Achca gentecunaca: “¿Imamantataj judiocunata yallitaj llaquichircacuna? ¿Judiocunata ama llaquichichunca imamantataj Diosca mana jarcarca? ¿Judiocuna charishca llaquicunataca pishi allichinga?” nishpami tapurishcacuna. Judiocunata llaquichijpi paicunapish sufrishcamantami cai tapuicunata yachasha nishcacuna.

Llulla: Judiocunata llaquichichun Dios imamanta saquishcata tapunaca juchami can.

 Cierto: Diosta sirvijcunapishmi imamanta Yaya Dios llaquicuna tiyachun saquishcataca tapurishcacuna. Por ejemplo, profeta Habacucca Diostaca: “¿Ima nishpataj ñuca mana ricunachishca millaita ruranacunataca ricuchihuanguiyari?” nishpami tapurca (Habacuc 1:3). Habacuc chashna tapujpica Diosca mana pꞌiñarircachu. Chaipaj randica Habacuc ima tapushcata tucuicuna beneficiarichunmi Bibliapi quillcachirca.

Llulla: Llaquicunahuan cajta ricushpaca Diosca mana llaquirinchu.

 Cierto: Diosca llaquicunataca mana ricunayachinchu (Proverbios 6:16-19). Bibliapica Noepaj punllacunapica ‘cai pachapi causajcuna yallitaj millaita ruracushcata ricushpami Yaya Diosca shungupi llaquirirca’ ninmi (Génesis 6:5, 6). Chashnallatajmi Yaya Diosca judiocunata llaquichishcata ricushpaca shungupi achcata llaquirishcanga (Malaquías 3:6).

Llulla: Judiocunataca Diosmi llaquichirca.

 Cierto: Jesús huañushca qꞌuipa huata 70-pica romanocunaca judiocunatami llaquichircacuna. Paicunata llaquichichunca Yaya Diosca mana jarcarcachu (Mateo 23:37–24:2). Diosca pipaj ladopish mana tucushcachu. Judiocunapish, griegocunapish Diospajca igualmi can (Romanos 10:12).

Llulla: Cꞌuyaj, tucui poderta charij Dios tiyashpaca judiocunata llaquichichunca mana saquinmanchu carca.

 Cierto: Yaya Dios llaquicunata mana cachashpapish huaquinpica asha tiempota llaquicuna tiyachunmi saquishca (Santiago 1:13; 5:11).

 Yaya Diosca pailla mandana derechota charishcata ricuchingapajmi llaquicuna tiyachunca saquishca. Paica cai pachataca mana mandacunchu. Bibliapica Diablomi cai pachata mandacun ninmi (Lucas 4:1, 2, 6; Juan 12:31). Judiocunata llaquichichun imamanta Dios mana jarcashcatami Bibliapi ricushun.

1.   Diosca gentecunataca ima alli cashcata, ima mana alli cashcata agllachunmi rurarca. Diosca Adán y Eva paita cazuchunmi shuyarca. Shinapish paita cazuchunca mana obligarcachu. Pero paicunaca mana allita ruranatami agllarcacuna. Chaimantami jatun llaquipi urmarcacuna (Génesis 2:17; 3:6; Romanos 5:12). Chai punllamanta pachami gentecunaca mana allita ruranata agllashcamanta animal sufrishcacuna. Declaración de principios del judaísmo conservador nishca libropica: “Gentecuna mana allita ruranata agllashcamantami llaquicunaca tiyan” ninmi. Gentecunallataj ima alli cashcata, ima mana alli cashcata agllachunmi Jehová Diosca saquishca.

2.   Judiocuna charishca llaquicunataca Diosca tucuchinatami munan. Chaita rurangapajmi poderta charin. Diosca huañushca gentecunata causachinatami munan. Huañushca judiocunatapishmi causachinga. Judiocunata llaquichishcata ricuj gentecunapish ñaupajman ima tucushcataca cutinca ña mana yuyaringacunachu (Isaías 65:17; Hechos 24:15). Yaya Diosca tucui gentecunata cꞌuyashcamantami pai imata rurasha nishcata pajtachinga (Juan 3:16).

 Judiocunata llaquichishcamantaca achcacunami sufrishca. Shinapish paicunaca llaquicunata tucuchingapaj Yaya Dios imata rurasha nishcata, llaquicuna tiyachun Dios imamanta saquishcatami yachaj chayashcacuna. Chaimantami cushilla, ñaupajman catishcacuna.