1. ¿Imanirtaq chikishqa kanqantsik tiempupaq alistakunantsik?

 WANUTSIYÄNAN paqasmi Jesusqa nirqan, Diosta sirwita munaqkuna chikishqa kayänampaq kaqta (Juan 17:14). Tsëpita patsëmi Jehoväpa sirweqninkunataqa chikir alläpa sufritsiyashqa (2 Tim. 3:12). Y ushanan junaqkuna chämunqanmannömi, nunakunaqa mas chikimäshun (Mat. 24:9).

2, 3. (1) ¿Imanirtaq mana alli kanman shamoq tiempuchö ima pasakunampaq kaqman alläpa yarpachakï? (2) ¿Imapitataq kë yachatsikïchö yachakushun?

² Chikishqa kanqantsik tiempu imakuna pasamänapaq kaqmanqa manam yarparäkushwantsu. Tsëkunaman alläpa yarparäkurninqa, itsa pruëbakunapa manaraq pasarnin Jehoväta sirwita dejarishun, porqui nunata mantsë y alläpa yarpachakïmi venciramashwan (Prov. 12:25; 17:22). Tsëtam chikimaqnintsik Diabluqa mas utilizan Jehoväta manana sirwinapaq (1 Pëd. 5:8, 9). Tsëqa, ¿imatataq ruranantsik valienti kanantsikpaq?

³ Kë yachatsikïchömi yachakushun, Jehoväman mas confiakunapaq imata ruranapaq kaqta y kanan tiempu tsëta ruranantsik imanir alläpa precisanqanta. Jina mas valienti kanapaq y chikishqa karnin imata ruranapaq kaqtam yachakushun.

4. Hebrëus 13:5, 6 textu ninqannö, ¿imapitataq següru këkänantsik y imanir?

⁴ Jehovä kuyamanqantsikta y imëpis mana jaqimänapaq kaqtam següru kanantsik (leyi Hebrëus 13:5, 6). Juk Täpakoq revistachömi nirqan, Jehoväta mas reqeq nunaqa pruëbakunapa pasarnimpis pëman mas confiakunqanta. Awmi, chikishqa kanqantsik tiempuchö alli tsarakunapaqqa, Jehovätam kuyanantsik y llapan shonquntsikwanmi pëman confiakunantsik (Mat. 22:36-38; Sant. 5:11).

5. Dios kuyamanqantsikta rikänapaqqa, ¿imatataq ruranantsik?

 ⁵ Bibliataqa leyinantsik Jehoväta mas kuyanapaqmi (Sant. 4:8). Tsëpaqqa leyinqantsik hörakunam, Jehovä ninqankunachö y ruranqankunachö alläpa kuyakoq kanqanta rikëta procuranantsik (Ex. 34:6). Wakinkunaqa pipis pëkunapaq mana yarpachakushqa kayaptin o mana kuyashqa kayaptinmi, Dios kuyanqantaqa creiyantsu. Noqantsikpis tsënö pensarqa, itsa alli kanman Jehovä alläpa kuyamanqantsikta imanö rikätsimashqa kanqantsikta juk papelchö apuntanantsik (Sal. 78:38, 39; Rom. 8:32). Y kawënintsikchö Jehovä imanö yanapamanqantsikman pensar y Bibliata leyirqa, cuentatam qokushun Jehovä alläpa kuyamanqantsikta. Jina ruranqankunata mas valorarninqa, masmi pëman confiakushun y kuyashun (Sal. 116:1, 2).

6. Salmus 94:17-19 textu ninqannö, ¿Diosman mañakunqantsikqa imanö sientikunapaqtaq yanapamantsik?

⁶ Jehoväman imëpis mañakushun. Juk wamrata papänin kuyëkanqanman pensarishun. Itsa kë wamraqa papäninwan karninqa, imapis pasanampaq kaqta mantsantsu y llapanta papäninta willan. Tsënöllam noqantsikpis Jehoväman seguïdu mañakurninqa, pëman mas confiakushun (leyi Salmus 94:17-19 b). Kuyakoq Teytantsik Jehovätaqa llapan llakikïnintsikkunata y yarpachakïnintsikkunatam willanantsik (Lam. 2:19). Tsënö rurarninqa, ‘imëka yarpachakïkuna janampa këkaq Diospa yamë këninmi shonquntsikta y pensënintsikta’ tsapanqa (Filip. 4:6, 7). Tsëmi Jehoväman seguïdu mañakurninqa, pëwan mas amïgu kashun (Rom. 8:38, 39).

7. ¿Imanirtaq següru kanantsik Dios änikunqankunata cumplimunampaq kaqta?

⁷ Änimanqantsik bendicionkunata Jehovä cumplimunampaq kaqtaqa segürum kanantsik (Nüm. 23:19). Jehovä änimanqantsikkunaman alläpa mana confiakushqaqa, Satanaswan chikimaqnintsik nunakunam raslla imawampis mantsakäratsimashwan (Prov. 24:10; Heb. 2:15). Dios änikunqan Gobiernuman mas confiakunapaqqa, ¿imatataq ruranantsik? Tsëpaqqa, tsë Gobiernu ima bendicionkunata apamunampaq kaqta y cumplikänampaq imanir següru kanqantsiktam yachakunantsik. Tsëta ruranantsik imanir precisanqanta entiendinapaqqa, Stanley Jones jutiyoq wawqintsikta ima pasanqanta rikärishun. Kë wawqintsikqa Diosman creinqanrëkurmi 7 watapa carcelararqan. c Y kënömi nirqan: “Diospa Gobiernumpita yachakunqämi Jehoväpa änikïninkunaman llapan shonqüwan confiakunäpaq y pëwan mas amïgu kanäpaq yanapamarqan, y tsëmi Jehoväta mana jaqinapaq valorta qomarqan”. Dios änimanqantsikkunaman llapan shonquntsikwan confiakurninqa, Jehoväpa lädunchönömi sientikushun y manam imapis mantsakätsimäshuntsu (Prov. 3:25, 26).

8. Reunionkunaman ëwëta o mana ëwëta munanqantsikqa, ¿imatataq rikätsikun?

⁸ Mana faltëpa reunionkunaman ëwashun.  Tsëchömi Jehoväman mas confiakunapaq yanapamantsik. Porqui reunionkunaman ëwëta o mana ëwëta munanqantsikmi rikätsikunqa, chikishqa kanqantsik tiempuchö alleq tsarakunapaq kaqta o mana tsarakunapaq kaqta (Heb. 10:24, 25). Ima asunturëkurllapis reunionkunaman kanan witsan faltarninqa, michashqa kanqantsik tiempuchöqa mas difïcilmi ëwanantsik kanqa. Peru kananllapitana reunionkunaman mana faltashqaqa, shamoq tiempuchöpis chikimaqnintsikkunaqa manam michämënintsikta puëdiyanqatsu. Tsëmi kananllapitana kallpachakunantsik reunionkunaman mana faltëpa ëwanapaq. Tsënö rurarqa, gobiernukuna michäkuyaptimpis reunionkunamanqa ëwëkäshunllam (Hëch. 5:29).

9. ¿Imanirtaq precisan textukunata yarpänantsik?

⁹ Gustamanqantsik textukunatam yarpänantsik (Mat. 13:52). Llapan textukunata yarpëta mana puëdishqapis, Jehovämi santu espïritunwan yarpänapaq yanapamäshun (Juan 14:26). Alemaniachö prësu këkaq juk wawqim kënö willakun: “Mëtsika textukunata yarpanqäqa allipaqmi karqan, porqui carcelchö kanqä witsan tsë textukunata yarpanqämi yanapamarqan”. Kë wawqintsiktaqa tsë textukunam alläpa yanaparqan Jehoväpa lädunchönö sientikunampaq y sirwita mana jaqinampaq.

10. ¿Imanirtaq Jehoväpaq cantanqantsik cancionkunata yachakunantsik?

¹⁰ Jehoväpaq cantanqantsik cancionkunata yachakushun. Pabluwan Sïlas Filïpuchö carcelarëkarmi, yarpäyanqan cancionkunata Jehoväpaq cantayarqan (Hëch. 16:25). Tsënöllam Union Soviëtica nir reqiyanqan nacionkunachö cristiänu mayintsikkunapis Jehoväman mas markäkuyänampaq rurayarqan. Pëkunataqa markankunapitam Siberia markaman prësu apakuyarqan. Mariya Fedun jutiyoq panintsikmi kënö willakun: “Yarpäyanqä cancionkunatam cantayarqä”. Kë panintsikqa nin, cantayanqan cancionkuna llapankunata alläpa animashqa kanqanta y Jehoväpa lädunchönö sientikuyänampaq yanapashqa kanqantam. ¿Noqantsiktaqa yanapamantsikku reunionkunachö cantanqantsik cancionkunata y Internet päginantsikchö këkaq cancionkunata cantë? Tsëqa tsë cancionkunata kananllapitana yachakushun (rikäri “ Qammi kallpä qomanki” nishqan recuadruta).

11, 12. (1) 1 Samuel 17:37, 45-47 textu ninqannö, ¿imanirtaq Davidqa valienti karqan? (2) ¿Imatataq Davidpita yachakuntsik?

¹¹ Chikishqa kanqantsik tiempuchö alli tsarakunapaqqa, valientim kanantsik. Peru valienti  mana kanqantsikta cuentata qokurqa, këtam yarpänantsik: mas valoryoq kanqantsikqa, manam jatun o kallpayoq kanqantsikpitatsu, ni manam imatapis yachanqantsikpitatsu. Jövin kanqan witsan David ruranqanta rikärishun. Pëqa takshalla y alläpa kallpayoq mana këkarpis Goliatwanmi mana mantsashpa pelyarqan. Jinamampis guërrachö pelyanampaqqa, manam listutsu karqan y espädampis manam kapurqantsu. Peru valienti karmi mana mantsashpa tsë jatun nunawan pelyaq ëwarqan.

¹² ¿Imanirtaq Davidqa valienti karqan? Porqui Jehovä yanapanampaq kaqmanmi chipyëpa confiakurqan (leyi 1 Samuel 17:37, 45-47 d). Davidqa manam yarpachakurqantsu Goliat pëpita mas puëdeq kanqanman, sinöqa Goliatpita Jehovä mas puëdeq kanqanmanmi confiakurqan. Noqantsikpis valienti kanapaqqa, Davidnömi Jehovä yanapamänapaq kaqman y chikimaqnintsikkunapita mas puëdeq kanqanman confiakunantsik (2 Crön. 20:15; Sal. 16:8). ¿Imatataq kananllapitana ruranantsik chikir qatikachämashqa tiempuchö mas valienti kanapaq?

13. ¿Imatataq ruranantsik mas valienti kanapaq? Willakaramï.

¹³ Jina Diospa Gobiernumpita alli willakïkunata yachatsikunqantsikmi yanapamäshun mas valienti kanapaq. Porqui yachatsikunqantsikqa Jehoväman mas confiakunapaq y nunakunata mana mantsanapaqmi yanapamantsik (Prov. 29:25). Imanömi fïsicata ruranqantsik kallpayoq kanapaq yanapamantsik, tsënöllam wayin wayin, cällikunachö y rantikuyanqan sitiukunachö Diospita yachatsikunqantsikqa mas valoryoq kanapaq yanapamantsik. Kananllapitana mana mantsakushpa yachatsikurninqa, gobiernukuna michämashqapis yachatsikurllam sïguishun (1 Tes. 2:1, 2).

14, 15. ¿Imatataq Nancy y Valentïna panintsikkunapita yachakuntsik?

¹⁴ Ishkaq panikuna valienti kayanqampitam yachakïta puëdintsik, pëkunaqa mana jaqipam Jehoväta sirwiyarqan. Juk kaq paniqa Nancy  Yuen jutiyoqmi, pëqa takshalla këkarpis valientim karqan. e Diospita yachatsikur sïguiptinmi 20 watapa Chïna nacionchö carcelararqan. Gobiernupaq trabajaq guardiakunam niyarqan, mana wiyakoq warmi kanqanta.

¹⁵ Juknin kaq panipa jutinqa Valentïna Garnovskayam karqan. Union Soviëtica nir reqiyanqan nacionkunachömi kima kutipa prësuyarqan, tsë llapanta yupashqaqa 21 watakunam prësurarqan. f Imëpis Diospita yachatsikunampaqmi decidishqa karqan, tsërëkurmi autoridäkunaqa niyarqan alläpa peligrösa warmi kanqanta. ¿Imanirtaq kë panintsikkunaqa valienti kayarqan y Jehoväpita yachatsikïta jaqiyarqantsu? Porqui Jehovä yanapanampaq kaqmanmi chipyëpa confiakuyarqan.

16. ¿Imanirtaq valienti kantsik?

¹⁶ Rikanqantsiknöpis valienti kanqantsikqa manam kallpantsikpitatsu ni yachanqantsikpitatsu, sinöqa Jehovä yanapamanqantsikpitam. Tsëmi noqantsikwan Jehovä imëpis këkanqanman confiakunantsik (Deut. 1:29, 30; Zac. 4:6).

17, 18. Juan 15:18-21 textu ninqannö, ¿ima pasamänapaq kaqtataq Jesusqa nirqan y imanir?

¹⁷ Llapantsikmi munantsik wakinkuna respetamänata, peru mana respetamashqaqa ama pensashuntsu imapaqpis mana välinqantsikta. Jesusmi kënö nirqan: “Kushishqam qamkuna kayanki, nunapa Tsurinrëkur nunakuna chikiyäshuptiki, qarquyäshuptiki, ashayäshuptiki y jutikikunapaq alläpa mana allita parlayaptin” (Lüc. 6:22). Tsënö nirqa, ¿ima nitataq munëkarqan?

¹⁸ Jesus tsënö nirqa manam nunakuna chikimänata gustamanqantsiktatsu nikarqan, sinöqa imë karpis tsë pasakunampaq kaqta musyarmi tsënö nirqan. Nunakunaqa, pëkunanö mana kashqa y Jesus mandakunqannö nunakunata yachatsishqam chikimantsik (leyi Juan 15:18-21). Nunakuna chikimashqapis Jehovä munanqannömi kawëta munantsik.

19. Apostolkuna rurayanqannölla, ¿imatataq noqantsikpis ruranantsik?

 ¹⁹ Ama nunakuna chikimashqaqa Jehoväpa testïgun kanqantsikpita penqakushuntsu (Miq. 4:5). Jerusalenchö Jesuspa apostolninkuna rurayanqanmi yanapamäshun, nunakunata mantsëta vencinapaq. Jesus wanuriptinllam pëkunataqa pushakoq religiösukuna alläpa chikiyarqan (Hëch. 5:17, 18, 27, 28). Tsënö kaptimpis cada junaqmi templuta ëwayaq y Diospita yachatsikurninmi Jesuspa discïpulunkuna kayanqanta rikätsikuyaq (Hëch. 5:42). Jina manam permitiyarqantsu nunakunata mantsë venciyänanta. Noqantsikpis nunakunata mantsëta vencinapaqqa trabäjuntsikchö, escuëlachö y täranqantsik sitiukunachömi Jehoväpa testïgun kanqantsikta rikätsikunantsik (Hëch. 4:29; Rom. 1:16).

20. Chikishqa këkarnimpis, ¿imanirtaq Jesuspa apostolninkunaqa kushishqa sientikuyarqan?

²⁰ Jehoväpa munëninta rurayanqanrëkur sufritsiyaptin y chikiyaptimpis, Jesuspa apostolninkunaqa kushishqam sientikuyarqan (Lüc. 6:23; Hëch. 5:41). Tsëpitanam apostol Pëdrupis kënö nirqan: “Alli kaqta rurayanqëkipita sufrirpis, kushishqam kayanki” (1 Pëd. 2:19-21; 3:14). Alli kaqta ruranqantsikrëkur chikimanqantsikta musyanqantsikqa, Diosta mana jaqipa sirwinapaqmi yanapamantsik.

21, 22. (1) ¿Imatataq ruranantsik chikishqa kanqantsik tiempu alli tsarakunapaq? (2) ¿Imapitataq qateqnin kaq yachatsikïchö yachakushun?

²¹ Manam musyantsiktsu imë chikir sufritsimänapaq kaqta ni yachatsikunqantsikta gobiernukuna imë michäkuyänampaq kaqta. Peru musyantsikmi kananllapitana alistakïta puëdinqantsikta. ¿Imanötaq alistakushwan? Jehoväman mas confiakurnin, mas valienti karnin y chikishqa kanqantsik tiempuchö imata ruranapaq kaqta alleq musyarninmi. Tsëta ruranqantsikmi shamoq tiempuchö alli tsarakunapaq yanapamäshun.

²² Peru Diospita yachatsikunqantsikta autoridäkuna michäkuyaptinqa, ¿imataraq rurashun? Qateqnin kaq yachatsikïchömi yachakushun, Diosta sirwir sïguinapaq Bibliapa consëjunkuna imanö yanapamänapaq kaqta.