Jatun llaqui punllacunapica cai Allpapi mana nunca ricushca llaquicunami tiyanga. Bibliapi tiyaj profeciacunaca cai tucuri punllacunapi pajtarinatami nin (2 Timoteo 3:1; Daniel 12:4). Marcos 13:19-pica: “Chai punllacunaca llaqui punllacunami canga. Cai pachata Dios rurashca punllamanta cunancamaca cashna llaquica mana tiyashcachu. Cutinpish manataj tiyangachu” ninmi (Daniel 12:1; Mateo 24:21, 22).

¿Jatun llaqui punllacunapica imataj tucunga?

•   Tucui panda religioncunami tucuringa. Cai panda religioncunaca mana yuyashcami rato chingachishca canga (Apocalipsis 17:​1, 5; 18:​9, 10, 21). Caicunataca gobiernocunapaj autoridadhuanmi Naciones Unidasca chashna ruranga. Shinami Diospaj munaita pajtachinga (Apocalipsis 17:​3, 15-​18). a

•   Diosta sirvij alli religiontami llaquichi callaringa. Achca llajtacunami shuj yuyailla tucushpa alli religionta charijcunataca tucuchishun ningacuna. Cai llaquichij llajtacunataca Ezequiel libropica “Magod llajtata mandaj God” ninmi. Pero Jehová Diosca paipaj pueblota tucuchichunca mana saquingachu (Ezequiel 38:​1, 2, 9-​12, 18-​23).

•   Allpapi causajcunatami juzganga. Jesusca ‘shuj michij runa ovejacunata chivocunamanta chꞌicanyachij shinami, gentecunata caishujmanta chaishujmanta chꞌicanyachinga’ (Mateo 25:31-​33). Chai punllacunapica Jesusca jahua pachapi mandagrij paipaj “huaquicunata” ayudashcata o na ayudashcata ricushpami gentecunataca juzganga (Mateo 25:34-​46).

•   Diospaj Reinopi mandagrijcunataca jahua pachapimi tandachinga. Jahua pachapi Jesushuan mandangapaj agllashcacunaca cai allpapi huañushpami jahua pachapi causangapaj tigra causachishca cangacuna (Mateo 24:31; 1 Corintios 15:50-​53; 1 Tesalonicenses 4:15-​17).

•   Armagedón punllami chayanga. Bibliapica Armagedontaca “Tucui poderta charij Diospaj jatun punlla” o “Diospaj punlla” nishpami nin (Apocalipsis 16:14, 16; Isaías 13:9; 2 Pedro 3:​12). Jesús juzgacuipi causaita mana chasquijcunaca chai macanacuipimi chingachishca cangacuna (Sofonías 1:​18; 2 Tesalonicenses 1:​6-​10). Shinallataj manchanai millai chanchis umacunayuj animaltapishmi tuchinga ninmi. Cai animalca tucui cai pachapi mandaj gobiernocunatami ricuchin (Apocalipsis 19:19-​21).

¿Jatun llaqui punllacuna qꞌuipaca imataj tucunga?

•   Satanaspish demoniocunapishmi huichcashca cangacuna. Shuj poderta charij angelmi Satanasta, demoniocunatapish shuj ‘jatun jutcupi’ huichcanga. Chaipica huañushca shinami canga. Chaimi imata mana rurai tucungacuna (Apocalipsis 20:​1-3). Chai jatun jutcupica carcelpi shina cashcamantami gentecunatapish ña mana pandachi tucunga (Apocalipsis 20:7).

•   Mil huatacunami callaringa. Chai punllamantami Diospaj Gobiernoca mil huatacunata mandashpa callaringa. Chashnami cai pachapi causaj gentecunapajpish achca bendecioncunata apamunga (Apocalipsis 5:​9, 10; 20:​4, 6). Shinallataj ‘pi mana yupaipaj achca gentecunami’ jatun llaqui punllamanta quishpirishpa Diospaj Gobierno cai Allpata mandai callarijta ricungacuna (Apocalipsis 7:​9, 14; Salmo 37:​9-​11).