“Mana alli nuna gobernaptinqa, markachö kaqkunam jipayan.” (Proverbius 29:2.)

Unëpita patsëmi munëninta ruraq gobernantikunaqa kayashqa, tsëmi rumi shonqu karnin gobernayanqan markakunata alläpa feyupa sufritsiyashqa. Awmi, manam llapan gobernantikunatsu tsënö kayashqa, wakinkunaqa markankunapaq allita munarninmi yanapëta tïrayashqa. Tsënö karpis, ichik tiempullachömi cuentata qokuriyan autoridäyoq këkarpis, nacionninkunachö problëmakuna kaptin y poderyoq këllapaq pelyayaptin rurayanqankuna shumaq mana yarqunqanta. Wakinkunanam nacionninta o markanta mana kaqpaq churëkur autoridäyoq kayanqanta provechar rïcuyäkuyan. Estadus Unïduspa unë secretariunmi nirqan: “Unëpita patsëmi alli gobernayänampaq kallpachakuyanqan y rurëta munayanqan mana allilla yarqushqa”.

Bibliam, “nunapa nänin kikimpa mana kanqanta. Ni kikinllapita mana purinqanta” nin (Jeremïas 10:23). Jutsasapa nuna kikimpa kawëninllatapis diriginampaq yachënin mana këkaptinqa, ¿imanöparaq puëdinman juk entëru nacionta dirigita? ¿Kananqa cuentata qokurinkiku gobernantikuna sufrimientuta ushakätsita mana puëdiyanqanta? Rasun kaqchöqa, kikinkunam problëmakunata yuritsiyämun.

“Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita.”(Juan 13:35.)

Entëru nacionchö religionta pushaqkunam parlayan kuyakïpaq y juknölla kawakïpaq. Tsënö kaptimpis, qateqninkuna kuyanakuyänampaq y llapan nunakunata igualpa tratayänampaq manam yanapayashqatsu. Kuyakïta yachatsikuyänampa rantinmi, religionkunaqa nuna pura y nacion pura chikinakï y rakinakï kanampaq yanapakuyashqa. El cristianismo y las grandes religiones nishqan librunchömi juk yachaq nuna qellqarqan,  ‘mas peor kaq guërrakunataqa religionkuna yuritsiyämunqanta’.

Jinamampis, mëtsikaq religionpa pushaqninkunam, jukwan jukwan punukïta y ollqu pura y warmi pura punukïta aprobayashqa. Këkunam chätsikushqa imëka qeshyakunaman, manaraq yureq wamrata jitëman, mana munëkar qeshyaq këman y familiakunata ushakätsiman; awmi, alläpa nanatsikïta y llakikïtam apamun.

“Quiquin nunam mana alli muneninta ichicllapayan munapäquican. Tseno munapëcarllanam, juclla jutsaman jeqarcun.” (Santiägu 1:14, 15.)

Jutsa noqantsikchö kanqanrëkurmi, llapantsik pantantsik. Jinamampis, ëtsantsikpa mana alli munëninkunapitam imëpis tsarakïkänantsik (Efesius 2:3). Mana alli munënintsik yuriptinqa sasaran tsarakunapaqqa, y masqa tsëta rurëta puëdishqam, peru mana tsarakurninqa alläpa mana allimanmi chäratsimashwan.

Tsë asuntuta estudiaq nunam kënö qellqarqan: “Cäsi llapan sufrimientuntsikkunaqa shamun mana alli munënintsikkunapitam, munënintsikllata ashinqantsikpita, imëkayoq këpaq ërayanqantsikpita y imëkatapis kikintsikllapaq munanqantsikpitam”. Imatapis alläpa munëwan, washkuwan, drögakunawan, pukllawan, pununakïwan y maskunawan viciashqa kayanqanmi respetashqa nunakunapa kawëninta malograshqa, jina familianta y amïgunkunatapis llakikïmanmi chätsishqa. Nunakuna jutsasapa kayanqanta musyëkarninqa, ‘Diospa llapan camashqancuna imeca juc qeshyaq warmi qeshpicur nanatsiconqanno jipaquicayan’ nir Biblia ninqanwanmi acuerdu kanantsik (Romänus 8:22).

Bibliam rikätsikun Satanas “patsacho mandacoq” kanqanta, y puëdeq demoniu nishqan mana alli espïritukuna yanapaqninkuna kayanqanta (2 Corintius 4:4; Apocalipsis 12:9).

Satanasnöllam, demoniukunapis alläpa munëkuyan nunakunata controlëta y engañëta. Tsë rasumpa kanqanta musyarmi apostul Pablu kënö nirqan: “Noqantsicqa manam nuna puratsu pelyecantsic, sinoqa mana ricanqantsic puedeq supëcunawanmi, diabluwanmi y tse diablupa mandaduncuna ruraq demoniucunawanmi. Pecunam jinantin munducho nunacunata llutanta ruratsiquic[ay]an” (Efesius 6:12).

Demoniukuna nunakunata fastidiëta gustarnimpis, masqa munayan Diosnintsik Jehoväpita rakimënintsiktam (Salmu 83:18). Astrologïa, mägia, brujerïa, adivinacion y maskunatam Satanasqa utilisan nunakunata engañar makinchö katsinampaq. Tsëmi, Jehoväqa willamantsik tsë peligrukunapita y tsëpita tsapashqa këta munaqkunatam yanapakïninta qon (Santiägu 4:7).

Ishkë waranqa watanam, Biblia kënö nirqan: “Teyta Jesucristu que patsaman cutimunanpaq ichicllana pishicaptinmi, allapa sasa cawaqui tiempucuna chämonqa”.

Tsëpitanam imanir tsënö kanampaq kaqta nin: “Nunacunam queno ticracuriyanqa: codisiosu, qellellapaq locuyäcoq, orgullosu, musyaq tucoq [...], mana ancupäcoq, perdonaqui mana yachaqcuna, cuentusteru, llutan rurecunata mana teqñaq, allapa mana baleq, alli rurecuna mana gustaq, amiguncunata lebantar ranticoq, allapa lisu, yachaq tucoq, Diosnintsic munashqanta mana cäsushpa quiquincunapa munenincunallata ruracoq”. Kë ushanan junaqkuna sufrimientuta apamunqanqa, clärum këkan (2 Timoteu 3:1-4).

Kë llapanta rikanqantsikchö, ¿manaku cläru këkan sufrimientuta nuna ushakätsita munëkarpis mana puëdinqan? Tsëqa, ¿pitataq ashishwan yanapamänapaq? Kamamaqnintsiktam. Pëmi awnikushqa demoniukunapa y “diablupa rureninta ushacäratsinanpaq” (1 Juan 3:8). Qateqnin kaq yachatsikïchömi rikäshun sufrimientuta ushakätsinampaq Dios imata ruranampaq kaqta.