Armagedón ¿ima kanqantataq pï më pensayan?

“Juc pampaman[mi] jinantin nasionpita reycunata elluramorqan. Tse pampapam jutin hebreu idiomacho ‘Harmagedon’.” (APOCALIPSIS 16:16.)

ARMAGEDÓN palabrata wiyar, ¿ima kanqantataq pensanki? Itsa hinantin o hinampag Patsa ushakänampaq kaqman pensanki. Bibliachö kë palabra huk kutilla yuriptimpis Internetchö, televisionchö, radiochö y periödicokunachömi yarqamun, y pushakoq religiösokunapis tsëpaq alläpam parlayan.

¿Armagedón ima kanqampaq nunakuna pensayanqan paqtanku Biblia yachatsikunqanwan? Alläpam precisan tsëta musyanantsik. ¿Imanir? Tsëta musyarqa, tsë hunaq chämunanta manam mantsashuntsu, shamoq tiempotapis kushishqam shuyaräshun y huknöpam Diostapis rikäshun.

Armagedonpaq nunakuna kima cösaskunata niyanqanta rikärir, igualaratsishun Biblia imata yachatsikunqanwan.

  1. ARMAGEDONTAQA NUNAKUNAM CAUSAYANQA NIYANMI.

Wakin periodistakuna y estudiösokunaqa, nunakuna causayanqan tukï desgraciakunapaqmi Armagedón niyan. * Tsëmi ishkan hatun guërrakunapaqpis tsë palabrata utilizäyarqan. Y Estados Unïdoswan Unión Soviética nishqan nacionkuna hinantin Patsata ushakätseq bombankunawan ushakätsinakuyänantam nunakuna mantsayarqan, tsëmi tukïchö yarqamoq noticiakunachö niyarqan tsë pasaptinqa “armagedón” kanampaq kaqta. Kanan witsanqa, Patsata paqwë rakchatäyanqampita alläpa usya o tamya karnin Patsata ushakätsinampaq kaqtam wakin estudiösokuna pensayan, y tsë “armagedón” kanampaq kaqtam niyan.

¿Imatataq pensatsikun tsënö niyanqan? Patsata y tsëchö llapan këkaqkuna nunapa makinchö këkanqantam. Gobiernokuna alli pensëkur imatapis mana rurayaptinqa, kë Patsa paqwë ushakänampaq kaqtam pensatsikun.

¿Imatataq Bibliaqa yachatsikun? Diosqa manam haqinqatsu nunakuna Patsata ushakätsiyänanta. Biblia ninqannöpis, “manam envänollatsu” Jehoväqa * Patsata kamarqan, sinöqa nunakuna tsëchö “kawayänampaqmi” (Isaías 45:18). Nunakuna paqwë ushakätsiyänanta haqinampa rantinmi ‘que patsacho llutan ruraqcunata ushacätsinqa’ (Apocalipsis 11:18).

2. ARMAGEDONQA PATSA KUYÏNÖ HUK HATUN DESGRACIAM KANQA NIYANMI.

Wakin nacionkunachöqa hatun desgraciakunapaq parlarmi periodistakuna utilizäyan Armagedón palabrata. Këllaman yarpäri, 2010 wata Haití nacionchö desgracia kanqampaqmi huk noticiachö Armagedón niyarqan. Tsë noticiachöqa willakuyarqan tsë nacionchö Patsa sinchipa kuyïkuptin alläpa hipayanqampaq, mëtsikaq wanuyanqampaq y imëkakuna ushakanqampaqmi. Hina noticiata wakin willakoqkuna y pelïculakunata ruraqkunapis tsë palabrataqa utilizäyanmi, y manam unë pasakunqampaq parlarllatsu, sinöqa shamoq tiempochö pasanampaq kaqpaqwanmi. Tsëmi ciëlopita mëtsikan qaqa Patsaman ishkimur llapanta ushakätsinampaq kaqpaq parlarnimpis “Armagedón” palabrata utilizäyan.

¿Imatataq pensatsikun tsënö niyanqan? Allikunata ruraq nunakunatawan paqta mana alli nunakunata illaqpita Armagedón ushakätsinampaq kaqta, y nunakuna salvakuyänanrëkur imatapis rurëta mana puëdeyänampaq kaqtam pensatsikun.

¿Imatataq Bibliaqa yachatsikun? Armagedonqa manam llapan nunakunatatsu igualpa ushakätsinqa. Tsëpa rantinqa, mana alli kaqkunallatam ushakätsinqa. Bibliaqa awnikun ichikllachöna ‘mana allita ruraqkunaqa manana kayänampaq’ kaqtam (Salmo 37:10).

3. ARMAGEDONCHÖQA PATSATAM DIOS USHAKÄTSINQA NIYANMI.

Mëtsikaq pushakoq religiösokunam niyan alli kaqkunawan mana alli kaqkuna ushakätsinakuyaptin Patsa ushakänampaq kaqta. Estados Unïdoschö huk encuestata ruraqkunam willakuyan “Armagedón guërrachö” kë Patsa ushakänampaq kaqman cada 10 nunakunapita chusku creiyanqanta.

¿Imatataq pensatsikun tsënö niyanqan? Kë Patsachö huk tiempolla kawayänampaq nunakunata Dios kamanqanta y kë Patsatapis  ushakänanllapaq kamanqantam. Awmi, imë karpis llapantsik ushakänallapaq Dios kamamanqantsiktam pensatsikun.

¿Imatataq Bibliaqa yachatsikun? Biblia claro willakunqannöpis Diosqa “patsata allim takyatsishqa, y manam pipis ni imë kuyutsinqatsu” (Salmo 104:5). Patsachö täraqkunapaqmi Biblia kënö nin: “Patsachöqa alli nunakunallam täräyanqa, y mana wanushpam tsëchö kawayanqa” (Salmo 37:29).

Rikanqantsiknöpis, Armagedonqa nunakuna pensayanqampita hukläya kanampaq kaqtam Bibliaqa rikätsikun. Tsëqa, rasumpa kaqchöqa, ¿imataq Armagedón?

[Päginapa ura kuchunchö willakïkuna]