1, 2. 1 Timoteu 6:20 ninqannö, ¿imatatan Timoteu ruranan kanaq?

 PILLAPIS imantapis kuyarqa mana oqrakänanta munarmi cuidar yanapayänampaq mañakun. Tsëtaqa rikätsikuyan qellëninkuna kaptin suwayänanta o oqrakänanta mantsar bancuman churarmi. Tsënömi rikantsik imatapis kuyarqa alli cuidanapaq.

² (Leyi 1 Timoteu 6:20). Nunakunapaq Diospa alli willakuyninkuna qarë cuenta kanqantam Apostol Pabluqa Timoteuta yarpätsirqan. Y Jehovänam yachatsikur y “alli willakïkunata musyatsikoq” kanampaq Timoteuta churarqan (2 Tim. 4:2, 5). Tsëmi Pabluqa tsëta rurar sïguinampaq Timoteuta yarpätsirqan. Noqantsikpis Timoteunö rurar këkänapaqmi Teytantsik Jehoväqa nimashqantsik. ¿Imakunatan tsë rurëkunaqa kayan? Y ¿imanirtan tsëkunata rurar këkänantsik?

3, 4. Bibliachö yachakunqantsikqa, ¿imanirtan imëkapitapis mas alli?

³ Jehoväqa kuyakoq karmi Palabran Bibliachö rasumpa kaqta yachatsimarquntsik. Tsëchömi Jehoväta maslla kuyanapaq y kushishqa kawakunapaq yachakuntsik. Yachakunqantsikmannö kawarqa, manam mana alli yachatsikuykunata wiyashuntsu ni rakcha rurëkunatapis rurashunnatsu (1 Cor. 6:9-11).

⁴ Jehoväqa yachakuy munaqkunata y humildi nunakunatam Palabranchö alli willakuyninkunata yachatsin (Hëch. 13:48). Kë nunakunaqa musyayanmi markäkïpaq o yärakuypaq sirweqninkunawan Jehovä yachatsikuykanqantaqa  (Mat. 11:25; 24:45). Jehovä mana yanapamashqaqa manachi kikintsikllapitaqa yachakuyta puëdishwantsu. Tsëkunata yachakunqantsikmi imëkapitapis masqa yanapamäshun (Prov. 3:13, 15).

5. ¿Ima ruranatatan Jehoväqa munan?

⁵ Jehoväqa wakin nunakuna reqiyänanta munarmi imanö kanqampita y munënimpita yachatsikunata munan (Mat. 24:14). Tsëta rurashqaqa nunakunaqa Jehoväpa sirweqninmi kayanqa y shamoq tiempuchönam mana wanushpa kawëta chaskiyanqa (1 Tim. 4:16). Kanan tiempu Teyta Diospita yachatsikur këkanqantsikqa imëkapitapis mas alli kaq rurëmi (1 Tim. 2:3, 4). Awmi, ¡Teyta Diospa minkankunam kantsik! (1 Cor. 3:9).

6. ¿Imatan pasarqan unë witsan wakin cristiänukunawanqa?

⁶ Timoteu kawanqan witsan wakin cristiänukunaqa, Jehoväpa minkan këtaqa mana kaqpaqmi churëkäyarqan. Tsënömi Dëmaswampis pasarqan, pëqa imayoqpis këta munëman yarparäkurmi Pabluwan Jehovä sirwiyanqanta dejarirqan (2 Tim. 4:10). Tsënöllam Figëluwan Hermögenispis Pablutanö chikir qatikachäyänanta mantsar Diospita yachatsikuyta dejariyarqan (2 Tim. 1:15). Y Himeneu, Alejandru y Filëtunam Diospa contran churakäyarqan (1 Tim. 1:19, 20; 2 Tim. 2:16-18). Kë nunakunaqa Diospa munëninmannö kawar y allita rurëkarpis juk cösaskunata kuyar, mantsakur y Diospa contran churakarmi alli rurëninkunata dejarir Diospita rakikäkuriyarqan.

7. ¿Imakunawantan Diabluqa Diospita rakimantsik?

⁷ Diabluqa imëkakunawanmi Diospita yachatsikur sïguinata qelanäratsimashwan. Tsëpaqqa kushikunapaq rurëkunawan y televisionchö rikanqantsikkunawanmi juknöpana pensaratsimashwan. Nunakuna chikimashqa y qatikachämashqam yachatsikuyta mantsarnin qelanärishwan. Diospa contran churakaqkunapa yachatsikuyninkunata wiyarpis, Teyta Diosnintsik sirwitaqa qelanärishwanmi (1 Tim. 6:20, 21).

8. Danielta pasanqampitaqa, ¿imatatan yachakuntsik?

⁸ Jehoväta sirwinapaq mana kallpachakurqa ichikllapa ichikllam pëpita karupakäkurishwan. Tsëpita cuidakunapaqmi Danielta b pasanqan yanapamäshun.  Pëmi kënö cuentakun: “10 watayoq këkarmi videujuëgukunata pukllar qallëkurqä. Tsëllaraq qallarqa allikunallatam pukllaq kä. Peru ichikllapa ichikllapam wanutsinakoq y Diablupaq parlaq pukllakunatapis pukllar qallëkurqä”. Danielqa 15 hörapitapis masshi pukllakurlla kakoq. Kikinmi willakun: “Atska tiempupa mana allikunata pukllanqämi Jehoväpita ichikllapa ichikllapa rakikëkätsimarqan. Tsëta musyëkarpis Bibliachö yachatsikuykunaqa noqapaq mana kanqantam pensaq kä”. Daniel pasanqampitam yachakuntsik, wakin kushikunapaq ruranqantsikkuna Jehoväpita rakikätsimanqantsikta. Tsënö pasamashqaqa noqantsikpaq llapan Jehovä ruramunqantam oqrarishwan.

9. 1 Timoteu 1:18, 19 ninqannö, ¿imawantan Pabluqa Timoteuta igualatsirqan?

⁹ (Leyi 1 Timoteu 1:18, 19). Apostol Pabluqa Timoteutam nirqan juk soldädu cuenta “alli kaq pelyachö pelyar” sïguinampaq. Timoteuqa manam nunakunawantsu pelyanan karqan, sinöqa Diospa kaqchömi. Diospa sirweqninkunaqa, ¿ima guërrachötan këkantsik? Alli soldädu kanapaqqa, ¿imanö soldädutan kanantsik? Apostol Pablu willakunqanchömi, Diospa musyatsikïninkunamannö kawanapaq pitsqa yachatsikuykunata tarintsik. Rikärishun.

10. ¿Ima ninantan llapan shonquntsikwan Diosta sirwiqa? Y ¿imanirtan tsënö ruranantsik?

¹⁰ Diosta sirwinapaq kallpachakushun. Alli soldäduqa imëkatam ruran kuyanqan nunakunata yanapanampaq y imapis ushakänantaqa manam permitintsu. Tsënö apostol Pablu Timoteuta ninqanqa yanaparqan Jehoväta mana dejëpa sirwinampaqmi (1 Tim. 4:7). Noqantsikpis Teyta Diosta kuyarqa mana dejanapaqmi kallpachakushun, tsënö rurashqaqa manam ni ima Jehoväpita rakimäshuntsu (1 Tim. 4:8-10; 6:6).

11. ¿Imanirtan alli kaqta imëpis rurëkänantsik?

¹¹ Tiempunchö imatapis rurashun. Juk alli soldäduqa mandayanqantam imëpis cumplin. Timoteu Cristupa alli soldädun kanampaqqa mana alli munëkunapitam witikunan karqan, mas alli cristiänu kanampaq y wakin cristiänukunawan mas alli kawakunampaqmi kallpachakunan karqan (2 Tim. 2:22). Tsëmi imatapis tiempunchö ruranan karqan. Noqantsikpis mana alli munëkunapita witikunapaqqa alli kaq rurëkunachömi ocupädu këkänantsik (Rom. 7:21-25). Dios munanqannömi imëpis alli kaqta rurar sïguinantsik (Efes. 4:22, 24). Y hörata reunionkunaman ëwarnin wawqi panintsikkunawan Diospita yachakunapaqpis kallpachakunantsikran (Heb. 10:24, 25).

12. Bibliapita mas alli yachatsikunapaqqa, ¿imatan yanapamäshun?

¹² Juk alli soldäduqa kutin kutinmi yachakunan manaraq guërraman ëwar. Tsënöllam Jehoväpa sirweqninkunapis Biblia utilicëta alli yachakunantsik (2 Tim. 2:15). Diospita yachakunapaq cada semäna juntakanqantsikchömi Jehoväpita yachakuntsik. Tsënö kaptimpis, yachatsinqantsik nunakunapa shonqunyaq chänampaqqa kikintsikran alli yachakunapaq tiempuntsikta patsätsinantsik. Tsëkunata rurarmi Diosmanqa markäkushun o yärakushun. Awmi, Bibliatam leyinantsik, tsëmanmi pensanantsik, librukunachö y revistakunachömi maslla  yachakunapaq ashinantsik (1 Tim. 4:13-15). Kë llapanta rurarqa Bibliawanmi mas alli yachatsikushun. Bibliapita yachakuyanqanmannö nunakuna kawayänantam munantsik (2 Tim. 3:16, 17).

13. Hebrëus 5:14 ninqannö, ¿imanirtan alli tantiaq kanantsik?

¹³ Tantiaq kënintsikta alli utilizäshun. Juk alli soldäduqa puntallapitanam alli alistakun chikeqninkunapita tsapäkunampaq. Noqantsikpis mäkoq mäkoqllam mana allikunapitaqa këkänantsik (leyi Hebrëus 5:14; Prov. 22:3). Tsëpaqqa kushikunapaq rurëkunatam alli akranantsik. Kananqa televisionchö y pelïculakunachömi rakcha rurëkuna yarqamun. Tsëkunata rikaräkushqaqa ichikllapa ichikllapam Jehoväpita rakiramäshun, tsëmi cristiänukunaqa tsëkunawanqa kushikuntsiktsu. Noqantsikqa musyantsikmi rakcha rurëkunata Jehovä chikinqanta y llakikuykunaman chätsikunqantaqa (Efes. 5:5, 6).

14. Daniel tantiaq kanqanqa, ¿imanötan yanaparqan?

¹⁴ 8 kaq pärrafuchö parlanqantsik Danielmi wanutsinakoq y Diablupaq parlaq pukllëkuna, mana alli kayanqanta cuentata qokurirqan. Tsëmi tsë puklla dejëta munarqa, Bibliapita yachatsikoq librukunachö y revistakunachö tsëpaq parlaq willakuykunata ashinan karqan. Tsë yachakunqan willakuykunamannö ruranqanmi yanaparqan mana alli pukllakunata dejanampaq, Internetpa jukkunawan pukllanqampita yarqunampaq y pukllanqan amïgunkunatapis dejanampaq. Tsëtam Danielqa kënö cuentakun: “Videujuëgukunata pukllarlla kakunapa rantinmi wawqi panikunawan juntakur qallëkurqä”. Danielqa llapan tiempunwanmi yachatsikun y creikoqkunata rikaqnömi kananqa yanapakun.

15. Mana kaqpita parlayaptinqa, ¿imanirtan creishwantsu?

¹⁵ Timoteunömi cläru musyanantsik, Diospa contran churakaqkunapa yachatsikuyninkunaqa mana allikunaman chätsikunqanta (1 Tim. 4:1, 7; 2 Tim. 2:16). Pensarishun, itsapis wawqi panintsikkunapaq y Jehoväpa markampaq mana kaqta parlayanman. Tsëta creishqaqa markäkïnintsik o yärakuynintsikchi ushakärinman. Tsëmi “lluta pensëyoq y  rasumpa kaqpita rakikashqa nunakunapa” yachatsikuynimpita cuidakunantsik (1 Tim. 6:4, 5). Pëkunaqa mana alli yachatsikuyninkunawanmi wawqi panintsikkunawan mana alli kawakunata munayan.

16. ¿Imakunachötan ocupädu këkänantsik?

¹⁶ Ocupädu këkäshun. Timoteuqa ‘Cristu Jesuspa alläpa alli soldädunnömi’ imëkayoq këman y munanqankunaman yarparäkunampa rantin, Diospita yachatsikur kallpachakur këkänan karqan (2 Tim. 2:3, 4). Timoteunömi noqantsikpis ocupädu këkänantsik. Y “engañakoq imëkayoq këta munëmi” Jehovä kuyanqantsikta ushakäratsinman. Tsënö karqa manam Bibliapita agradecikushwannatsu y yachatsikuytapis munashwannatsu (Mat. 13:22). Diospa Gobiernunta ashir sïguinapaqqa kapamanqantsikllawanmi kushishqa kanantsik. Tsëpaqqa tiempuntsikta y kallpantsiktam alli utilizänantsik Diospita yachatsikunantsikpaq (Mat. 6:22-25, 33).

17, 18. Mana alli yachatsikuykunapitaqa, ¿imanötan cuidakunantsik?

¹⁷ Raslla ruranapaq alistakushun. Juk soldäduqa imapis manaraq pasakuptinmi alli alistakun. Tsënöllam mana allikuna pasakuptinqa Jehovä nimanqantsikkunata cuidanapaq listu këkänantsik. Tsënö kanapaqqa yanapamäshun imapis manaraq pasakuptin imata ruranapaq kaqman pensanqantsikmi.

¹⁸ Atska nunakuna juntakäyanqanchöqa imapis manaraq qallaptinmi mëpa yarqunapaq kaqta willakuyan. Tsënömi imapis pasakuptinqa raslla yarquriyanman. Tsënöllam listu kanqantsikpis rikakunqa Internetchö këkashqa y televisionchö imatapis rikëkar mana allikuna yuriptin ruranqantsikchö. Tsë mana allikunaqa kayanman: Diospa contran churakaqkuna willakuyanqan, rakcha rurëkuna y wanutsinakuykunam. Jehoväpita chaskinqantsikkunata mana oqranapaqqa, listum këkänantsik mana allikunata mana rikänapaq y wiyanapaq (Sal. 101:3; 1 Tim. 4:12).

19. Jehovä nimanqantsikkunata rurarqa, ¿ima bendicionkunatatan chaskishun?

¹⁹ Jehoväpa sirweqninkunaqa Bibliachö shumaq yachatsikuykunata y wakinkunata yachatsinapaq nimanqantsikkunatam cuidanantsik. Tsënö rurarqa ima rurëyoq karnin y nunakunata yachatsirninmi kushishqa y yamë kashun. Awmi, Jehovä yanapamashqallam tsë llapantaqa rurashun (1 Tim. 6:12, 19).