¡ALKÄBU ALKÄBULLA KËKÄSHUN!
2023 wataqa imëka mana allikunam pasashqa | ¿Ima nintan Bibliachö?
2023 wata entëru Patsachö pasanqanmi rikätsikun Bibliachö willakunqannölla ‘ushanan tiempuchöna’ kawëkanqantsikta (2 Timoteu 3:1). Imëka pasëkanqanmi rikätsikun Bibliachö kanan tiempupaq willakunqan cumplikëkanqanta. Bibliachö willakunqampita wakin wakinllata rikärishun.
Bibliachö willakunqan y entëru Patsachö pasëkanqan
“Guërrakuna kanqanta y guërrakuna kanqampaq willakuyanqantam wiyayanki” (Mateu 24:6).
“Kananqa imëpitapis masmi chikinakur mëtsëchö guërrakunata rurayan”. a
Rikäri “¿Piraq nunakunata salvanqa?” neqchö y “Entëru Patsachöqa ishkë billon dölarpitapis mastanam guërrapaq armakunachö gastayan” neqchö willakunqanta.
“Wakchö këchömi terremötukuna” kanqa (Marcus 13:8).
“2023 wata qallanqampita kananyaqqa, entëru Patsachömi fuerti 13 terremötukuna kashqa. Unëqa tsënö fuerti terremötukunaqa manam karqantsu”. b
Rikäri “Patsa feyupa kuyuptin Turquïa y Siria nacionkunachö mëtsikaq nunakuna wanuyan” neqchö willakunqanta.
“Imëka espantëpaqkunam pasanqa” (Lücas 21:11).
“Kananqa unëpitapis masmi achachan” (Antoniu Guterres, secretariu general de las Naciönes Unïdas). c
Rikäri “2023 watachö entëru Patsa alläpa achachan” neqchö willakunqanta.
“Wakchö këchömi mallaqë” kanqa (Mateu 24:7).
“Familiankunata manteniyänampaq kallpachakoqkunapaqqa, 2023 wataqa manam fäciltsu kashqa”. d
Rikäri “La guerra y el cambio climático empeoran la crisis alimentaria mundial” neqchö willakunqanta.
“Alläpa mana alli y mana aguantëpaqnö tiempukunam kanqa” (2 Timoteu 3:1).
“Entëru Patsachöqa diezpita öchu nunakunam alläpa llakikur qeshyayan”. e
Rikäri “Kanan tiempu jövinkuna y shipashkunaqa imëpitapis masmi llakishqalla kakuyan” neqchö willakunqanta.
¿Imaraq pasanqa 2024 watachö?
2024 wata ima pasanampaq kaqtaqa manam pipis musyantsu. Tsënö kaptimpis, entëru Patsachö pasëkanqanmi rikätsikun ichikllachöna Diospa Gobiernun gobernamunampaq kaqta. Tsë gobiernuqa nunakunapa gobiernunta, sufrimientuta y llakikuytam ushakätsinqa (Daniel 2:44; Apocalipsis 21:4).
Tsë tiempu chämunqanyaqqa, llakishqa sientikurqa Diosmanmi mañakuyta puëdintsik. Bibliachömi kënö nin:
“Pëkunata mantsarmi qamman confiakamü Teyta Dios” (Salmus 56:3).
¿Imanötan rikätsikunkiman Teyta Diosman confiakunqëkita? Bibliachöqa manana sufrinapaq kaqtam willakun, tsëpita yachakurinëkipaqmi animariyaq. Bibliachö willakunqankuna qamta y familiëkita imanö yanapayäshunëkipaq kaqta musyanëkipaqqa, Bibliapita shumaq yachakunëkipaqmi animariyaq.
a Foreign Affairs, “A World at War: What Is Behind the Global Explosion of Violent Conflict?” (Un mundo en guerra: ¿Qué hay detrás de la explosión mundial de conflictos violentos?), Emma Beals y Peter Salisbury; 30 de octubri de 2023.
b Noticias de terremotos, “2023: La cantidad de grandes terremotos pronto batirá récords”; mäyu de 2023.
c Naciones Unidas, “Secretary-General’s Opening Remarks at Press Conference on Climate” (comentarios del secretario general sobre el clima en una rueda de prensa); 27 de juliu de 2023.
d Programa Mundial de Alimentos, “Una crisis alimentaria mundial”.
e Organización Mundial de la Salud, “Día Mundial de la Salud Mental”; 10 de octubri de 2023.
Capaz këkunapis gustashunki
MASTA YACHAKUY
¿Rasumpatsuraq imëkapis alliyanqa?
¿Imanirtan shamoq tiempupaq Bibliachö willakunqankunaqa nunakuna willakuyanqannötsu?
ENSEÑANZAS IMPORTANTES DE LA BIBLIA
¿Imataq Diospa Gobiernun?
Jesusqa, yachatsikur qallanqampita patsëmi, Diospa Gobiernumpita mas parlarqan. Jesuspa qateqninkunaqa unëpitam tsë Gobiernu chämunanta mañakïkäyan.
REQIYÄMË
¿Munankimanku visitayänaqta?
¿Munankiku Bibliapita maslla yachakuyta o Jehoväpa testïgunkuna imanö kayanqanta musyëta?
