Musyakärin pipa makinchö kë Patsa këkanqan

HUK kutichömi, “que patsacho nunacuna [...] manda[qqa] bensishqam canqa” nirqan Jesus. Tsëpita wallka tiempokuna pasarinqanchönam, “pëqa noqata mandameta manam puedintsu” y “condenacärishqana[m]” nirqan (Juan 12:31; 14:30; 16:11). ¿Pipaqtaq parlëkarqan?

Jesus tsënö ninqanmi rikätsikun “que patsacho nunacuna [...] manda[qqa]” Teytan Jehová mana kanqanta. Tsëqa, ¿pipaqtaq parlëkarqan? ¿Imanötaq ‘bensishqa’ kanan karqan? Y, ¿imanötaq “condenacärishqana”?

“Patsacho [...] mandacoq” pï kanqan musyakärin

Suwakoqkunata o wanutsikoqkunataqa rurayanqampita parlëkachëmi gustan, tsëtam Diablupis rurarqan Diospa Tsurin Jesusta tentarnin. Puntataqa “riquecatserqan jinantin munducho nasioncunata[m]”, nïkurnam kënö nirqan: “Que llapan nasioncunaqa maquïchomi quecan. Munarqa pitapis qoycümanmi. Tsemi shumaq queninta ricacunequipaq y tsecho mandacoq canequipaq qoycushqequi. Peru que llapanta qoycunaqpaqqa; puntäman qonqurïcur, adorecamë” (Lucas 4:5-7).

Wakinkuna niyanqannöpis mana alli munëkunalla Diablu kaptinqa, ¿imanöraq kë texto willakunqanta entiendeshwan? ¿Tsëllaraq bautizakuriptinku mana alli pensëninkuna o munëninkuna Jesusta tentëkarqan? Y tsënö kashqa kaptinqa, ¿“pëchoqa manam ni ima jutsapis cantsu” ninmantsuraq karqan Biblia? (1 Juan 3:5.) Diablupa makinchö kë Patsa këkanqantaqa manam Jesus negarqantsu. Tsëpa rantinqa, “mana alli ruraqcunapa mandacoqnin” kanqantam nirqan, hina ‘asesinum’ y “pëchoqa ni ima rasonpa caq cantsu” nirqanmi (Juan 14:30; 8:44).

Jesusta Diablu tentëta munanqampita qanchis chunka watakuna pasarinqanchönam, apóstol Juan cristiano mayinkunata yarpätsirqan Diablu alläpa puëdeq kanqanta kënö nirnin: “Que munducho Diospa mana caqcunaqa diablupa muneninchomi caquicayan”. Hinamampis kë espíritu “jinantin marcacho nunacunatam engañaquican” nirqanmi (1 Juan 5:19; Apocalipsis 12:9). Rikanqantsiknöpis, “mana alli ruraqcunapa mandacoqnin[qa]” huk mana rikakoq espíritu kanqantam Bibliaqa nin. Tsënö karqa, ¿paqwëtsuraq llapan nunakunata makinchö katsin? Rikärishun.

Patsata gobernaq y yanapaqninkuna

Diosman markäkïninkunarëkur o yärakuyninkunaraykur cristiänokuna peleachö cuenta këkäyanqampaq parlarmi, apóstol Pablu rikätsikurqan pikuna pasëpa chikeqninkuna kanqanta. Kënömi nirqan: “Noqantsicqa manam nuna puratsu pelyecantsic, sinoqa mana ricanqantsic puedeq supëcunawanmi, diabluwanmi y tse diablupa mandaduncuna ruraq demoniucunawanmi. Pecunam jinantin munducho nunacunata llutanta ruratsiquican” (Efesios 6:12). Këchö ninqannöpis, cristiänokunaqa “manam nuna puratsu pelyecantsic, sinoqa mana ricanqantsic puedeq supëcunawanmi”.

Qepakunata traduciyanqan Bibliakunachöqa, casi llapanchömi rikätsikun “mana ricanqantsic puedeq supëcuna[qa]” mana alli munëkunalla mana kanqanta, sinöqa, alläpa puëdeq y mana alli espïritukuna kayanqantam. Tsëmi wakin Bibliakunachöqa, “ciëlochö mana rikakoq mana alli tröpakuna” nir traduciyashqa (Carta a los Efesios. Comentario para exégesis y traducción) o “rarakunachö mana alli espïritukunapa tröpankuna” nirpis (La Biblia de las Américas). ¿Imatataq kë rikätsimantsik? Diabluqa manam hapallanllatsu nunakunata makinchö katsin. Hina huk angelkunapis pëta qatirmi “jaqiriyarqan  kikinkunapa wayinkunata” y pëkunam yanapëkäyan (Judas 6, QKW).

Daniel librochö qellqarëkaq profecïakunam rikätsimantsik “nunacunata llutanta ruratsiquica[qcuna]” hinantin Patsata makinchö katsiyänampaq unë witsampitana imanö churanakushqa kayanqanta. 537 Jesus manaraq shamunqan watam, wakin judïokuna Babiloniapita Jerusalenman kutiyarqan. Tsë kutikoq marka mayinkunapaq yarpachakurmi, profeta Danielqa kima semänapa pëkunapaq mañakurqan. Tsënam kallpata qonanrëkur huk angelta Dios kacharqan, pero tsë angelqa manam rasllatsu pë kaqman charqan. ¿Imanir? Kënömi Danielta tsë ángel willarqan: “Persia nación rikaq principem ishkë chunka huk hunaqkuna harkarämar [tsaparämar] kashqa” (Daniel 10:2, 13).

¿Pitaq tsë “Persia nación rikaq principe[qa]” karqan? Manam Persia nacionta gobernaq Cïrotsu, antis pëqa yanaparqanmi Danieltawan markanta. Hinamampis, ¿mëqan ëtsayoq y tulluyoq gobernaqraq huk angelta kima semänapa harkarëta puëdenman karqan? Yarpäshun, huk angel-llam 185.000 puëdeq soldädokunata huk paqasllachö ushakäratsirqan (Isaías 37:36). Tsë ‘principeqa’ Diablupa yanapaqnin demoniom karqan, y hinantin Persia naciontam cargonchö katsirqan. Hinamampis Dios kachanqan angelqa Danielta nirqan kutikurnin tsë demoniowan y ‘Grecia nacionpa principenwampis’ peleayänampaq kaqtam (Daniel 10:20).

¿Imatataq kë willakïpita yachakuntsik? “Nunacunata llutanta ruratsiquica[qcunaqa]” mana rikakoq demoniokuna kayanqantam, y pëkunaqa mandaqnin Satanás Diabluta wiyakurmi hinantin Patsata makinchö katsiyänampaq churanakuyashqa. Pero, ¿imatataq kananyaq logrëta munayashqa?

Patsata gobernëkaq musyatsikurin pï kanqanta

Bibliapa ushanan kaq libronchömi, apóstol Juan willakun Miguel o Arcángel këman chashqana Jesus Diablutawan demonionkunata vencirnin ciëlopita qarpamunqanta. Y rikanqantsiknöpis, tsëqa imëka mana allikunatam noqantsikpaq apamun. Kënömi Juan nirqan: “¡Allau patsacho y lamarcho quecaqcuna, porqui diablum sielupita weqaparcayämushqa captin, y pocu tiempullana engañacur carinanta musyarnin, qamcunapa contrequicuna allapa piñashqa quecan!” (Apocalipsis 12:9, 12).

¿Imanötaq piñashqa këninta Diablu rikätsikïkan? Wanutsikoqkuna o suwakoqkuna “mana noqapaq karqa manam pipaqpis kanqatsu” niyanqannömi pëpis pensan. Ushakäyänampaq wallka tiempollana pishinqanta musyarmi, Diabluwan demonionkunaqa hinantin Patsata y nunakunata ushakätsita tïrëkäyan. Pëqa tukïtam utilizan, hukqa hatusaq negociokunam, tsëtaqa utilizan mana wanayanqantapis nunakuna paqwë rantiyänampaqmi. Tsënöpam Patsapa imëkankunata wallkätsiyan y tukï këkaqkunatapis malograyan, tsënömi nunakunaqa kikinkunalla kawëninkunata peligroman churayan (Apocalipsis 11:18; 18:11-17).

Nunakunaqa kawar qallayanqampita patsënam rikätsikuyashqa política y religión asuntokunachö Diablunö mandakoq këta paqwë munayanqanta. Apocalipsis librom rikätsikun mantsëpaq animal cuenta gobiernokunataqa Diablu “podernin” qoshqa kanqanta. Hina polïticawan religión yanapanakuyanqanta willakurmi imëka rakcha warmi wënanwan këkaq cuentapaq parlan (Revelación 13:2; 17:1, 2). Yarpärishun mëtsika watakunapana allqutsanakïkuna, esclavizänakïkuna, guërrakuna, huk marka huk markawan wanutsinakïkuna kanqanman y millonyëpayan nunakuna wanuyanqanman. Tsë llapan pasanqankuna, ¿nunakunapa mana alli munëninkunallapitatsuraq? O, ¿mana rikakoq espïritukunatsuraq tsëkuna pasanampaq rurëkäyan?

Bibliaqa clärom willakun mandakoqkunata y gobiernokunata pï makinchö katsinqanta. Musyëkar o mana musyëkarpis nunakunaqa rikätsikuyan gobernaqninnö kayanqantam, tsëmi pensëninkunachöqa “mana noqapaq karqa manam pipaqpis kanqatsu” niyan imëkapaqpis. ¿Imëyaqraq kë Patsa Diablupa makinchö kanqa?

 Ichikllachönam Diablu ushakärinqa

Cristu Patsachö këkar Teytampa munëninta ruranqanmi rikätsikurqan Diablupa y demonionkunapa ushakënin chämunampaq ichikllana pishinqanta. Supaykunata nunakunapita imanö qarquyanqanta qateqninkuna willayaptinmi Jesus kënö nirqan: “Imeca rayunoraq rara sielupita diablu jeqamoqta[nöna]m ricarqö” (Lucas 10:18). Tsëta nirmi Jesus rikätsikurqan, ciëloman kutikur arcángel Miguel tikrarir, Patsata gobernëkaqta ushakäratsir alläpa kushishqa kanampaq kaqta (Apocalipsis 12:7-9). Bibliachö profecïakunata alli estudiarmi rikantsik, 1914 watachö o ichik maschö Jesus ciëlota limpiar Satanasta qarqaramunqanta. *

Tsë witsëpita patsëmi Diabluqa musyan ushakänampaq ichikllana pishinqanta. Y kë ‘munducho Diospa mana caqcuna diablupa munenincho caquicayaptimpis’, mëtsika millón nunakunam makinchö kananta munar tukïta ruraptimpis ulipänanta o llullapänanta haqiyashqatsu. Bibliam rasumpa kaqta musyayänampaq yanapashqa y rikätsishqa pë pï kanqanta y imata munanqanta (2 Corintios 2:11). Apóstol Pablu cristiano mayinkunaman kënö nir cartakunqanmanmi markäkuyan: “Shumaq pasaquicho cawatsicoq Diosmi diabluta prontuna bensiriyänequipaq yanapecuyäshunqui” (Romanos 16:20). *

Ichikllachönam Diabluqa ushakärinqa. Cristupa gobiernonchöqa, llapan alli nunakunam kë Patsata huk paraïsoman tikratsiyanqa. Wanutsinakï, maqanakï y chikinakïqa paqwëmi ushakärinqa. “Tsë llapan punta kaqkunaqa qonqashqanam kanqa” nirmi Bibliaqa awnikun (Isaías 65:17). ¡Imanö kushikïpaqraq këkunqa mana rikakoq gobernantepa makimpita kë Patsa libre quedariptinqa!

[Päginapa ura kuchunchö willakïkuna]

[9 kaq päginachö ninqan]

Cristupa gobiernonchöqa, llapan alli nunakunam kë Patsata huk paraïsoman tikratsiyanqa