1. ¿Imatataq Jehoväpa sirweqninkunaqa rurayashqa Jehoväwan amïgu kayanqanta valorarnin?

 JEHOVÄWAN amïgu kanqëkitaqa alläpachi valoranki. Qamnömi unëpita patsë mëtsikaq nunakuna Jehoväwan amïgu kayanqanta valorayashqa (Sal. 104:33, 34). Mëtsikaq nunakunam Jehoväta sirwiyänanrëkur imëkata rurayashqa. Tsëtam rurayarqan unë Israelchö nazareukunapis. Peru ¿pikunatan kayarqan nazareukunaqa, y imatataq pëkunapita yachakuntsik?

2. (1) ¿Pikunatan nazareukuna kayarqan? (Nümerus 6:1, 2). (2) ¿Imanirtan israelïtakunaqa nazareu kayänampaq änikuyaq?

² Nazareu palabraqa hebreu idiömachö “akrashqa” o “rakishqa” ninanmi. Jehoväta kuyaq israelïtakunaqa, imëkatapis dejëkurmi Jehoväta maslla sirwita puëdiyaq. Moises qellqanqan Leychömi willakoq, warmi kar o ollqu karpis Jehoväta maslla sirwita munarqa, nazareunö juk tiempupa sirwinampaq änikuyta puëdinqanta (leyi Nümerus 6:1, 2, nöta). a Nazareukunaqa pëkunapaq Diosnintsik churanqan leykunatam cumpliyänan karqan. Tsëqa, ¿imanirtan juk israelïta nazareu këta munaq? Capazchi Jehoväta alläpa kuyarnin y bendicionkunata chaskinqampita alläpa agradecikurnin (Deut. 6:5; 16:17).

3. ¿Imachötan nazareukunanö kantsik?

³ Peru musyanqantsiknöpis cristiänukunaqa manam  Moises qellqanqan Ley ninqannönatsu kawantsik, tsëpa rantinqa Cristupa leynin mandakunqannönam. Tsëmi Jehovä Diostaqa nazareunö sirwita puëdintsiknatsu (Gäl. 6:2; Rom. 10:4). Tsënö kaptimpis, nazareukunanömi Jehovä Diosnintsikta llapan shonquntsikwan, kawënintsikwan, pensënintsikwan y kallpantsikwan sirwita munantsik (Mar. 12:30). Tsënö sirwinantsikpaqmi änikurquntsik Jehovällatana sirwinapaq änikunqantsikchö. Tsë änikunqantsikta cumplinapaqqa, imëkata rurëta munanqantsikta dejëkurpis Jehovä munanqanllatanam ruranantsik. Këchö yachakurishun änikuyanqanta nazareukuna imanö cumpliyanqanta y noqantsiktapis änikunqantsikta cumplinapaq imanö yanapamanqantsikta (Mat. 16:24). b

GUSTAMANQANTSIKKUNATA DEJËKUR JEHOVÄTA SIRWISHUN

4. Nümerus 6:3 y 4 ninqannö, ¿imakunatataq nazareukunaqa rurayaqtsu?

⁴ (Leyi Nümerus 6:3, 4). Nazareukunaqa manam alcoholta, üvasta ni päsaskunata mikuyta puëdiyaqtsu. Peru wakin israelïtakunaqa tsëkunata mikuyta puëdiyaqmi y allillam kaq. Bibliachömi nin, vïnuqa Diospa qarënin kanqanta y nunapa shonqunta kushitsinqanta (Sal. 104:14, 15). Tsënö këkaptimpis, nazareukunaqa Jehovä Diosta maslla sirwita munarmi, tsëkunata mikuyta gustëkarpis mana mikuyänampaq decidiyaq. c

5. ¿Imatataq rurayarqan Madianwan Marcëla, y imanirtan tsëta rurayarqan?

⁵ Noqantsikpis nazareukunanömi, gustamanqantsikkunata dejëkur Jehoväta sirwintsik. Parlarishun Colombia nacionpita Madianpaq y warmin Marcëlapaq. Pëkunaqa, Madian atska qellëta ganaptinmi, juk shumaq wayichö täkuyarqan. Peru Jehoväta maslla sirwita munarmi, alli kawakuyanqanchö cambiukunata rurayarqan. Kënömi willakuyan: “Mas pöcullata gastayänäpaqmi decidiyarqä, juk takshalla wayimanmi täkoq ëwakuyarqä y cärrükunatapis rantikuykuyarqämi”. Madianwan Marcëlaqa tsëta rurayarqan Jehovä Diosnintsikpita maslla yachatsikuyta munarmi. Tsëta rurayanqampitaqa, kushishqam këkäyan.

6. ¿Imakunatataq rurantsik Jehovä Diosnintsikta maslla sirwita munarnin? (Rikäri dibüjuta).

⁶ Jehovä Diosnintsikpaq masta rurëta munarmi imata munanqantsiktapis o  kuyanqantsikkunatapis dejarintsik (1 Cor. 9:3-6). Tsëkunata dejanapaqqa manam Jehovä obligamantsiktsu, y manam mana alli kaptintsu imatapis dejarintsik. Wakinkunaqa shumaq wayinkunata y alli trabäjunkunatam dejariyan o hasta animalkunata kuyëkarpis manam wätayannatsu. Wakinkunanam juk tiempupa soltërullaraq kayänampaq o casakurirpis wamrannaqllaraq kayänampaq decidiyashqa, o familiankunata y amïgunkunata llakikarpis, juk markakunaman yanapakoq ëwakuyashqa. Tsëtaqa rurantsik Jehovä Diosnintsikta maslla sirwita munarmi. Ichikllata o atskata rurashqapis, Jehovä Diosnintsikqa alläpam kushikun (Heb. 6:10).

WAKINKUNAPITA JUKLÄYA KANANTSIKPAQ KALLPACHAKUSHUN

7. ¿Imanirtan nazareukunapaqqa änikuyanqanta cumpliyänan sasa o aja karqan? (Nümerus 6:5; rikäri dibüjuta).

⁷ (Leyi Nümerus 6:5). Nazareukunaqa manam aqtsankunata rutukuyaqtsu. Tsëwanmi rikätsikuyaq Diosnintsikta alläpa respetayanqanta. Y atska tiempupa nazareu kaptinqa aqtsanmi jatun winaq, tsëwanmi israelïtakuna musyayaq nazareu kanqanta. Nazareu kanqanta valorayaptinqa, änikunqanta cumplinan fäcil-llam karqan. Peru höraqa manam israelïtakuna respetayaqtsu ni valorayaqtsu. Tsëmi pasakurqan Diospa willakoqnin Amos kawanqan witsan. Diospa contran churakashqa israelïtakunam nazareukunata “vïnuta” amälas uputsiyaq, capazchi tsënöqa rurayaq änikunqanta cumplinanta mana munar (Amos 2:12). Y höra höraqa, nazareukunapaq änikuyanqanta cumplinan mas sasa o ajaran karqan, tsëmi valienti kayänan karqan.

8. Benjaminta pasanqampitaqa, ¿imatan mas gustashunki?

⁸ Mantsapakurpis, Jehovä Diosnintsik yanapamashqam wakinkunapita jukläya këta puëdintsik. Noruëga nacionpita 10 watayoq Benjaminta pasanqanta rikärishun. Escuëlanchömi Ucraniachö nunakunata guërrachö yanapëkäyanqanta rikätsikurnin, Ucraniapa bandëran colorta vistikurkur wamrakuna cantayarqan. Benjaminqa karullachömi quedakurqan, peru profesöranmi kënö qayarqan: “¡Jinan höra këman shamuy! ¡Qamtam shuyarëkäyaq!”. Benjaminqa valorta tsarirkurmi profesöranta entienditsirqan Testïgukunaqa polïtica asuntuman mana mëtikunqantsikta,  y guërrakunachö mana yanapakuyanqampita wakin Testïgukuna carcelchö këkäyanqanta. Tsëmi profesöranqa imapis nirqannatsu. Peru estudiaq mayinkunam kënö niyarqan: “¿Imanirtan qamqa noqakunawan cantankitsu?”. Tsënö niyaptinmi Benjaminqa mantsakarnin waqaritapis munarqan, peru valorta tsarirmi profesörantanölla entienditsirqan. Y wayinman kutirirnam papäninta willarqan creencianta defendinampaq Jehovä imanö yanapashqa kanqanta.

9. ¿Imanötan Jehovä Diosnintsikta kushitsishwan?

⁹ Jehovä mandakunqankunata cäsukushqaqa, jukläya kanqantsiktam nunakuna cuentata qokuyan. Trabäjuchöpis o escuëlachöpis Jehoväpa testïgun kanqantsikta willakunapaqqa valientim kanantsik. Kë munduchö nunakunaqa mana allikunatam rurayan y mana allim portakuyan. Tsëmi Jehovä mandakunqankunata cäsukunan y Gobiernumpita yachatsikunanqa fäciltsu kanqa (2 Tim. 1:8; 3:13). Peru ama qonqashuntsu, wakinkunapita jukläya kanapaq kallpachakushqaqa, Jehoväqa alläpam kushikunqa (Prov. 27:11; Mal. 3:18).

JEHOVÄ DIOSNINTSIKTA PUNTAMAN CHURASHUN

10. ¿Imanirtan nazareukunapaqqa Nümerus 6:6 y 7 ninqanta cumpliyänan fäciltsu karqan?

¹⁰ (Leyi Nümerus 6:6, 7). Nazareukunaqa manam aya lädunman witita puëdiyaqtsu. Capaz pensashwan tsëta cumplinanqa fäcil-lla kanqanta. Peru familiankuna wanukuptinqa manam tsëta cumpliyänanqa fäciltsu karqan. Tsë witsanchöqa, costumbrinkuna kaptinmi juk nuna wanuptinqa, aya lädunchö kayaq (Juan 19:39, 40; Hëch. 9:36-40). Peru nazareukunaqa manam tsë costumbrita qatita puëdiyaqtsu. Familiankuna wanukuptin Diosnintsikta äniyanqanta cumpleq nazareukunaqa, Jehovämanmi alläpa confiakuyaq. Y Jehovämi tsë hörakunachö alli tsarakuyänampaq yanapaq.

11. Familiantsikta kuyarpis, ¿pï mandakunqantataq mas puntaman churashwan? (Rikäri dibüjuta).

¹¹ Noqantsikpis Jehovällatana sirwinantsikpaq änikunqantsiktaqa alläpam valorantsik. Tsëtaqa rikätsikuntsik imatapis decidinqantsikwan y familiantsikkunata imanö tratanqantsikwanmi. Familiantsiktaqa llapan puëdinqantsikmannömi yanapantsik, peru Jehovä mandakunqampa  contran imatapis ruranapaq nimashqaqa manam rurantsiktsu (Mat. 10:35-37; 1 Tim. 5:8). Höraqa Jehovä mandakunqankunata cäsukunqantsikrëkurmi familiantsikkunawampis llakitsinakurintsik.

12. Familianchö problëma kaptin, ¿imatataq Alexandru rurarqan, y imatataq rurarqantsu?

¹² Alexandrutawan warmin Dorïnata pasanqampaq parlarishun. Pëkunaqa juk watapam Bibliata estudiayarqan, peru tsëpitam Dorïnaqa estudiëta dejarirqan y Alexandrutapis estudiëta dejanampaqmi nirqan. Alexandru shumaq entienditsiptimpis manam munarqantsu y estudiëta dejanampaqmi Alexandruta obligaq. Warminta entiendinanqa manam fäciltsu karqan. Dorïnaqa, höraqa imëkatam qayapaq y mana allim trataq, tsëmi höraqa Biblia estudiëta dejarita pensarqan. Tsënö karpis, Jehoväta mas puntaman churarmi warmintaqa kuyëpa y respëtuwan tratarqan. Tsënö trataptinmi warmin Dorïnaqa Bibliata yapë estudiar qallëkurqan. Rikäri Alexandru y Dorïna Vacar: “Kuyakoqqa pacienciakoqmi y ankupäkoqmi” neq videuta. Tsëpaqqa yëkuri jw.org päginachö “Rurayämunqäkuna”, “Videukuna”, “Imakunapa pasayanqanta willakuyanqan” y “Rasumpa kaqta yachakurqa nunakuna cambiayanmi” neqman.

13. ¿Imanötan rikätsikushwan Jehoväta y familiantsikta kuyanqantsikta?

¹³ Jehovämi familia kanampaq patsätsirqan y kushishqa kawakunatam munan (Efes. 3:14, 15). Rasumpa kushishqa këta munarqa, Jehovä mandakunqannömi imatapis ruranantsik. Pëqa alläpam valoran pëta sirwinantsikpaq ruranqantsikkunata y familiantsikta cuidanqantsikta, kuyanqantsikta y respetanqantsikta (Rom. 12:10).

NAZAREUKUNANÖ KANAPAQ YANAPANAKUSHUN

14. ¿Pikunatataq masqa animashwan?

¹⁴ Kanampis, Jehoväta kuyarninmi, mana fäcil kaptimpis ima rurëllachöpis yanapakuyta munantsik. ¿Imanötan Jehoväta sirwikaqkunata animashwan? Shumaq parlaparninmi (Job 16:5). Animashun Jehoväta maslla sirwiyänampaq tiempunkunata patsëkätseqkunata, estudiaq mayinkuna burlakuyaptimpis jukläya kayänampaq kallpachakuykaq jövinkunata, familiankuna chikikäyaptimpis Biblia ninqanta cäsukoq wawqi panikunata o Bibliata  estudiëkaqkunata. Imëka mana allikunapa pasarpis, Jehoväta kuyarnin alli tsarakuyanqanta valoranqantsikta shumaq parlapärinapaq alkäbu këkäshun (Filem. 4, 5, 7).

15. ¿Imanötan wakinkunaqa llapan tiempunkunawan yanapakoqkunata yanapayan?

¹⁵ Allim kanman llapan tiempunkunawan yanapakoqkunata imallawampis yanaparinqantsik (Prov. 19:17; Heb. 13:16). Tsëtam Sri Lankapita juk edäna pani rurarqan. Pensionninta maslla pagayaptinmi, pishipakuykaq shipash precursörakunata qellëwan yanaparqan cada killa telëfunupita pagakuyänampaq, tsënöpam precursöra sïguiyarqan. Tsëta ruranqanqa, ¡alläpa shumaqmi karqan!

16. ¿Imatataq nazareukunapita yachakuntsik?

¹⁶ Nazareukunapitaqa, ¡imëkatam yachakurquntsik! Tsënöllam kuyakoq Teytantsik Jehoväpitapis yachakurquntsik. Pëqa musyanmi llapan shonquntsikwan sirwinqantsikta y äninqantsikta cumplinantsikrëkur imëkata ruranqantsikta. Y sirwinqantsiktaqa kushishqam chaskimantsik, tsëta musyarmi alläpa kushikuntsik (Prov. 23:15, 16; Mar. 10:28-30; 1 Juan 4:19). Nazareukunapita yachakunqantsikwanmi cuentata qokuntsik sirwinantsikpaq imëkata ruranqantsiktaqa Jehovä alläpa valoranqanta. Tsënö këkaptinqa, llapan shonquntsikwan Jehovä Diosnintsikta sirwishun.