Mana alläpa kapoqyoq Espäñapa norti kaq lädunchö këkaq Bilbao markachömi yurikurqä, teytäkunapa chusku wamrankunapitaqa ishkë kaqmi karqä. Wayichöqa alläpa catölicum kayarqä, y misamampis cada junaqmi ëwayaq kayä. 23 watayoq këkarmi profesora tikrarirqa. Yachatsikïqa alläpam gustamarqan, y chusku chunka watakunapam yachatsikurqä. Religionpita yachatsikurqa alläpam kushikoq kä. Y tardikunapanam religion catölicapita warmi wamrakunata comunionta chaskiyänampaq yachatsirnin yanapaq kä.

Casädunö kushishqa 12 watana këkäyaptïmi qowäqa wanukïkurqan, tsëmi chuskun wamräkunata japalläna wätana karqan. Tsë witsanqa 33 watayoqllaran karqä. Religionnïchö shoqakïta tarita munarpis, manam kë tapukïnïkunapa respuestantaqa tarirqätsu: Jesus wanïpita libramashqantsikna këkaptinqa, ¿imanirtaq sïguintsik wanurnin? ¿Imanirtaq Gobiernïki shamutsun nir Diosta mañakuntsik alli kaq nunakuna ciëluta ëwakïkäyaptinqa? Y wanurishqa Dios juzguëkämashqaqa, ¿imanirtaq ciëlupita, purgatoriupita o infiernupita juiciu junaqpaq yarqamunantsik?

Tsëkunatam atskaq cürakunata tapurqä. Juk kaqmi “noqaqa manam musyätsu tapurïki obisputa nimarqan. Jinamampis qamqa Diosman creinkinam, tsëmi masqa precisan nimarqanmi”. Tapukïnïkunapa respuestankunata ashirmi jesuitakunapa, pentecostalkunapa y gnosticukunapa reunionninkunaman ëwarqä, peru niyämanqanqa manam shonqöman charqantsu.

Qanchis watayoq alumnämi 60 watayoqpitapis masna këkaptï Jehoväpa testïgunkunapa reunionninman invitamarqan. Rikanqä y wiyanqä gustamaptimpis alläpa ocupäda karmi yapëqa kutirqänatsu. Ishkë wata pasariptinnam, Juan y Maiti casädu Testïgukuna punköta  tsaktakarayämurqan. Tapukïnïkunataqa kima killapam contestayämarqan, y tsëpitanam Bibliapita yachakur qallëkurqä.

¡Bibliapita Testïgukuna yachatsiyämänantaqa alläpam munarqä! Rasumpa kaqpita yachëkätsiyämanqanta musyanapaqmi, kima Bibliakunata igualatsir igualatsir preparakoq kä. Atska watakuna engañashqa kawanqätam cuentata qokurirqä. Creenqäwan Biblia yachatsikunqan jukläya kanqanta musyarirqa alläpam espantakurqä. Peru llakishqam këkarqa, creenqäkuna jatun montinö karpis llupikëkanqanta rikarnin.

Tsëllanam, ishkë kaq qowa alläpa qeshyakurkur wanurirqan. Jubilakurirmi Bilbao markapita juk tiempupa ëwakurqä. Juanwan Maitipis tsënöllam ëwakuyarqan. Bibliapita yachakïtam jaqirirqä, peru musyarqämi väleq tesöruta tarinqäta y yachakunqätaqa manam qonqarqätsu.

Ishkë chunka wata pasariptinnam, 82 watayoq këkaptï, Juanwan Maitiqa Bilbao markaman kutiramur, yapë watukayämarqan. ¡Alläpam kushikïkurqä! Cuentatam qokurirqa Jehovä mana qonqëkamashqanta, y yapëmi Bibliapita yachakur qallëkurqä. Juanwan Maitiqa pacienciawanmi yachatsiyämarqan, porqui imëpis kaq tapukïllatan ruraq kä. Punta creenciakunata chipyëpa jaqinarëkurmi Biblia ninqampita alleq yachatsiyämänanta munarqä. Jinamampis, rasumpa kaqpita familiäta y amïgökunata imanö entienditsinäpaq kaqtam yachakïta munarqä.

Jehoväpa testïgunkunapa juk asamblëanchömi 87 watayoq këkar bautisakurirqä. Tsë junaqnöqa manam imëpis kushikushqatsu karqä. Llapä bautisakoqkunam juk shumaq discursuta wiyayarqä. Yachatsikamoq ninqanqa hasta waqaratsimarqanmi. Jehovä parlapëkämaqnömi karqan. Bautisakuriptïnam, atskaq Testïgukuna mana reqikaptïpis felicitämaqni shayämurqan.

Imëpis musyarqämi Jesus Diosman chätsikoq “näni cuenta kanqanta” (Juan 14:6). Peru Bibliapita yachakurmi Jehoväta mas alleq reqirqö. Kananqa kuyashqa teytätanö y amïgötanömi mañakïta puëdï. Acerquémonos a Jehová * libruta leyinqämi kawënïchöqa alläpa precisaq kashqa. Leyir qallarqa juk paqasllachömi leyirnin usharirqä. Jehovä llakipäkoq kanqanta yachakurirqa alläpam kushikurqä.

Mëtsika tiempupa rasumpa kaqta ashinqäman pensarninqa, yarpärï Jesus kënö ninqanmanmi: “¡Imatapis mañacuyaptiqueqa, Dios qoyäshunquim! ¡Asherqa, tariyanquim; puncuta tsactacuyaptiquipis, quichapäyäshunquim!” (Mateu 7:7). Kananqa tapukïnïkunapa respuestankunata yachakurqömi, y yachakunqäpita wakinkunata yachatsirmi alläpa kushikö.

90 watayoqna karnimpis, Jehoväpa kaqchöqa jövinllam sientikö. Jehoväpa testïgunkuna Yachatsikuyänan Wayiman cada ëwarninqa alläpa shumaq yachatsikïkunatam yachakö, y kushikömi kuyashqa cristiänu mayïkunawan juntakarirnin. Dios awnikushqan Mushoq Patsachöqa yapëmi yachatsikoq këta munä (Apocalipsis 21:3, 4). Jina wanushqa këkaq kuyashqa kastäkunata rikäritapis alläpam munëkö. Pëkunatapis rasumpa kaqpita yachatsita puëdishaqmi, y Jehoväta tsatsayënichö reqinqätapis willarishaqmi (Hëchus 24:15).