1, 2. (1) ¿Ima premiutataq Diospa sirweqninkunaqa chaskita shuyarantsik? (2) ¿Imaraq yanapamäshun tsë premiuta mana oqranapaq? (Rikäri kë yachatsikïpa qallananchö këkaq dibüjuta).

 APOSTOL Pablunömi, kanan witsan ciëlupaq akrashqakunapis juk shumaq premiuta shuyarëkäyan; ciëluman qayashqa këta (Filip. 3:14). Pëkunaqa Jesuswan mandakamïta y jutsannaqna kayänampaq nunakunata yanapëtam alläpa munayan (Rev. 20:6). Y wakin kaq üshakunapis juk shumaq premiutam kushishqa shuyarëkäyan; kë Patsachö imëyaqpis kawakïta (2 Pëd. 3:13).

² Ciëlupaq akrashqakuna tsë premiuta chaskiyänanta munarmi apostol Pabluqa, “ciëluchö kaq cösaskunaman yarparäyë” nir consejarqan (Col. 3:2). Awmi, tsë herenciamanmi yarparäyänan karqan (Col. 1:4, 5). Tsëmi, ciëlupaq o Patsapaq karpis premiuta chaskita munarqa, Jehovä llapan änimanqantsikkunaman imëpis pensanantsik (1 Cor. 9:24).

3. ¿Ima peligrukunapita cuidakuyänampaqtaq cristiänukunata apostol Pablu consejarqan?

 ³ Jina Pabluqa consejarqanmi tsë premiuta chaskiyänampaqqa jukwan jukwan punukï munëpita, cristiänu mayinkunawan o familiachö problëmayoq këpita y mana alli yachatsikoqkunapita cuidakuyänampaq (Col. 2:16-18). Tsë peligrukunaqa kanan witsampis kanmi, y Pablu consejakunqanqa yanapamënintsiktam puëdin. Tsëmi kananqa rikärishun Colösas cristiänukunata Pablu imata consejanqampita.

4. ¿Imanirtaq oqllanakïta ërayëpa munëqa premiuntsikta oqraratsimashwan?

⁴ Shumaq premiuta chaskiyänampaq kaqta cristiänukunata yarpäratsirmi apostol Pablu kënö nirqan: “Cuerpïkikunachö këkaqkunapa mana alli munëninkunata chipyëpa ushakätsiyë, rakcha rurëkuna munëta, melanëpaq rurëkuna munëta, oqllanakïta ërayëpa munëta, mana alli kaqkunata imëpis munëta y imatapis ërayëpa munëta” (Col. 3:5). Oqllanakïta ërayëpa munëqa alläpa fuertim kanman, y hasta Dioswan amïgu kënintsikta y änimanqantsik premiutapis oqraratsimashwanmi. Congregacionman kutimushqa juk wawqim nirqan, tsë munëkuna alläpa fuerti kanqanta y jutsaman ishkiratsinqanta.

5. ¿Imakunatataq ruranantsik jutsaman mana ishkinapaq?

⁵ Imë hörapis alleq mana cuidakïkarqa, rasllam rakcha rurëman ishkirishwan. Tsëmi noviu këkaqkunaqa qallanampita patsë cläru parlayänan kuyanakuyanqanchö alleq cuidakuyänampaq y mëchöpis ishkallanqa mana kayänampaq (Prov. 22:3). Jina trabäjurëkur japallankunalla viajaq y warmiwan o ollquwan trabajaq cristiänukunapis peligruchömi këkäyan (Prov. 2:10-12, 16). Tsëkunapa pasarninqa, Jehoväpa testïgun kanqantsiktam musyatsikunantsik, shumaqmi portakunantsik, y yarpänantsikmi pitapis enamorëpa tratëqa mana alliman chätsikunqanta. Y masran cuidakunantsik llakishqa kanqantsik hörakunanäqa. Porqui tsë hörakuna pipis shumaq tratamashqaqa, chaskiparmi qallëkushwan y rasllam mana alliman ishkirishwan. Imëllapis tsënö sientikurqa Jehoväman mañakushun y cristiänu mayintsikkunapa yanapakïninta ashishun. Tsëta rurarqa manam premiuntsikta oqrashuntsu (leyi Salmus 34:18 a y Proverbius 13:20 b).

6. ¿Imatataq alleq yarpänantsik kushikunapaq imatapis akrarninqa?

⁶ Jina rakcha munëkunata vencinapaqqa, manam tsëkunata munapätsikoq pelïculakunata ni müsicakunata wiyanantsiktsu. Kananqa Sodöma y Gomörra markakunachönömi imëka rakcha rurëkuna kan (Jüd. 7). Y tsëkunata rikätsikamoqkunaqa, jukwan jukwan punukïtaqa allitanömi rikätsikayämun, peru rasumpa kaqchöqa imëka sufrimientukunamanmi chätsikun. Tsëmi alleq cuidakunantsik tsë rakcha rurëkunata ni ichikllapis mana rikänapaq ni wiyanapaq. Kushikunapaq ima rurëtapis alleq mana akrarninqa, imëyaqpis kawakunapaq premiuntsiktam oqrarishun (Prov. 4:23).

7. ¿Imataq congregacionchö pasarinman?

⁷ Jehoväpa sirweqnin këqa llapantsikpaqpis  juk bendicionmi. Porqui reunionkunachö Diospa Palabranta yachatsikayämunqan, cristiänu mayintsikkunawan kuyanakunqantsik y yanapanakunqantsikmi premiuntsikta mana qonqanapaq yanapamantsik. Peru tsënö kaptimpis, cristiänu mayintsikkunawanqa problëma karinmanmi y tsëta raslla mana altsarninqa llakishqam sientikushun (leyi 1 Pëdru 3:8, 9).

8, 9. (1) ¿Imanö kanqantsiktaq yanapamäshun premiuntsikta chaskinapaq? (2) ¿Imaraq yanapamäshun cristiänu mayintsikwan kushishqalla kawakur sïguinapaq?

⁸ ¿Imatataq ruranantsik llakishqalla mana kakunapaq? Apostol Pablum Colösas markachö cristiänukunata kënö consejarqan: “Shonqupita patsë kuyakurnin ankupäkoq këta, alli këta, qollmi shonqu këta, yachanëpaq këta y alläpa pacienciayoq këta imëka röpatanö vistikuyë. Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë. Imanöllam qamkunata Jehovä perdonayäshurqunki, jina tsënöllam qamkunapis rurayänëki. Jinamampis, kuyakoq këta imëka röpatanö vistikuyë, porqui tsëqa chipyëpa juk shonqulla këman chätsikoqmi” (Col. 3:12-14).

⁹ Kuyakoq kanqantsikmi yanapamäshun perdonanakunapaq. Juk cristiänu mayintsik ruranqanwan o parlanqanwan llakitsimashqantsik kaptinqa, yarpäshun noqantsikpis pitapis llakitsishqa kanqantsikta, y perdonamanqantsikpita alläpa kushikunqantsikta (leyi Eclesiastes 7:21, 22 c). Jina agradecikunantsikmi Jesus alli kanqanrëkur Diospa sirweqnin kanqantsikta (Col. 3:15). Llapantsikmi tsë Diosllata adorantsik, tsë yachatsikïllata yachatsikuntsik y problëmakunatapis pasantsik. Cristiänu mayintsikkunata kuyarninqa perdonëkushunmi, y tsënöpam llapantsik juk shonqulla kawakushun y chaskinantsikpaq kaq premiutapis manam qonqashuntsu.

10, 11. (1) ¿Imanirtaq envidiösu këqa pasëpa mana alli? (2) ¿Imaraq yanapamäshun premiuntsikta mana oqrarinapaq?

¹⁰ Envidiösu këpis premiuntsiktam oqraratsimashwan. Bibliachömi tarintsik envidiösu këqa alläpa mana alliman chätsikunqanta. Cainmi wawqin Abelta wanuratsirqan. Corë, Datan y Abiramnam Moisespa contran churakäyarqan. Jina rey Saulpis Davidtam wanutsita munarqan. Tsëmi Bibliaqa kënö nimantsik: “Mëchöpis chikikur piñakoq kë y contrakoq kë kanqanchöqa, jina tsëchömi imatapis lluta rurë y imëka mana allikuna kanqa” (Sant. 3:16).

¹¹ ¿Imataq yanapamäshun envidiösu mana kanapaq? Kuyakoq y alli kanqantsikmi. Tsëmi Diospa Palabranqa kënö nimantsik: “Kuyakoqqa pacienciakoqmi y ankupäkoqmi. Kuyakoqqa manam celösutsu” (1 Cor. 13:4). Jehoväqa llapantsiktam igualpa rikämantsik. Tsëmi envidiösu mana kanapaqqa, cristiänu mayintsikkunawan juk cuerpunölla kanqantsikta yarpänantsik. Porqui Diospa Palabranmi kënö nin: “Cuerpupa imampis [...] precisaqpaq churashqa [kaptinqa], tsëqa llapan wakin kaqkunam pëwan kushikuyan” (1 Cor. 12:16-18, 26). Tsëmi wakinkuna bendicionkunata chaskiyanqampita envidiakunantsikpa rantinqa kushikunantsik. Tsëtam rey Saulpa tsurin  Jonatanpis rurarqan. Pëpa rantin rey kanampaq Davidta Jehovä akrariptinqa manam piñakurqantsu, tsëpa rantinqa shumaq tratarmi yanaparqan (1 Sam. 23:16-18). ¿Jonatannö këta puëdintsikku?

12. ¿Ima consëjukunataq yanapamäshun familiantsikwan premiuta chaskinapaq?

¹² Jehovä mandamanqantsikta wiyakunqantsikmi yanapamäshun, familiachö kushishqa kawakunapaq y premiutapis chaskinapaq. Tsëmi apostol Pabluqa Colösas markachö cristiänu familiakunata kënö consejarqan: “Warmikuna, qowëkikunata respetakur cäsukuyë [...]. Qowakuna, warmikikunata kuyarnin sïguiyë y ama pëkunawan chipyëpa piñakuyëtsu. Wamrakuna, teytëkikunata llapanchö wiyakuyë, porqui tsëqa alläpam Señorta kushitsin. Teytakuna, ama wamrëkikunata piñatsiyëtsu, tsënöpa pëkuna shonqunkunachö mana llakikuyänampaq” (Col. 3:18-21). Awmi, kanampis kë consëjukunaqa casädukunata y wamrakunatam yanapëkan.

13. ¿Imanötaq juk pani mana Testïgu qowanta yanapanman Jehoväta sirwinampaq?

¹³ Këman pensarishun. ¿Imataraq juk panintsik ruranman mana Testïgu qowan shumaq mana trataptin? ¿Mana alli portakunqampitatsuraq  qayapanman? Itsa qowanqa qayapaptinlla shumaq tratarnin qallëkunqa. Peru ¿tsënö qayapanqanwanqa yanapanqatsuraq Jehoväta sirwinampaq? Manam. Peru Jehovä mandakunqannö respëtuwan trataptinqa, familiachömi kushishqa kawayanqa, Jehovätam kushitsinqa, y qowampis itsa Jehoväta sirwita munarinqa. Tsëqa ishkankunam premiuta chaskiyanqa (leyi 1 Pëdru 3:1, 2).

14. ¿Imatataq juk wawqi ruranman mana Testïgu warmin mana respetaptin?

¹⁴ Y ¿imatataq juk cristiänuqa ruranman mana Testïgu warmin mana respetaptin? “Noqam këchöqa mandakoq kä y qamqa respetamänëkim”, ¿nir qayapaptintsuraq respetanqa? Manam. Jehoväqa munan juk cristiänu, warminta shumaq y kuyëpa tratanantam (Efes. 5:23). Jesuspis kuyëpa y pacienciawanmi qateqninkunata tratarqan, y tsënöllam juk cristiänupis warminta tratanan (Lüc. 9:46-48). Tsënö trataptinqa, warminqa itsa Jehoväta sirwita munarinqa.

15. ¿Imanötaq juk cristiänu warminta kuyanqanta rikätsinqa?

¹⁵ Bibliam casädu ollqukunata kënö consejan: “Warmikikunata kuyarnin sïguiyë y ama pëkunawan chipyëpa piñakuyëtsu” (Col. 3:19). Warminta kuyaq cristiänuqa, warmin ninqankunatam cuentaman churan y valoran (1 Pëd. 3:7). Ninqankunata llapanta mana rurarnimpis, tapurinqanmi yanapanqa imatapis alli decidinampaq (Prov. 15:22). Warminta kuyaq ollquqa manam respetanampaq obligantsu, tsëpa rantinqa shumaq tratanqanwanmi respëtunta gananqa. Juk cristiänu kuyakoq kaptinqa, warmin y wamrankunapis itsa Jehoväta sirwita munayanqa y premiutapis chaskiriyanqa.

16, 17. Jövin karqa, ¿imatataq rurankiman teytëkikuna corregiyäshuptiki mana piñakunëkipaq?

¹⁶ Jövin, cristiänu teytayoq o mamayoq karninqa, itsa pensëkanki mana entiendiyäshunqëkita y alläpa controlëkäyäshunqëkita. Tsëqa itsa pensëkanki Jehoväta mana sirwirnin mas alli kanëkipaq kaqta. Peru Jehoväta sirwita jaqirirninqa cuentatam qokurinki cristiänu mayikikunanö y teytëkikunanöqa pipis mana kuyashunqëkita.

¹⁷ Pensari, ¿teytëkikunaqa chikiyäshurnikitsuraq corregïkäyäshunki? Manam, kuyayäshurnikim (Heb. 12:8). Itsa imanö corregiyäshunqëkiqa gustashunkitsu. Peru tsëman yarparäkunëkipa rantinqa, ¿imanirtaq yarpachakurinkitsu precisaptin corregïkäyäshunqëkiman? Pacienciawanmi wiyanëki, y rasllaqa manam piñakunëkitsu. Bibliaqa nin, yachaq y tantiaq nunaqa raslla mana piñakunqantam (Prov. 17:27). Poqu nuna këta procurë, tsënöpam humildäwan consëjukunata chaskikunki, y imanö yanapashunëkipaq kaqmampis pensanki (Prov. 1:8). Jehoväta kuyaq Teytayoq këqa alläpam yanapashunki. Porqui pëkunaqa premiuta chaskinëkipaqmi yanapashïnikita munayan.

18. ¿Imanirtaq premiuta chaskinëkipaq decidïdu këkanki?

¹⁸ Ciëlupaq o Patsapaq karpis Diosnintsik änimanqantsik premiutaqa, llapantsikmi chaskita puëdintsik. Segürum kanqa, porqui kikin Jehovämi änimarquntsik. Y tsë kawakïpaq parlarmi Bibliaqa kënö nin: “Patsachö llapan nunakuna[m] Jehoväta chipyëpa reqiyanqa” (Is. 11:9). Awmi, llapan nunakunam Diospita yachakuyanqa. Tsëmi alläpa precisan premiuta chaskinantsikpaqqa, Dios änimanqantsikkunaman imëpis yarparänantsik. ¡Premiuntsikta imapis oqratsimänataqa ama permitishuntsu!