Estellem * wamrankunawan iglesiaman seguïdu ëwaq, y Bibliata entiendita munanqantam pastorninta nirirqan, peru pë mana yanapaptinmi, iglesianman ëwëta jaqirirqan. Estellem kënö nin: “Iglesiäpitam juk cartata qellqayämurqan, tsëchömi kënö nirqan: ‘Iglesiaman shamïta mana puëdirpis, qellëtaqa apatsimunëkim’. Tsëchömi cuentata qokurirqä pëkunapaqqa mas precisaqqa qellënïlla kanqanta”.

Imëpis religiosa kashqa Angelinam këta nirqan: “Iglesiächöqa kima kutim cada reunionchö qellëta mañakur pasayaq, y cada pasayaptin ëkallatapis qoyänätam shuyaräyaq. Imëpis qellëllatam mañakïkäyaq. ‘Diospa munëninta manam rurëkayantsu’ nirmi pensarirqä”.

Y qam reqinqëki religionkunaqa, ¿nunakuna imëkanöpapis qellëta qoyänampaq obligakuyanku? ¿Tsëta rurarqa Biblia ninqannöku rurëkäyan?

Cristianismuta patsätseq Jesusmi kënö nirqan: “Debaldillam chasquiyarqonqui, y paqtam [...] cobrecayanquiman” (Mateu 10:8). Bibliapa väleq willakïnintaqa manam rantikuyanmantsu, antis llapan nunakunapaqmi fäcil tarinan y debaldilla kanman.

¿Punta kaq cristiänukunaqa mëpitataq congregacionpa gastunkunapaq qellëta tariyaq?

Cada ünum ëkallatapis “shonqun munanqannö” qoyaq, tsëtaqa qoyaq manam ‘mana munëkar ni obligädutsu, porqui Diosqa kuyan kushishqa qarakoqkunatam’ (2 Corintius 9:7, NM). Apostul Pabluqa carpakunata rurapakurmi trabajaq, tsënöpa, Diospita yachatsikurnin mantenikunampaq (Hëchus 18:2, 3). Kikinmi kënö nirqan: “Uryayarqä paqasta junaqtam qamcunata mana afanayänaqpaq. Tsenomi cayarqä Diospa alli willaquita willapäcurnin” (1 Tesalonicensis 2:9).

Jehoväpa testïgunkunapa Yachatsikuyänan Wayikunaqa, manam alläpa imëkayoqtsu kayan. ¿Mëpitataq gastunkunapaq qellëta jorqayan? Testïgukunaqa manam reunionninkunachö qellëta mañakur pasayantsu ni qellëta mañakurnin cartata qellqayantsu. Tsëpa rantinqa, Diospita yachatsikïnimpita agradecikoqkunaqa, yachatsikuyänan wayichö cäjamanmi ëkallatapis mana pitapis musyatsikushllapa winayan.

Awmi, kë revistata imprimi y repartiqa chaniyoqmi. Peru kë publicacionkunachöqa manam imëpis rikankitsu avïsukunata ni qellëta mañakïpaq willakïkunata. Bibliapa rasumpa yachatsikïninkunata musyatsikunanllapaqmi rurakämun.

¿Imataq parecishunki? ¿Jesus ninqanwan y punta kaq cristiänukuna rurayanqanwan igualanku tsënö rurayanqan?