KË Patsachöqa imëka problëmakunam kan, y yamë kawakïqa manam fäciltsu. Wakin wakinchö yamë këta puëdishqapis, imëpis yamë këqa manam fäciltsu. ¿Bibliapa mëqan consëjunkunataq yanapamashwan yamë këta tarinapaq y tsëta mana oqrarinapaq? ¿Imanötaq wakinkunata yanapashwan yamë këta tariyänampaq?

Rasumpa yamë kanapaqqa, alli y segürum sientikunantsik. Jina precisanmi alli amïgukunayoq kanantsik. Peru masqa, yamë kënintsikta mana oqranapaqmi Jehoväwan mas amïgu këta procuranantsik. Tsëta imanö ruranapaq kaqta yachakurishun.

Jehovä mandamanqantsikta y consejamanqantsikta cäsukurqa, pëman markäkunqantsikta y pëwan yamë këta munanqantsiktam rikätsikushun (Jer. 17:7, 8; Sant. 2:22, 23). Tsëqa, Diosmi noqantsikman witimunqa, y yamë këtam qomäshun. Isaïas 32:17 textuchömi kënö nin: “Rasumpa alli kaqta rurëqa, yamë këtam apamunqa; y rasumpa alli kaqta rurëqa, shumaq y següru kawakï imëyaqpis kanantam logranqa”. Awmi, shonqupita patsë Jehoväta cäsukurninqa, yamëmi sientikushun (Is. 48:18, 19).

Imëpis yamë kanantsikta munarmi, Jehoväqa santu espïritunta qomantsik (Hëch. 9:31).

‘Santu espïritupa wayïnimpaq’ parlarmi, Pabluqa kë kimankunapaq puntata parlarqan: kuyakïpaq, kushishqa këpaq y yamë këpaq (Gäl. 5:22, 23). Tsëmi rasumpa yamë këta munarninqa, kawënintsikchö santu espïritu dirigimänantsikta permitinantsik. Diospa santu espïritun yanapamänapaq imata ruranapaq kaqta ishkëllata rikärishun.

 Juk kaq: Diospa Palabrantam mana jaqipa leyinantsik (Sal. 1:2, 3). Bibliata leyinqantsikchö yachakunqantsikman pensashqaqa, santu espïritum yanapamäshun juk asuntuta Jehovä imanö rikanqanta tantiyanapaq. Yamë kë kanampaq Jehovä imata ruranqanta y yamë kë kananta imanir precisaq churanqantam yachakushun. Palabranchö yachakunqantsiknö rurarninqa, mas yamëmi sientikushun (Prov. 3:1, 2).

Ishkë kaq: santu espïritunta mañakurmi Jehoväman rogakunantsik (Lüc. 11:13). Yanapakïninta asheq kaqkunataqa, Jehoväqa kënömi nimantsik: “Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filip. 4:6, 7). Santu espïritunta imëpis mañakushqaqa, kuyë amïgunkunallata qonqan yamë këtam qomäshun (Rom. 15:13).

Kawëninkunata cambiayänampaq, y Jehoväwan, kikinkunawan y wakinkunawan imëpis yamë këkäyänampaqmi Bibliaqa mëtsika nunakunata yanapashqa. Ishkaq nunakunata imanö yanapanqampita yachakurishun.

Unë witsanchö raslla piñakoq nunakunatam congregacionkunachöqa tarintsik. Peru kananqa mas kuyakoq, mas pacienciayoq, yamë këta asheq y alli shonquyoqnam kayan a (Prov. 29:22). Geniunta dominëta yachakushqa y wakinkunata shumaq tratëta yachakushqa ishkë Testïgukunapita parlarishun.

David feyu geniuyoq kanqanqa parlëninchömi rikakoq. Diosllatana sirwinampaq manaraq änikurqa, wakinkunapaqmi mana allita parlaq y familiantapis manam respëtuwantsu trataq. Peru tsëpitaqa imanö kënintam cambiarirqan. ¿Imataq yanaparqan jukläya nunana kanampaq? Kikinmi kënö willakun: “Bibliachö yachakunqänömi rurarqä. Tsëmi familiäwampis mas shumaqna tratanakuyä”.

Familianchö imanö kayanqanrëkurmi Rachelqa lïsa warmi karqan. Pëmi kënö nin: “Pelyarlla kakoq familiachö winashqa karninmi, kananyaqpis kallpachakunäraq piñashqalla këta jaqinapaq”. ¿Imataq yanapashqa  jukläya warmina kanampaq? Kikinmi kënö willakun: “Yanapamänampaqmi Jehoväman imëpis mañakü”.

David y Rachel pasayanqanqa, Bibliapa consëjunkunata cäsukï y santu espïritupa yanapakïninta ashiqa, allipaq kanqantam rikätsikun. Diosta mana cäsukoq nunakunawan juntu këkarnimpis, yamë këta tarita, y congregacionchö y familiachö juknölla kawakïtaqa puëdintsikmi. Tsënö kaptimpis, Jehoväqa “llapan nunakunawan yamë kawakuyë” nimantsikmi (Rom. 12:18). ¿Imanötaq tsëta rurashwan? ¿Y imatataq tarishun wakinkunawan yamë kawakïta ashirninqa?

Yachatsikoq yarqurninqa, Diospa Gobiernumpita alli willakïkunatam nunakunaman chätsintsik (Is. 9:6, 7; Mat. 24:14). Tsë willakïkunata shumaq chaskikuyaptinqa alläpam kushikuntsik. Tsë willakïkunaqa, mana alläpa yarpachakuyänampaq y mana allikunata rikarnin mana piñakuyänampaqmi yanapan. Jinamampis kananqa shumaq kawakïtam shuyaräyan, y kë consëjutam wiyakuyan: “Yamë kawakïta procurë, y yamë kawakïta ashirnin sïgui” (Sal. 34:14).

Rasunmi, manam llapan nunakunatsu shumaq chaskimantsik (Juan 3:19). Peru Diospa santu espïritunmi shumaq y respëtuwan parlapänapaq yanapamantsik. Tsënömi Jesus kënö mandakunqanta cäsukuntsik: “Wayiman yëkurirqa, tsëchö täraqkunata saludakuyanki. Tsë wayichö chaskiyäshuptikiqa, yamë kayänanta munayanqëki pëkunachö katsun; peru mana chaskiyäshuptikiqa, yamë kayänanta munayanqëki qamkunaman kutimutsun” (Mat. 10:11-13). Tsënö rurarninqa, yamëmi tsë wayipita ëwakushun y tiempuwanqa itsa tsë nunatapis yanaparita puëdishun.

Jina yamë kawakïtaqa ashintsik, yachatsikunantsikta michäkuyaptimpis gobiernupaq trabajaqkunata respëtuwan parlaparninmi. Juk pasakunqampaq parlarishun. Africa ëwë nacionkunapa juk gobernadorninmi, Testïgukunapaq mana allita pensaq y Yachatsikunantsik Wayikunata rurayänampaqmi permïsuta qoyta munaqtsu. Tsëmi Londres markachö täraq tsë nacionchö precisaq carguyoq nunawan parlanampaq juk misionëru wawqita mandayarqan, tsënöpa Testïgukuna ruranqantsikkuna yamë kawakï kanampaq yanapakunqanta entienditsinampaq. ¿Y imataq pasarqan?

Wawqintsikmi kënö willakun: “Oficïnaman chärirmi recepcionchö trabajaq warmipa röpanta rikärirqä, y yachakunqä idiömata parlaq nunakunanömi vistishqa këkarqan. Tsëmi idiömanchö saludarirqä. Y pëqa alläpam espantakurqan y pita ashinqätam tapumarqan. Tsëmi respëtuwan nirqä, tsëchö trabajaq precisaq carguyoq nunawan parlëta munanqäta. Telëfunupa qayariptinnam, tsë nunaqa yarqaramurqan y idiömanchömi saludamarqan. Nïkurnam Testïgukuna ruranqantsikkunapaq parlapaptï shumaq wiyamarqan”.

Wawqintsik respëtuwan entienditsinqanmi, Testïgukunata juknöpana rikänampaq yanaparqan. Tsëpita ichik tiempullatanam, markanchö gobiernuqa Yachatsikunantsik Wayikunata rurayänampaq permïsuta qornin qallëkurqan. Cristiänu mayintsikkunaqa, ¡alläpam kushikuyarqan! Awmi, wakinkunata respëtuwan tratëqa allipaqmi y yamë kawakï kanampaqmi yanapakun.

Kanan witsanqa paraïsuchö këkaq cuentam Diosta sirweqkunaqa yamë kawakuntsik. Y yamë kawakï kananta procurarninmi, tsënö shumaq kawakï kanampaq yanapakuntsik. Peru tsëpitapis masqa, Jehovämi bendicionninta qomäshun y Shumaq Patsachömi imëyaqpis yamë kawakushun (2 Pëd. 3:13, 14).