Diosnintsik akranqan Reymi bendicionkunata apamunqa
Diosnintsik akranqan Reymi bendicionkunata apamunqa
“Jehoväpa espïritunqa pëchömi kanqa.” (ISA. 11:2.)
1. Mundochö pasanqankunata rikar, ¿imatataq wakin nunakuna niyan?
INTITA, killata y estrëllakunata estudiaq nunam 2006 watachö nirqan: “Kë mundochö pasëpa mana alli gobiernokuna, mana alli nunakuna y Patsatapis, vientotapis rakchataq nunakuna këkaptinqa, ¿imanötaq pachak wata masllapis nunakuna kawëta puëdeyanman?”. Huk periödiconam kënö nirqan: “Manam waktsa këta ushakätsishqantsiktsu, ni nacionpura yamë kawakïta tarishqantsiktsu. Tsëpa rantinqa mana allillatam rurashqantsik. Kë llapanta altsëta tïrashqantsik, llapanta controlaq gobiernokunawan hasta ni imata mana controlaq gobiernokunata patsätsirmi, hina guërrakuna mana kanampaq Sociedad de Naciones nishqanta patsätsir, hasta guërrakuna kanampaq armakuna ëllïwanmi. Y atska kutim ‘guërrakunata rurashqantsik guërrata ushakätsita munëwan’, tsëmi pipis creinnatsu guërrakunata ushakätsinata” (New Statesman).
2. ¿Imanötaq ichikllachöna Jehová rikätsikunqa pëlla Autoridad kanqanta?
2 Tsënö niyanqanqa manam noqantsikpaqqa espantakïpaqtsu, Bibliachöqa alleq clärom nimantsik nunakunata Diosnintsik gobernanakuyänampaq mana kamanqanta (Jer. 10:23). Jehovällam Ciëlochö Patsachöpis Autoridadqa, tsëmi pëlla Leykunata qomantsik, kawënintsikchö imata ruranapaq nimantsik y alli kaqta ruranapaq yanapamantsik. Ichikllanam pishin Autoridad këninwan nuna patsätsinqan gobiernokunata ushakätsinampaq. Y tsëchömi Autoridad kanqanta mana respetaq nunakunata y kë mundota kuyaqkunata ushakätsinqa. Kë mundochö nunakunaqa, hutsapa y “que patsacho mandacoq diablu[pa]” makinchömi kawayan (2 Cor. 4:4).
3. ¿Imataraq Cristupaq Isaías willakurqan?
3 Shamoq Patsachöqa, Jehová kuyakïninta rikätsikunqa Akrashqampa Gobiernonwanmi (Dan. 7:13, 14). Pëpaqmi profeta Isaías kënö willakurqan: “Jesëpa troncon hawampitam huk rama tseqllimunqa y tseqllimunqanchömi atskata wayïkamunqa. Jehoväpa espïritunqa pëchömi kanqa, musyëyoq kanampaq, willapäkoq kanampaq, kallpayoq kanampaq, yachëyoq kanampaq, y Jehoväta respetanampaq” (Isa. 11:1, 2). “Jesëpa troncon hawampitam huk rama tseqllimunqa” nirqa, Cristupaqmi parlëkan. Pero ¿imanöpataq pëtaqa santo espíritu yanapanqa llapan nunakunata gobernanampaq? Gobiernon, ¿ima bendicionkunatataq apamunqa? Y, ¿imataraq ruranantsik bendicionkunata chaskita munarqa?
Diosmi yachatsin Rey kanampaq
4-6. ¿Imataq Jesusta yanapanqa yachaq y ankupäkoq Rey, Sumo Sacerdote y Juez kanampaq?
4 Jehoväqa Patsachö täraq nunakuna hutsannaq kayänantam munan. Pero tsënö hutsannaq kanapaqqa, huk yachaq y ankupäkoq Reypa, Sumo Sacerdötepa y Juezpa yanapakïnintam wanayan. Tsëmi Diosnintsik Jesusta akrarqan, y santo espïritupa yanapakïninwanmi alläpa preciso rurëkunata ruranampaq yanaparqan. Kë llapan cargokunata chaskinqanta imanö ruranampaq kaqtapis rikärishun.
5 Manam ni pipis Jesusnöqa Diosnintsikta reqintsu. Pëqa Teytanwan atska millón watakunanam tärashqa, manam ni mëqan angelpis tsëläya unëqa Dioswan tärashqatsu. Tsë watakunachömi Teytampita alläpa yachakushqa, rasuntachi Bibliachöqa kënö nin: “Tsurin Jesucristuchomi shumaq cäyirintsic Dios imano canqantapis” (Col. 1:15). Tsëmi kikimpis kënö nirqan: “Pipis noqata ricamarnïqa Dios Yayatapis ricashqam” (Juan 14:9).
6 Jesusllam Jehová llapan kamanqankunata y nunakunata reqin. Colosenses 1:16, 17 textom Diospa Tsurimpaq kënö nin: “Jesucristuwanmi Diosnintsic camarqan sielucho y que patsacho llapan ricanqantsiccunata y mana ricanqantsiccunatapis [...]. Jesucristoqa imapis manaraq captinmi carqanna, y llapan camashqancunatapis poderninwan[mi] shumaq quecatsin”. ¡Yarpakurkï! “Huk maestronö” kanampaq Teytan churashqa kaptinmi, Jehová llapan ruranqanchö yanaparqan. Tsëmi maki paltantanö ciëlochö Teytan kamanqankunata reqin, más uchusaq kaqkunapita hasta nunakunapa urusninkunatapis. Awmi, pëqa llapantam paqwë reqïkun (Pro. 8:12, 22, 30, 31).
7, 8. ¿Imanötaq santo espíritu yanaparqan Jesusta yachatsikunqanchö?
7 Jesustaqa santo espïritunwanmi Dios akrarqan. Tsëmi kikin nirqan: “[Jehová] Diospa Espiritunmi noqacho. Pemi acramashqa wactsacunata alli willaquita willapänäpaq, llaquishqacunata cushitsinäpaq, presu cuenta caquicaqcunata libranäpaq, wiscucunata cachacätsinapaq, y ancupëpaq sirwipacoqcunata libranäpaq. Y tsenolla que tiempucho Diospa ancupäquininta willayänaqpaq” (Luc. 4:18, 19). Jesus bautizakurinqanllachöchi santo espíritu yarpätsirqan ciëlochö llapan yachakunqankunata, hina Akrashqa këninwan nunakunata yachatsinampaq Dios munanqankunatapis yarpätsirqanchi (lei Isaías 42:1 *, Lucas 3:21, 22 y Juan 12:50).
8 Jesus pensëninchö y cuerponchö hutsannaq karpis santo espïritupa kallpanta katsirqanmi. Tsëmi pëqa alli nunallatsu karqan, sinöqa kë Patsachö mana pipis yachatsikunqannömi yachatsikurqan. Bibliachömi pëpa yachatsikïnimpita këta leintsik: “Llapan nunacuna[m] allapa espantacur mantsacäcuyarqan tse yachatsiquininpita” (Mat. 7:28). Pëqa nunakunata manam hana hananllatsu reqeq, musyaqmi hutsarëkur y Diosta mana reqiyanqanrëkur nunakuna alläpa hipayanqanta. Hina nunakunapa shonqunkunatapis rikarmi, pensëninkunamannö parlapaq (Mat. 9:4; Juan 1:47).
9. Cristupa kawëninman yarpar, ¿imanirtaq alli Gobierno kananman markäkuntsik?
9 Jesusqa nunanömi kawarqan. Hina nunanö kawanqan y hutsasapa nunakunapa rurinchö kawanqanmi, yanapan alli Gobierno kanampaq. Apóstol Pablu ninqannömi, ‘noqantsicno que patsacho yuricushqa captin, petapis diablu jutsaman ishquitsita munarqan’. “Tsemi cananqa cumplidu ancupäcoq mas mandacoq saserdotintsic quecan. Tseno ancupäcoq carmi, pëqa cruscho [“qeruchö”, NM] wanushqa nunacunata jutsancunapita Dios perdonecunanpaq. Noqantsicno que patsacho yuricushqa captinmi, petapis diablu jutsaman ishquitsita munarqan. Tseno captinpis, shonquncho allapa sufrirmi tentasioncunata benserqan. Tseno jutsata mana rurashpa cawashqa carmi, noqantsictapis yanapecamantsic jutsa rureman mana ishquinantsicpaq.” (Heb. 2:17, 18.) Diablu ‘jutsaman ishquitsita munëcaptin’ tsarakushqa karmi, ankupäramantsik tukï hipakïkunata pasashqa. Kë Patsachö këkarnam, rikätsikurqan nunakunata hipaqta rikar ankupäkunqanta o llakipäkunqanta. Qeshyëkaqkuna, y hipatsiyaptin alläpa llakikoqkunaqa, wambra o mayor karpis llapankunam mana mantsakushpa Jesusman witiriyaq (Mar. 5:22-24, 38-42; 10:14-16). Hina rasumpa kaqta yachakïta munaq nunakunapis witiyaqmi pëmanqa. Pero pëmanqa manam witiyaqtsu chikikoqkuna, yachaqtukoqkuna, y ‘Dios Yayapa cuyaquininchö’ mana kaqkuna (Juan 5:40-42; 11:47-53).
10. ¿Imanötaq Jesus rikätsikushqa kuyamanqantsikta?
10 Noqantsikrëkurmi Jesus wanurqan. Këta ruranqanmi rikätsimantsik pëlla mëqan gobiernopitapis más alli kaq Gobierno kanqanta (lei Salmo 40:6-10 *). Kikinmi kënö nirqan: “Que cuyaquimi cuyaqueqa manam pipis wanurinmantsu amiguncunapaqrecur” (Juan 15:13). Kë mundochö gobiernokunaqa, tukï hananchö kawakuyan wakin nunakunapa qellëninkunawanmi, pero Jesusqa manam tsënötsu karqan, antis nunakunapaqrëkurmi wanurirqampis (Mat. 20:28).
Wanïnimpa chaninwan nunakunata yanapanampaqmi Dios churan
11. ¿Imanirtaq Jesus Salvamaqnintsik kanqanman markäkushwan?
11 Awmi, Jesusllam Sacerdötekunapa Mandaqnin këninwan yawarnimpa chaninwan yanapamäshun. Kë Patsachö yachatsikïninmi, rikätsikurqan Waranqa Wata Gobernarnin Salvamaqnintsik karnin imakunata ruranampaq kaqtapis, y tsë bendicionkunataqa chaskishun Jehovällapaq imëpis kawarmi. Cristuqa qeshyëkaqkunata, wiskukunata, cöjokunata kachakätsirqanmi, wanushqakunata kawaritsirqanmi, mallaqëkaqkunatapis mikïnin qorqanmi y hasta yakutapis vientotapis controlarqanmi (Mat. 8:26; 14:14-21; Luc. 7:14, 15). Y këkunataqa rurarqan manam kallpanta rikätsikïta munarllatsu, sinöqa kuyakoq y ankupäkoq karmi. Leprayoq nuna, kachakäratsimankimanku nishpa Jesusta tapuptinmi, “munämi” nirnin contestarirqan (Mar. 1:40, 41). Waranqa Wata Gobernanqanchömi, tsënö llapan nunakunawan ruranqa.
12. ¿Imanötaq Isaías 11:9 texto ninqan cumplikärinqa?
12 Jesuswan ciëlopa kaq yanapaqninkunam Diosnintsikpita ishkë waranqa watapana yachatsikuyashqa, hina tsënöllam imëpis yachatsikïkäyanqa. Tsënöpam cumplikärinqa Isaías 11:9 texto ninqan: “Imanömi lamarchö yaku paqwë junta këkan, tsënöllam patsachö llapan nunakuna Jehoväta paqwë reqiyanqa”. Tsëchöchi yachakushun Patsata y animalkunata shumaq rikänapaq, Adanta Dios unë ninqannö. Waranqa Wata Jesus Gobernar ushariptinmi, Diospa munënin Génesis 1:28 texto ninqannö rurakanqa, y Jesuspa wanïnimpa chaninwan rurakänampaq kaqkunapis rurakashqam kanqa.
Juez kanampaqmi Dios yachatsin
13. ¿Imanötaq Jesus rikätsikurqan justiciata kuyanqanta?
13 Diosmi, “cawecaqcunapa y wanushqacunapa juesnin” kanampaq Jesusta churashqa (Hech. 10:42). Jesusta Dios akranqampitaqa, ¡alläpam kushikuntsik!, pëqa manam takukantsu mana alli rurëkunaman, antis Diosllapaq kawëta y alli rurëtaqa tseqllanchö wachaka wataraqtanömi katsin (Isa. 11:5). Hinamampis mana alli rurëta, hanan shonqu nunakunata y mallaqäkoq nunakunata chikinqantam rikätsikurqan, tsëmi mana ankupäkoq nunakunatapis piñapakacharkurqan (Mat. 23:1-8, 25-28; Mar. 3:5). Y “nunacuna imanopis cayanqanta” musyaptinmi, ni pipis ulipëta o llullapëta puëdeqtsu (Juan 2:25).
14. ¿Imanötaq Jesus kuyakïninta kanan rikätsikun, y imataraq tapukushwan?
14 Hinantin Patsapa Diospita yachatsikïta Jesus dirigenqanmi, rikätsikun pë imëpis justiciata kuyanqanta. Manam ni ima gobierno, ni nuna, ni demoniokunapis Diospa munënin rurakänantaqa michäyanqatsu. Y alleqmi musyantsik Armagedón nishqan Diospa guërranchö justicia rikakunanta (lei Isaías 11:4 * y Mateo 16:27). Tsëmi kënö tapukunantsik: “Yachatsikoq ëwarnin, ¿Jesusnöku nunakunata yachatsï? Y, ¿saludnïmannöku o rurakïnïmannöku tiempöta alleq patsätsir Jehoväta servikä?”.
15. ¿Imaraq llapan kawënintsikwan yachatsikunapaq yanapamäshun?
15 ¿Imaraq llapan kawënintsikwan yachatsikunapaq yanapamäshun? Jehoväpa yachatsikïnin kanqanta musyëmi. Awmi, Jehovämi yachatsikunapaq mandamantsik, Tsurin Jesuswanmi dirigemantsik, y yachatsikunapaq santo espïrituntam qomantsik. ¿Kushikuntsikku Diospita yachatsikurnin, y Jesus santo espïrituwan yanapamanqantsikta musyarnin? Qanchis millón cristiänokuna Diosta mana sirveq nunakunapaq ‘mana educadu quecar ni mana presisaq quecäyaptinpis’, Jehoväqa yanapanmi 236 nacionkunachö Gobiernompita yachatsikuyänampaq (Hech. 4:13).
Cristu apamunqan bendicionkunata chaskinapaq sinchikushun
16. ¿Imatataq Génesis 22:18 texto awnikun?
16 Jehovämi Abrahanta awnirqan kënö nirnin: “Y mirënikiwanmi patsachö llapan nacionkuna bendecishqa kayanqa, ninqäta wiyakunqëkirëkur” (Gén. 22:18). Diosta kuyaq nunakunaqa, kë textota leirmi Diospa bendicionninkunata Akrashqapa shutinchö chaskiyänampaq kaqta markäkuyan. Y kë bendicionkunapaq yarparmi, llapan shonqunkunawan kushishqa Diosta serviyan.
17, 18. ¿Imatataq Deuteronomio 28:2 textochö Jehová awnikurqan, y kë awnikïqa noqantsikpaqwantsuraq?
17 Abrahanpa kastan Israel markatam Dios këta awnirqan: “Jehová Diosniki parlanqanta wiyakuptikim, kë llapan bendicionkuna qamman shamunqa y taripäshunkim” (Deu. 28:2). Kë textochö bendicionkunapaq parlanqanqa, kanan witsan Diosta sirveqkunapaqwanmi. Tsëmi bendicionkunata chaskita munarqa, ‘Jehová Diosnintsik parlanqanta wiyakunantsik’. Tsënöllapam rikäshun Dios kënö awnimanqantsikta: “Kë llapan bendicionkuna[m] qamman shamunqa y taripäshunkim”. Pero ¿imanöraq ‘Diosnintsik parlanqanta’ wiyakuntsik?
18 Jehoväta rasumpa wiyakurqa, Palabran Biblia y publicacionkuna ninqannömi ruranantsik (Mat. 24:45). Hinamampis Jehová y Tsurin ninqankunatam ruranantsik. Kikin Jesusmi këta willakurqan: “Manam llapan ‘Teytallä, Teytallä’ nimaqnïtsu gloriaman yecuyanqa; sinoqa sielucho quecaq Dios Yayä munashqanno cawacoqcunallam” (Mat. 7:21). Hina Diosta wiyakïllam congregacionchö anciänokunata wiyakïpis, pëkunam cristiänokunapaq ‘qarenin’ cuenta kayan (Efe. 4:8).
19. ¿Imatataq ruranantsik Diosnintsik bendecimänapaq?
19 Hina tsë ‘qarëkunam’ kayan Jehoväpa Testïgonkunata Pushaqkunapis, pëkunam hinantin Patsachö congregacionkunata rikäyan (Hech. 15:2, 6). Ama qonqashuntsu, Cristupa wawqinkunata imanöpis rikanqantsikpitam hatun hipakïchö Diosnintsik juzgamäshun (Mat. 25:34-40). Tsëmi Diosnintsik bendecimänapaqqa, ciëlopaq akranqan cristiänokunata imëkachöpis yanapanantsik.
20. a) ¿Imakunatataq rurayänan cristiänokunapaq ‘qarë’ cuenta kaqkuna? b) ¿Imanötaq rikätsikuntsik kë cristiänokunata alläpa agradecikunqantsikta?
20 Betel wayipita hinantin markachö congregacionkunata rikaqkunata, congregacionkunata watukaq circuitokunata y anciänokunatam santo espïrituwan Jehová churashqa cristiänokunata rikäyänampaq, pëkunapis congregacionpaq huk ‘qarë’ cuentam kayan (Hech. 20:28). Kë llapan cristiänokunam, yanapamantsik ‘llapantsicpis Jesucristuman marcäquinintsiccunacho jucnollana car Diosnintsicpa tsurin Jesucristupaqpis mas cäyicurinapaq, y waran waran cabal nuna carnin, Jesucristunona llapancho canapaq’ (Efe. 4:13). Pero kë cristiänokunaqa noqantsiknö hutsasapallam kayan. Tsënö kaptimpis, nimanqantsikkunata wiyakurqa atska bendicionkunatam chaskintsik (Heb. 13:7, 17).
21. ¿Imanirtaq alläpa preciso Diospa Tsurinta wiyakunantsik?
21 Ichikllanam pishin Satanaspa makinchö këkaq mundota Jesus ushakätsinampaq. Y tsë hunaq chäramuptinqa kawënintsik pëpitanam kanqa, pëtam Jehová churashqa “alli shuyni nunacunata” “cawatsicoq yacuman” pushanampaq (Apo. 7:9, 16, 17). Tsëmi kushishqa shonquntsikwan Cristu nimanqantsikta wiyakushun, pëtam Rey kanampaq Jehová churashqa, y santo espïritunwanmi yanapëkan.
[Päginapa ura kuchunchö willakïkuna]
^ par. 7 Isaías 42:1: “¡Rikë! ¡Sirvemaqnïtam alleq tsararä! ¡Pëtam noqa akrarqö! Espïrïtütam pëman churarqö. Pëqa alli rurëtam nacionkunapaq apamunqa”.
^ par. 10 Salmo 40:6-10: “Manam qarëkunata ni sacrificiokunatapis munarqëkitsu; kë rinrïkunatam kicharirqëki, manam mañakurqunkitsu kayashqa qarëkunata ni hutsapaq qarëkunatapis. Tsënö kaptinmi kënö nirqa: ‘Këchömi këkä, Palabrëkichömi noqapaq qellqarëkan. Teyta Diosllä, munanqëkita rurarmi alläpa kushikurqö, y shonqüpa rurinchömi leynikikuna këkan. Hatun congregacionchömi willakurqö alli kaq rurënikipita. ¡Rikë! Manam qallüta tsarätsu. Oh Jehová, tsëtaqa kikikipis allim musyanki. Manam alli kënikita shonqu rurinllachö pakarätsikurqötsu. Alli kënikipita y salvakoq kanqëkitam willakurqö. Manam hatun congregacionchö pakarätsikurqötsu kuyakïnikita y rasumpa kaqta parlakunqëkita’”.
^ par. 14 Isaías 11:4: “Waktsakunataqa justiciawanmi juzganqa, y patsachö manshukunataqa rurëninkunamannömi juzganqa. Y shiminwanmi imëka garroteq cuenta mana alli nunakunata castiganqa, y hamaninwanmi mana alli nunakunata wanutsinqa”.
¿Imakunatataq kë textokunapita yachakurquntsik?
[Yachakunapaq kaqpa tapukïninkuna]
[23 kaq päginachö dibüju]
Jesusmi ankupäkoq këninta rikätsikurqan Jairopa wambranta kawaratsirnin
[25 kaq päginachö dibüjukuna]
Jesucristum hinantin Patsapa Diospita yachatsikïta dirigikan