica ovejacunatami michicun” nirca. Chaimi Samuelca Jesemanca: “Paita cayanaman cachai, ñucanchijca pai shamungacama micungapajca mana tiyarishunchu” nirca.
12 Chaimi Jeseca paita mashcanaman cacharca. Paita pushamujpica Davidca pucajlla ñahui, alaja joven, ñahui luluncunapish sumajmi carca. Jehová Diosca Samueltaca: “¡Paimi can! Jatarishpa rey cachun agllai” nircami.
13 Chaimi Samuelca gachupi tiyacuj aceiteta japishpa Davidtaca paipaj huauquicunapaj ñaupajpi aceitehuan umapi tallirca.* Chai punllamantami Jehová Diospaj espirituca Davidman poderta curca. Chai qꞌuipaca Samuelca Ramá llajtamanmi rirca.
14 Jehová Diospaj espirituca Saulmantami caruyashca carca. Shinallataj Jehová Diosca mana alli yuyaicuna* Saulta llaquichichunmi saquirca.
15 Saulta sirvijcunaca cashnami nircacuna: “Diosmari mana alli yuyaicuna canta llaquichichun saquishca.
16 Amito, caipi caj canta sirvijcunata arpata alli tocaj shuj runata mashcachun mañahuai. Mana alli yuyaicuna canta llaquichichun Dios saquijpica paimi arpata tocanga. Chaimi canca ashtahuan alli sintiringui” nircacunami.
17 Chashna nijpimi Saulca paita sirvijcunataca: “Ari, arpata alli tocaj shuj runata mashcashpa apamuhuaichij” nirca.
18 Saulta ayudajcunamanta shujca: “Ricui, betlemitacunapuramanta Jesepaj shuj churi alli tocanata yachaj, mana manchaj, sinchi macanacuj cajtami ricushcani. Shinallataj paica alli parlanata yachaj, sumajmi can. Jehová Diospish paihuanmi can” nircami.
19 Chaimi Saulca Jesemanca: “Ovejacunata michicuj cambaj churi Davidta cachai” nishpa huillachun huillajcunata cacharca.
20 Chashna nijpimi Jeseca tandata, vino capachuta,* shuj malta chivotapish, shuj burro jahuapi churashpa Davidtaca Saulpajman cacharca.
21 Chashnami Davidca Saulpajman rishpa paita sirvi callarirca. Saulca Davidtaca achcatami cꞌuyarca. Shinallataj Davidca paipaj escudota apajmi tucurca.
22 Qꞌuipaca Saulca Jesemanca: “Ñucaca paihuanca contentomi cani. Chaimanta ñucapaj trabajashpa catichun Davidta saquihuai” nishpa huillachunmi cacharca.
23 Shinallataj mana alli yuyaicuna Saulta llaquichichun Dios saquijpica Davidca arpata mashcashpami tocaj carca. Chashna tocajpimi Saulca alli, tranquilo sintirij carca. Mana alli yuyaicunapish paimantami caruyaj carca.
Notacuna
^ “Gachu” shimita huasha diccionariopi ricui.
^ Hebreo rimaipica: “ancianocunaca” ninmi.
^ Hebreo rimaipica: “Jehová Diospaj agllashcatajmi paipaj ñaupajpi can” ninmi.
^ Hebreo rimaipica: “agllarca” ninmi. “Agllana” shimita huasha diccionariopi ricui.
^ Hebreo rimaipica: “shuj mana alli espíritu” ninmi.
^ “Capachu” shimita huasha diccionariopi ricui.
