1 Crónicas 17:1-27
17 Davidca paipaj propio huasipi* causai callarishpami profeta Natanmanca: “Ñucaca cedromanta rurashca huasipimi causacuni. Shinapish Jehová Dioshuan ari ninacushca arcaca telacunahuan rurashca carpa huasipimi tiyacun” nirca.
2 Chashna nijpimi Natanca Davidmanca: “Cambaj shungupi ima nishcata rurailla, Diosca canhuanmi” nishpa cutichirca.
3 Diosca chai tutallatajmi Natanmanca cashna nirca:
4 “Ñucata sirvij Davidpajman rishpa cashna ni: ‘Jehová Diosca caitami nin: “Ñuca causana huasitaca canca mana shayachinguichu.
5 Ñucaca israelitacunata Egiptomanta llujshichimushca punllamanta cunancamaca shuj huasipica mana causashcanichu. Ashtahuanpish carpa huasicunapimi causarcani. Shuj lugarmanta caishuj lugarman apajpipish chaipimi causarcani.
6 Tucui punllacunami ñucaca israelitacunahuan carcani. Ñuca pueblota michichunca Israelmanta juezcunatami agllarcani. Paicunataca ‘¿imamantataj ñucapaj cedro caspicunahuan shuj huasitaca mana rurashcanguichij?’ nishpa ima horapish mana tapushcanichu” ninmi’ ningui.
7 Cunanca ñucata sirvij Davidmanca cashna ni: ‘Jahua pacha soldadocunata mandaj Jehová Diosca caitami nin: “Ñucami cantaca ñuca pueblo Israelta pushaj cachun ovejacunata michishpa puricushca pambamantaca pushamurcani.
8 Can maiman rijpipish ñucaca canhuanmi casha. Cambaj tucui contracunatapish cambaj ñaupajpimi tucuchisha. Shinallataj cambaj shutitami jatunyachisha. Canca tucui cai allpapi causaj gentecunamanta ashtahuan rijsishcami tucungui.
9 Ñuca pueblo Israelpajca shuj lugartami agllasha, chaipimi paicunataca churasha. Paicuna chaipi causacujpica mana pi nunca molestangachu. Millaicunapish ñaupa shinaca paicunataca mana cutin llaquichingachu.
10 Ñuca pueblo Israelpaj juezcunata nombrai punllacunamantami millaicunaca chashna llaquichicurcacuna. Shinallataj cambaj tucui contracunatami tucuchisha. Ashtahuantajca canmanca: ‘Jehová Diosca cambajmi shuj huasita shayachinga’ ninimi.
11 Can huañushpaca cambaj ñaupa yayacunahuanmi samarigringui. Ñucaca cambaj qꞌuipami cambaj huahua huahuacunamanta, cambaj shuj churita rey cachun churasha. Paipaj mandanapish huiñaipaj cachunmi churasha.
12 Paimi ñucapajca shuj huasita shayachinga. Cutin ñucaca paipaj jatun tiyarinataca huiñai huiñaipajmi churasha.
13 Ñucaca paipaj yayami casha, paica ñuca churimi canga. Paitaca siempremi cꞌuyasha,* cambaj ñaupa mandajta shinaca paitaca manataj saquishachu.
14 Ñuca huasipi, ñuca mandanapimi huiñai huiñaipaj churasha. Paipaj jatun tiyarinapish huiñai huiñaipajmi canga” ninmi’ ni” nircami.
15 Natanca muscuipi shina Dios imallata ricuchishcatami Davidmanca tucuita huillarca.
16 Chashna nijpimi rey Davidca Jehová Diospaj ñaupajpi tiyarishpa cashna nishpa mañarca: “Jehová Dioslla, ¿ñucaca pitaj caniyari? ¿Ñuca familia* ima cajpitaj cai tucuitaca ñucamanta rurarcanguiyari?
17 Ñuca Dioslla, cai tucuica cambajca ashalla shinamari ricurishca. Canta sirvijpaj huahua huahuacunapish shamuj punllacunacamami unita tiyanga ninguimari. Jehová Dioslla, ñucataca shuj valishca runata shinamari ricungui.
18 Ñuca Dioslla, ñucataca allimari rijsingui. Canta sirvij Davidca canmanta jatunyachina cashcatamari chasquishcani. ¿Caimantaca imatataj ashtahuan nishari?
19 Jehová Dioslla, ñucamanta sustarishpami cambaj shungu munashca shina cai tucui jatun cosascunata rurashcangui. Chashnami can jatun cashcata ricuchishcangui.
20 Jehová Dioslla, can shinaca pi mana tiyanchu. Can shina Diosca pi shujtajca mana tiyanchu. Chaitaca ñucanchij rinrincunahuanmi siempre uyashcanchij.
21 ¿Maijan shujtaj llajtataj cambaj pueblo Israel shina canyari? Can Diosmi cambaj pueblo cachun paicunata quishpichinaman rircangui. Jatun cosascunata rurashpa, mancharina ruraicunata rurashpa, cambaj pueblopaj ñaupajmanta shujtaj llajtacunata llujshichishpa cachashpami cambaj shutitaca shujtajcunaman rijsichircangui. Chashnami paicunataca Egipto llajtamanta quishpichircangui.
22 Israelitacunataca cambajlla pueblo cachunmi huiñaipaj agllarcangui. Jehová Dioslla, canca paicunapaj Diosmari tucurcangui.
23 Cunanca Jehová Dioslla, canta sirvijhuanpish, paipaj huahua huahuacunahuanpish ari nishcataca huiñaipaj pajtachingui. Imata cusha nishcatapish pajtachingui.
24 Cambaj shutica unipaj cachun. Huiñai huiñaita cambaj shutica jatunyachishca cachun. Chaimantami gentecunaca: ‘Jahua pacha soldadocunata mandaj Jehová Diosmi israelitacunapaj Dios, paillami israelitacunapaj Diosca can’ ningacuna. Canta sirvij Davidpaj familiapish huiñai huiñaita cambaj ñaupajpi churashca cachun.
25 Ñuca Dioslla canca canta sirvijmanmi cai huasita rurasha nishpa huillashcangui. Chaimantami canta sirvijca cambaj ñaupajpi tucui shunguhuan mañai tucun.
26 Jehová Dioslla, canca Dios verdaderomi cangui. Cai sumaj cosascunatami canta sirvijmanca cusha nishcangui.
27 Chaimanta canta sirvijpaj familiata bendiciapai. Cai familiapish cambaj ñaupajpica huiñai huiñaipaj cachun. Jehová Dios, canllatajmi cai familiataca bendiciashcangui, cai familiaca huiñaipaj bendiciashca cachun” nircami.
Notacuna
^ O “palaciopi”.
^ O “mana tucurij cꞌuyaitami ricuchisha”.
^ Hebreo rimaipica: “huasi” ninmi.
