1. ¿Imatataq Jehovä änin jutsankunapita arrepentikoqkunata?

 JEHOVÄQA Kamamaqnintsik, Leykunata Patsätseq y Jueznintsikmi, tsënö kaptimpis kuyakoq Teytantsikmi (Sal. 100:3; Is. 33:22). Tsëmi jutsallakunqantsikpita llapan shonquntsikwan arrepentikushqaqa, Pëqa listu këkan perdonamänapaq y tsëta rurëtam munan (Sal. 86:5). Willakoqnin Isaïaswanmi Jehoväqa këta änimarqantsik: “Jutsëkikuna alläpa puka kaptinpis rajunöran yulaq kayanki” (Is. 1:18).

2. Wakinkunawan yamë kawakunapaqqa, ¿imatataq rurashwan?

² Imallachöpis pantareq kashqam ruranqantsikwan o ninqantsikwan wakinkunata ofendintsik (Sant. 3:2). Tsënö karpis, alli amïgukunayoq këtaqa puëdintsikmi. Peru tsëpaqqa perdonakoqmi kanantsik (Prov. 17:9; 19:11; Mat. 18:21, 22). Kikintsikpura ofendinakunqantsikta perdonanakunatam Jehoväqa shuyaran (Col. 3:13). Imëkachö pantanqantsikkunapita Jehovä ‘imëpis perdonamashqam’, noqantsikpis ofendimaqnintsikkunata perdonanantsik (Is. 55:7).

3. ¿Imatataq këchö yachakushun?

³ Këchöqa, pantareq kashqapis Jehovänölla perdonakoq kanapaq imata ruranapaq kaqtam yachakushun. ¿Ima jutsakunatataq cristiänukunata dirigeq anciänukunata willashwan? ¿Imanirtan juknintsik juknintsik perdonanakunantsikta  Jehovä munan? Y wakinkunapa jutsankunarëkur sufreq wawqi panikunapitaqa, ¿imatataq yachakuyta puëdintsik?

4. (1) ¿Imatataq jutsallakushqa wawqi o pani ruranan? (2) ¿Imatataq cristiänukunata dirigeq anciänukuna rurayänan?

⁴ Juk wawqi o pani jutsallakuykuptinqa, cristiänukunata dirigeq anciänukunatam willanantsik. Y tsënö jutsakunapaqqa, 1 Corintius 6:9 y 10 textuchömi parlan. Y Jehoväpa leynimpa contran kayaptinmi, tsë jutsakunaqa alläpa mana alli kayan. Tsënö jutsakunata juk wawqi o pani ruraptinqa, Jehovätam perdonëkunampaq mañakunan y cristiänukunata dirigeq anciänukunawanmi parlanan (Sal. 32:5; Sant. 5:14). ¿Imatataq cristiänukunata dirigeq anciänukuna rurayänan? Nunakunarëkur Jesus wanushqa kaptinmi, Jehoväqa pitapis jutsankunapita chipyëpa perdonëta puëdin. * Tsënö kaptimpis, congregacionpita qarquyänampaq o mana qarquyänampaqqa, cristiänukunata dirigeq anciänukunatam churashqa Biblia ninqanta rikëkur tsëta decidiyänampaq (1 Cor. 5:12). Y tsëpaqqa, kë tapukuykunamanmi pensayänan: ¿puntallapitanaku pensarqan tsë jutsata ruranampaq?, ¿pakarätsitaku procurashqa?, ¿unëpanaku tsë jutsata rurëkashqa? Peru tsëpitapis masqa: ¿rasumpa arrepentikushqa kanqantaku rikätsikun?, ¿imallapis rikätsikunku Jehovä perdonashqana kanqanta? (Hëch. 3:19).

5. Cristiänukunata dirigeq anciänukuna rurayanqanqa, ¿imanötan congregacionchö kaqkunata yanapan?

⁵ Jutsata ruraq nunawan cristiänukunata dirigeq anciänukuna juntakarqa, tsë asuntupaq ciëluchö decidikanqannö Patsachöpis decidiyänampaqmi rikäyan (Mat. 18:18). Tsëta rurayanqanqa, ¿imanötan congregacionchö kaqkunata yanapan? Tsë nuna jutsampita mana arrepentikuptinqa, congregacionpitam qarquriyan, tsënöpam Jehoväpa wakin sirweqninkunata tsë nunanö mana kayänampaq cuidayan (1 Cor. 5:6, 7, 11-13; Tïtu 3:10, 11). Jina kikin jutsallakushqa nunatapis, arrepentikunampaq y Jehovä perdonanampaqmi yanapëta puëdin (Lüc. 5:32). Cristiänukunata dirigeq anciänukunam arrepentikushqa nunapaq Jehoväman mañakurnin, pëwan amïgu këninchö yanapëkunampaq niyan (Sant. 5:15).

6. ¿Jehoväqa perdonanku congregacionpita qarqushqa kaqkunata pëwan yapë amïgu këta munayaptin? Entienditsikaramuy.

⁶ Jutsampita mana arrepentikushqa këkar cristiänukunata dirigeq anciänukunawan parlaq ëwaqqa, congregacionpitam qarqushqa kanqa. Y täranqan nacionchö leykunapa contran imatapis rurashqa kaptinqa, manam cristiänukunata dirigeq anciänukunaqa yanapayanqatsu. Arrepentikushqa o mana arrepentikushqa kaptimpis, Jehoväqa autoridäkunatam permitishqa täräyanqan nacionchö leykunata cumplitsiyänampaq (Rom. 13:4). Peru tsëpita tiempuwan llapan shonqunwan arrepentikuptin, y juknöpana pensaptin y portakuptinqa, Jehoväqa listum këkan perdonanampaq (Lüc. 15:17-24). Y alläpa jutsallakushqa kaptimpis, pëqa perdonanqallam (2 Crön. 33:9, 12, 13; 1 Tim. 1:15).

7. ¿Imanötan contrantsikchö imatapis ruraqta perdonanqantsikta rikätsikuntsik?

⁷ Jutsallakoqta Jehovä perdonanampaq o mana perdonanampaq noqantsik  mana decidinqantsikpitaqa, ¿manaku alläpa kushikuntsik? Tsënö kaptimpis, contrantsikchö imallatapis pipis ruraptin y tsëpita perdonëkunapaq mañakuptin o mana mañakuptinqa, ¿imataraq rurashun? Imanö kaptimpis, kikintsikmi perdonanapaq decidita puëdintsik. Juk parlakuychöqa, tsë nunawan resentïdu y cölerashqa mana kakunapaqmi churapakänantsik. Y tsëta ruranapaqqa, itsa atska tiempuraq pasanqa, masqa imatapis ruramanqantsikpita sufrikashqaraqmi. 1994 wata 15 de septiembri killa La Atalaya revistachömi kënö nin: “Jutsallakoqta perdonëqa, manam jutsanta mana kaqpaq churë ninantsu. Pitapis perdonaq kaqqa, tsë asuntutam Jehoväpa makinchö dejarin. Pëqa allillata ruraq Juezmi y tiempunchömi justiciata ruranqa”. ¿Imanirtan Jehoväqa contrantsikchö imatapis ruraqkunata perdonanantsikta munan, juk parlakuychöqa, justiciata ruraq kanqanman confiakunantsikta?

8. ¿Imanötan Jehovä ankupämanqantsikpita o llakipämanqantsikpita agradecikunqantsikta rikätsikuntsik?

⁸ Pitapis perdonarqa Jehovä ankupäkoq o llakipäkoq kanqampitam agradecikuntsik. Juk igualatsikuywan Jesus yachatsikunqanchömi, juk sirweqnin debinqan qellëta paguëta mana puëdiptin, patronnin perdonanqantawan Jehoväta igualatsirqan. Peru tsë sirwipakoq nunaqa, sirwipakoq mayin walkallata debikaptimpis manam perdonëta munarqantsu (Mat. 18:23-35). ¿Imatataq Jesus yachatsikuyta munarqan? Jehovä llakipäkoq kanqampita rasumpa agradecikurqa, wakinkunata perdonanapaq listu këkänapaq kaqtam (Sal. 103:9). Tsë asuntupaq parlarmi, atska qepa watakunata Täpakoq revistachö kënö nirqan: “Nuna mayintsikta mëtsika kuti perdonashqapis, ‘noqantsikrëkur Jesus wanunqampita Jehovä ankupämanqantsikwan y perdonamanqantsikwanqa manam igualantsu’”.

9. ¿Pikunatataq Jehoväqa ankupan o llakipan? (Mateu 6:14, 15).

⁹ Wakinkunata perdonashqaqa, Jehoväpis perdonamäshunmi. Pëqa llakipäkoq o ankupäkoq kaqkunataqa ankupanmi (Mat. 5:7; Sant. 2:13). Jesusqa Diosta imanö mañakuyänampaq kaqta qateqninkunata yachatsirmi, tsëta cläru entienditsirqan (leyi Mateu 6:14, 15). Job kawanqan witsampis Jehoväqa clärum tsëta rikätsikushqana karqan. Diosta mana dejëpa sirweq tsë nunaqa, Elifaz, Bildad y Zofar mana kaqpita tumpayanqampitam aguantashqa karqan. Jehoväqa pëkunapaq mañakunampaqmi Jobta nirqan. Y tsëta ruranqampitam, Jehoväqa Jobta bendicirqan (Job 42:8-10).

10. Resentïdu kakunqantsikqa, ¿imanötan kikintsikpaq mana alli kanman? (Efesius 4:31, 32).

¹⁰ Resentïdu kakunqantsikqa kikintsikpaqmi mana alli kanqa. Tsënö kakurqa imëka lasaq qepiyoqnömi kashun. Tsëmi Jehoväqa tsë qepita juk läduman churareq cuenta kanantsikta munan (leyi Efesius 4:31, 32). Pëmi kënö consejamantsik: “Llutallaqa imapitapis ama piñakïtsu ni cäsïtsu” (Sal. 37:8). Tsënö consejakunqanta wiyakuyqa, yamë kawakunapaq y alli saloryoq kanapaqpis yanapamäshunmi (Prov. 14:30). Piwampis resentïdu kakurqa, imëka venënuta upukurkoq cuentam kashun, kikintsikpaqmi mana alli kanqa. Tsëmi ofendimaqnintsikkunata  perdonanqantsikqa, kikintsikpaq mas alli kanqa (Prov. 11:17). Yamëmi kawakushun y Jehoväta sirwirmi sïguishun.

11. ¿Imatan Bibliachöqa vengakuypaq nin? (Romänus 12:19-21).

¹¹ Ama vengakuytsu, Jehoväpa makinchö dejari. Kikintsik vengakunataqa Jehoväqa manam permitimarquntsiktsu (leyi Romänus 12:19-21). Imallachöpis pantareq kar y llapanta musyëta mana puëdirmi, Jehovänöqa pitapis juzguëta puëdintsiktsu (Heb. 4:13). Jina, tsë höra imanö këkanqantsikpitam höraqa imatapis decidirintsik. Dios yanapaptinmi Santiägu kënö qellqarqan: “Nunapa piñakoq këninqa, manam Diospa rikëninchö alli kaqta rurëmantsu apakun” (Sant. 1:20). Jehovä alli kaqta ruranampaq kaqta y justiciata ruranampaq kaqtaqa, segürum këkantsik.

12. ¿Imanötan rikätsikuntsik Jehovä alli kaqta ruraq kanqanman confiakunqantsikta?

¹² Pitapis perdonarqa, Jehovä alli kaqta ruraq kanqanman confiakunqantsiktam rikätsikuntsik. Pëpa makinchö imatapis dejarishqaqa, contrantsikchö imatapis rurayanqampita sufrikanqantsikta Jehovä altsanampaq kaqmanmi confiakuntsik. Shumaq Patsata änimanqantsikchöqa, manam ‘unë pasakushqankunata yarpäshunnatsu’ (Is. 65:17). Peru imatapis ruramanqantsikpita sufrikashqaqa, ¿resentïdu y cölerashqa këkanqantsikta dejëta puëdishwantsuraq? Tsëta wakinkuna lograshqa kayanqanta rikärishun.

13, 14. Tonywan Josë imata pasayanqampitaqa, ¿imatataq yachakuntsik?

¹³ Mëtsikaq wawqi panikunam alläpa sufritseqninkunata perdonayashqa. ¿Imanötan tsëta rurayanqan yanapayashqa?

¹⁴ Filipïnas nacionchö täraq Tonypaq * parlarishun. Manaraq Testïgu karmi, mayor kaq wawqinta Josë jutiyoq nuna wanutsishqa kanqanta musyarirqan. Alläpa lïsu y maqakoq karmi, Tonyqa vengakuyta munarqan. Carcelpita Josë yarquriptinmi, Tonyqa  ashinampaq kaqta y wanutsinampaq kaqta nirqan, y tsëpaqmi juk illapata rantirqan. Tsënö këkarmi, Jehoväpa testïgunkunawan Bibliata estudiar qallëkurqan. Pëmi kënö willakun: “Bibliata estudianqämannömi imanö kanqäta cambianäpaq kaqta cuentata qokurqä. Cölerakuytam dejanä karqan”. Tsëpitam Tony bautizakurqan y tiempuwanqa cristiänukunata dirigeq anciänu këmanmi charqan. Y Josëpis, Jehoväpa testïgun tikrashqa kanqantaqa, ¡manam creirirqantsu! Y tarinakurirqa, alläpa tranquïlum waqunakuyarqan o makallanakuyarqan y Tonyqa perdonashqana kanqantam Josëta nirqan. Tsënö perdonashqa kanqampita alläpa tranquïlu këkanqanta ni imanöpapis mana entienditsikuyta puëdinqantam Tonyqa nin. Fäcil mana kaptimpis, tsë wawqiqa perdonakoqmi karqan, y tsënö ruranqampitam Jehoväqa bendicirqan.

15, 16. ¿Imatataq yachakunki Petertawan Sueta pasanqampita?

¹⁵ 1985 wata, Peterwan Sue Diospita Yachatsikuyänan Wayichö këkäyaptinmi, juk bomba pashtëkurqan. Tsë bombata churaqqa, manam Jehoväpa testïgun nunatsu karqan. Tsë bomba pashtanqampitam Sueqa imatapis muskita puëdinnatsu y nawinwan rinrinqa dañashqam quedayashqa. * Kë wawqiwan warminqa, “¿pï nunaraq tsëta rurëkurqan?” nirmi imëpis tapukuyaq. Mëtsika watakuna pasanqanchömi, tsë bombata pashtatseq nunata tsariyarqan y wanunqanyaq carcelchö llawiränampaqmi sentenciayarqan. Tsë nunata perdonashqa o mana perdonashqa kayanqantam, Petertawan Sueta tapuyarqan. Y pëkunam kënö niyarqan: “Resentïdu y cölerashqa kakuy kikintsikpaq mana alli kanqantam Jehoväqa yachatsimantsik. Tsëmi, tsënölla mana kakuyänäpaq yanapëkayämänampaq Diosta mañakuyarqä”.

¹⁶ Kë wawqipaqwan warmimpaqqa, ¿fäcilku kashqa tsë nunata perdonayänampaq? Manam. Pëkunam kënö niyan: “Tsë bomba  pashtanqampita Sue sufreqta rikarmi, yapë cölerakuyä. Peru tsëllaman mana yarparäkurmi, cölerashqallaqa kakuyätsu. Y tsë nuna Jehoväpa testïgun këman imëllapis chaptinqa, kushishqam chaskiyäman. Tsëpin pasayämanqampitaqa, Bibliachö këkaq consëjukunata wiyakunqantsik mas tranquïlu kawakunapaq yanapamanqantsiktam yachakuyarqö. Y ichikllachöna imëkatapis Jehovä altsamunampaq kaqta musyayanqämi kushitsiyäman”.

17. ¿Imatataq Myra panita pasanqampita yachakunki?

¹⁷ Myra jutiyoq paniqa, qowayoq y ishkë wamrayoqna këkarmi Jehoväpita yachakurqan. Peru qowanqa, manam Diospita yachakuyta munarqantsu y tiempuwanqa, jukwanmi Myrata engañarqan y familianta dejarir ëwakurqan. Myram kënö willakun: “Qowä dejaramashqa kanqantaqa manam creirirqätsu. Majankuna traicionayanqan nunakunanömi llakikurqä, pësakurqä, kikïta culpakurqä y cölerakurqä”. Qowampita divorciakushqana kaptimpis, engañanqampitaqa llakishqallaran këkarqan. Myraqa kënöpis ninmi: “Atska killakunapam tsënö kakurqa y Jehoväpita y wakinkunapita rakikëkanqätam cuentata qokurqä”. Kananqa, manam wamrankunapa teytanta chikinnatsu y ni ima mana alli pasanantapis munantsu. Tsëpa rantinqa, Diospita imëllapis yachakunantam shuyaran. Myraqa, pasanqanman yarparänampa rantinmi, kananqa shamoq tiempupaq masqa yarparan. Ishkan wamrankunata japallanlla Diospita yachatsishqa kaptimpis, kananqa wamrankunawan y pëkunapa familiankunawanmi Jehoväta tranquïlu sirwin.

18. Jehovälla mas alli kaq Juez kaptinqa, ¿imapitataq següru këkantsik?

¹⁸ Jehovälla mas alli kaq Juez kaptinmi, wakinkunata imanö juzganapaq kaqmanqa yarpachakushwantsu. Tsëtaqa pëmi ruranqa (Rom. 14:10-12). Ima alli o mana alli kanqanta alli musyarmi, imata decidinqampis alli kanampaq kaqta següru kantsik (Gen. 18:25; 1 Rëy. 8:32). Pëqa manam mana alli kaqtaqa imëpis ruranqatsu.

19. Llapampitapis mas alli kaq Juez Jehoväqa, ¿imatataq shamoq tiempuchö ruranqa?

¹⁹ Pantaq y jutsata ruraq kanqantsikrëkur imëkata sufrinqantsiktaqa Jehovällam altsamunqa. ¡Tsëta ruramunampaq kaq junaq chämunantanam munantsik! Pëqa llapan sufritsimaqnintsikkunatam ushakätsinqa (Sal. 72:12-14; Rev. 21:3, 4). Rasumpa kaqchöqa, llapan sufritsimaqnintsik kaqkunataqa mananam yarpäshunnatsu. Tsë junaq chämunqanyaqqa, pënö perdonakoq kanantsikpaq Jehovä kamamanqantsikpitaqa, wakinkunata perdonarninmi agradecikunqantsikta rikätsikushun.