A B C CH D E F G H I J L LL M N Ñ O P Q R S T V Y Z

A

• Acaya.

  Griego rimaipi Dios quillcachishcacunapica Romapi saquirij shuj llajtami carca. Chai llajtapaj capitalca Corintomi carca. Grecia llajta ura ladopimi saquirij carca (Hch 18:12).

• adivino.

  Shamuj punllacunapi ima tucunata huillangapaj poderta charini nij runami. Bibliapica adivino nishpaca magiata ruraj sacerdotecunamanta, astrologocunamanta, shujtaj runacunamantapishmi parlan (Le 19:31; Dt 18:11; Hch 16:16).

• agllana.

  Cai shimica hebreo rimaipica ‘aceitehuan llihuina’, ‘aceiteta churana’ nisha ninmi . Ñaupa punllacunapica shuj valishca trabajota pajtachichunmi mandajcunapaj, sacerdotecunapaj umapi aceiteta churajcuna carca. Griego rimaipi Dios quillcachishcacunapica jahua pachaman rigrijcunata espíritu santohuan agllashca cashcatami ricuchin (Éx 28:41; 1Sa 16:13; Lu 4:18; Hch 10:38; 2Co 1:21).

• ajenjo.

  Jayaj, caruman ashnacuj plantacunapuramantami can. Apocalipsis 8:​11-pica jayaj, venenoyuj plantamantami parlan. Chaitaca absintio nishpapishmi shutichin.

• alabastro.

  Cai shutica perfumecunata churangapaj shuj uchilla botellacunami carca. Callaripica Alabastrón (Egipto) llajta cꞌuchullapi tiyaj rumihuan rurashcami carca. Valishca perfume ama llujshichun tapangapajmi botella cungaca quichqui carca. Tiempohuanca botellacunata rurana rumitami alabastro nishpa shutichircacuna (Mr 14:3).

• alfa y omega.

  Griego rimaipica callari letraca alfa nishcami can. Cutin último letraca omega nishcami can. Cai shimicunaca Apocalipsis libropica quimsa cutinmi Diospaj título shina ricurin. Alfa y omega shimicunaca “puntapish, ultimopish” o “callaripish, tucuripish” nisha ninmi (Ap 1:8; 21:6; 22:13).

• alli huillaicuna.

  Griego rimaipi Dios quillcachishcacunapica Diospaj Gobiernomanta alli huillaicunata, Jesucristopi feta churashpa quishpirinatami alli huillaicuna nin (Lu 4:​18, 43; Hch 5:42; Ap 14:6).

• allichirina punlla.

  Sábado punllapaj ñaupa punllatami chashna nijcuna carca. Chai punllatami cunanca viernes nishpa rijsinchij. Chai punllapimi judiocunaca sábado punllapaj prepararijcuna carca. Inti huashicugrijpimi chai punllaca tucurij carca, sábado punllapish callarij carca. Judiocunapajca shuj punllaca tutayagrijpimi callarij carca, tucurijpish carca (Mr 15:42; Lu 23:54).

• allpamanta imatapish ruraj.

  Mangacunata, platocunata, shujtaj trastecunata allpamanta rurajmi can. Hebreo rimaipica ‘maquihuan ruraj’ nisha ninmi. Ima shinami allpa mangata ruraj runaca allpahuanca imatapish rurai tucun. Chashnallatajmi tucuita mandaj Jehová Diosca gentecunatapish, llajtacunatapish mandai tucun (Is 64:8; Ro 9:21).

• alma.

  Hebreo rimaipica néfesh cutin griego rimaipica psykhḗ nisha ninmi. Bibliapica cai shimicunamanta parlashpaca 1) gentecunamanta, 2) animalcunamanta, 3) gentecunapaj o animalcunapaj causaimantami parlan (Gé 1:20; 2:7; Nú 31:28; 1Pe 3:20; notacunapish). Alma shimica religioncunapi nishca shinaca mana canchu. Bibliapica néfesh shimi psykhḗ shimica allpapi causaj gentecunamantami parlan. Allpapi causajcunamanta parlashpaca cuerpoyuj, tuparipaj, ricuipaj, huañuipaj cashcatami ricuchin. Cai Bibliapica alma shimitaca “causai”, “causaj”, “gente” mana cashpaca “pai” nishpami traducishcanchij (por ejemplo, paipaj alma ninapaj randica “pai” nishpami traducishcanchij). Huaquin partecunapica notacunapimi alma nishpa churashcanchij. Alma shimita versocunapi o notacunapi churashca cajpica caipi nishca shinami intindina can. Paipaj tucui almahuan ruran nishpaca paipaj tucui causaihuan, tucui shunguhuan ruraj cashcatami nisha nin (Dt 6:5; Mt 22:37). Huaquin versocunapica alma nishpaca gentecunapaj munaicunamanta o gentecuna yaricachishcamantami parlan. Shinallataj shuj huañushcamanta o shuj huañushcapaj cuerpomantami parlan (Nú 6:6; Pr 23:2; Is 56:11; Ag 2:13).

• altar.

  Altarca allpahuan, rumicunahuan, fierrohuan forrashca caspicunahuan rurashcami carca. Chai jahuapimi Diosta adorangapaj sacrificiocunata, inciensotapish rupachijcuna carca. Carpa huasi punta ucupi, Diospaj huasi punta ucupipish inciensota rupachingapajmi shuj uchilla “oro altar” tiyaj carca. Chai altarca orohuan forrashca caspicunahuanmi rurashca carca. Cutin canlla patiopica rupachishca ofrendacunata cungapajmi cobremanta rurashca ashtahuan jatun altar tiyaj carca. Huaquin altarcunapica yanga dioscunatami adorajcuna carca (Éx 39:​38, 39; 1Re 6:20; Mt 5:​23, 24; Lu 1:11; Hch 17:23).

• altar gachucuna.

  Cai gachucunaca altarcunapica chuscu esquinapimi tiyaj carca (Le 8:15; 1Re 2:28; Ap 9:13).

• amén.

  Cai shimica ‘chashna cachun’ o ‘seguro’ nisha ninmi. Cai shimica hebreo rimaipica ʼamán ninmi. Caica ‘alli pajtachij’ o ‘confiaipaj caj’ nisha ninmi. Shuj juramentohuan, shuj mañaihuan o pi imata nijpi de acuerdo cashcata ricuchingapajmi amén nijcuna carca. Apocalipsis libropica amén shimica Jesuspaj título cashcatami ricuchin (Dt 27:26; 1Cr 16:36; Ro 1:25; Ap 3:14).

• Amito Jesús callarichishca micui.

  Chai micuipica levadura illaj tandapish, vinopishmi tiyarca. Levadura illaj tandaca Cristopaj cuerpotami ricuchin. Vinoca Cristopaj yahuartami ricuchin. Chaimantami cai micuitaca Jesús huañushcata yuyarina tandanacui nin. Bibliapica Jesusta catijcunataca Cristo huañushcata yuyarichunmi mandan (1Co 11:​20, 23-26).

• anciano.

  Ancianoca shuj yuyajlla runami can. Bibliapica anciano nishpaca comunidadpi o shuj llajtapi autoridadta, responsabilidadta charij runamantami parlan. Apocalipsis libropica ancianocuna nishpaca jahua pachapi causajcunamantapishmi parlan. Congregacionta pushangapaj responsabilidadta charijcunatami, griego rimaipi caj presbýteros shimitaca anciano nishpa traducishca (Éx 4:29; Pr 31:23; 1Ti 5:17; Ap 4:4). Paicunami congregacionta cuidancuna, michincuna. Griego rimaipi epískopos shimica cuidangapaj ricuj cashcatami nisha nin. Presbýteros, epískopos shimicunaca congregacionpi sirvij ancianocunallatatajmi ricuchin. Presbýteros shimica espiritualmente sinchi cashcamanta chai nombramientota chasquishcatami ricuchin. Cutin epískopos shimica shuj anciano imalla rurana cashcatami ricuchin (Hch 20:28; 1Ti 3:​2-7; 1Pe 5:2).

• ángel.

  Hebreo rimaipica malʼákh ninmi. Cutin griego rimaipica ágguelos ninmi. Cai ishquindij shimicunaca ‘huillaj’ nisha ninmi. Shinapish Diospaj huillajcunamanta parlashpaca “ángel” nishpami traducishca. Diosca gentecunata manaraj rurashpami angelcunataca rurarca (Gé 16:7; 32:3; Snt 2:25; Ap 22:8). Paicunaca poderta charij espiritucunami can. Bibliapica angelcunataca “huaranga huaranga jucha illajcuna”, “Diospaj churicuna”, “manaraj pacarijpi llujshij estrellacuna” nishpami shutichin (Dt 33:2; Job 1:6; 38:7; Jud 14). Diosca paicunataca mirarichunca mana rurarcachu. Ashtahuanpish cada unotami shuj shujlla rurarca. 100 millones yalli angelcunami tiyan (Da 7:10). Bibliapica cada ángel shutita charishcata, ima shina cashcatami ricuchin. Shinapish angelcunaca humilde cashcamantami paicunata adorachunca mana saquincuna. Achca angelcunacarin paicunapaj shutitaca mana huillancunachu (Gé 32:29; Lu 1:26; Ap 22:​8, 9). Angelcunaca chꞌican chꞌican autoridadtami charincuna. Shinallataj chꞌican chꞌican ruraicunatami pajtachincuna. Por ejemplo Jehová Diospaj jatun tiyarina ñaupajpimi sirvincuna. Dios ima nishcatami huillancuna. Allpapi Jehová Diosta sirvijcunatami ayudancuna. Diospaj juiciotapishmi pajtachincuna. Alli huillaicunata huillachunpishmi ayudancuna (2Re 19:35; Sl 34:7; Mt 4:11; Lu 1:​30, 31; Ap 5:11; 14:6). Shamuj punllacunapica Jesusdijmi Armagedonpi contracunahuan macanacungacuna (Ap 19:​14, 15).

• anticristo.

  Griego rimaipica ishqui yuyaicunatami ricuchin: Cristopaj contra o Cristopaj randi. Cristopaj contra, paita catijcunapaj contra caj gentecuna, organizacioncunami anticristocuna can. Shinallataj Cristopaj randimi shamunchij nishpa llullajcuna, Mesiasmi canchij nijcunapishmi anticristocuna can (1Jn 2:22).

• apostasía.

  Apostasía shimica griego rimaipica ‘imamanta caruyana’ nisha ninmi. Cai shimica ‘caruyana’, ‘saquina’, ‘mana cazuna’ nisha ninmi. Griego rimaipi Dios quillcachishcacunapica apostasía nishpaca alli religionta saquijcunamantami parlan (Pr 11:9; Hch 21:21; 2Te 2:​3, nota).

• apóstol.

  Cai shimica ‘cachashca’ nisha ninmi. Jesusmanta, shujtajcunata ayudanaman cachashcacunamantapishmi parlan. Ashtahuantajca Jesusllataj agllashca 12 catijcunatami apostolcuna nin (Mr 3:14; Hch 14:14).

• arameo.

  Cai rimaica hebreo rimai shinallatajmi can. Quillcangapajpish chai alfabetollatatajmi charin. Callaripica arameocunallami parlaj carca. Shinapish qꞌuipamanca Asiria llajtata, Babilonia llajtata mandajcunami cꞌatungapaj, parlanacungapaj rimai callarircacuna. Shinallataj Grecia llajtata mandajcunapishmi cai rimaitaca parlajcuna carca. Esdras, Jeremías, Daniel librocunamanta maijan partecunaca arameo rimaipimi qꞌuillcashca carca. Griego rimaipi Dios quillcachishcacunapipish maijan palabracunaca arameo shimipimi can (Esd 4:​8–6:18; 7:​12-26; Jer 10:11; Da 2:4b–7:28; Mr 14:36; Hch 9:36).

• arca tapa.

  Ari ninacushca arcapaj tapami carca. Chai ñaupajpimi sacerdotecunata jatun mandajca Juchacunata perdonana punllapi, juchacunamanta Diosman cushca sacrificio yahuarta tsirapaj carca. Hebreo rimaipica ‘juchata tapana’ o ‘juchata anchuchina’ nisha ninmi. Cai tapaca orohuan rurashcami carca. Cai jahuapica ishqui querubincunami chꞌimbapura tiyacurca (Éx 25:​17-22; 1Cr 28:​11, nota; Heb 9:5).

• ari ninacushca.

  Imata rurangapaj o imata mana rurashpa catingapaj ishquindij partemanta ari ninacunami. Dioshuan gentecunahuan ari ninacuna o gentecunapurallataj ari ninacunami can. Huaquinpica shujllami ari nishcata pajtachina can (shujlla ari nishcaca shuj promesami can). Shujtaj cutincunaca ishquindijllatajmi ari ninacushcataca pajtachina can (ishquindij ari ninacushca). Bibliapica Dioshuan gentecunahuan ari ninacushcamanta parlashpapish gentecunapura, familiacunapura, llajtacunapura o tauca gentecunapura ari ninacushcatapishmi parlan. Abrahanhuan, Davidhuan, Israel llajtahuan (Leyta cazungapaj ari ninacushca), Diospaj Israelhuan (mushuj ari ninacushca) Dios ari ninacushcami tucuimanta yalli ashtahuan valij ari ninacushcacuna can (Gé 9:11; 15:18; 21:27; Éx 24:7; 2Cr 21:7; Lu 22:29; Hch 3:25; 2Co 3:6; Heb 8:6).

• ari ninacushca arca.

  Acacia caspimanta rurashca, orohuan forrashca cajami carca. Chai cajataca Diospaj carpa huasipimi Diospajlla ashtahuan chꞌicanyachishca ucupi huaquichijcuna carca. Qꞌuipamanca Salomón rurashca Diospaj huasipimi Diospajlla ashtahuan chꞌicanyachishca ucupi huaquichijcuna carca. Caja jahua tapaca orohuan rurashcami carca. Chai jahuapica ishqui querubincunami chꞌimbapura tiyacurcacuna. Chai caja ucupica Chunga Mandamientocunata charij ishqui tablacunami huaquichishca carca (Dt 31:26; 1Re 6:19; Heb 9:4).

• arcángel.

  Cai shimica ‘angelcunata mandaj’ nisha ninmi. Arc- letracunaca ‘mandaj’, ‘pushaj’ nisha ninmi. Bibliapica shujlla arcángel tiyashcatami ricuchin. Chai arcangelpaj shutica Miguelmi can (Da 12:1; Jud 9; Ap 12:7).

• Areópago.

  Atenas llajtapi saquirij jatun lomami carca. Chai lomaca Acrópolis nishca inti huashicun janaj ladomanmi carca. Juezcuna maipi tandanacunatapishmi Areópago nijcuna carca. Estoicos, epicurios nishca yachajcunami Pablotaca imata crishcata huillachun Areopagoman pusharcacuna (Hch 17:19).

• Armagedón.

  Cai shimica hebreo rimaipica Har Meghiddóhn ninmi. Caica ‘Meguidó urcu’ nisha ninmi. Armagedonca “Tucui poderta charij” Diospaj macanacuna jatun punllami can. Chai punllapimi ‘tucui muyundij allpamanta mandajcunaca’ Jehová Dioshuan macanacungapaj tandanacungacuna (Ap 16:​14, 16; 19:​11-21). JATUN LLAQUI shimita ricui.

• arrepintirina.

  Bibliapica ñaupaman ima mana allita rurashcamanta o imata mana rurashcamanta shungumanta llaquirishpa cambiana cashcatami ricuchin. Shungumanta arrepintirishcataca ruraicunahuanmi ricuchina can (Mt 3:8; Hch 3:19; 2Pe 3:9).

• asélgueia.

  MILLAI PINGANAYAI RURAICUNA shimita ricui.

• Asia llajta.

  Griego rimaipi Dios quillcachishcacunapica Romapi saquirij llajtamantami parlan. Cunanca Turquía, Samos, Patmos, huaquin islacunapishmi chaipica saquirin. Asiapaj capitalca Efesomi carca (Hch 20:16; Ap 1:4).

• ayudaj.

  Shuj pꞌiñanacui tiyajpi ishquindij partemanta alli tucuchun ayudaj runami. Leyta cazungapaj ari ninacushcapi ayudajca Moisesmi can. Cutin mushuj ari ninacushcapi ayudajca Jesusmi can (Gál 3:19; 1Ti 2:5; Heb 12:24).

• ayunana.

  Asha tiempota imata mana micuna cashcatami ricuchin. Israelitacunaca juchacunata perdonana punllapi, llaqui punllacunapi, Dios ayudachun minishtishpapishmi ayunajcuna carca. Judiocunaca llaqui punllacunapi ima tucushcata yuyaringapajmi huatapica chuscu cutin ayunajcuna carca. Cristota catijcunaca ayunanataca mana minishtincunachu (Esd 8:21; Is 58:6; Mt 4:2; 9:14; Lu 18:12; Hch 13:​2, 3; 27:9).

• azotina.

  Griego rimaipi Dios quillcachishcacunapica puntayuj o huatashca anguhuan azotishpa castigana cashcatami ricuchin (Jn 19:1).

B

• Baal.

  Cananeocunapaj diosmi carca. Paitaca jahua pachapaj dueño, tamyata cachaj dios nijcunami carca. Shinallataj granocunata achcata pꞌucuchij, animalcunata mirachij dios nijcunami carca. Chai llajtamanta shujtaj dioscunatapishmi chai shutihuan rijsijcuna carca. Baal shutica hebreo rimaipica ‘dueño’, ‘amo’ nisha ninmi (1Re 18:21; Ro 11:4).

• bautismo, bautizana.

  Cai shimica yacupi pambana nisha ninmi. Jesusca paita catijcuna bautizarichunmi mandarca. Dios quillcachishcacunapica Juan bautizashcamanta, espíritu santohuan bautizarinamanta, ninahuan bautizarinamanta, shujtaj laya bautismocunamantapishmi parlan (Mt 3:​11, 16; 28:19; Jn 3:23; 1Pe 3:21).

• Belcebú.

  Satanastami chashna shutichin. Paica demoniocunata mandajmi can. Cai shutica Baal-Zebub nishca shutimantami shamuj yuyachin. Filisteocunaca chai Baal diostami Ecronpi adorajcuna carca (2Re 1:3; Mt 12:24).

• brujiana.

  Brujiana nishpaca demoniocunapaj ayudahuan chꞌican chꞌican ruraicunata gentecuna rurajtami ricuchin. Shinallataj huañushca qꞌuipa espíritu causashpa catishcatami crincuna. Chai espíritu causajcunahuan parlai tucushcatapishmi yuyancuna. Griego rimaipica “brujiana” shimitaca farmakía ninmi. Chaica ‘drogarina’ nisha ninmi. Ñaupa punllacunapica brujiangapajca drogarishpami demoniocunapaj ayudata mashcajcuna carca (Gál 5:20; Ap 21:8).

• brujo.

  Millai espiritucuna poderta cujpi imatapish ruraj runami can (Hch 13:6).

C

• cai pacha.

  Griego rimaipi kósmos shimica 1) gentecuna ima shina causacushcatami ricuchin. 2) Diosta mana adoraj gentecunatapishmi ricuchin. Cutin griego rimaipi aiṓn shimica shuj tiempopi ima tucushcata, ima importante ruraicuna pasashcata, shuj importante runa causashcatami ricuchin. Noepaj punllacunamanta parlashpa, cai pachapaj tucuri punllacunamanta parlashpaca chai tiempopi ima ashtahuan tucushcatami ricuchin. Shinallataj aiṓn shimica shuj tiempopi gentecuna ima shina causajta, ima laya cajtami ricuchin (Mt 24:3; Mr 4:19; Ro 12:2; 1Co 10:11). CAI PACHAPAJ RURAICUNA TUCURINA shimita ricui.

• cai pachapaj ruraicuna.

  CAI PACHA shimita ricui.

• cai pachapaj ruraicuna tucurina.

  Satanás cai pachata mandacushca tucurina tiempomi can. Cai tiempoca Jesús tigramuna punllacunapimi canga. Jesús mandajpimi angelcunaca ‘millaita rurajcunataca cashcata rurajcunamanta chꞌicanyachishpa’ tucuchinga (Mt 13:​40-42, 49). Jesusta catijcunaca cai pachapaj ruraicuna ima hora tucurina cashcatami yachashun nircacuna (Mt 24:3). Jesusca manaraj jahua pachaman tigrashpami paita catijcunataca chai tiempocama paicunahuan casha nirca (Mt 28:20). CAI PACHA shimita ricui.

• cai punlla.

  CAI PACHA shimita ricui.

• cacharichishca runa.

  Roma llajta mandacuj ladocunapi huacharijcunaca tucui chai llajtapaj derechocunatami charirca. Cutin sirvij runata cacharichijpica Roma llajtamanta cashca shinami tucuj carca. Shinapish paicunataca ima cargocunata ocupachunca mana saquijcunachu carca (1Co 7:22).

• caldeocuna.

  Cai llajta gentecunaca Tigris, Éufrates jatun yacucuna tandanacuj ladocunapimi causajcuna carca. Callaripica Ur llajtami chaipica carca. Chai llajtapimi Abrahanca huacharirca (Hch 7:4).

• capachu.

  Chivopaj, ovejapaj carahuan rurashca bolsa layami carca. Chaicunapimi vinota, shujtaj liquidocunatapish huaquichijcuna carca. Vino agruyashpaca dióxido de carbono nishcata shitashpami pꞌunguillichin. Chaimantami chutarijlla mushuj capachucunapi vinotaca huaquichijcuna carca. Cutin mauca capachucunaca duro cashcamantami pꞌunguillichijpica tugyajlla carca (Jos 9:4; Mt 9:17).

• cashcata rurana.

  Bibliapica Dios mandashca shina ima alli cashcata, ima mana alli cashcata ricushpa allita rurana cashcatami nisha nin (Gé 15:6; Dt 6:25; Sof 2:3; Mt 6:33).

• caspi.

  Huichiman shayachishca caspipimi castigashcacunataca churajcuna carca. Maijan llajtacunapica huañuchingapaj o huañushca cuerpotami caspipi churajcuna carca. Shujtajcunapaj ñaupajpi pingaipi churangapaj mana cashpaca shujtajcunata advirtingapajmi chashna rurajcuna carca. Asiriocunaca guerra punllacunapica maijanta preso apashpaca puntajlla caspitami huijsamanta pechocama pasachijcuna carca. Cutin judiocunapaj leypica Diosta pꞌiñashpa cꞌamijcunata, rurashcalla dioscunata adorajcunataca puntapica rumicunahuan shitashpa o shujtaj layami huañuchijcuna carca. Qꞌuipami huañushca cuerpocunataca caspicunapi o yuracunapi huarcujcuna carca (Dt 21:​22, 23; 2Sa 21:​6, 9). Maipica romanocunaca castigashca runacunataca caspipimi huatashpa churajcuna carca. Chaipimi inti shitajpi achca calorhuan, yacunaihuan, yaricaihuan, nanaihuan huañungacama achca punllacunata pasajcuna carca. Shujtaj cutincunaca Jesusta layami castigashcacunataca maquicunapi, chaquicunapi clavashpa churajcuna carca (Lu 24:20; Jn 19:​14-16; 20:25; Hch 2:​23, 36). LLAQUICHINA CASPI shimita ricui.

• carreta.

  Carretacunaca ishqui ruedacunayujmi carca. Viajangapaj, macanacuicunaman ringapajpish carretacunataca caballocunami aisaj carca (Éx 14:23; Jue 4:13; Hch 8:28; Ap 9:9).

• carrizo caspi.

  Cai plantacunaca yacu tiyan ladocunapimi huiñan. Carrizo caspi nishpaca Arundo donax nishcamantami parlan (Mt 27:29; Ap 11:1).

• causaita cuj yura.

  Chai yuraca Edén huertapimi carca. Bibliapica chai yuramanta pꞌucushca granocuna causaita cuj cashcataca mana ninchu. Ashtahuanpish chai yura granocunamanta micuchun saquishcacunaman Dios huiñai causaita cuna cashcatami ricuchin. Apocalipsis libropica chai yuraca huiñai causaita Dios cuna cashcatami ricuchin (Gé 2:9; 3:22; Ap 2:7; 22:19).

• cepo.

  Gentecunataca ama cuyurichunmi tablacunahuan canichishpa castigajcuna carca. Maipica chaquicunallatami canichijcuna carca. Cutin shujtaj cutincunaca tucui cuerpo ama cuyurichunmi chaquicunatapish, maquicunatapish, cungatapish tablacunahuan canichijcuna carca (Jer 20:2; Hch 16:24).

• César.

  Roma llajtapimi cai apellidoca tiyarca. Qꞌuipamanca Roma llajtata mandajcunapaj titulomi tucurca. Bibliapica Augusto, Tiberio, Claudio mandajcunapaj shuticunatami huillan. Neronpaj shutita mana nijpipish paica chai titulotami charirca. Griego rimaipi Dios quillcachishcacunapica César nishpaca llajtata mandajcunata, gobiernocunatami ricuchin (Mr 12:17; Hch 25:12).

• circuncisión.

  Cꞌari charishca aicha mirga carata pꞌitinami. Abrahán causashca punllacunapi, paipaj huahua huahuacunapaj punllacunapica chaitaca ruranatajmi carcacuna. Shinapish Jesusta catijcunaca ña mana chaita ruranata minishtinchu. Maipica cai shimica imata ricuchingapajllami can (Gé 17:10; 1Co 7:19; Flp 3:3).

• codo.

  Largoman midingapajmi carca. Chai medidaca codomanta chaupi dedo puntacamami carca. Israelitacunaca 44,5 centimetrocunata charij codotami utilizajcuna carca. Shinallataj ashtahuan largo codotapishmi utilizajcuna carca. Chai codoca 51,8 centimetrocunatami charirca (Gé 6:15; Ap 21:​17, nota).

• congregación.

  Congregación shimica imata rurangapaj huaquin gentecuna tandanacushcatami ricuchin. Griego rimaipi Dios quillcachishcacunapica muyundij allpapi Jesusta catijcunamantami parlan (Mt 16:​18, nota; 1Co 10:32). Shinallataj jahua pachapi causanaman ringapaj agllashcacunamantami parlan (Heb 12:23). Shuj llajtapi tandanacushca huauqui panicunamantapishmi parlan (Hch 8:1; 1Co 1:2; Ap 1:11). Diosta adorangapaj shuj huasipi tandacuj huauqui panicunamantapishmi parlan (Ro 16:5; Flm 2).

• Cristo.

  Cai shimica Jesuspaj shuj titulomi can. Griego rimaipica Khristós ninmi. Cutin hebreo rimaipica Mashiach ninmi. Cai shimitaca “Mesías” o “Agllashca” nishpami traducishca (Mt 1:16; Jn 1:41).

• Cristota catij.

  Diosmi Jesucristota catijcunata cai shutita churarca (Hch 11:26; 26:28).

• cuidaj.

  Gentecunata, huasicunata, chagracunata ama llaquichichun tutacunapi chapaj runami. Ima llaqui tiyagrishcata ricushpaca ratomi huillan. Cuidaj runataca llajtaman pi cꞌuchuyacujta carumanta ricuchunmi pircacuna jahuapi, torrecuna jahuapi churajcuna carca. Soldadocunamanta parlashpaca guardiacuna o chapajcuna ninmi (Mt 27:65; 28:4).

• cutana rumi.

  Chai rumica granocunata cutangapajmi shuj redondo rumi jahuapi churashca carca. Jahua lado rumita cuyuchichunca ucu lado rumi chaupipimi shuj estacata churajcuna carca. Ñaupa punllacunapica casi tucuicunami huasipica cutana rumita charijcuna carca. Chai rumitaca huarmicunami muyuchij carca. Cutana rumipi cutashpami tandata rurajcuna carca. Chaimantami Moisesman cushca leypica shuj prestamota rurashpaca prendata shina cutana rumita japichunca mana mandarca. Jatun cutana rumicunaca uchilla cutana rumicuna shinallatajmi carca. Chai cutana rumicunataca animalcunami muyuchij carca (Dt 24:6; Mr 9:42).

CH

• Chuglla huasicunata rurana fiesta.

  Cai fiestataca granocunata tandana fiesta nishpapishmi rijsijcuna carca. 15 de etanimmanta 21 de etanimcamami rurajcuna carca. Chaipimi israelitacunaca cosechataca tucuchijcuna carca. Chai fiestapica Jehová Dios paicunapaj cosechata bendiciashcamantami cushicushpa pagui nijcuna carca. Shinallataj chai fiesta punllacunapica Egipto llajtamanta llujshishcata yuyarishpami gentecunaca chuglla huasicunapi causajcuna carca. Cꞌaricunaca quimsa fiestacunata yuyaringapajmi Jerusalenmanca rinataj carcacuna. Chuglla huasicunata rurana fiestamanpishmi rinataj carcacuna (Le 23:34; Esd 3:4; Jn 7:2).

• chuya, ima mapa illajlla.

  Bibliapica “chuya”, “ima mapa illaj” shimicunata traducishpaca cuerpopi, yuyaipi, shungupi, Diospaj ñaupajpi chuya, limpio, alli cana cashcatami ricuchin. Moisesman cushca leypica tucuipi limpio cana cashcatami ricuchin (Le 10:10; Sl 51:7; Snt 1:27).

• chuyayachina pamba.

  Chaipimi granocunata trillajcuna carca. Achca huaira tiyaj ladocunapimi chai pambataca rurajcuna carca (Mt 3:12). TRILLANA shimita ricui.

D

• Davidpaj Churi.

  Jesustami chashna nin. Diospaj Gobiernopi mandangapaj ari ninacushcata ricuchingapajmi paitaca chashna nin. Chaica Davidpaj huahua huahuacunamanta shuj huahuapimi pajtarina carca (Mt 12:23; 21:9).

• Decápolis.

  Griegocunapaj tauca llajtacunami carca. Callaripica chunga llajtacunami carca. (Griego rimaipica déka ninmi. Caica ‘chunga’ nisha ninmi. Shinallataj pólis ninmi. Caica ‘llajta’ nisha ninmi). Galilea mama cucha inti llujshin ladoman Jordán yacu ladocunapimi achca llajtacunaca saquirij carca. Chai llajtacunatapishmi Decápolis nishpa rijsijcuna carca. Chaipica randijcuna, cꞌatujcunami tiyaj carca. Griegocunapaj costumbrecunatapishmi catijcuna carca. Chai llajtacunapaj ladocunatami Jesusca pasarca. Shinapish chai llajtacunamanta shuj llajtallatapish pai visitashcataca mana ninchu (Mt 4:25; Mr 5:20).

• demonio.

  Achca poderta charij, mana ricuipaj millai espiritumi can. Génesis 6:​2-pica “mana llulla Diospaj huahuacuna” ninmi. Shinallataj Judas 6-pica “angelcuna” ninmi. Paicunataca Diosca mana millaicunata rurarcachu. Ashtahuanpish chai angelcunaca Diospaj contra tucunatami agllarcacuna. Noepaj punllacunapi Diosta mana cazushpami Satanashuan igual Jehová Diospaj contra tucurcacuna (Dt 32:17; Lu 8:30; Hch 16:16; Snt 2:19).

• denario.

  Plata metalmanta rurashca romanocunapaj moneda cullquimi carca. Cai monedaca 3,85 gramos shinatami pesaj carca. Shuj ladomanca Cesarpaj ñahuimi quillcashca tiyacurca. Chai monedatami shuj punlla enterota trabajashcamanta pagajcuna carca. Cai moneda cullquitami romanocunaca impuestota shina pagachun judiocunata obligajcuna carca (Mt 22:​17, nota; Lu 20:24).

• Diablo.

  Griego rimaipi Dios quillcachishcacunapica Satanastami chashna shutichin. Cai shutica ‘yangamanta juchachij’ nisha ninmi. Satanastaca yangamanta Jehová Diosta juchachij cashcamantami Diablo nishpa shutichin. Paica Diosmanta, Dios nishca shimicunamanta, Diospaj jucha illaj shutimantami llullacunata nishca (Mt 4:1; Jn 8:44; Ap 12:9).

• diezmo.

  Chungamanta shuj partetami (10%) impuestocunata pagangapaj, Diosta adorangapajpish cujcuna carca (Mal 3:10; Dt 26:12; Mt 23:23; Heb 7:5). Moisesman cushca leypi mandashca shinaca levitacunaca huatantami paicuna causangapajca allpapi pꞌucushca granocunata, mirarishca huagracunata, ovejacunatapish chungamanta shuj parteta japijcuna carca. Cutin levitacunaca paicuna japishcataca Aaronpaj familiamanta shamuj sacerdotecuna causachunmi chungamanta shuj parteta cujcuna carca. Shujtaj laya diezmocunatapishmi cujcuna carca. Jesusta catijcunapajca diezmota cunaca mana minishtirishcachu can.

• Dios pacashca.

  Diosca paipaj munaitami pai agllashca tiempo chayangacama pacalla charin. Paica picunalla yachachun munashcacunallamanmi ricuchin (Mr 4:11; Col 1:26).

• Dios quillcachishcacuna.

  Diospaj shimipi quillcachishcacunami can. Cai ishqui palabracunaca Griego rimaipi Dios quillcachishcacunallapimi ricurin (Lu 24:27; 2Ti 3:16).

• Diosman cusha nina.

  Caica Diosman shuj promesata rurashcatami ricuchin. Imata rurangapaj, shuj ofrendata o shuj regalota cungapaj, Diosta ashtahuan sirvingapaj, imacunamanta jarcaringapajmi chai promesata rurajcuna carca. Diosman cusha ninaca shuj juramento shinallatajmi carca (Mt 5:33).

• Diosman cushca tanda.

  Carpa huasipi, Diospaj huasipimi ishqui montonta rurashpa mesa jahuapi tandata churajcuna carca. Shuj montonpica sujta tandami tiyarca. Caishuj montonpipish sujta tandami tiyarca (12 tandacunami tiyarca). Chai tandacunatami ‘montonashca tanda’ ‘Diosman cushca tanda’ nijcuna carca. Cada sabadomi mushuj tandata churashpa caishuj tandacunataca llujshichijcuna carca. Chai llujshichishca tandataca sacerdotecunallami micujcuna carca (2Cr 2:4; Éx 25:30; Le 24:​5-9; Mt 12:4; Heb 9:2).

• Diospaj Gobierno.

  GOBIERNO shimita ricui.

• Diospaj huasi.

  Carpa huasipaj randi Jerusalenpi rurashca huasimi carca. Chaipimi israelitacunaca Diosta adorarcacuna. Diospaj punta huasitaca Salomonmi rurarca. Chaitaca babiloniocunami tucuchirca. Diospaj catij huasitaca Zorobabelmi Babilonia llajtamanta tigramushca qꞌuipa shayachirca. Tiempohuanca jatun Herodesmi allichirca. Diospaj huasitami huaquinpica “huasi” nin (Mt 21:13; Lu 11:51; 1Cr 29:1; 2Cr 2:4; Mt 24:1).

• Diospaj huasi ucu.

  Caica Diosta adorangapaj jucha illaj ucumi carca. Shinapish carpa huasita, Jerusalenpi saquirij Diospaj huasitami chashna nijcuna carca. Jehová Dios causacuj jahua pachatapishmi chashna nin (Éx 25:​8, 9; 2Re 10:25; 1Cr 28:10; Ap 11:19).

• Diospaj huasita mingashcata yuyarina fiesta.

  Cai fiestataca Antíoco Epífanes nishca runa Diospaj huasita llaquichishca qꞌuipa chuyayachishcata yuyaringapajmi rurajcuna carca. Cai fiestaca 25 de kislev quillapimi callarij carca. Cai fiestataca pusaj punllacunatami rurajcuna carca (Jn 10:22).

• Diospajlla ashtahuan chꞌicanyachishca ucu.

  Carpa huasipi, Diospaj huasipi ashtahuan ucuman caj ucumi carca. Chai ucutami jucha illajcunamanta jucha illaj nijcuna carca. Chai ucupica ari ninacushca arcami tiyarca. Moisesman cushca leypi nishca shinaca sacerdotecunata jatun mandajllami huatapica shuj cutinlla Juchacunata perdonana punllapi chai ucuman yaicuj carca (Éx 26:33; Le 16:​2, 17; 1Re 6:16; Heb 9:3).

• Diospajlla chꞌicanyachishca ucu.

  Carpa huasipi, Diospaj huasipi punta ashtahuan jatun ucumi carca. Chai ucuca Diospajlla ashtahuan chꞌicanyachishca ucu shinaca mana carcachu. Carpa huasipi Diospajlla chꞌicanyachishca ucupica oro candelero, inciensota rupachina oro altar, Diosman cushca tandata churashca mesa, oromanta rurashca shujtaj cosascunapishmi tiyarca. Cutin Diospaj huasipi Diospajlla chꞌicanyachishca ucupica oro altar, chunga oro candelerocuna, Diosman cushca tandata churashca chunga mesacunami tiyarca (Éx 26:33; Heb 9:2).

• Diosta tucui shunguhuan adorana.

  Jehová Dioslla tucuita mandana cashcata ricuchingapajmi paillata adorana, paillata sirvina canchij (1Ti 4:8; 2Ti 3:12).

• disciplina.

  Cai shimica yachachina, huiñachina, educana, rimashpa intindichina, castigana nisha ninmi (Pr 1:2; Ef 6:4; Heb 12:11).

• dracma.

  Plata metalmanta rurashca griegocunapaj moneda cullquimi carca. Chai cullquica 3,4 gramostami pesaj carca (Mt 17:24).

E

• epicúreos.

  Paicunaca Grecia llajtamanta Epicuro (341-270 J.m.h.) nishca yachaj runata catijcunami carca. Cai runaca causaipica gentecunaca tucuimanta yallica cushicunatami mashcana can nishpami yachachij carca (Hch 17:18).

• espíritu.

  Hebreo rimaipica rúaj ninmi. Cutin griego rimaipica pnéuma ninmi. Cai shimicunatami espíritu nishpa traducishca. Gentecunaca mana ricui tucunchu. Hebreo rimaipi, griego rimaipipish espirituca 1) huairata, 2) allpapi causajcunapaj fuerzata, 3) gentecunapaj shungupi ima tiyashcata, imata rurashcata, imata nishcata, 4) mana ricuipaj cajcunamanta huillaicuna shamushcata, 5) espíritu cuerpota charijcunata, 6) Diospaj fuerzata o espíritu santotami ricuchin (Éx 35:21; Sl 104:29; Mt 12:43; Lu 11:13).

• espíritu santo.

  Diosca paipaj munaita pajtachingapajmi mana ricuipaj fuerzata utilizan. Jehová Diosca chuya, cashcata rurajmi can. Paica imatapish jucha illajllata rurangapajmi espíritu santota utilizan. Chaimantami cai espirituca jucha illaj can (Lu 1:35; Hch 1:8).

• estoicos.

  Grecia llajtamanta yachaj runacunami carca. Paicunaca cushilla causangapajca universopi tiyashca leycunata cazushpa, alli yuyashpa causana cashcatami yuyajcuna carca. Shuj yachaj runaca cushicunatapish, llaquirinatapish mana minishtinchu nishpami yuyajcuna carca (Hch 17:18).

• estrellacunata ricushpa adivinaj runa.

  Inti, luna, estrellacuna cuyurijta ricushpa shamuj punllacunapi ima tucunata huillajmi can.

• Etiopía.

  Cai llajtaca ñaupa Egipto llajta ura ladopimi saquirij carca. Chaipica cunanca Egipto, Sudán llajtacunami saquirin (Hch 8:27).

• Éufrates.

  Cai jatun yacuca Asia inti huashicun ura ladopimi saquirin. Mesopotamiapi tiyaj ishqui yacucunamantaca shuj jatun yacumi can. Punta cutinca Génesis 2:​14-pimi cai yacumanta parlan. Edén huertapi tiyaj chuscu yacucunamanta shuj yacumi carca. Eufratestaca “jatun yacu” nijcunami carca (Gé 31:21). Éufrates yacuca israelitacunaman cushca allpacuna janaj lado lindemi carca (Gé 15:18; Ap 9:14; 16:12).

• eunuco.

  Cai shimica capashca cꞌari nisha ninmi. Eunucocunaca reycunapaj huasicunapimi reinacunata, reypaj caishuj huarmicunatapish cuidajcuna carca, sirvijcuna carca. Mana capashca cashpapish shuj reypaj huasipi huaquin ruraicunata pajtachijtapishmi eunuco nijcuna carca. Bibliapica Diosta ashtahuan sirvingapaj jarcarijcunamanta parlashpami “eunucocuna” nin (Mt 19:12; Est 2:15; Hch 8:27).

F

• faraón.

  Egipto llajtata mandajcunapaj titulomi carca. Bibliapica pichca faraoncunapaj shutitami huillan (Sisac, So, Tirhacá, Nekó, Hofrá). Shinapish Abrahanpaj, Moisespaj, Josepaj punllacunapi causaj faraoncunapaj shuticunata, caishuj faraoncunapaj shuticunataca mana huillanchu (Éx 15:4; Ro 9:17).

• fariseo.

  Primer siglopica judiocunapaj shuj importante religionmi carca. Paicunaca sacerdotecunapaj familiamanta mana cashpapish Leypi mandashcataca tucuitami cazujcuna carca (Mt 23:23). Paicunapaj costumbrecunatapish Leyta shinallatajmi tucuita pajtachijcuna carca. Griegocunapaj costumbrecunata catinataca mana munarcacunachu. Paicunaca Leymanta, costumbrecunamanta alli yachashcamantami gentecunata mandangapaj achca autoridadta charircacuna (Mt 23:​2-6). Huaquincunaca mandaj juezcunapuramantami carcacuna. Jesustaca sábado punllata mana respetashcamanta, costumbrecunata mana catishcamanta, juchayujcunahuan, impuestota cobrajcunahuan tandanacushcamantami rimajcuna carca. Huaquin fariseocunaca Jesusta catijcunami tucurca. Tarso llajtamanta Saulo runapishmi Jesusta cati callarirca (Mt 9:11; 12:14; Mr 7:5; Lu 6:2; Hch 26:5).

G

• gachu.

  Animalcunapaj gachucunataca vasocunata shinami charijcuna carca. Shinallataj aceiteta, tintata, pinturacunatami chaipi huaquichijcuna carca. Chaihuanmi musicatapish tocajcuna carca. Señalta cungapajpishmi tocajcuna carca (1Sa 16:​1, 13; 1Re 1:39; Eze 9:2). Huaquinpica gachuca fuerzata charishcata, mishaj cashcatapish ricuchingapajmi can (Dt 33:17; Miq 4:13; Lu 1:69).

• garrucha.

  Fierro puntayuj suni caspimi can. Tarpuj runacunaca animalcunata purichingapajmi garruchataca utilizancuna. Yachaj runacunapaj shimicunataca garrucha puntahuanmi chꞌimbapuran. Chai shimicunaca maijan runatapish shuj alli consejota catichunmi ayudan. Garrucha puntapi jaitana nishpaca mana purisha nij huagra garrucha puntahuan tujsijpi mana cazushpa, paillataj garrucha puntapi jaitashpa llaqui tucushcatami ricuchin (Hch 26:14; Jue 3:31).

• Gehena.

  Hinón pugru pambatami griego rimaipica Gehena nin. Chaica ñaupa Jerusalén inti huashicun ura ladomanmi saquirij carca (Jer 7:31). Chai pugru pambaca Jerusalén canllamanmi carca. Chaimantami chai pugru pambapica basuracunata rupachijcuna carca. Profeciacunapica chai pugru pambapi huañushcacunapaj cuerpota shitana cashcatami huillan (Jer 7:32; 19:6). Causaj gentecunata, causaj animalcunata rupachingapaj o llaquichingapaj chaipi shitashcataca ni maipi mana huillanchu. Chaimantami chai pambaca huañushca gentecunata huiñai huiñaita ninahuan llaquichina cashcataca mana ricuchin. Jesuspish, Jesusta catijcunapish ‘qꞌuipa huañui’ tiyanata ricuchingapaj, huiñaipaj tucuchishca canata ricuchingapajmi Gehena nijcuna carca (Ap 20:14; Mt 5:22; 10:28).

• gobierno.

  Cai shimica Dioslla mandana cashcata ricuchingapajmi can. Diosca paipaj gobiernopi Jatun Mandaj cachunca paipaj Churi Cristo Jesustami churashca (Mt 12:28; Lu 4:43; 1Co 15:50).

• griego.

  Cai rimaitaca Grecia llajtamanta gentecunami parlaj carca. Shinallataj Grecia llajtapi huacharijcuna o chai llajtamanta caj familiacunami cai rimaitaca parlajcuna carca. Griego rimaipi Dios quillcachishcacunapica Grecia llajtamanta gentecunata, paicunapaj costumbrecunata, rimaita catijcunatami griego nin (Joe 3:6; Jn 12:20).

H

• Hades.

  Cai shimica griego rimaipimi quillcashca can. Cutin hebreo rimaipica “Seol” ninmi. Chai shimitami huañushcacuna samaricujta ricuchingapaj “Pambana Jutcu” nishpa traducishca. Callari letrataca mayusculapimi can. PAMBANA JUTCU shimita ricui.

• hebreo.

  Amorreocunamanta chꞌican cashcata ricuchingapajmi Abrantaca (Abrahán) hebreo nijcuna carca. Qꞌuipamanca Jacobpaj huahua huahuacunata, paicuna parlashca shimitapishmi hebreo nijcuna carca. Jesús causashca punllacunapica hebreo rimaica ñami arameo rimaihuan chagrushca carca. Chai rimaitami Cristopish, paipaj catijcunapish parlajcuna carca (Gé 14:13; Éx 5:3; Hch 26:14).

• Hermes.

  Griegocunapaj diosmi carca. Shinallataj Zeuspaj churimi carca. Paitaca dioscunamanta imatapish huillaj, alli yachachij dios nijcunami carca. Chaimantami Listra llajtapica Pablotaca Hermesmi canga nishpa pandata yuyarcacuna (Hch 14:12).

• Herodes.

  Judiocunata mandajcunapaj apellidomi carca. Paicunataca Roma llajtata mandajmi churaj carca. Jatun Herodesca Diospaj huasita Jerusalenpi allichishcamanta, Jesusta huañuchisha nishpa huahuacunata huañuchichun mandashcamantami rijsishca carca (Mt 2:16; Lu 1:5). Herodes Arquelao, Herodes Antipasca Jatun Herodespaj churicunami carca. Paicunatami paicunapaj yaya mandacushca huaquin ladocunata mandachun agllarcacuna (Mt 2:22). Chuscupi chaupishcamanta shuj partellata mandajpipish Antipastaca rey Herodes nijcunami carca. Quimsa huata chaupita Jesús huillacujpi, Hechos capítulo 12-pi imalla tucushcata parlashca punllacunacamami paica mandarca (Mr 6:​14-17; Lu 3:​1, 19, 20; 13:​31, 32; 23:​6-15; Hch 4:27; 13:1). Chai qꞌuipaca Jatun Herodespaj nieto Herodes Agripatami (Agripa I) Diospaj ángel huañuchirca. Paica ashalla tiempotami mandarca (Hch 12:​1-6, 18-23). Qꞌuipaca paipaj churi Agripami (Agripa II) mandai callarirca. Paica judiocuna Roma llajtapaj contra jataringacamami mandarca (Hch 23:35; 25:​13, 22-27; 26:​1, 2, 19-32).

• Herodesta catijcuna.

  Paicunataca herodianocuna nishpapishmi rijsijcuna carca. Romanocuna churashca Herodescunapaj yuyaicunatami apoyajcuna carca. Maijan saduceocunapish paicunapuramantami cashcangacuna. Herodianocunaca Jesuspaj contra tucungapajmi fariseocunahuan tandanacurcacuna (Mr 3:6).

• hisopo.

  Cai plantaca ñañujlla ramacunata, hojacunatami charin. Ima mapa illajlla cangapajmi yahuarta o yacuta hisopo ramacunahuan tsirapajcuna carca. Cai plantataca mejorana siria ninmi (Origanum maru; Origanum syriacum). Juan 19:​29-pica mejorana pꞌangacunata shuj ramapi huatashcatami parlacuj yuyachin. Mana cashpaca durra nishca plantamantami parlacuj yuyachin. Caica sorgo común nishcapuramantami can (Sorghum vulgare). Cai plantapaj rama caspicuna suni cashcamantami jayaj vinotaca esponjapi churashpa Jesuspaj shimiman cꞌuchuyachi tucurcacuna (Heb 9:19).

• huainayaj huarmi, huainayaj cꞌari.

  Cullqui jahua huainayajcunami. Griego rimaipica pórnē shimica ‘cꞌatuna’ nisha ninmi. Moisesman cushca leypi mandashca shinaca huainayajcunaca mana tiyanachu carca. Huainayashcamanta cullquitaca Jehová Diospaj huasipica mana chasquijcunachu carca. Shinapish panda religioncunapica huainayashcamanta cullquitaca chasquijcunallami carca (Dt 23:​17, 18; 1Re 14:24). Bibliapica huainayaj huarmi nishpaca gentecunamanta, llajtacunamanta, organizacioncunamantami parlan. Paicunaca Diosta sirvinchij nishpapish yanga dioscunatami adorancuna. Apocalipsis libropica poderta charingapaj, achca charinacunata mirachingapaj cai pacha mandajcunahuan apanacushcamantami “Babilonia Jatun llajta” nishca panda religioncunataca huainayaj huarmi nin (Ap 17:​1-5; 18:3; 1Cr 5:25).

• huainayana.

  Griego rimaipi moikheia nishpaca cazarashcacuna quiquin munaimanta shujtaj cꞌarihuan o shujtaj huarmihuan aichapi chayarinamantami parlacun (Éx 20:14; Mt 5:27; 19:9). Quillcachishcacunapi griego rimaipi pornéia nishpaca Dios millanayachishca chꞌican laya huainayana juchacunamantami parlacun. Juchacunaca cazadocuna shujtajcunahuan huainayana, cullqui jahua huainayana, solterocuna huainayana, cꞌaripura huarmipura huainayana, animalcunahuan huainayanami can. Apocalipsis libropica huainayaj “Babilonia Jatun llajta” nishpaca religioncuna poderta chasquingapaj, achca charinacunata chasquingapaj cai pacha mandajcunahuan chagrurishcatami ricuchin (Ap 14:8; 17:2; 18:3; Mt 5:32; Hch 15:29; Gál 5:19). HUAINAYAJ HUARMI, HUAINAYAJ CꞌARI shimita ricui.

• huañushcacuna causarina.

  Shuj huañushca runa causaiman tigrana cashcatami parlan. Griego rimaipi anástasis shimica ‘jatarichina’ o ‘alzana’ nisha ninmi. Bibliapica iscun huañushcacuna causarishcamantami parlan. Jesustaca Jehová Diosmi causachirca. Elías, Eliseo, Jesús, Pedro, Pabloca Diospaj poderhuanmi huañushcacunata causachircacuna. Jehová Diospaj munai pajtarichunca ‘cashcata rurajcunapish, cashcata mana rurajcunapish’ cai allpapi causarinami can (Hch 24:15). Bibliapica huañushcacuna jahua pachapi causarinatapishmi parlan. Paicunatami ‘punta causarijcuna’ nin. Chai causarijcunaca espirituhuan agllashca Jesuspaj huauquicunami can (Flp 3:11; Ap 20:​5, 6; Jn 5:​28, 29; 11:25).

I

• Ilírico.

  Cai llajtaca Romapimi saquirij carca. Grecia llajta inti huashicun janaj ladopimi carca. Pablo huillacushpaca chai caru llajtacamami chayarca. Shinapish Ilírico llajtapi huillashcataca mana parlanchu (Ro 15:19).

• incienso.

  Caica mishquijllata ashnacuj qꞌuihuacunahuanmi rurashca carca. Carpa huasipi, Diospaj huasipica chuscu ingredientecunahuan rurashca inciensotami preparajcuna carca. Chai inciensotaca tutamanta lado, chishi ladomi Diospajlla chꞌicanyachishca ucupi tiyaj inciensota rupachina altarpi rupachijcuna carca. Juchacunata perdonana punllaca Diospajlla ashtahuan chꞌicanyachishca ucupimi rupachijcuna carca. Inciensoca Diosta tucui shunguhuan sirvijcunapaj mañaita Dios uyaj cashcatami ricuchin. Jesusta catijcunapajca inciensota rupachinaca mana minishtirishcachu carca (Éx 30:​34, 35; Le 16:13; Ap 5:8).

• inciensota rupachina.

  Chaica oromanta, cullquimanta, cobremanta rurashca shuj uchilla pala shinami carca. Carpa huasipi, Diospaj huasipipish inciensota rupachingapajmi utilizajcuna carca. Shinallataj sacrificiocunata cuna altarmanta carbonta llujchingapaj, oro candelerocunapi rupachishca ushpata anchuchingapajmi utilizajcuna carca. Chaitaca inciensota churana nishpapishmi rijsijcuna carca (Éx 37:23; 2Cr 26:19; Heb 9:4).

• Israel.

  Jacobtami Israel nishpa Diosca shutichirca. Jacobpaj tucui huahua huahuacunatapishmi Israel nijcuna carca. Jacobpaj 12 churicunapaj huahua huahuacunatami achca cutin Israelpaj churicuna, Israelpaj huasi, Israel llajta, Israelmanta runacuna, israelitacuna nin. Ura ladopi caj ishqui familiacunamanta chꞌicanyarishpa janaj ladopi causaj chunga familiacunatapishmi Israel nijcuna carca. Tiempohuanca Dios agllashcacunatami ‘Diospaj Israel llajta’ nijcuna carca (Gál 6:16; Gé 32:28; Hch 4:10; Ro 9:6).

J

• Jacob.

  Isaacpaj, Rebecapaj churimi. Qꞌuipamanca paitaca Israel nishpami Diosca shutichirca. Paimi israelitacunapaj yaya tucurca. (Paicunataca israelitacuna, tiempohuanca judiocuna nishpami rijsijcuna carca). Jacobca 12 churicunatami charirca. Paicunami paicunapaj huahua huahuacunandij Israelpaj 12 familiacuna tucurca. Israel llajtamanta parlangapajmi Jacob nishpa catircacuna (Gé 32:28; Mt 22:32).

• jatun jutcu.

  Griego rimaipi ábyssos nishcamantami shamun. Cai shimica ‘ucujman’, ‘mana tupaipaj’, ‘mana tucuripaj’ nisha ninmi. Griego rimaipi Dios quillcachishcacunapica maijanpish maipi huichcashca cashcata, ima shina huichcashca cashcatami ricuchin. Huañushcacunata pambana jutcumanta parlashpapish shujtaj yuyaicunamantami parlai tucun (Lu 8:31; Ro 10:7; Ap 20:3).

• jatun llaqui.

  Griego rimaipica “jatun llaqui” nishpaca tucui laya llaquicunata apana cashcatami ricuchin. Jesusca Jerusalén llajta jatun llaquita apana cashcatami huillarca. Shinallataj shamuj punllacunapi pai jatun poderhuan shamujpi tucui gentecuna jatun llaquita apana cashcatapishmi huillarca (Mt 24:​21, 29-31). Apóstol Pabloca jatun llaquimanta parlashpaca ‘Diosta mana rijsijcunata, Jesucristomanta alli huillaicunata mana cazujcunatapish’ cashcata rurashpa Dios llaquichina cashcatami ricuchirca. Apocalipsis capítulo 19-pica manchanai millai animalta, cai allpata mandajcunata, paicunapaj soldadocunatapish llaquichingapaj jahua pachamanta soldadocunata Jesús pushacujtami ricuchin (2Te 1:​6-8; Ap 19:​11-21). ‘Achca gentecuna’ chai jatun llaquimanta quishpirijtapishmi huillan (Ap 7:​9, 14). ARMAGEDÓN shimita ricui.

• Jehová.

  Traducción del Nuevo Mundo Bibliapica Mateomanta Apocalipsiscamaca 237 cutinmi Jehová Diospaj shutica ricurin. Diospaj shutita churangapajca cai yuyaicunatami catishca:

  1. Jesuspaj punllacunapi, paipaj apostolcunapaj punllacunapica Hebreo rimaipi Dios quillcachishcacunapica tucui ladocunapimi Tetragrámaton nishcaca ricurirca (Tetragramatonca hebreo rimai chuscu letracunapi יהוה Diospaj shuti quillcashca cashcatami ricuchin).

  2. Jesuspaj punllacunapi, paipaj apostolcunapaj punllacunapica Hebreo rimaipi quillcachishcacunata griego rimaiman traducishcacunapica Tetragrámaton nishcami tiyarca.

  3. Griego rimaipi Dios quillcachishcacunapipish Jesús cutin cutin Diospaj shutimanta parlashcata, chai shutita rijsichishcatapishmi huillan (Jn 17:​6, 11, 12, 26).

  4. Hebreo rimaipi quillcachishcacunapaj qꞌuipami Griego rimaipi quillcachishcacunaca tiyarca. Chaicunatapish Diosllatajmi yuyaita cushpa quillcachirca. Chaimantami chai quillcachishcacunamanta paipaj shuti ñapish chingarinaca mana alli ricurin.

  5. Griego rimaipi Dios quillcachishcacunapica Diospaj shutica ashalla letracunallapimi ricurin (Ap 19:​1, 3, 4, 6).

  6. Judiocunapaj ñaupa quillcachishcacunapica judiocunapuramanta Jesusta catijcunapish Diospaj shutimanta parlashcatami ricuchin.

  7. Hebreo rimaipi Dios quillcachishcacunamanta maijan yuyaicunaca Griego rimaipi Dios quillcachishcacunapimi huaquin partecunapi ricurin. Bibliamanta yachaj maijan runacunaca chai partecunapimi Diospaj shutica ricurij yuyachin nincunami.

  8. Bibliataca achca shimicunapimi traducishca. Griego rimaipi Dios quillcachishcacunapica Diospaj shutica 100 yalli rimaicunapimi ricurin.

  Chaimantami Griego rimaipi Dios quillcachishcacunapica maipi cashcapi Diospaj shutita churanaca alli can. Chaitami Traducción del Nuevo Mundo Bibliata traducijcunaca rurashca. Paicunaca Diospaj shutitami achcata respetancuna. Shinallataj callari quillcachishcacunamanta imatapish anchuchinatami manchancuna (Ap 22:​18, 19).

• jucha illaj.

  Jehová Diosmi tucuipi limpio, tucuipi jucha illaj can. (Éx 28:36; 1Sa 2:2; Jn 17:11). Cutin gentecunamanta (Mr 6:20; Hch 3:21), imacunamanta (Ro 7:12; 11:16; 2Ti 3:15), ima ladocunamanta (Mt 4:5; Hch 7:33; Heb 9:1), ima ruraicunamanta (Éx 36:4) parlashpaca hebreo, griego rimaicunapica chꞌicanyachishca, Diospajta rurangapaj agllashca, Diosta adorangapaj chꞌicanyachishca nisha ninmi. Griego rimaipi Dios quillcachishcacunapica “jucha illaj” nishpaca shuj persona tucuipi chuya cashcatami ricuchin (2Co 7:1; 1Pe 1:​15, 16).

• Juchacunata perdonana punlla.

  Chai punllami israelitacunapajca tucuimanta yalli ashtahuan jatun punlla carca. Chai punllataca Yom Kipur nijcunapishmi carca. (Hebreo rimaipica yohm hakkippurím ninmi. Chaica ‘juchacunata tapana punlla’ nisha ninmi). Chaitaca 10 de etanim quillapimi rurajcuna carca. Chai punllallapimi sacerdotecunata jatun mandajca carpa huasipi Diospajlla ashtahuan chꞌicanyachishca ucuman yaicuj carca. Asha huatacuna qꞌuipaca Diospaj huasipimi chashnallataj ruraj carca. Chai ucupimi sacrificiota rurashca yahuartaca paicunapaj juchacunamanta, caishuj levitacunapaj juchacunamanta, pueblopaj juchacunamantapish cuj carca. Chai sacrificiocunaca Jesuspaj sacrificiotami ricuchirca. Jesusca shuj cutinlla sacrificiota rurashpami gentecunapaj juchacunataca huiñaipaj libri anchuchirca. Chashnami Jehová Dioshuan tucuicuna alli tucuchun ayudarca. Chai punllaca sumaj tandanacuna punlla, ayunana punllami carca. Shinallataj chai punllaca sabadomi carca. Chai punllapica ima trabajota mana ruranachu carca (Le 23:​27, 28; Hch 27:9; Col. 1:20; Heb 9:12).

• juchamanta cushca ofrenda.

  Mana munaimanta rurashca juchacunamantami cai ofrendataca cujcuna carca. Chꞌican chꞌican animalcunatami huagracunamanta callarishpa uchilla palomacunacama cujcuna carca. Chaitaca pobrecuna cashpapish, charijcuna cashpapish paicunapaj juchacunata perdonachunmi cujcuna carca (Le 4:​27, 29; Heb 10:8).

• Judá.

  Jacobpaj, Leapaj cuarto churimi carca. Jacobca manaraj huañushpami Judapaj huahua huahuacunamanta shuj jatun mandaj achca tiempota mandana cashcata huillarca. Jesusca cai allpapica Judapaj huahua huahuacunamantami huacharirca. Judapaj familiacunatapish, Judá llajtata mandajtapishmi cai shutihuan rijsijcuna carca (Gé 29:35; 49:10; Heb 7:14).

• judío.

  Judapaj familiamanta cashcatami ricuchin. Israel llajtamanta chunga familiacunata mandaj urmashca qꞌuipami paicunataca judío nishpa rijsi callarircacuna (2Re 16:6). Babilonia llajtaman pushashca qꞌuipa Israel llajtaman cutin tigraj israelitacunatami judiocuna nijcuna carca (Esd 4:12). Qꞌuipamanca israelitacunata tucui llajtacunamanta chꞌican cashcata ricuchingapajmi judío nijcuna carca (Est 3:6). Apóstol Pabloca congregación ucupi mai llajtamanta cana mana importante cashcata ricuchingapajmi cai shimita nirca (Ro 2:​28, 29; Gál 3:28).

• Juicio Punlla.

  Chaica shuj punlla o shuj tiempomi can. Chaipimi Diosca huaquin gentecunata, llajtacunata o tucui gentecunata juzgan. Chai tiempopica huañungapaj juzgashcacunaca huañungacunami. Cutin caishujcunaca quishpirinata, huiñai causaita chasquina oportunidadtami charingacuna. Jesucristopish, paipaj apostolcunapish shamuj punllacunapi ‘Juicio Punlla’ tiyanamantami parlarcacuna. Chai punllapimi causajcunapish, ñaupa punllacunaman huañushcacunapish juzgashca cangacuna (Mt 12:36).

• jurana.

  Cai shimica cierto cashcata ricuchingapaj, imata rurangapaj o imata mana rurangapaj pajtachinataj cashcatami ricuchin. Ashtahuantajca Diosman imata ari nishpa pajtachina cashcatami ricuchin. Jehová Diosca pai ari nishcata pajtachina cashcata ricuchingapajmi Abrahanmanca shuj juramentota rurarca (Gé 14:22; Heb 6:​16, 17).

• juzgashpa tiyarina.

  Canllaman rurashca shuj plataformami carca. Chaimanca gradacunatami huichiyajcuna carca. Juezcunaca gentecunahuan parlangapaj, paicuna imata yuyarishcata huillangapajmi chaipi tiyarijcuna carca. “Dios juzgashpa tiyarina”, “Cristo juzgashpa tiyarina” nishca shimicunaca Jehová Dios gentecunata juzgana cashcatami ricuchin (Ro 14:​10, nota; 2Co 5:10; Jn 19:13).

L

• langosta.

  Cai animalcunataca saltamontecuna o chapulín nincunami. Paicunaca achcacunapura tucushpami shuj ladomanta caishuj ladoman rincuna. Moisesman cushca leypica chai animalca chuyami carca. Chaimantami micunalla carca. Achca langostacuna maita pasashpa tucuita micujpi, tucuita llaquichijpica shuj plaga shina cashcatami ricujcuna carca (Éx 10:14; Mt 3:4).

• lepra.

  Chaica aicha carapi ricurij millai ungüimi carca. Lepraca churanata, huasicunatapishmi japij carca. Bibliapi parlashca lepra ungüica mana cunan punllacunapi tiyaj lepra ungüi shinachu carca (Le 14:54, 55; Lu 5:12).

• leptón.

  Judiocunaca apostolcunapaj tiempopica cai ashtahuan uchilla moneda cullquitami charijcuna carca. Chai cullquica cobremanta, broncemanta rurashcami carca (Mr 12:42; Lu 21:2; notacuna).

• levadura.

  Caica masata pꞌunguillichingapaj, liquidota agruyachingapajmi can. Ñaupaman rurashca asha masata huaquichishpa shujtaj masacunapi churajpimi pꞌunguillichin. Bibliapica juchata, mana alli ruraicunata ricuchingapajmi levadurahuan chꞌimbapuran. Shinallataj mana pi ricucujpi mirarishpa tucui ladocunata rij cashcata ricuchingapajmi levadurahuan chꞌimbapuran (Éx 12:20; Mt 13:33; Gál 5:9).

• Levadura illaj tandata micuna fiesta.

  Israelitacunaca huatapica quimsa jatun fiestacunatami rurajcuna carca. Chai fiestami callari fiesta carca. Pascua fiesta qꞌuipami 15 de nisán quillapi callarij carca. Canchis punllacunatami chai fiestataca rurajcuna carca. Chai fiesta punllacunapica Egiptomanta llujshishcata yuyaringapajmi levadura illaj tandallata micui tucurcacuna (Éx 23:15; Mr 14:1).

• Leví; levita.

  Paica Jacobpaj, Leapaj tercer churimi carca. Paipaj familiatapishmi Leví nishpa rijsijcuna carca. Levipaj quimsa churicunami levitacuna tiyachun quimsa grupocunata callarichirca. Sacerdotecunapish Levipaj familiamantami carcacuna. Dios cusha nishca allpapica Levipaj familiamanca ima allpata mana curcachu. Shinapish caishuj familiacunapi tiyaj 48 llajtacunatami chasquircacuna (Dt 10:8; 1Cr 6:1; Heb 7:11).

• ley.

  Mayúscula letrahuan quillcashca cajpica Moisesman cushca leyta o Bibliamanta callari pichca librocunatami ricuchin. Cutin minúscula letrahuan quillcashca cajpica Moisesman cushca leypi tiyaj maijan mandashcacunata o shujlla mandashcatami ricuchin (Nú 15:16; Dt 4:8; Mt 7:12; Gál 3:24).

• lucero.

  ‘Manaraj pacarijpi llujshij estrellami’. Cai estrellaca inti manaraj ricurijpimi inti llujshin ladota ultimota llujshin. Chashnami shuj mushuj punlla cashcata ricuchin (Ap 22:16; 2Pe 1:19).

LL

• llajtata mandajcuna.

  Roma llajtapi tiyaj maijan ladocunatami gobiernota ayudashpa mandajcuna carca. Paicunaca orden tiyachun, cullqui ama desperdiciarichunmi ricujcuna carca. Shinallataj leyta mana cazujcunatami juzgajcuna carca. Castigachunpishmi mandajcuna carca (Hch 16:20).

• llaquichina caspi.

  Griego rimaipica staurós ninmi. Caica huichiman shayachishca caspimi can. Chashna laya caspipimi Jesustaca huañuchircacuna. Cristo manaraj shamujpi achca huatacuna huashaman panda religioncuna crishca cruzmantaca mana parlacunchu. “Llaquichina caspi” shimica staurós ima nisha nishcatami alli ricuchin. Staurós shimica Jesusta catijcuna llaquichishca cana cashcata, llaquita apana cashcata, pingaipi churashca cana cashcatapishmi ricuchin. CASPI shimita ricui (Mt 16:24; Heb 12:2).

• llaquirina.

  Pi huañushcamanta, ima llaquita charishcamanta nanarishcata ricuchinami can. Ñaupa punllacunapica pi huañujpica achca tiempotami llaquilla cajcuna carca. Caparishpa huacashca jahuapish shujtaj laya churanacunatami churarijcuna carca. Umapipish ushpatami shitarijcuna carca. Churanatapish lliquirijcunami carca, pechopipish huajtarijcunami carca. Maipica veloriocunapi huacachunmi gentecunata invitajcuna carca. Chai invitashcacunamanca huacashcamantami pagajcuna carca (Est 4:3; Mt 11:17; Mr 5:38; Jn 11:33; Ap 21:4).

• llullu luna.

  Judiocunapaj calendariopica cada quillapaj punta punllami carca. Chai punllaca tandanacungapaj, jatun micuicunata rurangapaj, sacrificiocunata rurangapajmi carca. Tiempohuanca tucui llajtapimi chai fiestata rurajcuna carca. Chai punllapica mana trabajajcunachu carca (Nú 10:10; 2Cr 8:13; Col 2:16).

M

• macanacungapaj churana.

  Soldadocunaca shujtajcuna ama llaquichichunmi cascota, pechopi fierro churanata, cinturonta, sampicunapi taparinata churarijcuna carca. Escudotapishmi apajcuna carca (1Sa 31:9; Ef 6:​13-17).

• Macedonia.

  Grecia llajta janaj ladopimi saquirij carca. Alejandro Magno mandacujpica chai llajtaca rijsishcami tucurca. Shinapish romanocunami macanacushpa chai llajtata japirca. Punta cutin apóstol Pablo Europata visitajpica Macedoniaca romanocunapajmi carca. Pabloca quimsa cutinmi chai llajtata visitarca (Hch 16:9).

• maná.

  Cai micuitami israelitacunaca 40 huatacunata chaquishca pambapi cashpa micurcacuna. Jehová Diosmi shuj milagrota rurashpa cai micunata curca. Tutamanta ladomi tucui punllacuna pambapi ricurij carca. Shinapish sábado punllapica mana ricurijchu carca. Punta cutin cai micuita ricushpami israelitacunaca: “¿Caica imashi?” nircacuna (Éx 16:​13-15, 35). Hebreo rimaipica “¿Man huʼ?” nisha ninmi. Jesuspishmi maná micuimanta parlarca (Jn 6:​49, 50).

• mana alli nina.

  Pita llaquichisha nina o ima llaqui tucushca cachun ninami. Pero yallitaj pꞌiñarishpa cꞌamina cashcataca mana nisha ninchu. Dios huillajpi o pai cachashca runa huillajpica chai mana alli nishcaca achca valishcami can. Pajtarinataj cashcatami ricuchin (Gé 12:3; Nú 22:12; Mr 11:21; Hch 23:12; Ro 12:14; Gál 3:10). Maipica jurashca jahua mana pajtachijpi castigashpa maldicinami (Ne 10:29).

• manaraj pacarijpi llujshij estrella.

  LUCERO shimita ricui.

• mandashcacunata quillcaj.

  Hebreo rimaipi Dios quillcachishcacunatami copiacunata rurajcuna carca. Jesús cai allpapi cajpica Leymanta yachaj gentecunami carca. Paicunami Jesustaca llaquichircacuna (Esd 7:​6, nota; Mr 12:​38, 39; 14:1).

• mapa.

  Bibliapica ima mapa cashcata, maijanpish aichapi mapa cashcata, huainayajcuna cashcata ricuchingapajmi chashna nin. Huaquinpica Moisesman cushca leypi nishca shina mana chasquipaj o mana chuya cashcata ricuchingapajmi chashna nin (Le 5:2; 13:45; Mt 10:1; Hch 10:14; Ef 5:5). CHUYA, IMA MAPA ILLAJLLA shimita ricui.

• maquicunata churana.

  Imata mingangapaj, bendiciangapaj, alliyachingapaj o espíritu santota cungapajmi maijan runapaj jahuapi maquicunata churajcuna carca (Nú 27:18; Hch 19:6; 1Ti 5:22).

• Mediamanta.

  Paicunaca Madaipaj huahua huahuacunamantami carca. Madái runaca Jafetpaj shuj churimi carca. Paicunaca iraní urcu chaqui pambacunapimi causai callarircacuna. Qꞌuipaca chai ladoca Media llajtami tucurca. Media llajtamanta gentecunapishmi huata 33 Pentecostés fiestapica Jerusalenpi carcacuna (Hch 2:9).

• Mesías.

  Cai shimica hebreo rimaipica “agllashca” nisha ninmi. Cutin griego rimaipica Cristo nisha ninmi (Da 9:25; Jn 1:41).

• milagrocuna.

  Diospaj fuerzahuan o shujtaj espiritucunapaj fuerzahuan rurashcacunami. Bibliapica ‘señalcuna’, ‘mancharina ruraicuna’, ‘chꞌican laya milagrocuna’ ninmi (Mt 11:20; Hch 4:22; Heb 2:4).

• Millai.

  Diablo Satanastami chashna nin. Paimi Diospaj contra can, Dios mandashcacunatapish mana cazun (Mt 6:13; 1Jn 5:19).

• millai pinganayai ruraicuna.

  Caitaca griego rimaipica asélgueia ninmi. Diospaj leycunata mana cazushpa, millai ruraicunata mana pingashpa, mana pacashpa ruranami. Chashna rurajcunaca Diospaj autoridadta, Dios churashca leycunata, mandashcacunata mana respetashcatami ricuchin. Chai mana alli ruraicunaca jatun juchami can (Gál 5:19; 2Pe 2:7).

• mina.

  Ñaupa punllacunapica shuj minaca 100 dracma cullquimi valij carca. Shinallataj 340 gramostami pesaj carca (Lu 19:13).

• mirra.

  Huaquin plantacunamanta, Commiphora nishca uchilla casha yuracunamanta llujshij mishquijllata ashnacuj yacu layami can. Dios agllashcacunapaj jahuapi churangapajmi aceitetaca mirrahuan chagrujcuna carca. Mishquijllata ashnachunmi churanacunapi, camacunapi churajcuna carca. Shinallataj masajecunata rurana aceitepi, cuerpopi churarina cremacunapimi churajcuna carca. Jambi shina cachunmi mirrataca vinopi chagrujcuna carca. Huañushcacunata pambangapajpishmi churajcuna carca (Éx 30:23; Pr 7:17; Mr 15:23; Jn 19:39).

• Moisesman cushca ley.

  Jehová Diosmi Jesús manaraj huacharijpi 1513 huatapi Sinaí chaquishca pambapi Moisesman chai leyta curca. Cutin chai leytami Moisesca israelitacunaman curca. Bibliamanta callari pichca librocunatami Ley nin (Mt 5:17; Lu 24:44).

• Moloc.

  Amonitacunapaj diosmi carca. Moloc nishpaca Malcam, Milcom, Mólek diosllamantatajmi parlacuj yuyachin (Hch 7:43).

N

• nardo.

  Mishquijllata ashnacuj puca aceitemi carca. Achca cullquimi valirca. Chai aceitetaca espicanardo (Nardostachys jatamansi) nishcamantami llujshichijcuna carca. Yallitaj caro valishcamantami mana tanto valij aceitecunahuan chagrujcuna carca. Shinapish Marcos, Juanca ‘mana imahuan chagrushca’ nardo aceiteta Jesuspi churashcatami parlarcacuna (Mr 14:3; Jn 12:3).

• Nazareno.

  Nazaretmanta cashcamantami Jesustaca nazareno nijcuna carca. Cai shimica Isaías 11:​1-pi nishca shinaca hebreo rimaipica “retoño yura” nisha ninmi. Tiempohuanca Jesusta catijcunatapishmi nazareno nijcuna carca (Mt 2:23; Hch 24:5).

• nina cucha.

  Caitaca “azufrehuan rupacuj nina cucha” ninmi. Shinallataj “qꞌuipa huañui” ninmi. Chaipimi juchata rurashpa mana arrepintirijcunata, Diablota, huañuita, Pambana Jutcutapish (Hades) shitan. Espíritu cuerpota charijta, huañuita, Hadesta nina cuchapi shitajpica ima dañota mana ruranchu. Chaimantami nina cuchaca huiñaipaj llaquichina cashcataca mana ricuchin. Ashtahuanpish huiñaipaj tucuchina cashcatami ricuchin (Ap 19:20; 20:​14, 15; 21:8).

• nisán.

  Babilonia llajtamanta tigrashca qꞌuipami abib quillataca nisán nishpa shutichircacuna. Judiocunapaj calendariopica punta quillami carca. Cutin shujtaj calendariocunapica séptimo quillami carca. Marzo chaupi quillamanta callarishpaca abril chaupi quillapimi tucurij carca. (Ne 2:1). 14 de Nisán punllapimi judiocunaca Pascua fiestata rurajcuna carca. Chai punllapimi Jesucristopish pai huañushca punllata yuyarina tandanacuita callarichirca (Lu 22:​15, 19, 20). Chai punllallatajmi paitaca llaquichina caspipi huañuchircacuna (Lu 23:​44-46).

Ñ

• ñan.

  Bibliapica Diospaj ñaupajpi alli causacushcata o mana alli causacushcata ricuchingapajmi ñan nin. Jesucristota catijcunataca paipi feta churashcamanta, paipaj ejemplota catishcamantami ‘Diospaj Ñanpi’ purincuna nishpa rijsijcuna carca (Hch 19:9).

• ñaupa punlla.

  CAI PACHA shimita ricui.

O

• olíbano.

  Caitaca yuracunamanta, Boswellia nishca plantacunamantami llujshichijcuna carca. Rupachijpica mishquijllatami ashnaj carca. Carpa huasipi, Diospaj huasipimi alli inciensota rurangapaj olibanotaca churajcuna carca. Shinallataj ofrendata shina cushca granocuna jahuapi, Diospajlla chꞌicanyachishca ucupi tiyaj tandacuna jahuapimi churajcuna carca (Éx 30:​34-36; Le 2:1; 24:7; Mt 2:11).

P

• pambana jutcu.

  Minúscula letrapi cajpica gentecunata pambashca jutcutami ricuchin. Cutin mayúscula letrapi cajpica hebreo rimaipi Seol nishcata, griego rimaipi Hades nishcatami ricuchin. Seol, Hades shimicunaca huañushcacuna samaricujta o imata mana sintishcata, imata mana rurai tucushcatami ricuchin (Gé 47:30; Ec 9:10; Mt 27:61; Hch 2:31). Griego rimaipi mnēméion nishca shimitaca “yuyarina” nishpami traducishca. Chai shimica huañushcata yuyarina nisha ninmi (Jn 5:​28, 29).

• paraíso.

  Shuj sumaj huertami can. Callaripica Jehová Diosca punta cꞌari, punta huarmi causachunmi Edén nishca huertata rurarca. Jesús caspipi cashpaca paipaj ladopi caj shuhuamanca cai allpa shuj paraíso tucuna cashcatami intindichirca. 2 Corintios 12:​4-pica shamuj punllapi shuj paraíso tiyanatami ricuchin. Cutin Apocalipsis 2:​7-pica jahua pacha paraisomantami parlan (Can 4:13; Lu 23:43).

• Pascua.

  Chai fiestataca Egipto llajtamanta llujshishcata yuyaringapajmi israelitacunaca cada huata 14 de abib quillapi rurajcuna carca (qꞌuipamanca cai quillataca nisán nishpami shutichircacuna). Chai fiestapica malta ovejata o malta chivotami huañuchishpa cusajcuna carca. Qꞌuipamanca jayaj verduracunata, levadura illaj tandatami micujcuna carca (Éx 12:27; Jn 6:4; 1Co 5:7).

• patio.

  Carpa huasi canllamanmi carca. Chai canlla muyundijtaca cortinacunahuan tapachishcami carca. Tiempohuanca Diospaj huasi canllamanmi patioca tiyarca. Chai patio muyundijtaca pircacunahuan rurashcami carca. Patio ucupica ofrendacunata rupachina altarmi tiyarca. Bibliapica huasi patiocunamanta, mandajcunapaj huasi patiocunamantami parlan (Éx 8:13; 27:9; 1Re 7:12; Mt 26:3; Mr 15:16; Ap 11:2).

• Pentecostés.

  Quimsa jatun fiestacunamanta segunda fiestami carca. Chai fiestata rurangapajmi judío cꞌaricunaca Jerusalenman rina carcacuna. Cai Pentecostés fiestatami Hebreo rimaipi Dios quillcachishcacunapica Cosechana fiesta nin. Pentecostés shimica ‘quincuagésimo punlla’ nisha ninmi. Chaitaca 16 de nisán pasashca 50 punllacuna qꞌuipami rurajcuna carca (Éx 23:16; 34:22; Hch 2:1).

• pergamino.

  Ovejapaj, chivopaj o malta bizipaj carami carca. Chai jahuapimi quillcajcuna carca. Pergaminoca papirotapish yallimi ahuantaj carca. Bibliataca pergaminohuan rurashca rollocunapimi quillcarcacuna. Pabloca pergaminocunata apamuchunmi Timoteota mañarca. Chai pergaminocunaca Hebreo rimaipi quillcachishcacunami cashcanga. Rollos del mar Muerto nishca quillcachishcacunaca maijancunaca pergaminocunami can (2Ti 4:13).

• pilar.

  Diospaj huasita shayachingapaj, shujtaj huasicunata shayachingapajpishmi Salomonca pilarcunata churarca. Pilar nishpaca sinchi cashcatami ricuchin (1Ti 3:15). Griego rimaipi Dios quillcachishcacunapica mana cuyuchipaj cashcatami pilarhuan chꞌimbapuran (Jue 16:29; 1Re 7:21; Ap 3:12).

• pircapi churashca rumi.

  Jatun huasicunata rurangapajmi cai rumitaca shuj esquinapi churajcuna carca. Cai rumica ishquindij patacunata tandachishpa sinchiyachingapajmi carca. Pircapaj callaripi churashca rumimi ashtahuan importante rumi carca. Jatun huasicunata rurangapaj, llajta pircacunata rurangapajca shuj sinchi rumitami agllajcuna carca. Cai allpa mana cuyuchipaj cashcata ricuchingapajmi callari rumi jahuapi churashca shina can nishpa chꞌimbapuran. Congregacionta shuj huasihuan chꞌimbapurashpami Jesustapish ‘pircapaj callaripi churashca rumi’ nin (Ef 2:20; Job 38:6).

• pobrecunata ayudana.

  Imata minishtijcunatami ayudajcuna carca. Hebreo rimaipi Dios quillcachishcacunapica pobrecunata cashna o chashna ayudana cashcataca mana ninchu. Shinapish Leypica israelitacuna pobrecunata ima shina ayudana cashcatami mandarca (Mt 6:2).

• pornéia.

  HUAINAYANA shimita ricui.

• Procónsul.

  Shuj llajtata mandajmi carca. Paitaca romanocunami mandachun churajcuna carca. Paica juezcunata, soldadocunata mandangapajmi autoridadta charirca. Romanocuna pai ima shina mandacushcata ricujpipish pai mandacushca llajtapica achca autoridadtami charirca (Hch 13:7; 18:12).

• profecía.

  Diosmanta shamuj huillaicuna o paipaj munai maijan cashcata ricuchingapaj huillaicunami can. Huaquinpica shuj yachaita, shuj mandashcata, shuj juiciota o shamuj punllacunapi ima tucuna cashcatami huillan (Mt 13:14; 2Pe 1:​20, 21).

• proverbio.

  Ashalla sumaj shimicunahuan imata yachachingapajmi can. Bibliapi tiyaj proverbiocunaca mancharipaj o mana intindipajmi cai tucun. Proverbiocunaca chꞌimbapuraicunahuanmi cierto cashcata intindichin. Maipica cai nishcacunahuanmi gentecunataca pingaipi churancuna o mana ricunayachishcata ricuchincuna (Ec 12:9; 2Pe 2:22).

• punta.

  Cai shimica shuj runapaj punta huacharishca cꞌari huahuamanta parlangapajmi can (mana shuj huarmipaj punta cꞌari huahua huacharishcamanta parlangapajchu can). Ñaupa punllacunapica punta huacharishca cꞌari huahuaca familia ucupica shuj bendicionmi carca. Yaya huañujpica punta churimi familiata pushaj tucuj carca. Jesusca Jehová Diospaj punta churi cashca jahuapish ‘Dios tucui imalla rurashcacunamanta puntami’ can. Shinallataj ‘huañushcacunamanta Punta causarijmi’ can (Gé 25:33; Éx 11:5; Col 1:15; Ap 1:5).

• punta pꞌucushca grano.

  Cosechacunamanta punta granocunami. Jehová Diosca Israel llajtataca runacunamanta, animalcunamanta punta cajcunata, allpapi pꞌucushca punta granocunata paiman cuchunmi mandarca. Israelitacunaca Levadura illaj tandata micuna fiestapi, Pentecostés fiestapipishmi punta pꞌucushcacunata Diosman cujcuna carca. Cristota, jahua pachaman ringapaj agllashcacunatapishmi punta pꞌucushca grano nin (1Co 15:23; Nú 15:21; Pr 3:​9, nota; Ap 14:4).

• Punta Pushaj.

  Griego rimaipi “Punta Pushaj” nishpaca Jesucristo imata ruracushcatami ricuchin. Paica tucui shunguhuan Diosta sirvijcunatami juchamanta, huañuimanta quishpichin. Huiñai causaimanpishmi pushan (Hch 3:15; 5:31; Heb 2:10; 12:2).

Q

• querubín.

  Cai angelca shujtaj angelcunamanta ashtahuan yalli importante trabajota rurajmi can. Paica mana shuj serafinhuan igualchu can (Gé 3:24; Éx 25:20; Is 37:16; Heb 9:5).

R

• racu tela.

  Querubincunahuan bordashca sumaj telami carca. Carpa huasipipish, Diospaj huasipipish, cai telami Diospajlla chꞌicanyachishca ucumanta ashtahuan chꞌicanyachishca ucutaca separaj carca (Éx 26:31; 2Cr 3:14; Mt 27:51; Heb 9:3).

• randishpa quishpichina.

  Prezumanta, castigashca cashcamanta, ima llaquimanta, juchamanta o shuj obligacionmanta pagashpa cacharichinami. Mana siempre cullquihuan paganachu carca (Is 43:3). Israel llajtapica punta huacharishca cꞌari huahuacunapish, punta huacharishca animalcunapish Jehová Diospajmi carca. Paita adorangapaj chꞌicanyachishcami carca. Chai obligacionmanta cacharichingapajca shuj preciotami pagana carcacuna (Nú 3:​45, 46; 18:​15, 16). Shuj pꞌiña huagrata mana cuidashcamanta pitapish huañuchijpica huagrapaj dueño ama huañungapajca paganami carca (Éx 21:​29, 30). Shinapish huañuchina munaihuan huañuchij runa quishpiringapaj cullquita pagasha nijpipish mana chasquijcunachu carca (Nú 35:31). Bibliapica Diosta cazujcunata juchamanta, huañuimanta Cristo paipaj causaita cushpa randishpa quishpichishcatami parlan (Sl 49:​7, 8; Mt 20:28; Ef 1:7).

• Roma llajtata mandajta cuidajcuna.

  Roma llajtata mandajta cuidangapaj agllashca tauca soldadocunami carca. Paicunaca huaquinpica chai mandajcunata llujshichingapaj o apoyangapajmi poderta charircacuna (Flp 1:13).

• runapaj churi.

  Hebreo rimaipi Dios quillcachishcacunapica Ezequielta, Danieltami chashna nin. Paicunaman huillachij Dios huañujlla runacunahuan mana igual cashcata ricuchingapajmi chashna nin (Eze 3:17; Da 8:17). Mateo, Marcos, Lucas, Juan librocunapica Jesusmanta parlashpami 80 cutincuna Runapaj Churi nin. Jesusca shuj huarmimanta huacharishcamantami runa carca. Shinallataj Jesusmi Daniel 7:​13, 14-pi nishca profeciata pajtachina carca (Mt 19:28; 20:28).

• rupachishca ofrenda.

  Altar jahuapi rupachishpami animaltaca enterota Diosman cujcuna carca. Chai sacrificiota cujca huagra cajpi, carnero cajpi, chivo cajpi, urpi cajpi, uchilla paloma cajpipish chai animalmantaca imahuan mana saquirijchu carca (Éx 29:18; Le 6:9; Mr 12:33; Heb 10:6).

• rurashcalla dioscunata adorana.

  Chashna nishpaca rurashcalla dioscunata adoranamanta, cꞌuyanamanta, tucui shunguhuan sirvinamantami parlacun (Sl 115:4; Hch 17:16; 1Co 10:14).

• rollo.

  Pergaminomanta o papiromanta rurashca largo hojacunatami shuj ladoman quillcashpa caspipi pilluchijcuna carca. Dios quillcachishcacunataca rollocunapimi quillcajcuna o copiajcuna carca. Bibliata quillcacuj tiempopica librocunataca rollocunapimi quillcajcuna carca (Lu 4:​17-20; 2Ti 4:13).

S

• sábado punlla.

  Judiocunapaj yuyarina punllami carca. Chai punllataca cunanca sabbat ninmi. Hebreo rimaipica ‘samarina’ o ‘imata mana rurana’ nisha ninmi. Judiocunapajca séptimo punllami carca (viernes chishi inti huashicunmantaca sábado chishi inti huashicuncamami carca). Sábado punllapica ima trabajota mana ruranachu carca. Sacerdotecunallami Diospaj huasipi trabajajcuna carca. Shinallataj huatapi shujtaj fiesta punllacunata, canchis huatacunata, 50 huatacunatapishmi sábado nijcuna carca. Sábado nishca huatacunapica mana tarpunachu carca. Hebreocunatapish paicuna ima dibishcata pagachunca mana obliganachu carca. Moisesman cushca leypica sabadopi imata rurana cashcataca pajtachinallami carca. Shinapish religionta pushajcunaca ashtahuan ashtahuan mandashcacunatami mirachishpa catircacuna. Chaimantami Jesuspaj punllacunapica chai tucuita pajtachinaca sinchi carca (Éx 20:8; Le 25:4; Lu 13:​14-16; Col 2:16).

• sacerdote.

  Diospaj randimi pueblopaj ñaupajpi shayarishpa Diosmanta, Diospaj leycunamantapish yachachij carca. Shinallataj tucui pueblomanta Diosman sacrificiocunata cushpa, Diosta mañashpami ayudaj carca. Moisesman cushca ley manaraj tiyajpica familiata pushajmi paipaj familiapaj sacerdote carca. Cutin leyta cushca qꞌuipaca Aaronpaj familiamanta cꞌaricunami sacerdotecuna carca. Paicunaca Levipaj familiapuramantami carcacuna. Caishuj levitacunaca sacerdotecunata ayudajcunami carca. Mushuj ari ninacushca callarijpica Israel espiritualmi sacerdotecuna tucurca. Jesucristomi sacerdotecunata jatun mandaj can (Éx 28:41; Heb 9:24; Ap 5:10).

• sacerdotecunata jatun mandaj.

  Moisesman cushca ley ucupica sacerdotecunata jatun mandajmi ashtahuan importante carca. Paimi israelitacunapaj randi Diospaj ñaupajpi ricurij carca. Shinallataj shujtaj sacerdotecunapaj trabajotapishmi ricuj carca. Carpa huasipipish, Diospaj huasipipish paillami Diospajlla ashtahuan chꞌicanyachishca ucumanca yaicui tucurca. Chaimanca juchacunata perdonana punllami huatapica shuj cutinlla yaicui tucurca. Jesucristotapishmi sacerdotecunata jatun mandaj nin (Le 16:​2, 17; 21:10; Mt 26:3; Heb 4:14).

• sacerdotecunata mandaj.

  Hebreo rimaipi Dios quillcachishcacunapica sacerdotecunata jatun mandajcunatami chashna nijcuna carca. Cutin Griego rimaipi Dios quillcachishcacunapica sacerdotecunapurapi ashtahuan autoridadta charijcunatami sacerdotecunata mandajcuna nijcuna carca. Paicunapurapica sacerdotecunata jatun mandaj cashcacunapish, 24 grupopi chꞌicanyachishca sacerdotecunata pushajcunapishmi cashcanga (2Cr 26:20; Esd 7:5; Mt 2:4; Mr 8:31).

• saco.

  Granocunata huaquichina sacocunata rurana racu puchcacunahuan ahuashcami carca. Chai sacocunataca yana chivopaj millmahuanmi ahuajcuna carca. Pi huañujpi llaquilla cashcata ricuchingapajmi chashna sacocunata churarijcuna carca (Gé 37:34; Lu 10:13).

• sacrificio.

  Diosman cushca ofrendami can. Chai ofrendataca pagui ningapaj, culpayuj cashcata ricuchingapaj, Dioshuan alli tucungapajmi cujcuna carca. Abelmanta callarishpami gentecunaca chꞌican chꞌican sacrificiocunata shungumanta Diosman cujcuna carca. Huaquinpica animalcunatapishmi cujcuna carca. Moisesman cushca leypica sacrificiocunata cunaca obligatoriomi carca. Jesús paipaj jucha illaj causaita shuj sacrificiota shina cushcamantaca animalcunata cunaca ña mana minishtirishcachu carca. Shinapish Jesusta catijcunaca Diosmanca shujtaj laya sacrificiocunatami rurashpa catincuna (Gé 4:4; Heb 13:​15, 16; 1Jn 4:10).

• saduceo.

  Judiocunapaj shuj importante religionmi carca. Paicunapurapica achcata charijcuna, yachaj tucushcacuna, Diospaj huasipi autoridadta charij sacerdotecunapishmi carca. Paicunaca fariseocunapaj costumbrecunata, huaquin crishcacunatapish mana catijcunachu carca. Shinallataj huañushcacuna causarinata, angelcuna tiyashcatapish mana crijcunachu carca. Paicunaca Jesuspaj contrami tucurcacuna (Mt 16:1; Hch 23:8).

• salmo.

  Diosta adorangapaj cantocunami can. Jehová Diosta adorangapajmi musicata tocashpa cantajcuna carca. Por ejemplo, Jerusalenpi tiyaj Diospaj huasipimi tucuicunapaj ñaupajpi cantashpa Diosta adorajcuna carca (Lu 20:42; Hch 13:33; Snt 5:13).

• Salomón nishca Corredor.

  Jesús causashca punllacunapica Diospaj huasi corredorca pilarcunahuan shayachishcami carca. Chai corredorca inti llujshin ladomanmi saquirij carca. Salomón rurashca Diospaj huasi parte cashcatami yuyajcuna carca. Tamya punllacunapica chai corredortami Jesusca purirca. Jesusta punta catijcunapish Diosta adorangapajmi chaipi tandanacujcuna carca (Jn 10:​22, 23; Hch 5:12).

• Samaria.

  200 huatacunatami israelitacunamanta janaj ladoman caj chunga familiacunapaj capital carca. Tucui chai janaj lado llajtatami Samaria nishpa rijsijcuna carca. Chai llajtataca Samaria nishca urcu jahuapimi rurarcacuna. Jesuspaj punllacunapica Samaria janaj ladomanca Galileami carca. Cutin ura ladomanca Judeami carca. Jesús viajacushpaca chai ladocunapica mana huillarcachu. Shinapish huaquinpi chaita pasacushpaca chaipi causaj gentecunahuanmi parlarca. Samaria llajtamanta gentecuna espíritu santota chasquijpimi Pedroca Diospaj gobiernopaj catij llaveta utilizarca (1Re 16:24; Jn 4:7; Hch 8:14).

• samaritanocuna.

  Callaripica israelitacunamanta janaj ladoman caj chunga familiacunatami chashna nijcuna carca. Samaria llajtata asiriocuna 740 (J.m.h.) huatapi tucuchishca qꞌuipa, chai llajtaman apashca gentecunatapishmi samaritanocuna nijcuna carca. Jesuspaj punllacunapica ñaupa Siquem llajtamanta, Samaria llajtamanta religionta catijcunatami samaritanocuna nijcuna carca. Chai religionta catijcunapaj crishcacunaca mana judiocunapaj crishcacuna shinachu carca (Jn 8:48).

• Sanedrín.

  Jerusalenpi saquirij judiocunapaj mandaj juezcunami carca. Jesuspaj punllacunapica 71 miembromi carcacuna. Paicunapurapica sacerdotecunata jatun mandaj, ñaupaman chai cargota charijcuna, sacerdotecunata mandajpaj familiacuna, autoridadcuna, familiacunata pushajcuna, familiacunapaj yayacuna, mandashcacunata quillcajcunami carca (Mr 15:1; Hch 5:34; 23:​1, 6).

• saruna jatun jutcu.

  Caliza rumimanta rurashca ishqui tinacunami carca. Shuj tinaca caishujtapish yalli jatunmi carca. Chai ishqui tinacuna chaupipica uchilla larcami tiyarca. Jahua lado tinapica uvacunata o aceitunacunatami sarujcuna carca. Cutin ucu lado tinapica jugo o aceitemi urmaj carca. Chai jatun jutcuca Diospaj juiciotami ricuchin (Ap 19:15).

• Satanás.

  Cai shimica hebreo rimaipica ‘jarcaj’ nisha ninmi. Satanás Diabloca Diospaj enemigomi can (Job 1:6; Mt 4:10; Ap 12:9).

• sello.

  Imata señalashpa churangapajmi carca (chai señaltaca lodo jahuapi, cera jahuapimi churajcuna carca). Chashna señalashpami dueño cashcata, ciertotaj cashcata o ari ninacushcata ricuchij carca. Documentocunapi, pungucunapi, huañushcacunata pambashca jutcucunapi sellota churashca cajpica chaitaca pajtachinatajmi carcacuna. Ñaupa punllapi tiyaj sellocunaca sinchi materialhuanmi rurashca carca (chai materialcunaca rumi, marfil o caspimi carca). Chai sellocunaca letracunata, dibujocunatami charirca. Maijanpish shuj sellota charin o sellashcami can nijpica ciertotaj cashcata, pipaj cashcata o pacalla cashcatami ricuchin (Mt 27:66; Jn 6:27; Ef 1:13; Ap 5:1; 9:4).

• shamuj punlla.

  CAI PACHA shimita ricui.

• señal.

  Cai punllacunapi, shamuj punllacunapipish ima tucunatami ricuchin (Mt 24:3; Ap 1:1).

• siervo ministerial.

  Griego rimaipica diákonos ninmi. Cai shimitami huaquinpica ‘sirvij’ nishpa traducishca. Siervo ministerialcunaca congregación ucupica ancianocunata ayudajcunami can. Siervo ministerial cangapajca Bibliapi imata mandashcatami pajtachina can (1Ti 3:​8-10, 12).

• sinagoga.

  Cai shimica ‘tandanacui’ o ‘asamblea’ nisha ninmi. Achca versocunapica sinagoga nishpaca judiocuna tandanacuna huasicunamantami parlan. Judiocunaca chai huasicunapimi Dios quillcachishcacunata liyingapaj, yachangapaj, Diosta mañangapaj, huillangapaj tandanacujcuna carca. Jesuspaj punllacunapica Israel llajtapica tucui pueblocunapimi shuj sinagoga tiyaj carca. Cutin jatun pueblocunapica ishqui o ashtahuan sinagogacunami tiyarca (Lu 4:16; Hch 13:​14,15).

• Sion, Sion urcu.

  Sion urcuca Jebús nishca llajtapaj shutimi carca. Chaipimi jebuseocuna causarca. Chai llajtaca Jerusalén inti llujshin ura lado urcupimi saquirij carca. Davidca chai llajtata tucuchishca qꞌuipami pai mandana huasita chaipi rurarca. Chaitami “Davidpaj llajta” nishpa shutichirca (2Sa 5:​7, 9). David chai llajtaman arcata apajpimi chai urcuca Jehová Diospajlla chꞌicanyachishca tucurca. Tiempohuanca Moria urcupi saquirij Diospaj huasita o tucui Jerusalén llajtatami Sion nijcuna carca. Griego rimaipi Dios quillcachishcacunapica shuj chꞌimbapuraita churangapajllami Sion o Sion urcu nin (Sl 2:6; 1Pe 2:6; Ap 14:1).

• Siria.

  Ñaupa punllacunapica Roma llajtapaj provinciami carca. Capitalca Antioquiami carca. Hebreo rimaipi Dios quillcachishcacunapica casi tucui Siria llajta cashcatami ricuchin (chaitaca Aram nijcunapishmi carca). Siria llajtata mandajca tucui Palestinatapishmi ricuraj carca (Lu 2:2; Hch 18:18; Gál 1:21).

• Sirte.

  Caica ishqui jatun golfo yacucunapaj shutimi can. Chai yacucunaca mana tanto hondochu carca. África janaj lado Libia costapimi saquirij carca. Yacucuna yallitaj cuyurijpimi shuj ladoman caishuj ladoman achca arena montonarij carca. Chaimantami barcota pushajcunaca chai yacucunata rinataca manchajcuna carca (Hch 27:17).

• sorteana.

  Ima decisionta agllangapajmi ñaupa punllacunapica cai costumbreta charijcuna carca. Uchilla rumicunata o uchilla caspicunatami churanapi mana cashpaca imacunapi churashpa cuyuchijcuna carca. Qꞌuipaca maijan rumita o caspita llujshichishpami ima decisionta agllanata ña yacharcacuna. Caitaca Diosta mañashca qꞌuipami rurajcuna carca (Mt 27:35; Hch 1:26).

T

• talento.

  Hebreocunapajca cai cullquimi achca valishca carca. Cai cullquica 34,2 kilogramocunatami (75,5 lb; 91,75 lb tr; 1.101 oz tr) pesaj carca. Cutin griegocunapaj talento cullquica ashahuan uchillami carca. Casi 20,4 kilogramocunatami (44,8 lb; 54,5 lb tr; 654 oz tr) pesaj carca (1Cr 22:14; Mt 18:24).

• Tártaro.

  Caica Noepaj punllacunapi mana cazuj angelcunata pingaipi churashcatami ricuchin. 2 Pedro 2:​4-pi Tartaropimi shitarca nishpaca (tartaróō shimimanta traducishcami) juchata ruraj angelcunata maipi shitashcata, allpa ucupi, mai amsa lugarpi churashcataca mana ninchu. Ashtahuanpish Diosllatajmi paita sirvichun, jahua pachapi causashpa catichunpish mana saquirca. Paipaj sumaj munai ima cashcatapish ama intindichunmi paicunapaj yuyaita amsapi churarca. Chashnami paicunataca pingaipi saquichichirca. Bibliapica chai mana cazuj angelcuna paicunata mandaj Satanás Diablohuan huiñaipaj tucuchishca canatami huillan. Chaimantami chai mana cazuj angelcunapajca Tartaroca tucuimanta yalli pingaipi churashca cana cashcata ricuchin. Tartaroca mana Apocalipsis 20:​1-3-pi parlashpa ‘jatun jutcuchu’ can.

• tigramuna punllacuna.

  Griego rimaipi Dios quillcachishcacunapica tigramuna punllacuna nishpaca, tucuri punllacunapi Jesús Jatun Mandaj shina jahua pachapi mandai callarishcatami ricuchin. Cristo tigramuna punllacunaca pai shamushcahuan cutin rinaca mana canchu. Ashtahuanpish shuj tiempomi pasana can (Mt 24:3).

• tributo.

  Shuj impuestota paganami carca (Ne 5:4; Ro 13:7).

• trillana.

  Ujshamanta, tꞌamomanta granocunata chꞌicanyachinami. Ashalla cajpica caspihuanmi huajtajcuna carca. Cutin achca granocuna cajpica animalcunaman aisachishpami trillo o rodillo nishcahuan trillajcuna carca (Le 26:5; Is 41:15). CHUYAYACHINA PAMBA shimita ricui.

• trompeta.

  Fierromanta rurashcami carca. Trompetapi pꞌucushpami imatapish huillajcuna carca o musicata tocajcuna carca. Trompetata tocashpaca Jehová Diospaj juiciocunata, Diosmanta shamuj shujtaj huillaicuna tiyashcatami huillajcuna carca (1Co 15:52; Ap 8:​7–11:15).

• tucui laya ungüi.

  Contagiaj ungüicuna ratito mirarishpami gentecunata huañuchi tucun (Lu 21:11).

• tucuri punllacuna.

  Bibliapi tiyaj profeciacunapica shuj tiempopi ima ruraicuna ñalla tucurigrishcata ricuchingapajmi “tucuri punllacuna” nin (Eze 38:16; Da 10:14; Hch 2:17). Huaquin profeciacunapica ashalla huatacuna pasana cashcata, cutin shujtaj profeciacunapica achca huatacuna pasana cashcatami ricuchin. Bibliapica Jesús tigramuna punllacunapi cai “tucuri punllacuna” tiyana cashcatami huillan (2Ti 3:1; Snt 5:3; 2Pe 3:3).

V

• vara.

  Shuj mandajca autoridadta charishcata ricuchingapajmi tauna caspita mana cashpaca varata charin (Gé 49:10; Heb 1:8).

• vino ofrenda.

  Cai vinotaca altar jahuapimi jichajcuna carca. Shujtaj ofrendacunahuan igualmi cujcuna carca. Pabloca paipaj huauquicunata tucui fuerzahuan ayudanata munashcata ricuchingapajmi vino ofrendata tallishca shina cani nirca (Nú 15:​5, 7; Flp 2:17).

Y

• yallitaj llaquij.

  Cai shimimanta parlashpaca maijan librocunapica ishqui yuyaitami ricuchin. 1) Diosca imatapish tigrachichun mana mañashpa, mana cobrashpami shungumanta cun. 2) Diosca manapish miricijcunamanmi pai yallitaj llaquij cashcata ricuchishca. Pai llaquishcamantami gentecunataca juchacunamanta perdonan. Cristomanta huiñaita quishpirichunpishmi invitan (2Co 6:1; Ef 1:7).

• yugo.

  Gentecunaca cunga tullupi shuj caspita churashpami ishquindij ladoman cargacunata apajcuna carca. Shinallataj animalcunapaj cunga jahuapi caspita churashpami carretacunata, tarpuna herramientacunata aisachijcuna carca. Sirvij runacunaca yugopimi llashaj cargacunata aparijcuna carca. Chai yugoca shujtajcunata sirvij cashcata, llaquita apacushcatami ricuchij carca. Yugota anchuchina o yugota pꞌaquina nishpaca sirvij canamanta cacharichishca canata o llaquicunamanta cacharichishca canatami ricuchij carca (Le 26:13; Mt 11:​29, 30).

Z

• Zeus.

  Griegocunapaj dioscunamanta ashtahuan yalli jatun diosmi carca. Listra llajtapica Bernabetaca Zeus cashcatami yuyarcacuna. Listra llajta cꞌuchullapica “Zeuspaj sacerdotecuna”, “inti dios Zeus” nishca quillcachishcacunatami japishcacuna. Malta shuti islamanta Pablo viajacushca barco ñaupaj ladopica Zeuspaj ishqui churicunapaj adornocunami churashca carca. Paicunaca Cástor y Pólux gemelo huauquicunami carca (Hch 14:12; 28:11).