1. ¿Imanirtan Jehoväqa juk mamawan igualan?

 ISAÏAS kawanqan witsanmi Jehoväqa sirweqninkunata nirqan: “¿Wawanta warmi qonqëkunmantsuraq? [...] Wawanta qonqaptinpis noqaqa manam imëpis qonqashqëkitsu” (Is. 49:15). Bibliachöqa manam atska kutitsu Jehoväta juk mamatawan igualatsin. Kë kutichö juk mamawan Jehoväta igualatsirqa, sirweqninkunata Jehovä kuyanqampaqmi parlëkan. Cäsi llapan mamakunam pani Jasmin ninqannö niyan: “Wamrantsikta chichirqa imëyaqpis kuyanakunapaqmi yanapamantsik”.

2. Juk sirweqnin karupakäkuriptinqa, ¿imanötan Jehovä sientikun?

² Jehoväqa musyanmi juk sirweqnin imanir manana yachatsikoq yarqunqanta y imanir reunionkunaman manana ëwanqantapis. Tsëmi Jehoväqa tsënö mana rurayaptin alläpa llakikun. b

3. ¿Imatatan Jehovä munan?

³ Jehoväpita karupakaqkuna kutiyämuptinqa kushishqam chaskintsik (1 Pëd. 2:25). ¿Imanötan pëkunata yanapashwan? Këpita manaraq yachakur, puntata yachakurishun reunionkunaman imanir mana ëwayanqanta y yachatsikoq imanir mana yarquyanqanta.

4. Trabäjullachö kakushqaqa, ¿imatan pasaramashwan?

⁴ Wakinkunaqa trabäjullachömi kakuyan. Tsënö kanqantam wawqi Hüguqa c kënö nin: “Trabäjullachömi  kakoq kä. Tsëtaqa ruraq kä qellëta mas juntapakurir Jehoväta mas sirwinäpaq kaqta pensarmi. Tsëmi trabäjuchö mas kakurnin reunionkunamampis ëwaqnatsu kä. Tsënömi mas qellëta ganarnin Jehoväpita karupakäkurirqä”.

5. ¿Imatan juk panita pasarqan?

⁵ Imapis mana allikuna pasakuptinmi wakin wawqi panikunaqa llakikuyan. Gran Bretäñapita pani Änapaqa pitsqa wamrankunam kapun. Pëmi kënö cuentakun: “Juk wamräqa qeshyëkarnam yurirqan. Tsëpitanam warmi wamräqa Testïgu këta dejarirqan y juk kaq wamräpa peqan mana alli kanqantam niyämarqan. Tsëmi alläpa llakikurnin reunionkunaman ëwaqnatsu kä y yachatsikoqpis yarqoqnatsu kä”. Pani Änatawan familianta pasanqanqa llapantsiktam llakitsimantsik.

6. ¿Imaraq pasamashwan Colosensis 3:13 ninqanta mana cäsukushqaqa?

⁶ (Leyi Colosensis 3:13). Wakinqa pensayan wawqi panikuna llakitsiyanqantam. Tsëchi apostol Pabluqa kikintsik pura mana llakitsinakunapaq nirqan. Llakitsimanqantsikllaman yarparäkurqa Jehoväpitam karupakäkurishwan. Wawqi Pabluta ima pasanqanta rikärishun. Pëtaqa mana kaqpitam tumpayarqan, tsënömi cargunta oqrarqan. Tsëtam pëqa kënö willakun: “Alläpa piñakurmi Jehoväpita karupakäkurirqä”.

7. Jutsa ruranqantsikman yarparäkushqaqa, ¿imaraq pasakunman?

⁷ Jutsata rurashqa wakin wawqi panikunaqa Jehovä perdonashqana kaptimpis pë mana kuyanqanta creirmi llakikuyan. Tsënömi wawqi Franciscupis sientikurqan. Tsëtam pëqa kënö willakun: “Ruranqä mana alli kanqantam niyämarqan. Tsëllaqa reunionkunaman ëwaqmi kä, peru llakikurmi qallëkurqä. Jehovä mana perdonamanqanta pensarmi yachatsikuyta dejarirqä y reunionkunamampis ëwaqnatsu kä”. Kë wawqitanöpis wakin wawqi panikunata pasaptinqa, ¿imatatan pensantsik? ¿Ankupantsikku? Y Teyta Diosqa, ¿imanötan pëkunata rikan?

8. Sirweqninkunata Jehovä mana qonqanqanta, ¿imanötan musyantsik?

⁸ Jehoväqa manam karupakashqa wawqi panikunata qonqantsu y rurayanqantapis yarparëkanmi (Heb. 6:10). Isaïasqa Jehovä kuyakoq kanqantam kënö willakun: “Üsha mitsiq nuna [üshanta] mellqakurkur apaqnömi pushamunqa” (Is. 40:11). Jehovämi llapan üsha mitseqkunapitapis mas alli kaqqa. Tsënö Jehovä kanqantaqa Jesusmi qateqninkunata kënö tapunqanchö rikätsikurqan: “¿Ima niyankitaq? Juk nunapa pachak üshankuna kapunman, y tsëpita juk oqrakäriptinqa, ¿manatsuraq 99 kaqta jirkachö jaqirïkurnin, oqrakashqa kaqta ashir qallëkunman? Y tarïkurninqa, rasuntam niyaq, tsë mana oqrakaq 99 üshankunapaq kushikunqampitapis masmi tsë üshampaq kushikunqa” (Mat. 18:12, 13).

9. Alli mitsikoq nunaqa, ¿imanötan üshanta cuidan? (Qaranchö dibüjuta rikäri).

⁹ Alli mitsikoq nunaqa shumaqmi cuidan üshankunata. Tsënö kanqantam  Davidqa rikätsikurqan leonpita y ösupita üshankunata cuidarnin (1 Sam. 17:34, 35). Juk alli mitsikoqqa juk üshan pishiptinqa rasllam musyarin (Juan 10:3, 14). Y juk üshan oqrakaptinqa wakinta umpakïkur o corralninman llawïkurmi oqrakashqa kaqta asheq ëwan. Jehoväqa, ¿imachötan igualan juk mitsikoqwan? Tsë igualatsikuywanmi Jesusqa Teytan imanö kanqanta rikätsikurqan, kënö ninqanchö: “Pishi wamranö kaqkunapita jukllaqllapis ushakärinantaqa munantsu” (Mat. 18:14).

10. Ezequiel 34:11-16 ninqannö, ¿imanötan Jehovä yanapan qelanashqa wawqi panikunata?

¹⁰ Jehoväqa llapantsiktam kuyamantsik y “pishi wamranö” karupakashqa kaqkunatapis kuyanmi. Teyta Diosqa willakoqnin Ezequielwanmi oqrakashqa üshankunata ashinampaq y yanapanampaq kaqta änikurqan. Y imanö ashinampaq kaqtapis willakurqanmi (leyi Ezequiel 34:11-16 d). Puntataqa, mitsikoqqa alliran kallpachakunan karqan oqrakashqa üshanta ashinampaq. Tarïkurqa yanaqinkunatawan juntanampaqmi kutitseq. Y üshan malograkushqa kaptinqa ampeqmi y shumaqmi cuidaq. Kë mitsikoqkunanöllam creikoqkunata  rikaq wawqikunaqa qelanashqa wawqi panikunata yanapayänan (1 Pëd. 5:2, 3). Creikoqkunata rikaq wawqikunaqa qelanashqa wawqi panikunata ashïkurmi Jehovä kuyanqanta rikätsiyan. e

11. Üshan oqrakaptin, ¿imatatan ruran juk mitsikoq?

¹¹ Juk alli mitsikoqqa manam üshan oqrakaptin maqar ushaqtsu. Tsënö kanqantaqa rikantsik, unë witsan sirweqninkuna Jehovä munanqannö mana rurayaptin imata ruranqanchömi.

12. ¿Imanötan Jehoväqa Jonasta yanaparqan?

¹² Jehoväpa willakoqnin Jonas mana cäsukushqa këkaptimpis, ¿imatatan Jehoväqa rurarqan? Mandanqanta Jonas ruranampaqmi, juk alli mitsikoqnö shumaq yanaparqan (Jon. 2:7; 3:1, 2). Tsëpita juk calabäzuta winaratsirnam, nunakunapa kawëninkuna imëkapitapis mas väleq kanqanta yachatsirqan (Jon. 4:10, 11). Noqantsikqa, ¿imatatan yachakuntsik? Creikoqkunata rikaq wawqikunaqa, manam oqrakashqatanötsu rikäyan Jehoväpita karupashqa wawqi panikunataqa. Tsëpa rantinqa imanir Jehoväpita karupakashqa kayanqanta musyayänampaqmi kallpachakuyänan. Y Jehoväpa voluntäninta yapë rurëta munayaptinqa shumaqmi yanapayänan.

13. Salmus 73 qellqaq nunata Jehovä yanapanqampitaqa, ¿imatatan yachakuntsik?

¹³ Diosta mana sirweq nunakuna allinö kayanqanta rikarmi, Salmus 73 qellqaq nunaqa Diospa voluntänin rurëta qelanarqan (Sal. 73:12, 13, 16). Jehoväqa manam piñakurqantsu tsë nunawan. Tsëpa rantinqa, Palabran Bibliamanmi tsënö pensanqanta churatsirqan. Tsëpitaran Salmus qellqaq nunaqa, Jehoväta cäsukuy imëkapitapis  mas alli kanqanta yachakurqan (Sal. 73:23, 24, 26, 28). Noqantsikqa, ¿imatatan yachakuntsik? Creikoqkunata rikaq wawqikunaqa, manam wawqi panikunata niyanmantsu pensayanqan mana alli kanqanta. Tsëpa rantinqa, Bibliata leyiparmi imanir tsënö parlayanqanchö y rurayanqanchö yanapayänan.

14. ¿Imanötan Jehoväqa Elïasta yanaparqan?

¹⁴ Diospa willakoqnin Elïasqa Jezabelta mantsarmi ëwakurqan (1 Rey. 19:1-3). Pëqa pensarqan Jehoväpa willakoqninkuna pëllana kanqantam, tsëmi wanuytapis munarqan (1 Rey. 19:4, 10). Jehoväqa manam Elïaswan piñakurqantsu. Tsëpa rantinqa, japallanlla mana kanqanta y pë yanapanampaqmi musyatsirqan. Yarpachakuyninkunata Elïas willaptinqa, Jehoväqa shumaq wiyarninmi mas rurëkunachö yanapakunampaq nirqan (1 Rey. 19:11-16, 18). Noqantsikqa, ¿imatatan yachakuntsik? Shumaq kuyanakur llapantsik kanapaqmi. Wakin wawqi panikuna mana alli sientikuyanqantaqa, creikoqkunata rikaq wawqikunaqa shumaqmi wiyayänan. Tsënö rurarllam pëkuna y Jehovä kuyayanqanta musyatsiyanqa.

15. Juan 6:39 ninqannö, ¿imanötan Jesusqa rikarqan Jehoväpa sirweqninkunata?

¹⁵ Qelanashqa wawqi panikunata shumaq tratanatam Jehoväqa munan. Y  tsëtam Jesusqa ruranqanwan yachatsimarquntsik. Tsëmi imëkanöpa ‘oqrakashqa üshakunanö këkaq Israel nacion kaqkunata’ Jehoväwan alli kayänampaq yanaparqan (Mat. 15:24; Lüc. 19:9, 10). Jehoväpa llapan sirweqninkunata shumaq yanapanampaqmi Jesusqa kallpachakurqan (leyi Juan 6:39).

16, 17. Creikoqkunata rikaq wawqikunaqa, ¿imanötan qelanashqa wawqi panikunata yanapayanman? (Rikäri “ ¿Imanötan qelanashqa wawqi panikunaqa sientikuyan?” neqtawan).

¹⁶ Ëfesu markachö creikoqkunata rikaq wawqikunatam apostol Pabluqa Jesusnö kayänampaq yachatsirqan. Kënömi nirqan: “Sinchi trabajarnin, kallpannaq kaqkunata yanapayänëkipaq, y Señor Jesus kënö ninqantam imëpis yarpäyänëki: ‘Imatapis qokïmi imata chaskipitapis mas kushikïtaqa apamun’” (Hëch. 20:17, 35). Espäña nacionpita creikoqkunata rikaq wawqi Salvadormi kënö cuentakun: “Qelanashqa wawqi panikunata Jehovä kuyanqanta rikarqa, noqapis tsënö rurëtam munä. Jehovä munanqannö yanapakuytam munä”. Tsënömi llapan creikoqkunata rikaq wawqikunapis yanapakuyänan.

¹⁷ Kë yachatsikuychö rikanqantsik Jehoväpita karupakashqa wawqi panikunaqa, kananqa llapanmi Jehoväta kushishqa sirwikäyan. Tsënö kaptimpis atskaqran Jehoväpita karupakashqa këkäyan. ¿Imanötan pëkunata yanaparishwan? Yapëchönam tsëpitaqa maslla yachakurishun.