1. ¿Imachötan Jehoväpa testïgunkunaqa wakin religionkunapita jukläya kantsik?

 WAKIN religionkunaqa manam Diosnintsikpita yachatsikuyantsu, peru Jehoväpa testïgunkunataqa yachatsikuyqa alläpam gustamantsik (Tïtu 2:14). Tsënö kaptimpis, capazchi höraqa yachatsikunantsikpaq gänasnintsik kanmantsu. Tsëmi juk anciänuta pasarqan, pëmi kënö nin: “Höraqa manam yachatsikunäpaq gänasnï kantsu”.

 2. ¿Imanirtan höraqa fäciltsu kanman gänas gänaslla yachatsikunantsik?

² Capazchi höraqa yachatsikunqantsikpitapis mas gustamashwan, Diosnintsikta adoranantsik wayikunata altsëchö o rurëchö yanapakuy, o desgraciakuna kaptin wawqi panikunata yanapë o animë. Tsëkunachö yanapakurqa mas rasllam rikantsik ruranqantsikkuna imanö yarqunqanta, wawqi panikunawanmi kushishqa trabajantsik y yanapakunqantsikpitam agradecikamantsik. Peru Diosnintsikpita yachatsikurqa, capazchi tsë markallachö mëtsika watapa yachatsikushwan, o nunakuna wiyakuyta munayanmantsu, o kë mana alli tiempuchö kawashqa nunakuna chikimashwan (Mat. 10:22). Peru ¿imaraq yanapamashwan gänas gänaslla yachatsikunapaq?

 3. Lücas 13:6 a 9 ninqannö, ¿imatataq Jesuspita yachakuntsik?

³ Gänas gänaslla yachatsikunapaqqa, Jesuspita yachakunqantsikmi yanapamäshun. Jesusqa yachatsikuyta qelanäkurinampa rantinmi, cada junaq mas gänaswan yachatsikurqan (leyi Lücas 13:6-9). Jesusqa kikimpaqmi nirqan hïgus plantata cuidaq nunanö kanqanta. Tsë nunaqa kima watapam hïgus plantata cuidarqan, peru tsë plantaqa manam imatapis wayurqantsu. Tsënömi Jesuspis kima watapa judïukunata Diosnintsikpita yachatsirqan, y juk ishkëllam qateqnin tikrayarqan. Peru hïgus plantata mana dejareq nunanömi, Jesuspis Diosnintsikpita  yachatsikuyta dejarqantsu. Tsëpa rantinqa, nunakuna cäsukuyänanta munarmi mas gänaswanraq yachatsikurqan.

 4. ¿Imakunatataq këchö yachakushun?

⁴ Këchömi yachakushun wanunampaq joqta killa pishikaptin gänas gänaslla Jesus yachatsikunqanta (Lücas 10:1 textupa “Después de estas cosas” neq nötanta leyi). Jesusqa, 1) Jehoväpa voluntänintam puntaman churarqan, 2) Diospa willakoqninkuna niyanqantam cuentachö katsirqan, 3) Jehovä yanapanampaq kaqmanmi confiakurqan y 4) wakin nunakuna wiyakuyänampaq kaqmanmi confiakurqan. Tsëtam këchö yachakushun.

JEHOVÄPA VOLUNTÄNINTAM PUNTAMAN CHURARQAN

 5. ¿Imanötan Jesusqa rikätsikurqan Diospa voluntäninta puntaman churanqanta?

⁵ Jesusqa allim musyarqan yachatsikunanta Diosnintsik munanqanta, tsëmi Diospa Gobiernumpita nunakunata gänas gänaslla yachatsirqan (Lüc. 4:43). Jesusqa manam yachatsikuyta dejarqantsu. Tsëmi wanutsiyänampaq juk ishkë killakuna pishikaptimpis, markakunapa ëwar nunakunata yachatsirqan (Lüc. 13:22). Y qateqninkunatapis allim yachatsirqan pënölla yachatsikuyänampaq (Lüc. 10:1).

 6. Imëka rurëchö yanapakurpis, ¿ima rurëtataq dejanantsiktsu? (Fötukunata rikäri).

⁶ Kanan witsampis, Jehoväwan Jesusqa yachatsikuyta mas puntaman churanantsiktam munayan (Mat. 24:14; 28:19, 20). Y imëkata ruranqantsikpis yachatsikunantsikpaqmi yanapakun. Këllaman pensarishun: yachatsinqantsik nunakuna reunionkunaman ëwayänampaqmi Diosta adoranantsik wayikunata rurantsik. Diosnintsikpita maslla yachatsikuyänanta munarmi Betelchöpis y juk rurëkunachöpis yanapakuntsik. Y desgraciapa pasaq wawqi panikunatapis yanapantsik, manam alli kayänanta munarllatsu, sinöqa yachatsikur sïguiyänanta munarmi. ¡Diosnintsikqa yachatsikunantsikta mas puntaman churanantsiktam munan! Tsëta mana qonqarqa, masllam yachatsikuyta munashun. Hungrïa nacionpita Jänos jutiyoq anciänum kënö nin: “Imëka rurëchö yanapakurpis, manam yachatsikuytaqa  dejanantsiktsu. Yachatsikuytaqa imëkapitapis mas puntamanmi churanantsik”.

 7. ¿Imanirtan Jehoväqa yachatsikur sïguinantsikta munan? (1 Timoteu 2:3, 4).

⁷ Gänas gänaslla yachatsikunapaqqa yanapamäshun nunakunata Jehovä kuyanqannö kuyanqantsikmi. Jehoväqa munan llapan nunakuna alli noticiakunata wiyakuyänantam (leyi 1 Timoteu 2:3, 4). Tsëta cäsukurmi nunakunaqa salvakuyta puëdiyanqa. Tsëmi Jehoväqa imanö yachatsikunapaq yanapamantsik. Këllaman pensarishun: Kuyakoq karmi nunakunata yachatsintsik neq follëtutam ruratsimushqa. Tsëchömi yanapakuykunata tarintsik nunakunata Bibliapita yachatsir qallanapaq y Jesuspa qateqninkuna kayänampaq yanapanapaq. Yachatsinqantsikkunata kanan witsan mana cäsukurpis, capazchi alläpa sufrimientu witsanchö yachakur qallëkuyanqa. ¿Imaraq tsëpaqqa yanapanqa? Kanan witsan yachatsinqantsikkunata yarpäyanqanmi. Tsëmi yachatsikuytaqa imëpis dejanantsiktsu.

DIOSPA WILLAKOQNINKUNA NIYANQANTAM CUENTACHÖ KATSIRQAN

 8. ¿Imata musyanqantan Jesusta yanaparqan tiempunta alli provechanampaq?

⁸ Jesusqa musyarqanmi, Diospa willakoqninkuna niyanqankunaqa imanö cumplikänampaq kaqta. Tsëmi musyarqan kima wata y joqta killapa yachatsikunampaq kaqta (Dan. 9:26, 27). Tsënöllam musyarqan imë y imanö wanunampaq kaqta (Lüc. 18:31-34). Tsëta musyarmi Jesusqa Diosnintsik mandanqankunata cumplinampaq tiempunta alli provecharqan y gänas gänasllam yachatsikurqan.

 9. ¿Imata musyanqantsiktan yanapamantsik gänas gänaslla yachatsikunapaq?

⁹ Bibliachö willakunqankuna cumplikaqta rikarmi gänas gänaslla yachatsikuyta munantsik. Allim musyantsik kë mana alli tiempuqa ushakärinampaqna kaqta. Clärum rikëkantsik Biblia ninqannölla kë ushanan tiempuchö nunakunaqa mana alli portakuyanqanta y imëka mana allikunata rurëkäyanqanta. Tsënöllam cläru rikëkantsik Biblia ninqannölla sur kaq gobiernu (Reinu Unïduwan Estädus Unïdus) y norti kaq gobiernu (Rusiawan yanapaqnin nacionkuna) alläpa chikinakuyanqanta (Dan. 11:40). Tsënöllam entiendintsik Daniel 2:43 a 45 ninqan monumentupa chakinkunaqa Reinu Unïduwan Estädus Unïdus kayanqanta. Bibliata estudiarmi cuentata qokuntsik Diosnintsikpa Gobiernunqa, mana alli gobiernukunata ushakätsinampaqna kaqta. Tsëmi musyantsik Diospita yachatsikuyqa alläpa urgenti kanqanta.

10. ¿Bibliachö ima ninqankunatan yanapamantsik gänas gänaslla yachatsikur sïguinapaq?

¹⁰ Tsënöllam Jehovä änimarquntsik imëka allikunata ruramunampaq kaqta y tsëtam wakin nunakunatapis willëta munantsik. Republica Dominicäna nacionpita Carrie jutiyoq panim kënö nin: “Shamoq tiempuchö ruramunampaq kaqta Diosnintsik änikunqankunata musyarninqa, wakinkunatapis willëtam munä. Nunakuna imëka problëmakunapa pasayaqta rikarmi, pëkunatapis alli vïdata Diosnintsik änishqa kanqanta pensä, y manam noqallatatsu änimashqa”. Tsënöllam Biblia willakunqankunaqa yanapamantsik yachatsikushqa Jehovä yanapëkämanqantsikta següru kanantsikpaq. Hungrïa nacionpita Leila jutiyoq panim kënö nin: “Isaïas 11:6 a 9 textum entienditsiman pï nunatapis cambianampaq Jehovä yanapëta puëdinqanta. Tsëmi wiyakuyta mana munayänampaq kaqta pensëkarpis, llapan nunakunata yachatsinäpaq kallpachakü”. Zambia nacionpita Christopher wawqinam kënö nin: “Marcus 13:10 ninqannömi Diosnintsikpita entëru Patsachö yachatsikuykantsik, y Biblia willakunqan cumplikänampaq yanapakuyqa alläpam gustaman”. Y qamtaqa, ¿Bibliachö  ima ninqantan yanapashunki yachatsikur sïguinëkipaq?

JEHOVÄ YANAPANAMPAQ KAQMANMI CONFIAKURQAN

11. ¿Imanirtan Jesusqa Jehoväman confiakunan karqan yachatsikur sïguinampaq? (Lücas 12:49, 53).

¹¹ Jesusqa confiakurqan, gänas gänaslla yachatsikunampaq Jehovä yanapanampaq kaqtam. Nunakunata respëtuwan yachatsirpis, musyarqanmi yachatsikuptin wakin nunakuna cölerakuyänampaq y chikiyänampaq kaqta (leyi Lücas 12:49, 53). Pushakoq religiösukunanäqa yachatsikuptinmi alläpa chikiyarqan y wanutsita munayarqan (Juan 8:59; 10:31, 39). Tsënö kaptimpis Jesusqa, Jehovä yanapëkanqanta musyarmi yachatsikur sïguirqan. Kënömi nirqan: “Noqaqa manam japallätsu këkä. Mandamaqnï Teytam noqawan këkan” (Juan 8:16). Y kënöpis nirqanmi: “Rikënimpaq alli kaqta imëpis ruraptïmi japallätatsu dejaramashqa” (Juan 8:29).

12. ¿Imanötan Jesusqa discïpulunkunata yachatsirqan nunakuna chikiyaptimpis yachatsikur sïguiyänampaq?

¹² Jesusqa discïpulunkunatam nirqan Jehoväman confiakuyänampaq. Pëqa musyarqanmi nunakuna chikiyänampaq kaqta, tsëmi kutin kutin yarpätsirqan Jehovä yanapanampaq kaqman confiakuyänampaq (Mat. 10:18-20; Lüc. 12:11, 12). Tsënö nirpis, cuidakuyänampaqmi mandarqan (Mat. 10:16; Lüc. 10:3). Tsënöllam nirqan nunakuna wiyakuyta mana munayaptinqa, mana obligayänampaq (Lüc. 10:10, 11). Y nirqanmi nunakuna chikiyaptinqa, juk markakunaman ëwakuyänampaq (Mat. 10:23). Jesusqa Jehoväman confiakurpis y gänas gänaslla yachatsikurpis, peligruta rikarqa witikoqmi (Juan 11:53, 54).

13. ¿Imanirtan següru kanëki gänaswan yachatsikunëkipaq Jehovä yanapashunëkipaq kaqta?

¹³ Kanan witsampis yachatsikushqam nunakuna chikimantsik, tsëmi gänas gänaslla yachatsikunapaq Jehovä yanapamänata wanantsik (Apo. 12:17). Peru ¿imanirtan següru këkantsik Jehovä yanapamänapaq kaqta? Tsëtaqa musyantsik Juan librupa 17 kaq capïtulunchö Jesus ninqanta leyirmi. Tsë capïtulum willakun apostolninkunata yanapanampaq Teytan Jehoväman Jesus mañakunqanta y Jehoväqa wiyarqanmi. Y Hëchus librunam willakun nunakuna chikikäyaptimpis, apostolkuna gänas gänaslla yachatsikushqa kayanqanta. Peru Jesusqa apostolninkunata yanapanampaq Jehoväman mañakurpis, apostolkuna yachatsiyaptin  creikoq nunakunata yanapanampaqpis mañakurqanmi. Y tsënö mañakurqa, noqantsikpaqwanmi mañakuykarqan. Tsëmi següru këkantsik Jesus mañakunqanta wiyarnin, apostolkunatanölla Diosnintsik yanapamänapaq kaqta (Juan 17:11, 15, 20).

14. ¿Imanirtan següru këkantsik gänas gänaslla yachatsikuyta puëdinapaq kaqta? (Fötuta rikäri).

¹⁴ Kë mana alli tiempuqa masllam avanzanqa, y capazchi gänas gänaslla yachatsikunanqa fäciltsu kanqa. Tsënö kaptimpis, kikin Jesusmi änimarquntsik yanapamänantsikpaq (Lüc. 21:12-15). Noqantsikqa Jesuswan qateqninkuna rurayanqannömi nunakunata Diospita yachatsinantsik, peru kikinkunam decidiyänan wiyakuyta o mana wiyakuytapis, y manam pëkunawanqa discutita munantsiktsu. Wakin nacionkunachöqa manam fäciltsu Diospita yachatsikuyänampaq. Tsënö kaptimpis wawqi panikunaqa, kikinkunallaman confiakuyänampa rantinmi, Jehovä Diosnintsikman confiakurnin gänas gänaslla yachatsikuykäyan. Teyta Jehoväqa punta cristiänukunata yanapanqannömi, poderninwan yanapamäshun gänas gänaslla yachatsikunapaq, y “mananam yachatsikuyänëkinatsu” nimanqantsikyaqmi yachatsikushun (2 Tim. 4:17). Ama imëpis qonqashuntsu: Jehoväman confiakurninqa gänas gänasllam yachatsikushun.

WAKIN NUNAKUNA WIYAKUYÄNAMPAQ KAQMANMI CONFIAKURQAN

15. ¿Imanötan musyantsik wakin nunakuna yachakuyta munayänampaq kaqman Jesus confiakunqanta?

¹⁵ Jesusqa wakin nunakuna Diospita yachakuyänampaq kaqmanmi confiakurqan, tsëmi imëpis gänas gänaslla yachatsikoq. 30 wata ushëkaptinmi, Jesusqa rikarqan mëtsikaq nunakuna yachakuyta munayanqanta, tsëmi cosëcha tiempuna kanqanta nirqan (Juan 4:35). Y tsënö ninqampita juk watanö pasariptinmi, discïpulunkunata kënö nirqan: “Cosechëpaqqa mëtsikam kan” (Mat. 9:37, 38). Y tsëpita tiempuwannam yapë kënö nirqan: “Cosechëpaqqa mëtsikam kan [...]. Cosëchanman mas peonkunata mandamunampaq chakrapa Duëñunta rogakuyë” (Lüc. 10:2). Jesusqa clärum rikarqan mëtsikaq nunakuna Diospita yachakuyta munayanqanta, y juk ishkëllapis yachakur qallayaptinqa alläpam kushikoq (Lüc. 10:21).

16. ¿Ima ejempluwantan Jesusqa discïpulunkunata entienditsirqan gänas gänaslla yachatsikuyänampaq? (Lücas 13:18-21; fötuta rikäri).

 ¹⁶ Jesusqa discïpulunkunatam yachatsirqan, wakin nunakuna wiyakuyänampaq kaqman confiakuyänampaq. Tsënö confiakuyanqanmi yanapanan karqan gänas gänaslla yachatsikuyänampaq. Discïpulunkunata ejemplukunawan yachatsinqanta ishkëllata rikärishun (leyi Lücas 13:18-21). Jesusqa nirqan Diospa Gobiernunqa mostäza murunö ichiklla kanqantam, peru mururiyaptinqa jatun plantaman o montiman tikrarinqantam. Tsëwanqa entienditsirqan alli noticiakunata mëtsikaq nunakuna wiyakuyänampaq kaqta y imapis mana michänampaq kaqtam. Tsënöllam nirqan Diospa Gobiernunqa levadüra cuenta kanqanta. Tsëwannam entienditsirqan alli noticiakunataqa entëru Patsachö yachatsikuyänampaq kaqta, y qallananchö mana wiyakoqnö karpis wakin nunakuna yachakuyänampaq y cambiukunata rurayänampaq kaqta. Tsë ishkan igualatsikuykunawanmi Jesusqa discïpulunkunata entienditsirqan yachatsikuyanqanqa mëtsikaq nunakunata yanapanampaq kaqta.

17. ¿Imata musyanqantsiktan yanapamantsik gänas gänaslla yachatsikur sïguinapaq?

¹⁷ ¿Imatan yanapamäshun gänas gänaslla yachatsikur sïguinapaq? Yachatsikunqantsikrëkur mëtsikaq nunakuna yachakur qallayanqanta rikanqantsikmi. Cada watam Jesus wanunqanta yarpäna reunionman mëtsika millon nunakuna shayämun, mëtsikaqmi Bibliapita estudiëta qallayan y mëtsikaqmi Diosnintsikpita yachatsikur qallayan y bautizakuyan. Shamoq watakunaqa, ¿ëkaqraq Bibliapita yachakuyta qallayanqa? Manam musyantsiktsu. Peru alläpa sufrimientu manaraq chämuptinqa, Jehovä Diosnintsikqa mëtsikaq nunakuna yachakuyänantam permitinqa (Apo. 7:9, 14). Jehoväqa allim musyan mëtsikaq nunakuna yachakuyta munayanqanta, tsëmi gänas gänaslla yachatsikuytaqa dejanantsiktsu.

18. ¿Nunakuna imata cuentata qokuyänantataq munantsik?

¹⁸ Jesuspa qateqninkunaqa imëpis gänas gänasllam kushishqa yachatsikuyan. Apostolkuna mana mantsapakuypa y gänas gänaslla yachatsikuyaptinmi, nunakunaqa cuentata qokuyarqan “Jesuswan puriyashqa” kayanqanta (Hëch. 4:13). Noqantsikpis alläpam munantsik, Jesusnö gänas gänaslla yachatsikunqantsikta nunakuna cuentata qokuyänanta.