Guërrakunata rurarqa mëtsika qellëtam gastayan.

•   “Qanyan wataqa entëru Patsachö gobiernukunam 2,2 billon dölarista guërrakunata rurar gastayashqa. Pasaq watakunachöqa manam tsënö atska qellëta guërrakunachö gastayashqatsu” (The Washington Post, 13 de febrero de 2024).

 Tsënö kaptimpis, guërrakunachöqa manam qellëllatatsu gastayan. Ucrania nacionchö guërrallapaq parlarishun.

•   Soldädukuna. Ucraniachö guërra qallanqampitaqa cäsi quinientus mil soldädukunanam wanuyashqa o herïdu quedayashqa. Tsë guërra qallanqampitaqa ishkë watanam pasarishqa.

•   Nunakuna. ONU niyanqanmi willakun veinti öchu milpitapis mas nunakuna guërrakunachö wanuyanqanta o herïdu quedayanqanta. Tsë ONU niyanqanchö alli carguyoq nunam kënö willakun: “Guërrakuna kaptin ëkaq nunakuna sufriyanqantaqa manam musyëta puëdintsiktsu”. a

 Entëru Patsachö guërrakuna kaptinmi mëtsika nunakuna sufriyan.

•   2023 wata setiembri killapitam guërrakuna y imëka mana allikuna kaptin, 114 millon nunakuna wayinkunata dejëkur juk sitiuta ëwakuyashqa.

•   783 millon nunakunam mikuyänampaq imapis mana kaptin alläpa mallaqäyan. Programa Mundial de Alimentos niyanqanta dirigeqkunam kënö willakuyan: “Entëru Patsachö mallaqëta pasaq nunakunapitaqa, pullampitapis masmi guërrakuna y imëka mana allikuna kanqanchö kawayan. Tsëmi guërrakuna kaptin mallaqëpa pasayan”.

 ¿Imëllapis guërrakuna ushakanqatsuraq? ¿Imëllapis yamë kawashuntsuraq? ¿Imëllapis entëru Patsachö mallaqë y pobri kë ushakanqatsuraq? ¿Ima nintan Bibliachö?

 Guërrakuna kanampaq kaqta rikätsikunampaqmi Bibliachöqa cawallupaq y cawalluta montaraq nunapaq willakurqan.

•   “Tsënam nina color cawallu yarqaramurqan. Tsë cawalluta montarëkaqqa patsachö nunakuna wanutsinakuyänampaqmi, patsapita yamë këta ushakätsinampaq autoridäta y jatun espädata chaskirqan” (Apocalipsis 6:4).

 Tsë cawalluta montaraqpa qepantam ishkë mas yarquyarqan, tsëkunaqa qeshyakunawan y maskunawan wanuyanqanta y mallaqëtam rikätsikun (Apocalipsis 6:5-8). Bibliachö willakunqanta y kanan tiempu imanö cumplikëkanqanta musyanëkipaqqa, rikäri “¿Imatataq musyatsikun bestian montashqakunaqa?” neqchö willakunqanta.

 Ichikllachönam kë munduchö imëka väleqkunata guërrata rurayänampaq utilizäyanqanatsu, peru tsëtaqa manam nunakunatsu lograyanqa. Bibliachömi kënö willakun:

•   Teyta Diosmi “patsachö guërrakunata ushakätsin” (Salmus 46:9).

•   Teyta Diosqa guërrakuna kaptin sufrinqantsiktam ushakätsinqa. “Nawinkunapitam llapan weqita limpianqa, y nunakunaqa manam wanuyanqanatsu o wañuyanqanatsu, llakikuyanqannatsu, waqayanqanatsu ni nanatsikuyanqanatsu. ¡Teyta Diosmi llapan sufritsimanqantsik kaqkunata ushakätsinqa!” (Apocalipsis 21:4).

•   Teyta Diosqa yamë kawakunapaqmi yanapamäshun. “Sirwimaqnïkunaqa tranquïlu sitiuchömi kawayanqa, wayinkunapis segürum kanqa, tsë sitiukunachöqa imatapis mana mantsashpam kawayanqa” (Isaïas 32:18).

 Bibliachö willakunqannömi guërrakuna y imëka mana allikuna pasëkan, tsëmi rikätsimantsik ichikllachöna yamë kawanapaq kaqta.

 ¿Imatataq Teyta Dios ruramunqa yamë kawakunapaq? Ciëluchö këkaq Gobiernunwanmi yamë kawakunapaq yanapamäshun (Mateu 6:10). Diospa Gobiernun ima kanqanta y imata ruramunampaq kaqta musyanëkipaqqa, ¿Imatan Diospa Gobiernun? neq videuta rikäri.