1. Adanwan Ëva jutsallakuriyaptinqa, ¿imatataq Jehovä rurarqan? (Genesis 3:15).

 ADANWAN Ëva jutsallakuriyaptinllam, pëpa mirëninkunata yanapanampaq kaqta Jehovä willatsikurqan.Tsë willatsikunqanqa, Genesis 3:15 (leyi) ninqanchömi qellqarëkan.

2. Genesis 3:15 ninqanchö Dios willatsikunqanqa, ¿imanirtan alläpa precisaq?

² Tsëta Dios willatsikunqanqa, Bibliapa qallanan kaq librunchömi qellqarëkan. Bibliapa llapan librunkunachö qellqarëkaqkunaqa, Genesis 3:15 ninqanchö Dios willatsikunqanllapaqmi parlayan. Y tsëqa, Diabluta y llapan qateqninkunata ushakätsinampaq juk Salvamaqnintsik Dios mandamunampaq kaqmi. * Jehoväta kuyaqkunaqa tsëta musyanqantsikpitam, ¡alläpa kushikuntsik!

3. ¿Imatataq këchö yachakushun?

³ Këchöqa, Genesis 3:15 ninqampita wakin tapukuykunapitam yachakushun. Tsëta Dios willatsikunqanchöqa, ¿pikunapaqtan parlëkan?, ¿imanötan cumplikëkan? y ¿imanötan kanan witsankuna yanapamantsik?

4. ¿Pitan culebraqa, y imanötan tsëta musyantsik?

⁴ Genesis 3:14 y 15 ninqanchöqa, juk ‘culebrapaq’ y tsë culebrapa ‘mirënimpaq’, y juk ‘warmipaq’ y tsë warmipita ‘miraqkunapaqmi’  parlan. Bibliachö ninqampitam tsë culebra y tsë warmi pikuna kayanqanta entiendintsik. * Culebrapaq parlar qallëkushun. Rasumpa culebra kashqa kaptinqa, manam Eden huertachö Jehovä ninqanta entiendinmantsu karqan. Tsëmi Bibliachöqa pï kanqanta cläru rikätsimantsik. Revelacion 12:9 ninqanchömi, ‘unë kaq culebraqa’ Satanas Diablu kanqanta nin. ¿Y pitan culebrapa mirëninqa?

5. ¿Pikunatan culebrapa mirëninkuna kayan?

⁵ Bibliachö ‘mirëpaq’ parlarqa, pitapis teytantanö rikar portakuyanqampaqmi parlëkan. Tsëmi culebrapa mirëninqa, Jehoväta y pëta sirweqkunata Satanasnölla chikeq demoniukuna y nunakunam kayan. Tsë grüpuchömi, Noë kawanqan witsan ciëluchö rurëninkunata dejarir Patsaman urämoq angelkuna y alläpa mana alli nunakuna kayan. Pëkunaqa teytan Diablunöllam portakuyan (Gen. 6:1, 2; Juan 8:44; 1 Juan 5:19; Jüd. 6).

6. Genesis 3:15 ninqanchö ‘warmiqa’, ¿imanirtan Ëvatsu kanman karqan?

⁶ Kananqa, Dios willatsikunqanchö ‘warmi’ pï kanqanta rikärishun. ¿Ëvatsuraq karqan? Manam. Dios willatsikunqanchöqa warmipa mirënin culebrapa peqanta o umanta jalunampaq kaqtam nin. Yachakunqantsiknömi, tsë culebraqa Satanas Diablu, y pëqa mana rikakoq espïritum. Tsënö kaptinqa, manam Ëvapa mirënimpita pipis Satanasta ushakätsita puëdinmantsu. Tsëpaqqa, Satanaspitapis mas puëdeqmi kanan.

7. Genesis 3:15 ninqanchö warmi pï kanqanta musyanapaqqa, ¿imanötan Revelacion 12:1, 2, 5 y 10 ninqan yanapamantsik?

⁷ Genesis 3:15 ninqanchö warmi pï kanqantaqa, Revelacion libruchömi willakun (leyi  Revelacion 12:1, 2, 5, 10). Tsëqa, manam ëtsayoq y tulluyoq warmitsu. Killam chakin jawanchö këkan y peqan o umanchönam chunka ishkë estrëllapita corönayoq këkan. Jina juk wamratam qeshpikun, tsëqa, Diospa Gobiernunmi. Tsë Gobiernu ciëluchö kaptinmi, tsë warmipis ciëluchö këkänan. Y pëqa, Jehoväta ciëluchö sirweq llapan angelkunatam rikätsikun (Gäl. 4:26).

8. Warmipa mirënimpitaqa, ¿pitan mas precisaq këman charqan y imëtan tsënö këmanqa charqan? (Genesis 22:15 a 18).

⁸ Diospa Palabranchö ninqampitam, warmipa mas precisaq mirënin pï kanqanta entiendintsik. Abrahanpa mirënimpita kanampaq kaqtam nin (leyi Genesis 22:15-18). Y tsëta Dios willatsikunqanqa cumplikarqanmi. Abrahanpa mirënimpitam Jesus yurirqan (Lüc. 3:23, 34). Peru Satanasta ushakätsinampaqqa, manam juk nunallatsu kanan karqan. Tsëmi Jesus 30 watayoq këkaptin, santu espïritunwan Diosnintsik akrarqan. Tsë höram, warmipa mirënimpita mas precisaq këman pëqa charqan (Gäl. 3:16). Wanunqampita kawariramuptinmi, ‘alläpa precisaqpaq’ y pïmë respetanampaq churarqan. Jina ‘ciëluchö y patsachö imëkata rikänampaqmi autoridäta’ chaskirqan. Tsënöpam, ‘Diablupa rurëninkunatapis chipyëpa ushakätsinqa’ (Heb. 2:7; Mat. 28:18; 1 Juan 3:8).

9, 10. (1) Warmipa mirëninchöqa, ¿pikuna mastan këkäyan y imëtan mirënimpita këman chäyarqan? (2) ¿Imatataq qateqnin kaq pärrafukunachö yachakushun?

⁹ Peru Dios willatsikunqan warmipaqqa, Patsachöpis mirënin kananmi karqan. Tsëpaqmi judïukunapita y juk nacionkunapita Dios akranqan nunakunaman qellqarnin kënö nirqan: “Cristupa karqa rasumpam Abrahanpa mirënin kayanki, juk änikïrëkur herenciata chaskeq kaqkuna” (Gäl. 3:28, 29). Santu espïritunwan juk nunata Jehovä akraptinqa, warmipa Patsachö këkaq mirënimpitam tikrarin. Tsëmi warmipa mirëninqa, Jesucristu y pëwan gobernayämunampaq kaq 144.000 nunakuna kayan (Rev. 14:1). Pëkunaqa pensayanqanchö y rurayanqanchömi Teytankuna Jehovänö kayänampaq kallpachakuyan.

¹⁰ Tsëqa, Genesis 3:15 ninqanchö pikunapaq parlanqanta musyantsiknam. Kananqa änikunqankunata cumplinampaq Jehovä imata rurëkashqa kanqanta rikärishun. Tsëpitanam, Genesis 3:15 ninqanchö Dios willatsikunqan kanan witsan imanö yanapamanqantsikta rikäshun.

11. ¿Imanötan warmipa mirënimpa ‘atakanta’ culebra kanirqan?

¹¹ Warmipita yureq mirëninta atakanchö culebra kaninampaq kaqtam Genesis 3:15 nin. Tsëqa, judïu y Röma nunakunawan Diospa Tsurinta Satanas wanutsinqanchömi cumplikarqan (Lüc. 23:13, 20-24). Atakantsikta malogrëkurqa, juk tiempupam purita puëdishwantsu. Tsënöllam Jesuspis pampashqa kanqan junaqkunaqa, imatapis rurëta puëdirqantsu (Mat. 16:21).

12. ¿Imë y imanötan culebrapa peqan jalushqa kanqa?

¹² Genesis 3:15 ninqanchö Dios willatsikunqanchöqa, culebrapa peqanta o umanta warmipa mirënin jalunampaq kaqtam nin. Y tsënö ninqan cumplikänampaqqa, Jesusqa kawarimunanmi karqan. Y ¡tsënömi pasakurqan! Wanunqampita kima junaq pasarinqanchömi, manana ushakaq espïritu kanampaq kawarimurqan. Y Dios dispunishqan tiempu chäramuptinmi, Jesusqa Satanasta ushakäratsinqa (Heb. 2:14). Cristu  y pëwan gobernaqkunam Diospa Patsachö llapan chikeqninkunata ushakätsiyanqa, juk parlakuychöqa, culebrapa mirëninta (Rev. 17:14; 20:4, 10). *

13. ¿Imanötan Dios tsë kutichö willatsikunqan cumplikëkanqan yanapamantsik?

¹³ Diospa sirweqnin kanëkipaq bautizakushqana karqa, Dios willatsikunqan cumplikëkanqanqa yanapëkäshunkinam. Jesusqa nunanömi Patsachö yurikurqan y Teytannö kanqantam llapan ruranqanchö rikätsikurqan (Juan 14:9). Imanö kanqanwanmi, Jehoväta reqinapaq y kuyanapaq yanapamarquntsik. Jina Jesusqa, yachatsimarnintsik y kanan witsan congregacionkunata imanö diriginqanwanmi yanapamarquntsik. Jehovä kushishqa kanampaq imanö kawanapaq kaqtam yachatsimarquntsik. Y wanunqampis llapantsiktam yanapamantsik. Kawarirkamurmi, Jesusqa yawarnimpa chaninta Jehoväman chätsirqan, y tsëmi “llapan jutsapita limpiamantsik” (1 Juan 1:7).

14. ¿Imanötan musyantsik Eden huertachö Jehovä willatsikunqanqa jinan höra mana cumplikashqa kanqanta?

¹⁴ Eden huertachö Jehovä ninqanqa, willatsikunqan jinan höra mana cumplikänampaq kaqtam rikätsikurqan. Atska tiempuran pasanan karqan mirëyoq warmi kanampaq, qateqninkunata Diablu juntanampaq y warmiwan Diablu chikinakuyänampaq. Tsëta musyanqantsikqa, cuidakunapaqmi yanapamantsik. Satanaspa makinchö këkaq munduqa, Jehoväta sirweqkunatam chikiyänan karqan. Tsëpita mëtsika watakuna pasanqanchöpis, tsëkuna pasakunampaq kaqtam qateqninkunata Jesus nirqan (Mar. 13:13; Juan 17:14). Y Dios willatsikunqan cumplikëkanqantaqa, kë pasaq 100 watakunachömi masraq rikarquntsik. ¿Imanirtan tsëta nintsik?

15. (1) ¿Imanirtan nunakunaqa imëpitapis masraq chikimantsik? (2) ¿Imanirtan Satanastaqa mantsashwantsu?

¹⁵ Jesusqa, 1914 watachömi Diospa Gobiernunchö Mandakoq tikrarirqan. Y tsëpita ichik tiempullatam, Satanasta ciëlupita qarqamurqan. Tsëmi Diabluqa, imatapis Patsallachöna rurëta puëdin y ushakänampaq kaqtam shuyarëkan (Rev. 12:9, 12). Peru manam makinta choqpashqatsu shuyarëkan. Alläpa cölerashqam Diospa sirweqninkunata sufrikätsin (Rev. 12:13, 17). Tsërëkurmi nunakunaqa imëpitapis masraq chikimantsik. Peru Satanasta y qateqninkunataqa, manam mantsashwantsu. Tsëpa rantinqa, apostol Pablunöllam Diosman confiakuntsik. Pëmi kënö qellqarqan: “Noqantsikwan Dios këkaptinqa, ¿piraq noqantsikpa contrantsikchö këkanqa?” (Rom. 8:31). Yachakunqantsiknöpis, Genesis 3:15 ninqanchö Dios willatsikunqan cäsi llapanna cumplikashqa kaptinmi, Jehovämanqa chipyëpa confiakuntsik.

16-18. Genesis 3:15 ninqanchö Dios willatsikunqanta entiendiyanqanqa, ¿imanötan Edwardta, Ursulata y Jëssicata yanapashqa?

¹⁶ Genesis 3:15 ninqanchö Dios willatsikunqanqa, imapa pasashqapis alli tsarakunapaqmi yanapamantsik. Guam nacionchö misionëru Edward wawqim kënö nin: “Kawënïchö imëkapa pasanqärëkurmi, Jehovällata sirwinäpaqqa fäciltsu kashqa. Peru Genesis 3:15 ninqanchö willatsikunqanman yarpanqämi, Teyta Jehoväman confiakur sïguinäpaq yanapamashqa”. Edwardqa, imëka sufritsimaqnintsikkunata  Jehovä ushakätsimunan junaq chämunantam kushishqa shuyarëkan.

¹⁷ Alemania nacionchö këkaq Bavierachö täraq Ursula panitash, Genesis 3:15 ninqanta entiendinqan Biblia Diospa Palabran kanqanta següru kanampaq yanaparqan. Bibliachö qellqarëkaq Diospa wakin musyatsikuyninkunapis Genesis 3:15 ninqanllapaq parlayanqampitam Ursulaqa espantakurqan. Pëqa kënöpis ninmi: “Shamoq tiempuchö imëkatapis altsanampaq kaqta nunakuna shuyaräyänampaq jinan höra patsätsinqampitam, Jehovätaqa mas kuyar qallëkurqä”.

¹⁸ Micronesia nacionchö täraq Jëssica jutiyoq paninam kënö nin: “Diospita rasumpa kaqta yachakuykanqäpita alläpa kushishqa këkanqätaqa yarparëkäran. ¡Genesis 3:15 ninqanchö Dios willatsikunqanmi cumplikëkarqan! Tsëta entiendinqämi, kanan witsan imëkatapis sufrikanqantsikqa Diospa munënimpita mana kanqanta yarpätsiman. Y tsë kutichö willatsikunqanqa, Jehoväta kanan witsan sirwirnin alli kawakunapaq kaqta y shamoq tiempuchöqa mas kushishqaraq kanapaq kaqtam rikätsiman”.

19. ¿Imanirtan següru këkantsik Dios willatsikunqampa ushanan kaqpis cumplikänampaq kaqta?

¹⁹ Rikanqantsiknömi, Genesis 3:15 ninqanchö Dios willatsikunqanqa cumplikëkanmi. Warmipa y culebrapa mirënin pikuna kayanqantam alli entiendintsik. Warmipa mirënimpita mas precisaq kaqqa Jesusmi. Atakanchö kaneq cuenta Satanas wanutsinqampitam, Jesusqa kawarimushqa y kananqa alläpa respetëpaq y mana ushakaq Rey këmanmi chashqa. Jina Jehoväqa, Jesuswan gobernayämunampaq kaq nunakunatam cäsi llapantana akrarishqa. Pëkunam, warmipa Patsachö mirënin kayan. Rikanqantsiknömi, Dios willatsikunqanqa cäsi llapanna cumplikärishqa. Tsëmi següru kantsik culebrapa peqan o uman jalushqa kanampaq kaq cumplikänampaq kaqtapis. Satanas chipyëpa ushakäriptinqa, Diosta sirweqkunaqa alläpam kushikuyanqa. Peru tsë junaq chämunqanyaqqa, tsarakurninmi sïguikänantsik. Diosnintsikmanqa imëkarëkurmi confiakushwan. Warmipa mirëninwanmi ‘patsachö llapan nunakuna’ mëtsika bendicionta chaskiyanqa (Gen. 22:18).