ISRAELÏTAKUNAQA Dios Äninqan Patsaman yëkuyänampaqmi, Jordan mayuta tsimpayänampaqna këkäyarqan. Tsëman chärirmi juk nacion warmikuna fiestankunaman ëwayänampaq, israelïta ollqukunata invitayarqan. Itsachi israelïtakunapaqqa allinö karqan, porqui pëkunawan mas reqinakurnin alli amïgu këta, shumaq tushïta y alli mikupakuritachi pensayarqan. Tsë warmikunapa costumbrikuna y kawëninkunaqa manam igualtsu karqan israelïtakunata Jehovä mandanqan Leykunawanqa. Itsa wakinkunaqa pensayarqan alli cuidakuyänampaq kaqta y mana alliman mana ishkiyänampaq kaqta.

 ¿Imataq pasakurqan? Bibliam kënö nin: “Israelïtakunaqa Moab warmikunawanmi oqllanakur melanëpaq rakcha rurëkunata rurar qallëkuyarqan”. Kë warmikunaqa adorayanqan dioskunata adorayänantam munayarqan. Y tsëtam israelïtakunaqa rurayarqan, tsëmi Jehoväqa alläpa piñakurqan (Nüm. 25:1-3).

Israelïtakunaqa manam Diospa Leyninta wiyakuyarqantsu, tsëmi mana alli dioskunata adorayarqan y tsë warmikunawanmi lluta oqllanakï rurë jutsaman ishkiyarqan. Tsërëkurmi mëtsikaq israelïtakuna wanuyarqan (Ex. 20:4, 5, 14; Deut. 13:6-9). ¿Imanirtaq tsëta rurayanqanqa alläpa mana allipaq karqan? Porqui Dios Äninqan Patsaman yëkuyänampaqqa ichikllanam pishirqan. Sitsun Diospa Leynin ninqanta cäsukuyanman karqan, Jorqan mayuta tsimparirllam Dios Äninqan Patsaman yëkuyanman karqan (Nüm. 25:5, 9).

Israelïtakunapaq parlarmi apostol Pablu kënö escribirqan: “Tsë cösaskunaqa pëkunata pasarqan noqantsik yachakunapaqmi, y noqantsik, imëkapis imanö këkanqankunapa ushëninchö këkaqkuna, atikashqa kanapaqmi qellqashqa kayarqan” (1 Cor. 10:7-11). Jutsaman ishkiyanqanrëkurmi israelïtakuna Dios Äninqan Patsaman yëkuyarqantsu, tsëqa Satanastam alläpa kushitsirqan. Tsëpitaqa noqantsikpis yachakïta puëdintsikmi. Dios änimanqantsik patsaman mana yëkunapaq Satanas ishkitsimarnintsikqa alläpachi kushikunman.

Alli reqinqan trampakunatam Satanasqa utilizan cristiänukunata jutsaman ishkitsinampaq. Y israelïtakunata ishkitsinqannöllam mëtsikaqta ishkikätsin, ¿ima trampatataq Satanasqa utilizan? Jukwan jukwan oqllanakï munë jutsatam. Y tsëman ishkinapaqqa pornografïatam utilizan.

Kanan witsan nunakunapaqqa mas fäcilmi pornografïata rikäyänan y tsëtaqa manam pipis cuentata qokuntsu. Unë witsankunaqa pornografïata pipis rikëta munarqa, cïnitaraqmi ëwayaq o revistakunata o librukunataran rantiyaq. Peru itsa tsë sitiukunachö rikäyänanta penqakurnin mëtsikaq ëwayaqtsu. Peru kananqa pï mëmi Internet-ta utilizäyan, tsëmi trabäjunkunachö o cärrunkunallachö pornografïata rikëta puëdiyan. Jina mëtsika nacionkunachömi warmipis y ollqupis wayinkunallachö rikëta puëdiyan.

Y kananqa celularkunachömi pï mëpis pornografïata rikëta puëdin. Wakinkunaqa cällikunapa ëwarëkar, cärruchö o trenchö ëwarëkarmi rakcha rurëkunata celularninkunachö o tablëtankunachö rikarar ëwayan.

Kananqa pitapis mana mäkatsishllapam pornografïata rikäyan, y tsëqa alläpa mana allikunamanmi nunakunata chëkätsin. Pornografïata rikäyanqanrëkurmi mëtsikaq nunakuna casädu kawakïninkunata ushakätsiyan, jina mana väleqnö y concienciankunachömi mana alli sientikuyan. Peru masqa Jehoväwan amïgu këninkunatam ushakätsiyan. Rikanqantsiknöpis pornografïata rikaqkunaqa alläpa mana allim sientikuyan. Y manam fäciltsu rikäyanqankunata qonqariyänanqa.

Satanaspa trampaman mana ishkinapaqqa Jehovämi yanapamäshun. Peru tsëpaqqa pë mandamanqantsikkunatam cäsukunantsik, y manam israelïtakunanöqa mana wiyakoq kanantsiktsu. Porqui pëkunaqa Dios mandanqantam cäsukuyarqantsu (Ex. 19:5). Jina pornografïata imanir Jehovä chikinqantam alleq entiendinantsik. ¿Imanirtaq tsëta entiendinantsikqa precisan?

Israelïtakunata Dios mandanqa leykunaqa imëka perqanömi, wakin nacionkunapa mana alli rurëninkunata mana rurayänampaq tsaparqan (Deut. 4:6-8). Tsë leykunam alleq cläru rikätsikurqan jukwan jukwan lluta oqllanakïta Jehovä alläpa chikinqanta.

 Tsë nacionkunachö nunakuna melanëpaq rurëkunata rurëkäyanqantam Jehoväqa israelïtakunata musyatsirqan, y kënömi nirqan: “Pushëkäyanqaq Canaan markaman chärirpis tsëchö nunakunapa costumbrinkunataqa ama rurayankitsu [...]. Tsëmi täräyanqëki patsaqa rakchatashqa këkan, y mana allita rurayanqampitam castigashqa kayanqa”. Jehovä Diospaqqa cananeu nunakuna rurayanqankunaqa alläpa melanëpaqmi karqan, tsëmi israelïtakuna këkäyanqan markaqa melanëpaq rurëkunawan rakchatashqa këkanqanta nirqan (Lev. 18:3, 25).

Cananeukunata Jehovä castigashqa kaptimpis, jukwan jukwan lluta oqllanakur rurëqa manam ushakarqantsu. Tsëmi 1.500 watakuna pasarinqanchö, cristiänukuna täräyanqan nacionkunachö nunakunapaq apostol Pablu kënö nirqan: “Mana penqakur mana allikunata rurar kakuyarqan, tsënöpam ërayarnin tukïläya melanëpaq rurëkunata rurayarqan” (Efes. 4:17-19). Kanan tiempu nunakunapis mana penqakushpam jukwan jukwan lluta kakuyan. Peru Jehoväpa sirweqninkunaqa imëkanöpam procurayan tsë rakcha rurëkunata mana rikäyänampaq.

Pornografïata rikaqkunaqa Diosta mana respetayanqantam rikätsikuyan. Porqui Jehovämi kikin niraqta y kikin rikoqta kamamarquntsik, alli kaqta y mana alli kaqta cuentata qokunapaq. Jinamampis imanö y pikunalla oqllanakïta puëdiyänampaq kaqtam leykunata patsätsishqa y casädu kaqkunalla oqllanakïta puëdiyanqantam nirqan (Gen. 1:26-28; Prov. 5:18, 19). Peru pornografïata ruraqkuna y rikätsikoqkunaqa oqllanakïpaq Jehovä ninqantam respetayantsu. Tsëmi kë nunakunataqa Jehovä castiganqa (Rom. 1:24-27).

Kikinkuna munar pornografïata rikaqkunaqa, itsa allilla kanqanta pensayan. Peru tsëta rurarqa Dios mandakunqankunata mana kaqpaq churaqkunanöllam rurëkäyan. Y pornografïata rikarnin qallarqa itsa wakinqa tsëmanqa pensayarqantsu. Peru Diosta sirweqkunaqa chipyëpam tsëta chikiyänan. Bibliam kënö nin: “Jehoväta kuyaq nunakuna, mana alli kaqtaqa chikiyë” (Sal. 97:10).

 Jina pornografïata rikëta mana munaqkunapis, tsëman ishki fäcil kanqantam cuentata qokuyan. Itsa kallpachakïkantsik melanëpaq oqllanakï munëkunaman mana pensanapaq. Jinamampis shonquntsikqa imatapis rasllam munarin, itsa tsërëkur pensashwan Dios mandakunqankunata cäsukï mana precisanqanta (Jer. 17:9). Peru mëtsikaq nunakunam Jehoväta sirwiyänampaq tsë viciuta venciyashqa. Tsëta musyëqa tsë viciuta dejayänampaq kallpachakïkaqkunatam yanapanqa. Kananqa rikärishun Satanaspa tsë trampanman mana ishkinapaq Diospa Palabran imanö yanapamanqantsikta.

Kë yachatsikïpa qallananchö rikanqantsiknöpis, mëtsikaq israelïtakunam mana alli munëninkuna dominaptin mana allichö ushayarqan. Jina kanampis tsënöllam pasamashwan. Tsëmi Jesucristupa wawqin Santiägu kënö nir escribirqan: “Cada ünum pruëbaman churakan munënin inkitaptin y shonqunchö patsakäriptin. Tsënam tsë munë winarirqa, jutsata rurëman chätsikun” (Sant. 1:14, 15). Pipis mana alli munëkuna shonqunchö y pensëninchö yurinanta permitirninqa, jutsa rurëmanmi ishkinqa. Tsëmi tsë mana alli pensëkunataqa chipyëpa ushakätsinantsik.

Mana alli allikunaman pensar sïguinqantsikta cuentata qokurqa, Jesus kënö ninqantam raslla ruranantsik: “Sitsun makiki o chakiki ishkitsishunki, tsëqa roqurir jitarïkï [...]. Jina, sitsun nawiki ishkitsishunki, tsëqa jorqarïkur jitarïkï” (Mat. 18:8, 9). Tsënö nirqa Jesusqa manam makintsikta, chakintsikta o nawintsikta rasumpa jorqarinapaqtsu parlëkarqan. Sinöqa manaraq ishkitsimashqa mana alli pensëkunata ras ushakätsinapaq kaqtam nikarqan. Pornografïa asuntuchöqa, ¿imanötaq Jesus consejakunqanta cäsukushwan?

Mana pensanqantsik höra pornografïata rikëkurqa, ama pensashuntsu mana alliman mana chätsimänapaq kaqmanqa. Tsëmi tsë pasamashqaqa jinan höram tumakurinantsik. Jina televisionta, computadörata o celulartapis rasmi upiratsinantsik y alli kaqkunamanmi pensëta tïranantsik. Tsënö  rurashqaqa mana alli pensënintsikta dominanapaqmi yanapamäshun.

Rikanqantsik rakcha rurëkunaqa atska watapam pensënintsikchö quedakun y mana pensanqantsik höram yarpärishwan. Y tsë pasakuptinqa itsa pipis partinta yatarnin o kuparnin qallëkunman. Pornografïata rikëta dejashqana karnimpis, rikanqëkikunata illaqpita yarparninqa, ama yarpachakïtsu porqui tsëqa pasakunmi. Peru tsëta musyanqëkim yanapashunki, mana alli pensëkuna yurimunqan höra imanö vencinëkipaq kaqta.

Dios munanqannö imatapis ruranapaq y pensanapaqmi decidïdu këkänantsik. Y apostol Pablu kënö ninqanta rurashun: “Allim cuerpüta tsarä y imëka esclävutanömi pushä” (1 Cor. 9:27). Ama permitishuntsu mana alli pensëkuna esclävutanö dominamänata. Sinöqa Romänus 12:2 textu ninqanta rurashun, kënömi nin: “Pensënikikunata cambiar jukläyana tikrayë, tsënöpa Diospa alli, pëta kushitseq y chipyëpa alli munënin ima kanqanta kikikikuna rikäyänëkipaq”. Tsëmi Dios munanqannö imatapis rurarninqa mas kushishqa sientikushun.

Pornografïa asuntupaq Jehovä imata pensanqanta rikätsikoq textukunata yarpäshun. Tsënöpa mana alli pensëkuna peqantsikman illaqpita chäramuptin, tsë textukunaman ras yarpärinapaq. Tsë wakinqa kayan Salmus 119:37, Isaïas 52:11, Mateu 5:28, Efesius 5:3, Colosensis 3:5 y 1 Tesalonicensis 4:4-8 textukunam.

¿Imataraq rurashwan mana allikunata rikëta munanqantsik höra? Jesus ruranqannöllam ruranantsik (1 Pëd. 2:21). Jesustaqa bautizakuriptinllam Satanasqa atska kutipa tentarqan. ¿Imatataq Jesus rurarqan? Diospa Palabrantam kutin kutin utilizarqan Satanas tentaptin alli tsarakunampaq. Kënömi nirqan: “¡Këpita ëwakï Satanas!” tsënö niptinmi Satanasqa ëwakurqan. Jesusqa manam Satanas tentanqanman ishkirqantsu. Noqantsikpis Jesusnöllam alleq tsarakïta puëdintsik (Mat. 4:1-11). Satanas y makinchö këkaq nunakunaqa imëkanöpam munayanqa pornografïawan pensënintsikta rakchatëta, peru ama permitishuntsu. Porqui Jehoväpa yanapakïninwanqa chikimaqnintsik Satanasta vencita puëdishunmi.

Yanapamänapaq Jehoväman mañakur sïguishun. Apostol Pablum kënö nirqan: “Yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filip. 4:6, 7). Jehovämi alli sientikunapaq yanapamäshun, tsënöpa jutsaman mana ishkinapaq y kallpachakurnin sïguinapaq. Porqui Diosman witishqaqa pëpis noqantsikmanmi witimunqa (Sant. 4:8).

Ima peligrupitapis cuidakunapaqqa Jehoväpa lädunchömi këkänantsik. Jesusmi Satanaspaq kënö nirqan: “Mana cäsukoq nunakunapa gobernaqninmi shamun, y pëqa manam noqata dominamëta puëdintsu” (Juan 14:30). Jesusqa segürum karqan, tsëmi kënö nirqan: “Y kachamaq Kaqqa, noqawanmi këkan; manam japallätatsu jaqiramashqa, porqui noqaqa pëta kushitsinqan kaqkunatam imëpis rurä” (Juan 8:29). Jehovä nimanqantsikkunata rurashqaqa manam dejamäshuntsu. Pornografïa trampaman ama ishkishuntsu, tsënöpam Satanasta vencishun.