Kuyakïqa shonqupita patsë pitapis yachanëmi. Kuyakoq nunaqa parlakïninchö y rurëninchömi rikätsikun, tsënö ruranampaq imëkata ruranan kaptimpis.

Diosta kuyanqantam Moisesqa rikätsikurqan. ¿Imanö? Imëpis wiyakurnin. Tsëmi 1 Juan 5:3, (NTCN) textopis kënö nin: “Llapan mandacuynincunata cäsurga, quiquin Dios Yayatapis rasumpa[m] cuyantsic”. Dios imata mandaptimpis Moisesqa ninqannöllam ruraq, mantsëpaq faraón kaqman ëwëta o fäcil-lla puka lamarman väranta makyëtapis (Éxodo 40:16).

Jina Moisesqa israelïtakunata kuyanqantam rikätsikurqan. Pëkunaqa musyayarqanmi Moisesta Jehová pushayänampaq churanqanta, tsëmi imëka problëmankunatapis pëta willayarqan. Bibliam nin: “Tsë markaqa Moisespa puntanchömi patsa warëpita hasta tardeyaq kayarqan” (Éxodo 18:13-16). Yarpakurkï, imanö utishqaraq o pishipashqaraq junaqta ushaq llapanta wiyarnin. Pero pëqa kushishqam rurarqan llapanta kuyarnin.

Moisesqa manam pëkunata wiyarqanllatsu, jina pëkunapaqmi Diosta mañakoq. Mana alli trataqninkunapaqpis pëqa mañakoqmi. Këman yarpärishun, panin Míriam Moisespaq quejakuptinmi Jehoväqa leprawan castigarqan. Moisesqa kushikunampa rantinmi Diosman kënö panimpaq mañakurqan: “¡Dioslla, rogakullaqmi! ¡Kachakëkatsillë, rogakullaqmi!” (Números 12:13). ¿Mana kuyakoq karninqa, tsënö mañakunmantsuraq karqan?

Diosta llapan shonquntsikwan kuyanapaqmi, tsënö kuyakïmi mandamientonkunata ‘shonquntsikpita’ patsë wiyakunapaq yanapamäshun (Romanos 6:17). Tsëqa pëta alläpam kushitsinqa (Proverbios 27:11). Diosta kuyarnin sirwinqantsikqa noqantsiktapis yanapamantsikmi, kushitsinqankunata rurashqaqa kushikïtam tarishun (Salmo 100:2).

Wakinkunarëkur kuyakunqantsikchö sufritapis yachakunantsikmi. Amïgontsik o familiantsik problëmankunapita willamashqaqa tsënö kuyakunqantsikmi yanapamäshun 1) llapan puëdinqantsikmannö wiyanapaq, 2) pëpa problëmanta problëmantsiktanö rikänapaq y 3) pëman interesäkunqantsikta rikätsinapaq.

Moisesnöllam noqantsikpis kuyanqantsikkunapaq mañakushwan. Höraqa yanapëta munarpis manam ni imata rurëta puëdintsiktsu y quizá disculpakurnin kënö nishwan: “Disculpëkamë, pero qampaqqa Diosnintsikman mañakamïllatam puëdï”. Tsënö kaptimpis këta yarpë, “Dios munashqanno cawacoq nunapa mañaquinenqa allapa poderyoqmi” (Santiagu 5:16). Mañakïnintsikqa Diosnintsikpa shonquntapis quizá kuyuratsinman, juk nunapaq imatapis rurëta mana pensanqanta rurarinampaq. Kuyanqantsikkunapaq mañakunqantsikmi alläpa alliqa kanqa imëkata ruranqantsikpitapis. *

Moisespitaqa atskatam yachakïta puëdintsik. Noqantsiknö jutsasapa karpis, alläpam yachatsimantsik Diosman markäkunqanchö o yärakunqanchö, humildadninchö y kuyakïninchö. Sinchikushun Moises ruranqanta qatinapaq, y tsënö rurarninqa noqantsik y reqinqantsikkunapis atska bendicionkunatam chaskiyanqa (Romanos 15:4).