ALLÄPA kushikïpaqmi Diospita yachatsikuyänanrëkur atskaq Testigo jövenkuna sencïllolla kawakuyänampaq churakaqta rikëqa (Mat. 6:22). ¿Ima cambiokunatataq rurayan y ima sasa o aja kawëkunapataq pasayan? Tsëta musyarinapaqqa, México nacionchö yanapakïkaqkunata wakinllata reqirishun.

Estados Unidos nacionpita Dustinwan Jassa jövenkunam casakuyarqan 2007 watapa enero killanchö. Tsëpita ichikllatanam, unëpita patsë rurëta munayanqannö, juk barcota rantiyarqan tsëchö entero watapa täräyänampaq. Tsë barcoqa këkarqan Astoria (Oregón, Estados Unidos de América) markapa océano Pacífico nishqan lamarpa lädonmampam. Y tsë markapa lädonmampaqa atska bosquekunayoq taksha jirkakunam y cordillërakunam rikakoq. Dustinmi kënö willakun: “Mëmampa rikaptikipis alläpa shumaqmi karqan”. Dustinwan warminqa Jehoväman markäkuyanqanta y sencïllolla kawakuyanqantam pensayaq, porque takshalla barcochömi täräyaq, manam llapan tiemponkunawantsu trabajayaq, juk idiömata parlaq congregacionmanmi ëwayaq, y puëdiyanqan höraqa precursor auxiliarpis kayaqmi. Pero tsëpita tiempowanqa, Diospa kaqchö alläpa mana yanapakïkäyanqantam cuentata  qokuriyarqan. Dustinmi kënö nin: “Congregacionchö yanapakuyänäpa rantinmi, barcota altsakurlla tiempota perdiyaq kayä. Y entiendiriyarqämi, kawënïkunachö Jehoväta puntaman churëta munarqa, cambiota rurayänä alläpa precisanqanta”.

Warmin Jassanam kënö nin: “Manaraq casakurqa Mëxicochömi tärarqä y inglés idiömata parlaq congregacionmanmi ëwaq kä. Tsëchö yanapakïqa alläpam gustamaq y kutitam munarqä”. Tsëmi juk nacionkunachö yanapakï munëninkuna más miranampaq, Dustinwan Jassaqa, Familiachö Diosta Adorayänan Hörachö, imëka cosechëllapaqna listo këkaq markakunaman ëwashqa cristiänokunapa kawëninkunapita yachakuyaq (Juan 4:35). Dustinmi kënö nin: “Noqakunapis, pëkunanömi kushishqa sientikïta munayaq kayä”. Mëxicochö täraq amïgonkuna, tsëllaraq formakashqa grupo yanapakïta alläpa necesitanqanta willariyaptinmi, pëwan warminqa ëwayänampaq decidiriyarqan. Trabäjonkunata jaqirikurmi y barconkunata rantikurïkurmi tsë nacionta yanapakoq ëwakuyarqan.

Dustinwan Jassaqa quedakuyarqan Tecomán nishqan markachömi. Tsë markaqa këkan océano Pacífico lamar lädonmampam y Astoria markapita 4.300 kilómetros karunchömi, sur kaq lädomampa. Dustinmi willakun, tsë marka alläpa achachanqanta y atska limón plantakuna wayunqanta, y punta täranqanchönö shumaq jirkakunataqa manana rikanqanta. Qallananllachöqa manam trabäjota tariyarqantsu, y qellëninkuna alläpa mana kaptinmi arroztawan pushpullata o pushkullata atska semänakunapa mikuyarqan. Jassami kënö nir willakun: “Juk mikuyanqällata mikurnin utishqana këkäyaptïmi, Bibliata estudiaqkunaqa mangokunata, plätanokunata, papäyakunata, y limonkunata qarar qallëkayämarqan”. Tsëpita tiempowannam, Taiwán markachö këkaq escuëlapaq, juk idiömata yachatsikur qallëkuyarqan. Y qellë ganayanqanmi necesidadninkunapaq yanapan.

Pero ¿tsënö këkarnimpis kushishqaku kayan? Ishkanmi kënö niyan: “Këman ëwakayämunqäqa alläpa allipaqmi kashqa, porque casado kawakïnïkuna y Jehoväwan amigo kënïkunaqa masmi sinchiyashqa. Llapan junaqkunam ishkäkuna junto imëkatapis rurayä, yachatsikoq yarquyä, reunionkunapaq preparakuyä y estudiantekunata imanö yanapayänäpaq kaqta parlayä. Jinamampis, unë yarpachakïnïkunapitam librakäyarqö”. Jina kënömi niyan: “Salmo 34:8 textochö, ‘Jehová alli kanqanta rikäyë y kushikuyë’ ninqan awnikïta alleqlla mana entiendishqa kayanqätam cuentata qokuyä”.

Diospita yachatsikoqkunata más necesitäyanqan México nacionpa markankunamanmi, 20 watayoqpita  hasta 40 watayoq, mil novecientospitapis más solterokuna y casädokuna yanapakoq ëwakuyashqa. Tsënö yanapakï sasa o aja këkaptimpis, ¿imanirtaq atskaq Testïgokuna tsëta rurayan? Wakinkunata tsë tapukïta rurariyaptinmi kima respuestata qoyarqan.

Jehoväta y nuna mayïkunata kuyarmi. 18 watayoq këkarnin bautizakushqa Leticia jutiyoq cristiänam kënö willakun: “Musyarqämi Jehovällatana sirwinäpaq awnikurninqa shonqupita patsë y llapan kawënïwan sirwinäpaq awnikanqäta. Llapan kallpäwan y llapan tiempöwanmi sirwïta munarqä, tsënöpa alläpa kuyanqäta rikätsinäpaq” (Mar. 12:30). Leticiawan casakushqa Hermïloqa, Diospita yachatsikoqkunata wanayanqan markaman yanapakoq ëwanqan witsanqa 20 watapita masmi karqan. Kënömi nin: “Cuentatam qokuriyarqä nuna mayintsikta kuyanqantsikta rikätsiqa, Diospita yachatsi kanqanta” (Mar. 12:31). Tsënöpam Monterrey reqishqa markachö alli kawakunqanta y bancochö trabäjonta jaqirirnin, juk takshalla markaman Diospita yachatsikoq ëwakurqan.

Rasumpa kushikïta imëkamayaqpis tarinäpaq. Bautizakunqampita ichik tiempollatam Leticiaqa juk precursörata yanaqarqan juk markata yanapakoq ëwaptin, y tsëchömi juk killapa yachatsikur kayarqan. Leticiam kënö willakun: “Alläpa espantashqam quedarirqä. Y Diospa Gobiernompita willakïta nunakuna shumaq wiyakoqta rikarmi alläpa kushikurqä. Killa cumpliramuptinmi kënö nirqä: ‘¡Kawënïchöqa këtam rurëta munä!’”. Jina tsënöllam pasarqan 20 watayoqpita ichik más edäyoq Essly jutiyoq soltera cristiänatapis. Wakinkunata alläpa kushishqata rikarmi, pëpis Diospita yachatsikoqta necesitäyanqan markaman ëwëta munarirqan. Joven këninman chärirmi tsënö yanapakoq atska Testïgokunata reqirirqan. Pëmi kënö yarpan: “Alläpa kushishqata rikarmi, noqapis pëkunanölla yanapakïta munapärirqä”. Esslynöllam mëtsikaq cristiänakuna rurayashqa. Mëxicochöqa seicientospitapis masmi soltera panikuna Diospita yachatsikoqta wanayanqa markakunachö yanapakïkäyan. ¡Imanö alli ejemplom kayan jövenkunapaq y mayorkunapaqpis!

Shumaq kawakunäpaq y imapaq kawanqätapis musyanäpaq. Secundarianta Essly ushariptinmi juk bëcata awniriyarqan universidadman ëwanampaq. Wakin jövenkunaqa niyarqan tsë bëcata chaskikurir universidadman ëwanampaq, profecionyoq kanampaq y tsëpita cärrota rantinampaq y entero mundopa paseakamunampaqmi. Pero pëqa manam tsë consëjokunata chaskirqantsu. Kënömi nin: “Atskaq cristiano mayï jövenkunam imëkayoq këta ashiyarqan, y cuentatam qokurirqä Diospa kaqtaqa qepaman churariyanqanta. Jina cuentatam qokurirqä kë mundochö kaqta ashirninqa más nitipakashqa y llakishqa kayanqanta. Noqaqa joven kënïta utilicëta munarqä llapan puëdinqämannö Jehoväta sirwinäpaqmi”.

 Esslyqa estudiarqan precursora këninchö yanapananllapaqmi, y tsëpitam Diospita yachatsikoqkunata necesitäyanqan markaman ëwakurqan. Jina otomí y tapanco idiömakunatapis yachakurqanmi. Karu markakunachö kima watapa yanapakïkanqaman pensarmi Esslyqa kënö nin: “Tsë karu markachö Diospita yachatsikunqämi yanapamashqa alli kawakïta tarinäpaq y kushishqa kanäpaq. Pero tsëpitapis masqa, Jehoväwan amigo kënïmi más sinchiyashqa”. 30 watayoqpitapis maslla Phillipwan Racquelpis tsënöllam pensayan. Kë matrimonioqa Estados Unïdospitam, y kënömi niyan: “Kë mundo alläpa cambiaptinmi mëtsikaq nunakunaqa segürotsu sientikuyan. Pero karu markakunachö Bibliapa willakïninta imëpis mana wiyashqa nunakunata parlapëqa, kawënintsiktam segürota sientikatsin. ¡Tsëmi juk markakunachö yanapakïqa alläpa alli!”.

Musyanqantsiknöpis juk lädokunachö Diospita yachatsikïqa manam fäciltsu. Jukqa qellëta tarinanmi sasa o aja. Y tariyänampaqqa tsë markachö nunakuna rurayanqannömi rurayänan. Atska watapana precursöranö yanapakoq Verönicam kënö nin: “Juk markachöqa, mikïta sencïllollata cocinarirmi rantikoq kä. Juk markachönam röpata rantikoq kä y aqtsata rutupakoq kä. Kananqa, wayichö limpiapakurmi trabajä y primer wamrayoq teytakunatam wamrankunata imanö parlapäyänampaq yachatsï”.

Wakin markakunapa costumbrenkunawan yachakëqa höraqa manam fäciltsu, masran alläpa karu markakunaman tärar ëwaptikinäqa. Tsëmi pasarqan Philliptawan Racquelta, náhuatl idiömata parlaq markata ëwariyaptin. Phillipmi kënö nin: “Kawakïninkunaqa alläpa jukläyam karqan”. ¿Imatataq rurayarqan yachakäyänampaq? Jina Phillipmi nin: “Náhuatl idiömata parlaq nunakunapa alli kaq rurëninkunatam rikäyaq kayä, familiachö unido kawakuyanqanta, rasumpa kaqta parlakuyanqanta y juknin juknimpaqpis alli kayanqanta”. Racquelnam kënö nin: “Tsëchö karninqa imëkakunatam yachakuyarqä, cristiano mayïkunawan junto Jehoväta adorëtapis”.

Itsa qampis juk markakunachö yanapakïta pensarqunki, pero manaraq ëwarnin, ¿imatataq puntata rurankiman? Atska watapana tsënö yanapakoq wawqikunam niyan puntataqa sencïllolla kawakï y kayäpunqanllawan kawakï alläpa precisanqanta (Filip. 4:11, 12). ¿Ima mastataq rurayänan? Leticiam kënö nin: “Juk markallachö mana quedakunäpaqmi jatun trabäjokunataqa chaskikoqtsu kä. Munanqä hora y mëpapis ras ëwakunäpaqmi libre këta munaq kä”. Hermilonam kënö nin: “Ropata takshëta, planchëta y cocinëtam yachakurqä”. Verönicam kënö nin: “Teytäkunawan y turïkunawan këkarmi pitsapakur yanapakoq kä y sencïllollatam mishki mikïkunata cocinëta yachakurqä. Jina qellëta alläpa mana gastëtapis yachakurqämi”.

Leviwan Ameliaqa Estados Unïdospitam kayan y puwaq watapanam casado kayan. Pëkunanam niyan, Jehová Diosman alleq claro mañakuyanqan México nacionchö yanapakuyänampaq yanapanqanta. Levimi kënö nin: “Juk nacionchö yanapakurnin juk watachö ëka qellëta gastayänäpaq kaqtam cuenta jorqayarqä, tsëpitanam tsë necesitäyanqä qellëta tariyänäpaq yanapayämänampaq Jehoväman mañakuyarqä”. Killakuna pasariptinqa, necesitäyanqan qellëta juntariyarqanmi, y tsëmi yanapakoq ëwakuyarqan. Levimi kënö nin: “Mañakuyanqächö yanapayämarninqa, Jehoväqa ruranampaq kaqta cumplishqanam karqan. Y kananqa noqakunanam awnikuyanqäta cumpliyänä karqan”. Y Ameliam nin: “Juk watalla quedakïtam pensayarqä, pero qanchis watatanam cumplirayämurqö, y manam ëwakïtaqa yarpäyätsu. Këchö kawarninqa Jehová cuidayämanqantam más sientiyä. Llapan junaqkunam alli këninta rikäyä”.

Diosman mañakïqa alläpam precisarqan Adampaqwan Jenniferpaqpis; pëkunaqa kayan Estados Unïdospitam, y México nacionchömi inglés idiömata parlaq congregacionchö yanapakuyan. Kë matrimoniom kënö consejakun: “Ama pasëpa alli tiempo kanantaraq shuyarëtsu. Karu markachö yanapakïta munanqëkita Jehoväta willë, y tsëpita mañakunqëkimannö rurë. Sencïllolla kawakïta qallë, më nacionchö sirwïta munanqëkita sucursalman qellqë, y tsëpita gastota shumaq tantiëkur pensanqëkita rurar qallë”. * Tsëta rurarqa rikärinkim, espiritual kaqchö riquëzata y kushishqa kawakïta tarinëkipaq, qampaq punku kichakäreqta.