¿Jesuswan Diosqa hukllaqllatsuraq kayan?
¿Jesuswan Diosqa hukllaqllatsuraq kayan?
Nunakuna niyanqan:
▪ “Awmi, Llapan Kallpayoq Diosmi Jesusqa.”
▪ “Cristuqa Diosllam.”
Jesus nenqankuna:
▪ “Noqata cuyamarnïqa Dios Yayaman cuticunäta musyarninmi cushicuyanquiman, porqui noqa puedeq canqäpitaqa pemi mas puedeq.” (Juan 14:28.) Pëpita más kallpayoq Teytan kanqantam Jesusqa nerqan.
▪ “Willanqui Papänïman eucunäpaq caqta; noqapa Papänïqa qamcunapapis Papäniquicunam, y Diosnïqa qamcunapapis Diosniquicunam.” (Juan 20:17.) Diosmi kä nerqantsu manam imëpis Jesusqa. Dios hukläya kanqantam parlarqan.
▪ “Manam quiquillapeqtsu yachatsicü, sinoqa cachamaqnï Dios Yayam mandamashqa nenqanllata yachatsicunäpaq.” (Juan 12:49.) Jesus yachatsikonqanqa Teytanllapitam karqan, manam kikinllapitaqa imatapis yachatsikorqantsu.
DIOSPA Tsurinmi kä nerqanmi Jesusqa, manam llapan kallpayoq Diosmi kä nerqantsu. Pë Dios këkarqa, ¿pimantaq mañakorqan Patsachö këkarnin? (Mateo 14:23; 26:26-29.) ¿Ardëllatsuraq kikin Dios këkar, hukman mañakoq tukorqan? Manachi tsënöqa ruranmantsu karqan.
Jesus gobernaptin lädonchö kayänanrëkur ishkë qateqninkuna alli sitiokunata mañakuyaptin, ¿ima nerqanraq Jesus? “Derechu laducho y itsoq laducho pipis täcamunanpaqqa manam noqatsu dispunï. Tsetaqa Papänïllam dispunishqana.” (Mateo 20:23.) ¿Manam noqatsu disponë nerqan ardëllatsuraq? Manam. Dioslla disponenqantam pëqa rikätsikorqan. Y Teytanlla llapanta musyanqantaqa, ni pë ni angelkunapis mana musyayanqantam Jesusqa yachatsikorqan (Marcos 13:32).
¿Jesusqa Patsachö këkarllatsuraq Diostsu karqan? Manam. Wanonqampita kawariramurpis Diospa mandädonchö këkanqantam Bibliaqa yachatsikun. Apóstol Pablupis “Diospa mandadunchomi Jesucristu quecan” nirmi yarpätsimantsik (1 Corintios 11:3). Hina shamoq tiempopaqpis kënömi nin, “Jesucristu[m] llapanta Diospa muneninman churanqa. Tsepitanam quiquin Jesucristupis tsurin carnin, Diospa mandadunman churacärenqa. Tsenam Diosllana llapanpa mandacoqnin canqa” (1 Corintios 15:28).
Këkunachö rikanqantsiknöpis, Jesusqa manam llapan kallpayoq Diostsu karqan. Tsëmi atska kuti Teytantapis ‘Diosnï’ nerqan (Apocalipsis 3:2, 12; 2 Corintios 1:3, 4). *
[Päginapa ura kuchunchö willakï]
^ par. 12 Tsëta más yachakunëkipaqqa, Jehoväpa testïgonkuna rurayanqan Rasumpëpaqa, ¿imatataq Biblia yachatsikun? libropa 201 a 204 päginankunachömi tarinki.
[4 kaq päginachö ninqan]
Teytanlla llapanta musyanqantaqa, ni pë ni angelkunapis mana musyayanqantam Jesusqa yachatsikorqan