ANTICRISTU palabraqa mëtsika tiempupam utilizakashqa Römachö päpakunapaq y mantsanëpaq pelïculakunapaq parlarnin. Tsëchi nunakunaqa, ¿pitaq anticristu? ¿Precisanku pëpita musyanantsik? nir tapukuyan. Tsë palabraqa pitsqa kutim Bibliachö yurin, tsëmi ima ninan kanqanta musyanantsikqa precisan.

Anticristu palabrataqa apostol Juanllam utilizarqan. Punta kaq cartanchömi kënö nin: “Ushanan höranam, y wiyayashqankinam anticristu shamunampaq kaqta, kanampis atskaqnam anticristukunaqa kayan; tsëmi musyantsik ushanan hörana kanqanta. Pëkunaqa noqantsikpitam rakikäkuriyarqan; peru manam noqantsiknötsu kayarqan [...]. ¿Pitaq ulikoqqa, manaku Jesus Cristu kanqanta negaq? Tsëmi anticristu, Dios Yayata y Tsurin Jesusta negaq kaq” (1 Juan 2:18, 19, 22, NM).

¿Imatataq kë palabrakunapita yachakuntsik? Apostol Juanqa “atskaqnam anticristukunaqa kayan” nirqanmi, tsëwanqa entienditsikïkarqan anticristuqa atskaq nunakuna kayanqantam. Anticristukunaqa yachatsikuyan Jesusqa Cristu mana kanqantam y manam musyatsikuyantsu Jesucristu y Teytan pï kayanqanta. Tsëmi anticristuqa kayanman, mas nunakunata ganayänanrëkur Cristutukoqkuna o Jesuspa akrashqa markan kayanqanta neq religionkuna. Jina “pëkunaqa noqantsikpitam rakikäkuriyarqan” nirqanmi apostol Juanqa, tsëqa rikätsikun Cristupa yachatsikïninkunata mana chaskeqkunatam. Y apostol Juan kawanqan witsankunapis tsënö nunakunaqa kayarqannam. Y “ushanan höranam” nirqa, itsa parlëkarqan wanukunampaq ichikllana pishinqan tiempukunapaq.

¿Ima mastataq apostol Juan nirqan? Anticristuqa Diospa contran yachatsikïkunatam yachatsikunqa nirqanmi. Tsëmi nirqan: “Jesucristu nunanö kë patsaman shamunqanta yachatsikïqa Diospitam shamun, peru Jesuspita mana yachatsikoqqa, manam Diospitatsu shamun. Tsëqa anticristu shamunampaq kaqta wiyayanqëkipa yachatsikïninmi, kanan witsanqa jinantinchönam këkan” (1 Juan 4:2, 3, NM). Tsëpita ishkë kaq cartanta qellqanqanchönam, tsëpaq masta parlarnin kënö nirqan: “Jinantinchömi atskaq engañakoqkuna këkäyan, kë nunakunaqa manam willakuyantsu Jesucristu nunanö shamunqanta. Këmi engañakoq y anticristu” (2 Juan 7, NM). Ardëpa ulikïkunata Jesucristupaq y yachatsikïnimpaq anticristu yachatsikunqanqa apostol Juanpaqqa clärum karqan.

Apostol Juan anticristupaq manaraq qellqaptinmi, Jesucristuqa kënö nishqana karqan: “Cuidakuyë uli profëtakunapita, pëkunaqa manshu üsha tukurmi qamkunaman shayämun, peru rurillantaqa imëka mallaqashqa atoqnömi kayan” (Mateu 7:15, NM). Apostol Pablupis Tesalönicachö  cristiänukunatam kënö nirqan: “Engañayäshunequita dejacuyëtsu, porqui tse junaq [Jehoväpa junaqnin] manaraq chämuptinmi, nunacuna Diosnintsicpa contran sharcucurcuyanqa. Tsenam si Jesucristupa contran nuna yurircamonqa. Tse nunaqa dispunishqa quecan condenadu ushacänanpaqmi” (2 Tesalonicensis 2:3).

Clärum këkan apostolkuna kawayanqan witsankunapis uli (llulla) profëtakuna y cristiänukunapa markäkïninkunata ushakätsita munaqkuna kayanqanqa. Anticristupaq Juan ninqannöllam, kë nunakunaqa Cristupaq y yachatsikunqampa contran yachatsikuyarqan. Y pëkunapaq Jehovä imata pensanqanta rikätsikurmi, apostol Pabluqa ‘condenadu ushacänanpaqmi’ këkan nirqan.

Kanan witsampis anticristuqa këkanllam. Jesuspa y yachatsikïnimpa contranmi kë nunakuna y religionkunaqa këkäyan. Ardëpam ulikïkunata (llullakïkunata) y mana alli yachatsikïkunata yachatsikuyan, tsënöpa nunakuna Jesuswan Jehovä jukläya kayanqan cuentata mana qokuyänampaq. Tsënö ulikïkunapitam cuidakunantsik. Kanan rikärishun nunakunata pantatseq ishkë ulikïkunata.

Mëtsika watapam, cristiänutukoq religionkunaqa yachatsikuyashqa Kima Dios Jukllëlla kanqanta. Pëkunaqa niyashqa Teyta y Tsuri juk Dioslla kayanqantam. Tsënömi anticristu kayanqanta rikätsikuyashqa, ¿imanir? Porqui Dios y Jesus pï kayanqantam pakäyashqa. Tsëqa manam yanapakuntsu alli shonquyoq nunakuna Diosta reqiyänanta ni Jesusta qatiyänanta (1 Corintius 11:1; Santiägu 4:8).

Jina cristiänutukoq religionkunaqa nunakunata engañayashqa Diospa jutin Jehoväta Bibliankunapita jorqar, y Diospa jutin yureq Bibliata utilizäyaptin contran parlarmi. Y Diosta mana respetashpam tsëtaqa rurayashqa, porqui Bibliata qellqar qallayanqanchöqa, Diospa jutin Jehoväqa qanchis waranqa kutinömi yurin. Tsënö engañakuyanqampita, ¿imataq pasashqa? Mëtsika nunakunam rasumpa Dios pï kanqanta musyayantsu.

Diospa jutin Jehovä kanqanta musyayanqanqa, mëtsikaqtam yanapashqa pëman witiyänampaq. Tsëmi pasarqan Richard jutiyoq nunatapis, pëqa manam qonqantsu Jehoväpa testïgunkunawan parlanqanta. Kënömi nin: “Bibliawanmi yachatsiyämarqan rasumpa Diospa jutin Jehovä kanqanta. Manam creirirqätsu Diosqa jutiyoq kanqanta. Manam imëpis tsëmanqa pensarqätsu”. Tsëpita patsëmi, Jehoväta kushitsinanrëkur Bibliachö yachakunqanmannö kawar qallëkurqan. Jina ninmi: “Jehoväpa jutinta musyanqäqa, yanapamashqa pëwan amïgu kanäpaqmi”.

Anticristuqa mëtsika watapam millonyëpayan nunakunata Diospa kaqta mana musyayänampaq paqaschönö katsishqa. Bibliapita alleq yachakurninqa musyashunmi anticristu pï kanqanta y ulikïninkunapitam librakäshun (Juan 17:17, NTCN).