1, 2. ¿Jesus ima willakunqanmantaq discïpulonkuna más yarparäyarqan, y imanir?

PEDRU, Santiagu, Juan y Andresmi Maestronkunawan këkäyarqan. Jesusmi parlashqa karqan templo ushakänampaq kaqta y tsëmanmi yarparëkäyarqan (Mar. 13:1-4). Tsëmi Jesusta kënö tapuriyarqan: “¿Imëtaq këkuna kanqa, y ima señaltaq rikätsikunqa këkämunqëkita, y më tsëchö imëkapis imanö këkanqampa ushënin witsanna kanqanta?” (Mat. 24:1-3, NM). Jesusmi nirqan shamoq tiempochö pasakunampaq kaqkunaqa nunakunapa kawëninkunata cambiatsinampaq kaqta, y Satanaspa mundompa ushakënin junaqkunana kanqanta rikätsikunampaq kaqta. Itsa juk pasakunampaq kaqman discïpulonkuna más yarparäyarqan. Guërrakuna, mallaqë y mana alli rurëkuna pasakunampaq kaqta willakurirmi, juk alli rurë kanampaq kaqta Jesus kënö nir willakurqan: “Tsemi llapan nunacunata alli willaquinïta willayänequi presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” (Mat. 24:7-14).

² Discïpulokunaqa, ‘Diospa mandaquinincho cayänanpaq alli willaquicunatam’ Jesucristuwan junto kushi kushilla yachatsikushqa kayarqan (Luc. 8:1; 9:1, 2). Itsachi tëkäyanqan hora, Maestronkuna kënö ninqanman yarpäyarqan: “Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Luc. 10:2). Tsëqa itsa kënö nir tapukuyarqan: “¿Imanöraq ‘jinantin nasioncunaman’ yachatsikï chanqa? ¿Mëpitaraq ëlloqkuna o yachatsikoqkuna yuriyämunqa?”. Shamoq tiempochö pasakunampaq kaqta rikëta puëdirqa, Jesuswan parlëkäyanqan hörachi musyariyanman karqan Mateo 24:14 texto imanö cumplikänampaq kaqta, ¡y alläpachi kushikuyanman karqan!

3. ¿Imanötaq kanan witsan cumplikëkan Lucas 21:34 texto ninqan, y imakunatataq tapukunantsik?

 ³ Jesucristu tsënö willakunqanqa kanan witsankunam cumplikëkan, porque entero Patsachömi mëtsikaq ollqukuna y warmikuna Diospa alli willakïninta yachatsikïkäyan (Is. 60:22). Tsënö kaptimpis, Jesusqa entienditsikurqanmi wakin cristiänokuna Diospita yachatsikïta alläpa mana precisaqpaq churarnin, juk cösaskunawan ‘nitipakashqa’ kayänampaq kaqta (lei Lucas 21:34 *). Tsënö kanqantaqa rikëkantsikmi. Wakin cristiänokunaqa juk cösaskunatam más precisaqpaq churëkäyan. Tsëqa clärom rikakun, trabäjota, estudiota, imëkayoq kë ashita y kushikuyänampaq rurëkunallata puntaman churayanqanchö. Wakin cristiänokunanam qelanëkäyan alläpa yarpachakïyoq kar. Tsëmi kënö tapukunantsik: “¿Imanötaq noqaqa këkä? ¿Imatataq rikätsikö imatapis puntaman churanqäkunawan?”.

4. a) ¿Imatataq Pablu mañakurqan Filipos cristiänokunapaq, y imanir? b) ¿Imatataq yachakushun kë yachatsikïchö y qateqnin kaqchö, y imachötaq yanapamäshun?

⁴ Apostolkuna kawayanqan witsanchöqa casi llapan cristiänokunam Pablunöpis ‘mana mantsacushpana qallaquicuyarqan alli willaquita willacurnin’ (Filip. 1:12-14). Tsënö kaptimpis, cristiänokunaqa sinchikurmi sïguiyänan karqan Diospa kaqta puntaman churayänampaq. Tsëmi Apóstol Pablu Diosman mañakurqan, Filipos cristiänokuna ‘más precisaq kaqkunata rurayänampaq’ (lei Filipenses 1:9-11 *). Tsënöllam kanan witsampis pasakun. Llapantsikmi valorwan Diospa Palabrampita yachatsikuntsik. Tsënö kaptimpis, ¿manatsuraq yanapamashwan Diospita más yachatsikunapaq kanan witsan Jehoväpa markan mëtsika rurëkunachö alli yarqapakïkanqanta musyanqantsik? Awmi. Kë yachatsikïmi yanapamäshun Mateo 24:14 texto imanö cumplikänampaq Jehová imakunata patsatsinqanman yarpachakunapaq. ¿Imatataq Diospa markan logrëta munan? ¿Imanötaq noqantsikta y familiantsikkunata yanapamashwan Diospa markan imata logrëta munanqanta musyanqantsik? Qateqnin kaq yachatsikïchömi rikäshun imanö alli tsarakoq kanapaq y Diospa markan ëwanqanmannö noqantsikpis ëwanantsikpaq.

5, 6. a) ¿Imanirtaq Jehová munarqan ciëlochö këkaq markan imanö kanqanta musyanantsikta? b) ¿Imatataq Ezequiel rikanqan visionchö?

⁵ Jehoväqa, peqantsik o umantsik imanö funcionanqanta y ciëlochö kamanqankuna imanö funcionanqantaqa manam qellqatsishqatsu Palabran Bibliaman. Tsëpa rantinqa, munëninkunapita yachakunantsikpaq y tsë munëninmannö kawanapaq wananqantsik yachatsikïkunatam qellqatsimurqan (2 Tim. 3:16, 17). ¡Y Jehoväpa ciëlochö këkaq markampita Biblia willakunqanqa alläpa shumaqmi! Alläpa kushikïpaqmi ciëlochö këkaq markan imanö patsätsishqa kanqampita Isaías, Ezequiel, Daniel y Juan qellqayanqanta leiqa (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). Tsëqa, ciëlota kichëkur tsëchö këkaqkunata Jehová rikätsimaqnintsik cuentam. ¿Imanirtaq tsëkunata Palabran Bibliaman qellqatsimurqan?

⁶ Jehoväpa markanchö juk familianölla kanqantsikta imëpis yarpänapaqmi. Rikëta puëdinqantsikpitapis masmi, imëkakunam pasakïkan Diospa munënin cumplikänampaq. Këllaman yarpärishun, profeta Ezequielmi rikarqan  ciëlochö juk jatun cärrota, y tsëqa rikätsikurqan ciëlochö këkaq Diospa markantam. Tsë cärroqa rasllam ëwaq y rasllam jukmampapis ëwaq (Ezeq. 1:15-21). Ruëdankuna cada tumanqanwanmi alläpa karuman chäreq. Jina Ezequielqa cärropa manejaqnimpaqpis willakunmi, kënömi nin: “Rikärirqä qallwash color rayo niraqtam, firuroqnimpa nina shanshëkaqtanö [...] Tsëqa karqan Jehoväpa gloriannömi” (Ezeq. 1:25-28). Ezequielqa alläpa mantsakashqachi quedarirqan. Jehová markanta mana pantëpa santo espïritunwan pushëkanqantam rikarqan. ¡Imanö shumaqmi karqan Jehoväpa ciëlochö këkaq markan imëkata rurëkanqanta rikanqan visionqa!

7. ¿Imanötaq confiakïnintsikta miratsin Daniel rikanqan visión?

⁷ Jina profeta Danielpis confiakïnintsikta miratseq atska visionkunatam rikarqan. Juk visionchömi Jehoväta rikarqan imëka ‘Mana Yupëpaq Watakunapa Kawaq Awkintanö’ y pëmi tëkarqan nina tsarikaq ruëdakunayoq trönochö (Dan. 7:9). Jehoväqa munarqan, munëninta cumplitsirnin markan avancëkanqanta Daniel rikänantam. Jina Danielqa rikarqan ‘nunapa tsurintam’, pëqa karqan Jesusmi, pëtam Jehová entregarirqan Patsachö këkaq markanta diriginampaq. Jesuspa mandakïninqa manam juk ishkë watallapaqtsu, porque “mandakïninqa mana ushakaq mandakïmi y manam jukmanqa pasanqatsu, y gobiernonqa manam imëpis ushakanqatsu” (Dan. 7:13, 14). ¿Manaku këqa yanapamantsik Jehoväman y rurëkanqanman más confiakunapaq? Jehoväqa ‘mandakïta, respetashqa këta y gobiernotam’ Tsurinta entregarirqan, porque pruëbakunapa pasarninmi Pëllapaq kanqanta rikätsikurqan. Clärom këkan, Jehoväqa Tsurinman confiakunmi. Jina noqantsikpis  pushamaqnintsik Jesusman confiakïtaqa puëdintsikmi.

8. ¿Imanötaq Ezequieltawan Isaïasta yanaparqan juk visionchö Jehoväpita rikäyanqan, y imata ruranapaqtaq noqantsiktapis yanapamantsik?

⁸ ¿Imanötaq yanapamashwan Jehoväpa ciëlochö këkaq markanta alli reqinqantsik? Profeta Ezequielnöchi espantakuntsik y Jehová llapan rurëkanqanta rikarchi humilde kënintsikta rikätsikuntsik (Ezeq. 1:28). Jehoväpa markan imanö kanqanman pensanqantsikqa, Isaïastanöchi yanapamantsik ruranantsikpaq kaqta rurar sïguinapaq. Jehová rurëkanqanta nunakunata willanampaq juk invitacionta Isaías chaskirirmi, kushishqa kënö nirqan: “¡Këchömi noqa këqa! Noqata kachamë” (lei Isaías 6:5, 8 *). Alläpa segürom këkarqan ruranampaq kaq sasa o aja kaptimpis, Jehoväpa yanapakïninwan cumplinampaq kaqta. Tsënöllam Jehoväpa ciëlochö markan imanö kanqanta musyanqantsikqa kushitsimashwan y rurënintsikta rurar sïguinapaq yanapamashwan. Diospa markan avancëkanqanta rikar y Jehoväpa munëninkunata cumplikëkätsinqanta rikëqa, ¡alläpam yanapamantsik noqantsikpis tsënölla rurar sïguikänapaq!

9, 10. ¿Imanirtaq alläpa precisan Jehoväpa markan kë Patsachö kanan?

⁹ Jehoväqa Patsachö precisaq rurëkunata Tsurinwanmi patsätsimushqa, ciëlochö këkaq markannölla funcionanampaq. ¿Imanirtaq Mateo 24:14 texto ninqan cumplikänampaq alläpa precisan kë Patsachö markan alli patsätsishqa kanan? Imanir precisanqanta kimallata rikärishun.

¹⁰ Puntataqa, Jesusmi nirqan alli willakïta chätsiyänanrëkur ‘jinantin munduyaq’ discïpulonkuna chäyänampaq kaqta (Hech. 1:8). Ishkë kaqchönam, espiritual kaqchö mikïta qoyänampaq y yachatsikoqkunata cuidayänampaq alli churanakushqa kayänan karqan (Juan 21:15-17). Y kima kaqchönam, alli willakïta yachatsikoqkuna Jehoväta adorayänampaq y Diospita yachatsikuyänampaq yachatsikïkunata chaskiyänampaqqa ëllukäyänan karqan (Heb. 10:24, 25). Mana kaqllapitaqa manachi tsë llapan lograkanmantsu karqan. Cristupa qateqninkuna rurëninkunachö alli yarqapakuyänampaqqa, alli churanakushqa kayänanmi alläpa precisan.

11. ¿Imanötaq yanapakushwan Jehoväpa markan precisaq rurëkunata patsätsinqanchö?

¹¹ ¿Imanötaq yanapakushwan Jehoväpa markan precisaq rurëkunata patsätsinqanchö? Tsëtaqa rurashwan Jehoväwan Jesus yachatsikïta dirigiyänampaq churayanqan cristiänokunaman confiakurninmi. Mundopa mana alli rurëninkunam kë wawqikunata pantaratsinman. Tsënö kaptimpis, Jehoväpa Patsachö këkaq markanqa precisaq rurëkunachö këkäyänampaqmi yanapëkan. ¿Ima rurëkunataq tsëqa?

12, 13. ¿Imanötaq anciänokuna cargonkunata cumpliyan, y tsënö rurayanqan imanötaq yanapashunki?

¹² Entero Patsachömi unëpitana yanapakoq anciänokunata cargota qoyashqa täräyanqan markakunachö Diospita yachatsikïta dirigiyänampaq. Y pëkunaqa, chakinkunata aktseq ‘chiwchinö’ y näninkunata ‘aktseqnö’ yanapananta munarmi, imatapis decidiyänampaqqa, Diospa Palabranchöraq yanapakïta ashiyan, y alli yarqapakuyänampaqqa Jehoväman mañakuyan (Sal. 119:105; Mat. 7:7, 8).

¹³ Apostolkuna kawayanqan witsanchö Diospita yachatsikïta dirigeqkunanömi, kanan witsan anciänokunapis Diospa ‘palabranta  yachatsicur’ këkäyan (Hech. 6:4). Tsë anciänokunaqa alläpam kushikuyan entero Patsachö Diospa yachatsikïnin alläpa mirëkanqampita (Hech. 21:19, 20). Diospa yachatsikïnin miranampaq imëka rurëkunata patsätsiyänampaqqa, kikinkuna munayanqanmannö rurayänampa rantinmi, Diospa Palabrampa y santo espïritupa yanapakïninta ashiyan (lei Hechos 15:28). Tsënö rurayanqanwanmi tsë cristiänokunaqa congregacionkunapaq alli ejemplo kayan (Efes. 4:11, 12).

14, 15. a) ¿Imakunataq rurakëkan entero patsachö Diospa yachatsikïnin miranampaq? b) ¿Imanötaq sientikunki Diospita yachatsikïchö yanapakurnin?

¹⁴ Casi llapan cristiänokunam rikantsiktsu publicacionkunachö, reunionkunachö y asamblëakunachö chaskinqantsik yachatsikïkuna alläpa trabajo kanqanta. Entero Patsachö tukïläya idiömakuna parlaq nunakuna “Diospa espantepaq rurenincunata” musyayänampaqmi, atska waranqa cristiänokuna tsë yachatsikïkunata 600 idiömapitapis masman traducirnin yanapakïkäyan (Hech. 2:7-11). Joven wawqikuna y panikunam trabajayan librokuna, revistakuna y más publicacionkuna rurayänan fabricakunachö. Tsëpitanam tsë publicacionkunata llapan congregacionkunaman apatsiyan.

¹⁵ Congregacionnintsikchö cristiano mayintsikkunawan Diospita más yachatsikunapaqmi imëkakunata patsëkätsiyämun. Këllaman pensarishun, atskaq cristiänokunam yanapakuyan Diospita Yachatsikuyänan Wayikuna rurëchö, Asamblëakunata Rurayänan Localkuna rurëchö, ima desgraciakunapis pasakuptin yanapakïchö, salud asuntochö pipis yanapakïta wanaptin, o Asamblëakuna rurakänampaq o Diospa escuëlankuna rurakänampaq patsätsichö. Kë trabäjokunata rurayanqantaqa itsa llapantatsu rikantsik. Këkunata rurayanqanqa Diospita yachatsikï más miranampaq, yachatsikoqkuna espiritual kaqchö más alli kayänampaq y rasumpa religión más miranampaqmi yanapakun. Jehoväpa Patsachö këkaq markan, ¿tsë rurëkunachö ocupädoku këkäyashqa? Awmi.

16. Diospa markanta alleq reqinantsikrëkur, ¿ima ruranqantsiktaq noqantsikta y familiantsikta yanapamäshun?

¹⁶ ¿Tiempontsikta rakintsikku Jehoväpa markan rurëkanqankunaman yarpachakunapaq? Wakin cristiänokunaqa Familiachö Diosta Adorayänan Hörachö o japallankunalla Bibliata estudiayanqan hörachömi tsëta rurayan. Alläpa kushikïpaqmi Isaías, Ezequiel, Daniel y Juan rikäyanqan visionkunata estudiëqa. Jehoväpa markanta más reqinapaqqa Los testigos de Jehová, proclamadores del Reino de Dios nishqan libro, wakin publicacionkuna y DVD-kunapis yanapamantsikmi.

17, 18. a) ¿Imanötaq kë yachatsikï qamta yanapashurqunki? b) ¿Ima tapukïkunatataq rurakunantsik?

¹⁷ Markanwan Jehová rurëkanqanman yarpachakunqantsikqa alläpam yanapamantsik. Jehoväpa markan rurëkanqannöllam más precisaq rurëkunata noqantsikpis rurëkänantsik. Tsëta rurarllam Pabluta qatikäshun, pëmi kënö nirqan: “Noqacunaqa manam ichicllapis utinäyätsu salbasionpaq alli willaquita willacurnin, porqui Teyta Diosmi cuyayämarnï tseta willacuyänäpaq churayämashqa” (2 Cor. 4:1). Jina yanaqaqninkunatapis kënö nirmi animarqan: “Tserecur ama qelanäshuntsu allicuna rureta, y mana utinashpa rurarqa, tiempunchomi allita cosechashun” (Gal. 6:9).

¹⁸ ¿Manatsuraq kawënintsikchö rurënintsikkunata shumaq patsäratsishwan más precisaq kaqkunata ruranapaq? ¿Kapamanqantsikkunallawan kawëta puëdintsikku Diospita yachatsikïchö más yanapakunapaq? Qateqnin kaq yachatsikïchömi rikäshun pitsqa rurëkunata Jehoväpa markanwan junto ëwëkänapaq.