“Jutsata manana rurashpa shumaq cawacushun”

“Tseno llapan imecapis ushacänan quecaptenqa, ¡noqantsicpis Diosnintsic munashqanno jutsata manana rurashpa shumaq cawacushun!” (2 PED. 3:11.)

1. Pëdrupa ishkë kaq cartan, ¿imanirtaq alläpa preciso karqan tsë witsan cristiänokunapaq?

PEDRU ishkë kaq cartanta qellqanqan witsampaqqa, atska watapanam cristiänokunata Diablu tukïnöpa hipatsirqan. Pero manam congregación mirananta ni rurëninkunata ushakätsirqantsu. Tsëmi, unë tiempochö Diospa serviqninkunata ishkitsinqan toqllakunawan cristiänokunata ishkitsita tïrarqan. Apóstol Pedru ninqannömi, Satanasqa ishkitsita tïraq ‘warmicunata ricapar munapaq’ nunakunawan, y “codisiosu” mana alli yachatsikoqkunawan (2 Ped. 2:1-3, 14; Jud. 4). Tsëmi cristiänokuna alli tsarakuyänan karqan. Tsëpaqmi Pedru ishkë kaq cartanchö consejakurqan.

2. ¿Imapaqtaq 2 Pedru kima kaq capïtulonchö parlan, y imakunataraq tapukushwan?

² Apóstol Pëdrum kënö qellqarqan: “Teytantsic Jesucristu musyatsimashqanam wanucunäpaq cashqanta. Tsemi noqapaqqa alli canqa que patsacho cawashqäyaqqa qamcunata quecunata yarpätsiyarniqui siempri willapëcayänaq [...]. Tsemi imecanopapis willapëcayaq, wanucuptï qamcuna que niyashqaqcunata mana qonqellata yarparäyänequipaq” (2 Ped. 1:13-15). Awmi, apostolqa musyarqannam wanukunampaq kaqta. Tsëmi pëqa munarqan cristiano mayinkuna shonqunkunachö kë ninqankunata yarparäyänanta. Y tsënömi karqan, qellqanqankunaqa Bibliachömi këkan, y kananyaqpis yanapamantsikmi. Kima kaq capïtulom noqantsikpaq  alläpa preciso, ‘que patsawan’ cielo ushakänan hunaqkunapaq parlaptin (2 Ped. 3:3, 7, 10). ¿Imatataq Pedru cartanchö consejamarquntsik? ¿Imanötaq yanapamantsik Jehoväpa kuyakïninta tarinapaq?

3, 4. a) ¿Imakunatataq Pedru consejakurqan? b) ¿Imakunatataq qateqninchö yachakushun?

³ Mana alli nunakunapa ushakënimpaq parlarirmi Pedru nirqan: “¡Noqantsicpis Diosnintsic munashqanno jutsata manana rurashpa shumaq cawacushun!” (2 Ped. 3:11, 12). Këchöqa manam tapukïkantsu, sinöqa cristiano mayinkunatam consejëkan. Peqa allim musyarqan Jehoväpa munëninta ruraq kaqlla, y cristiänonö kawakoq kaqlla Jehoväpa hatun piñakïnin hunaqta kawëkar pasananta (Isa. 61:2). Tsëmi yapë kënö nirqan: “Tsemi, cuyashqa wauqicuna panicuna, quecunata alli musyecar, ¡paqtaraq creyiyanquiman jutsasapa nunacuna llutanta yachatsiyäshuptiqui! Jina Diosnintsicman alli marcäcuyashqequipita cuidadu qepaman cutiyanquiman” (2 Ped. 3:17).

⁴ Apóstol Pedru ima pasakunantapis ‘alli musyarmi’, ushanan hunaqkunachö cristiänokuna alli tsarakuyänampaq willakurqan, hina nirqanmi mäkoq mäkoq kayänampaqpis. Hina apóstol Juanpis yachatsikurqanmi imanir mäkoq mäkoq kanantsik alläpa preciso kanqanta. Huk visionchömi rikëkurqan ciëlopita qarpakämushqa Satanás, ‘allapa piñakur’ “Jesucristuman marcäquinincunacho alli firmi tsarac[oqcunata, y] Diospa mandamientuncunata cäsucoqcuna[ta]” tukï mana allikunata rurëkaqta (Apo. 12:9, 12, 17). Pero ciëlopaq kaqkuna y wakin ‘üshacunapis’ tsarakuyanqam (Juan 10:16). Tsënö kaptimpis llapantsikmi kënö tapukunantsik: “¿Ushanan hunaqkunayaqtsuraq tsarakushaq?”. Awmi nishpa contestanapaqqa, kë kimantaraqmi ruranantsik: 1) Diosnintsik munanqannömi kawëta tïranantsik, 2) kawënintsikchö y Diosta adoranqantsikchömi limpio kanantsik, y 3) imëka pasanqantsik más sinchiyätsimänatam yarpänantsik. Qateqnin kaq pärrafokunachömi kë kimampita yachakushun.

Diosnintsik munanqannö kawashun

5, 6. ¿Imanö cristiano këtataq tïranantsik, hina imata ruranapaqtaq sinchikunantsik?

⁵ Ishkë kaq cartampa qallananchömi Pedru qellqarqan: “Tsemi Diosnintsicman marcäcur, allita rurar, noqantsic queno cawanantsic: yachacushqantsiccunata cada bes mas cäyicur, cuerpuntsiccunapa mana alli munenincunata manana rurar, alli tsaracur, Dios munashqanno cawar, jucnintsic jucnintsic cuyanacur, tsenolla llapan nunatapis cuyar. Tsecunata rurar cawacushqaqa, manam embanutsu canqa Teytantsic Jesucristuman marcäcushqantsic” (2 Ped. 1:5-8).

⁶ Bibliachö kënö ninqanta ruranapaqqa, ‘alliraqmi’ sinchikunantsik. Y churapakänantsikmi llapan reunionkunaman ëwanapaq, llapan hunaq Bibliata leinapaq, y wakin publicacionkunapita yachakunapaqpis. Hina tsënöllam kallpachakushwan Familiachö Diosta Adorana Hora cada semana shumaq yachakunapaqpis. Këkuna rurëta yachakärishqaqa, manam sasatsu o ajatsu kanqa, yachakunqantsikkuna yanapamashqanäqa.

7, 8. a) ¿Imatataq wakin cristiänokuna niyan Familiachö Diosta Adorana Hörapaq? b) Y qamta, ¿imanötaq yanapashurqunki Familiachö Diosta Adorana Hora?

⁷ ¿Cristiänokuna imanötaq rikäyan Familiachö Diosta Adorana Hörata? Huk cristiänam nin: “Tukï yachatsikïkunapitam yachakïkäya”. Huk cristiänapis ninmi: “Rasun kaqchöqa, Libropita Yachakunapaq reunión ushakänantaqa manam munarqätsu, tsë reunionta kuyarnin. Pero Familiachö Diosta Adorana Hörachö yachakurqa, cuentata qokümi Jehová llapan wanayanqäkunata musyanqanta y imanö yanapayämänantapis”. Huk cristiänonam nin: “Warmïtawan noqataqa alläpam yanapëkäyäman. Diosta kënö adorëqa alläpa allim, familiachö wanayanqäkunata yachakuyaptï. Ishkäkunapis mäkuyämi cristiänonö kawayänäpaq Diospa espïritun yanapëkäyämanqanta, hina kananqa wayin wayin yachatsikurnimpis más kushishqam puriyä”. Y wambrayoq cristiänonam kënö nin: “Wambräkunapis kikinkunam  puntallapitana librokunapita ashir ashir yachakïkäyan. Kananqa, unëpitapis masmi markäkuyä Jehová noqakunapaq yarparanqanta y mañakïnïkunata contestanqantapis”. Y qamqa, ¿imataq ninki Familiachö Diosta Adorana Hörapita?

⁸ Bibliapita yachakïta imallapis haqitsiyäshunëkita ama haqïtsu. Huk matrimoniom kënö nin: “Pasaq chusku jueves hunaqkunachömi tukï pasakurqan, tsëmi ichikllapa Diospa Palabrampita yachakuyarqätsu”. Höraqa manam ninqantsik hörachö yachakïta puëdeshuntsu, tsëqa itsa huk hörapaq churarishwan. Pero huk semänallapis Familiachö Diosta Adorëtaqa haqïtsu.

9. ¿Imataq Jeremïasta yanaparqan, y imanirtaq pëpita yachakïta munantsik?

⁹ Diospa serviqnin Jeremïaspitam yachakushwan. Pëqa imëpis agradecikurqanmi Jehová Dios yachatsinqampita, tsë yachatsinqan, mana wiyakoq nunakunata mana mantsakushpa yachatsinampaq yanapaptin. Kikinmi nirqan: “Jehoväpa palabranmi [...] nina rupaqnö këkarqan, tullükunachö këkaqnö” (Jer. 20:8, 9). Tsë yachatsinqanmi yanaparqan mana allikuna pasëkaptimpis, Jerusalen ushakanqanyaq alli tsarakunampaq. Y kanannäqa llapan Diospa Palabrantanam katsintsik. Tsëmi Bibliapita alli yachakur y Dios pensanqannö pensarqa, Jeremïasnö kashun, tsëqa kushishqallam yachatsikushun, tukï hipakïkuna kaptimpis tsarakushunmi, y kawakïnintsikchö y Jehoväta adoranqantsikchöpis limpiom kashun (Sant. 5:10).

‘Jutsannag limpiu’ kawakushun

10, 11. ¿Imanirtaq sinchikunantsik ‘jutsannag limpio’ kawakunapaq, y imatataq ruranantsik?

¹⁰ Rasumpëpa cristiänokunaqa musyantsikmi ushakë hunaq këllachöna kanqanta. Tsëmi espantakuntsiktsu kë mundochö nunakuna Dios chikinqankunata rurakur kawakuyaptin, chikikuyaptin, lluta rakchakunata rurakuyaptin, wanutsinakuyaptimpis. Y Satanasqa manam cristiänokunata qatikacharnin mantsakätsïllatatsu munan, sinöqa hutsamanmi ishkitsita tïran (Apo. 2:13, 14). Tsëmi alläpa preciso apóstol Pedru cristiänokunata kënö consejanqanta wiyakï: “Allillata rurarnin shumag cawacuyta tïrayay, Dios Yaya mana juc jutsannag limpiuta paywan alli päsacuychö cawacuycagta tariyäshunayquipag” (2 Ped. 3:14, NTCN).

¹¹ “Shumag cawacuyta tïrayay” nirqa, rikätsikïkarqan qepan kaq versïculokunachö “cada bes mas” sinchikuyë ninqampaqmi. Hina Jehoväqa musyanmi Satanaspa mana alli mundompita rakikänapaq o mana ‘juc jutsannag limpiu’ kawakunapaq alli sinchikunantsikta. Tsëmi mana alli munëkuna hutsaman mana ishkitsimänapaq paqwë shonquntsikpita horqanantsik (lei Proverbios 4:23 * y Santiagu 1:14, 15). Alli kawakïnintsikpita mana allita parlayaptimpis, allim tsarakunantsik (1 Ped. 4:4).

12. ¿Ima awnikïtataq tarintsik Lucas 11:13 textochö?

¹² Hutsasapa nuna kashqam allita ruranan sasaraq (Rom. 7:21-25). Alli kaqta ruranapaqqa, Jehoväpa yanapakïnintam ashinantsik, Pëqa llapan mañakoqkunatam kuyakïwan espïritunta qarëkunqa (Luc. 11:13). Tsë espïritum yanapamantsik shumaq kawakurnin Diosnintsikta kushitsinapaq, hutsaman mana ishkinapaq  y problëmakunachö alli tsarakunapaq. Y kë problëmakunaqa maschi mirakïkunqa, Jehoväpa hunaqnin këllachöna kaptin.

Imëka pasanqantsikqa masmi sinchiyätsimantsik

13. ¿Imataq yanapamäshun hipakïkunapa pasar tsarakunapaq?

¹³ Kë mana alli mundochö kawanqantsikyaqqa tukïtam pasashun. Pero qelanänantsikpa rantinqa, ¿imanirtaq más sinchikuntsiktsu kuyakïnintsikta Diosta rikätsinapaq, hina pëman y Palabranman más markäkunqantsikta musyatsinapaq? Jesuspa qateqnin Santiägum kënö qellqarqan: “Wauqicuna panicuna, tuquilaya desgrasiacuna pasayäshuptiqui, qamcuna allapa cushicuyë. Porqui musyayanquim marcäquiniquicunawan desgrasiacunata pasarnin, pasensiaquita mas yachacuyanqequita” (Sant. 1:2-4). Imëpis këta yarparäshun: “Peman marcäcoqcunataqa llapan mana allicunapita Diosnintsic libramänantsicpaq cashqanta” (2 Ped. 2:9).

14. ¿Imanötaq qamta yanapashunki Jose tsarakunqan?

¹⁴ Jacobpa tsurin Jose ruranqanta rikärishun, pëtaqa wawqinkunam rantikïkuyarqan (Gén. 37:23-28; 42:21). Bibliam willamantsik, tukïta hipëkarpis Dioswan mana piñakunqanta ni haqinqanta. Y manam tsëllatatsu pasarqan. Hina huk warmipis violamëtam munashqa nirmi tumparqan. Tsëchöpis rikätsikurqanmi Jehovällapaq kanqanta (Gén. 39:9-21). Tsë llapan pasanqanmi Jehoväman markäkïninta más sinchiyätsirqan, y tsëpitaqa atska bendicionkunatam chaskirqan.

15. ¿Imatataq Noemí pasanqan yachatsimantsik?

¹⁵ Awmi, imëkapa pasanqantsikqa llakitsimantsikmi y yarpakachëmampis churamantsikmi. Itsa tsënöchi Josëpis tikrarirqan. Y tsënöchi Diospa wakin nunankunapis kariyarqan. Yarpärishun Noemí pasanqanta, pëqa qowan y ishkan wawankuna wanuriyaptinmi kënö nirqan: “Ama, Noemí niyämënatsu, sinöqa Mará niyämë, [Maräqa llakishqa ninanmi] Llapan Kallpayoq Dios pasëpa llakikïman churamashqa kaptin” (Rut 1:20, 21). Tsënöqa parlarqan alläpa llakikurmi. Pero Josënömi pëpis Diosta servikarqan y kuyëkarqan. Tsënö kanqampitam Jehová bendicerqan (Rut 4:13-17, 22). Hinamampis, Satanaspa makinchö y mundonchö hipayanqampitam Jehoväqa Paraïsochö Noemïta y llapan sirveqninkunata alli kawëta qonqa. Y manam tsëllatsu, llapan pasayanqankunam “qonqashqa kanqa, y manam shonqunkunachö pipis yarparanqanatsu” (Isa. 65:17).

16. ¿Alläpa precïsoku Diosman mañakunantsik, y imanir?

¹⁶ Imëkata hiparpis Jehová kuyamanqantsikta yarparqa tsarakushunmi (lei Romanos 8:35-39). Satanás pasëpa llakikïman churamënintsikta  tïrarpis, ‘shumaq cawacushqaqa y mana qonqellata Diosnintsicta mañacushqaqa’ manam ishkitsimäshuntsu (1 Ped. 4:7). Jesusmi nirqan: “Peru qamcunaqa shuyaquïcäyë imepis Diosman mañacurnin, tse tiempucunacho alli tsaracuyänequipaq. Tsemi Diospita Shamushqa Nunapa nopanchopis mana mantsacushpana shëcäyanqui” (Luc. 21:36). Kë textochö rikanqantsiknömi, Jesusqa Diosman imëpis mana qonqëta mañakunapaq nikämantsik. ¿Imanirtaq tsënö nimantsik? Pëpa y Teytampa kuyakïninchö alläpa preciso kanqantsikta cuentata qokunapaqmi. Awmi, Jehoväpa piñakïnin hunaqnimpitaqa salvakushun pëkunapa puntachö y kuyakïninkunachö këkarllam.

Mana qelanashpa Jehoväta servishun

17. Mana wiyakuyanqan markachö yachatsikunapaq, ¿imanötaq yanapamantsik Diospa unë sirveqninkuna rurayanqan?

¹⁷ Jehoväpaq llapan ruranqantsikkunam más sinchiyätsimantsik. Awmi, Pëdruqa alläpa preciso kanqantam rikätsimantsik këta nirnin: “¡Noqantsicpis Diosnintsic munashqanno jutsata manana rurashpa shumaq cawacushun!” (2 Ped. 3:11). Hina wayin wayin yachatsikunapaqpis këchöqa apóstol parlëkanmi (Mat. 24:14). Rasunmi, wakin markachöqa Diospita yachatsikï alläpa sasam, wiyakïta mana munayaptin, yachatsikunqantsikpita chikikuyaptin o problëmankunaman yarparäkuyaptin. Jehoväpa unë sirveqninkunapis tsënö nunakunatam tariyaq. Pero manam qelanäyarqantsu, antis ‘kutin kutinmi’ ëwayarqan Diospita yachatsikurnin (lei 2 Crónicas 36:15, 16 *; Jer. 7:24-26). ¿Imanöpataq alli tsarakuyarqan? Jehová rikanqannömi yachatsikuyanqanta rikäyaq, y manam Diospita rakikashqa nunakunanötsu, hinamampis, musyayaqmi Diospita yachatsikïnöqa imapis mana kanqanta (Jer. 15:16).

18. ¿Yachatsikunqantsik imanötaq yanapakunqa Diospa shutin alabashqa kanampaq?

¹⁸ Noqantsikpaqpis alläpa kushikïpaqmi Jehoväpita y ruramunampaq kaqkunata yachatsikoq ëwëqa. Tsënö yachatsikur purinqantsikpitam Jehová cuentata mañaptin, manam noqalläqa musyarqötsu niyanqatsu. Egiptochö Faraonnömi kikin Jehová ushakëta apamunqanta musyariyanqa (Éxo. 8:1, 20; 14:25). Hina musyatsikunqam pikunata willakuyänampaq Jehová kachanqanta, tsënöpam sirveqninkunata kuyanqanta rikätsikunqa (lei Ezequiel 2:5 *; 33:33 *).

19. ¿Imapaqtaq yanapamantsik Jehová raslla mana piñakunqan?

¹⁹ Apóstol Pëdrum ishkë kaq cartampa ushananchö cristiänokunata kënö qellqarqan: “Señornintsikpa pasensyanqa salbasyonpaqmi” (2 Ped. 3:15, QKW). Yachakunqantsiknöpis, Jehová ras mana piñakunqanqa allipaqmi. ¿Imapaq? Diosnintsik munanqannö kawëta tïranapaq, ‘jutsannag limpiu’ kawakunapaq, imëka pasanqantsik más sinchiyätsimänapaq y Diospita yachatsikoq más yarqunapaq. Tsënö rurarqa, ‘mushoq sielupaq’ y ‘mushoq patsapaq’ Biblia ninqan cumplikäriptinmi atska bendicionkunata chaskishun (2 Ped. 3:13).

[Päginapa ura kuchunchö willakïkuna]

¿Yarpankiku?

• ¿Imatataq rurashwan rasumpa cristiänonö kawanapaq?

• ¿Imataq yanapamäshun ‘jutsannag limpiu’ kawakunapaq?

• ¿Imatataq yachatsimantsik Josëwan Noemí pasayanqan?

• Noqantsikpaqqa, ¿imanirtaq alläpa alli Jehoväpita yachatsikï?

[Yachakunapaq kaqpa tapukïninkuna]

[21 kaq päginachö dibüju]

¿Imatataq huk teyta ruranman familian cristiänonö kawayänampaq?

[22 kaq päginachö dibüjukuna]

¿Imatataq yachakuntsik Jose tukïta pasëkarpis alli tsarakunqampita?