¿SASARAQKU o ajaräku wiyakoq kanëki? *... Ama llakikïtsu, llapantsiktam tsëqa pasamantsik. Jesuspaqpis wiyakoq kë hora höraqa sasaraqmi karqan, ¿tsëta musyarqëkiku?...

¿Pikunatataq wiyakunëki?... Awmi, teytëkitawan mamëkitam. Bibliapis, “wamracuna, Jesucristurecur papäniquitapis y mamäniquitapis cäsucuyë” ninmi (Efesios 6:1). Jesusqa teytankunata wiyakurqanchi. ¿Musyankiku pikuna teytankuna kayanqanta?... Rasumpa teytanqa karqan Jehová Diosmi, y pëqa noqantsikpapis Teytantsikmi (Mateo 6:9, 10). Jesuspa teytankuna Josëwan Maria kayanqanta pensashqa karpis, allillatam pensarqunki. ¿Imanötaq Josëwan Maria teytankuna tikrayarqan?...

Gabriel shutiyoq angelmi Marïata willarqan llulluyoq kanampaq kaqta. Pero ¿imanöraq Marïaqa qeshyaq tikrarinman karqan ollquwan mana punushqa këkarqa? Jehovämi huk milagrota ruranan karqan. Tsë angelmi Marïata kënö nirqan: “Santu Espiritu qamman shamurninmi, camanqa juc wamrata, sielucho quecaq Diospa poderninwan qeshyaq tucurinequipaq. Santu wawequinam Diospa tsurin canqa” (Lucas 1:30-35).

Jehovämi Tsurimpa kawëninta Marïapa pachanman churarqan. Tsënam Jesusqa llapan llullukunanöpis mamampa pachanchö winar qallëkurqan. Tsëpitanam Jose Marïawan casakurirqan. Y tsëpita isqon killa pasariptinnam Jesus yurirqan. Llapan nunakunam pensayarqan Jose teytan kanqanta, pero pëqa wätaq teytanllam karqan. Tsëmi nintsik Jesusqa ishkë teytayoq kanqanta.

12 watayoqllaraq këkarmi ciëlochö këkaq Teytan Jehoväta alläpa kuyanqanta Jesus rikätsikurqan. Tsëta rikärishun. Jesuspa familianqa karutam ëwayaq Jerusalenyaq Pascua fiestata celebrayänampaq. Pero Nazaretchö wayinkunaman kutirëkarnam, nänichö Josëwan Maria cuentata qokuriyarqan Jesus pëkunawan mana këkanqanta. ¿Musyëta munankiku imanö oqrariyanqanta?...

Tsë witsampaqqa Josëwan Marïaqa atska wambrayoqnam kayarqan (Mateo 13:55, 56). Hinamampis wakin kastankunawanchi ëwëkäyarqan, Zebedeowan y warmin Salomëwan hina pëkunapa wambran Santiäguwan y Juanwampis, Salomëqa itsachi Marïapa nanan karqan. Tsëchi pensayarqan pëkunawan Jesus këkanqanta (Mateo 27:56; Marcos 15:40; Juan 19:25).

Jesus mana yuriptinnam Josëwan Maria mantsakashqa Jerusalenman kutiyarqan y më tsëpa ashiyarqan. Kima hunaqtaran templochö tariyarqan. Tsënam Maria kënö nirqan: “Ä wawa, ¿imanirtan caynö rurayämar, mana willayämarnï quëdargoyqui? Alläpa llaquishgam taytayquiwan ashirniqui puriyargö”. Y Jesusnam nirqan: “¿Imanirtan ashiyämargoyqui? ¿Manacu gamcuna musyayanqui Dios Taytäpa wajinchö canäta?” (Lucas 2:45-50, NTCN.)

 ¿Mana allitatsuraq karqan tsënö Jesus contestanqan?... Mëraq Josëwan Marïaqa musyayaq Teytampa wayinman ëwë Jesusta gustanqanta (Salmo 122:1). Jesusqa pensarqan teytankuna templochöraq puntata ashiyänantam, ¿alliku karqan tsënö pensanqan?... Marïaqa unëraqmi yarpachakurqan Jesus tsënö contestanqanman.

¿Tsëpita witsëpa imanöraq Jesus portakurqan teytankunawan?... “Pecunawan[mi] Nazaretman cuticorqan, [y] mandayanqancunata rurarmi carqan” ninmi Biblia (Lucas 2:51, 52). ¿Imatataq Jesuspita yachakuntsik?... Awmi, teytantsikkunatam wiyakunantsik.

Rikanqëkinöpis, hasta ciëlochö Teytan ninqanta wiyakunan sasaraq o ajarä kaptimpis, Jesusqa wiyakoqmi karqan.

Këman yarpärishun, Jehoväqa pëta kachamurqan nunakunarëkur wanunampaqmi. Pero wanutsiyänan hunaqpa qanyannin paqasqa, manana wanunampaq Teytan ninanta Jesus munanmanchi karqan (Lucas 22:42). Tsënö karpis Teytan ninqantam rurarqan. Biblia ninqannöpis, “sufrimientucunata pasarnin[mi], yachacorqan obedienti queta” (Hebreus 5:8). ¿Noqantsikpis tsënö kashwantsuraq? ¿Sasaraq o ajarä kaptimpis wiyakushwantsuraq?...