1 Corintios 2:1-16
2 Huauquicuna, Dios pacalla charicushcata cancunaman huillanaman rishpaca jatun yachaj tucushca shina, alli yachaj runa shinaca mana parlarcanichu.
2 Ña cancunahuan cashpaca Jesucristollamanta, paita caspipi huañuchishcallamantami huillanata munarcani.
3 Cancuna maipi cashcaman rishpaca irquilla, manchaihuan, achca chujchuihuanmi carcani.
4 Cancunaman parlashpa, cancunaman yachachishpaca jatun yachaj runacuna shina crinalla shimicunahuanca mana yachachircanichu. Ashtahuanpish ñuca parlashca shimicunaca Diospaj espiritupaj podertami ricuchirca.
5 Runacunapaj yachaipi ama crichun, ashtahuanpish Diospaj poderpi crichunmi cancunamanca chashna huillarcani.
6 Ñucanchijca crishcapi sinchi cajcunapurapimi alli yachaimantaca parlanchij. Shinapish cai pachapaj* yachaita, cai pachata mandajcunapaj yachaitapish mana parlanchijchu, chaicunaca ñallami chingaringa.
7 Ñucanchijca Diospaj yachaimantami parlacunchij. Chai yachaitaca pi ama yachai tucuchunmi Diosca pacalla charicushca. Paica ñucanchijta jatunyachingapajmi cai millai pacha manaraj tiyajpi imata ruranata ña yuyarirca.
8 Cai yachaitaca cai pachata* mandajcunamantaca ni maijan mana yachaj chayarcacunachu. Paicunaca caita yachashca cashpaca ñucanchij jatun Amito Jesustaca mana huañuchincunamanchu* carca.
9 Shinapish Dios quillcachishcapica: “Ñahuipish mana ricushcachu, rinrinpish mana uyashcachu, runapaj shungupish Dios cꞌuyashcacunapaj imata ruragrishcataca mana yuyashcachu” ninmi.
10 Diosca paipaj espirituhuanmi ñucanchijmanca pi mana yachashcata intindichishca. Chai espiritumi tucui imatapish ricuchin. Pi mana yachai tucushca Diospaj yuyaitapishmi ricuchin.
11 Shinaca ¿shuj runapaj yuyaitaca pitaj yachai tucunyari? Mana pi yachai tucunchu. Chaitaca runapaj shungullami* yachan. Chashnallatajmi Diospaj yuyaitapish ni pi mana yachan, Diospaj espiritullami yachan.
12 Ñucanchijca cai pachapaj espiritutaca mana chasquishcanchijchu. Ashtahuanpish Diospaj espiritutami chasquishcanchij. Dios llaquishpa ñucanchijman cushcacunata yachangapajmi Diospaj espiritutaca chasquishcanchij.
13 Ñucanchijpish chaicunallamantatajmi parlanchij. Shinapish alli yachaj runacuna yachachishca shimicunahuanca mana parlanchijchu. Ashtahuanpish Diospaj espíritu yachachishca shimicunahuanmi parlanchij. Diosmanta yachachishpaca Diospaj espíritu yuyachishca shimicunahuanmi yachachinchij.
14 Shinapish aicha munaillata rurashpa causaj runaca Diospaj espiritumanta shamushcataca mana chasquinchu. Chaicunaca paipajca yangalla shinami. Shinallataj chaicunataca manataj intindi tucunchu. Chaita alli yachangapajca Diospaj espiritutami charina can.
15 Ashtahuanpish Diospaj espirituta charij runaca tucui imatapish callarishpami yachan. Shinapish paitaca ni pi mana juzgai tucunchu.
16 Shinaca “¿Jehová* Diosta yachachingapajca pitaj paipaj yuyaitaca rijsinyari?”. Shinapish ñucanchijca Cristopaj yuyaitami charinchij.
Notacuna
^ Griego rimaipica: “aión” ninmi. “Cai pacha” shimita huasha diccionariopi ricui.
^ Griego rimaipica: “aión” ninmi. “Cai pacha” shimita huasha diccionariopi ricui.
^ O “caspipi clavashpa mana huañuchincunamanchu”.
^ Griego rimaipica: “espiritullami” ninmi.
^ “Jehová” shutita huasha diccionariopi ricui.
