1. ¿Imatataq Jehoväta sirweqkunaqa rurayan?

 BIBLIACHÖQA, Jesus dirigiptin kikinkuna munar Jehoväta mëtsikaq nunakuna sirwiyänampaq kaqtam unëpitana nirqan (Sal. 110:3). Kanan witsanmi tsënö ninqanqa cumplikëkan. Diosta sirweqkunaqa, llapan watakunam mëtsika millon hörakuna Diospita kushishqa yachatsikuyan ëkatapis mana cobrakushpa. Y wawqi paninkunata këkunachö yanapayänampaqmi tiempunkunata patsätsiyan: wanayanqanta tariyänampaq, shumaq parlapäyänampaq y Diosman mas confiakuyänampaq. Jina creikoqkunata rikaqkuna y yanapaqninkunam, reunionkunachö yachatsikuyänampaq preparakur y wawqi paninkunata watukarnin mëtsika hörakuna kayan. ¿Imarëkurtan tsë llapanta rurayan? Jehoväta y nuna mayinkunata kuyarmi (Mat. 22:37-39).

2. Romänus 15:1 a 3 ninqannöpis, ¿imatataq Jesuspita yachakuntsik?

² Jesusqa, wakinkunapa biennintam mas puntaman churarqan y noqantsikpis tsënölla ruranapaqmi kallpachakuntsik (leyi Romänus 15:1-3). Pënö rurarqa, kushishqam kashun. Jesusmi kënö nirqan: “Imatapis qokïmi imata chaskipitapis mas kushikïtaqa apamun” (Hëch. 20:35).

3. ¿Imatataq këchö yachakushun?

³ Këchöqa, nunakunata yanapananrëkur Jesus imata ruranqanta y pënölla wakinkunata yanapanapaq imata ruranapaq kaqtam rikäshun. Jina wakinkunata sirwinapaq imata ruranapaq kaqtam yachakushun.

4. ¿Imanötan Jesusqa wakinkunapa bienninta mas puntaman churanqanta rikätsikurqan?

⁴ Jesusqa utishqa o pishipashqa këkarpis wakinkunata yanaparqanmi. Itsapis Capernaum markapa amänun jirkapa ladëranchö këkaptin, pëman ëwaq mëtsikaq nunakunata rikar imata ruranqanman pensarishun. Diosman entëru paqas mañakushqa karchi, Jesusqa utishqa këkarqan. Peru tsë nunakunachö waktsakunata y qeshyëkaqkunata rikarmi alläpa llakiparqan. Qeshyëkaqkunatam alliyätsirqan y Diospitam yachatsirqan. Tsëpin yachatsikunqantam jirkapita yachatsikunqan nir reqintsik (Lüc. 6:12-20).

5. ¿Imatataq familiankunata dirigeqkuna rurayan utishqa o pishipashqa këkarpis Jesusnölla rurayänampaq?

⁵ Familiankunata dirigeqkunaqa, ¿imanötan Jesus ruranqannölla rurayan? Këman pensarishun: entëru junaq trabajarir juk teyta utishqa o pishipashqa wayinman chärinman. Tsë paqasqa, familianwanmi Diospita yachakuyänan, peru utishqa këkarmi juk junaqna yachakuyänampaq patsätsita munan. Tsënö kaptimpis, familianwan estudiayänampaqmi Jehoväta kallpata mañakun y Jehoväqa juk semänakunachönölla yachakuyänampaqmi yanapan. Tsë paqasqa, Jehoväpita yachakuyta mas puntaman teytankuna churayanqantam, wamrankuna yachakuyan.

6. Rurëta munanqanta juk kuchuman churarir juk kutichö nunakunata Jesus imanö yanapanqanta willakaramuy.

⁶ Jesusqa nunakunata atiendinampaqmi listu këkarqan. Këllaman pensarishun: amïgun bautizakoq Juanta wanutsishqa o wañutsishqa kayanqanta musyarirmi, Jesusqa alläpa llakishqa këkarqan. Bibliachömi kënö nin: “Tsëta wiyëkurnam Jesusqa japallan këta munarnin barcuman lloqarkur tsunyaq sitiuta ëwakurqan” (Mat. 14:10-13). Wakin nunakunanöchi alläpa llakikurnin, japallan këta munarqan. Peru tsë sitiuchö mëtsikaq nunakuna shuyarëkäyaptinmi, tsëta rurëtaqa puëdirqantsu. Tsëqa, ¿imatataq rurarqan? Tsë nunakunatam “alläpa ankuparqan” y wanayanqankunamanmi yarpachakurqan. Jesusqa, tsë nunakuna Diospita yachakuyta wanayanqantam rikarqan, tsëmi  ‘imëkata yachatsirnin qallëkurqan’ (Mar. 6:31-34; Lüc. 9:10, 11).

7, 8. Juknöpaqa, ¿imanötan creikoqkunata rikaqkuna wawqi paninkunata Jesusnölla yanapayan?

⁷ Creikoqkunata rikaq kuyakoq wawqikunaqa, ¿imanötan Jesus ruranqannölla rurayan? ¿Agradecikuntsikku noqantsikrëkur creikoqkunata rikaqkuna imëkata rurayanqampita? Mëtsikaqmi, imëkata rurayanqanta musyantsiktsu. Hospitalkunachö Yawarta mana Churamänapaq yanapakoq wawqikunallaman pensarishun. Pëkunaqa, pullan paqasna këkaptimpis wawqi paninkunata yanapayänampaqmi jinan höra sharkuyan. Llakipäkoq karmi, tsë kuyakoq wawqikuna y familiankunaqa, wawqi paninkunapa bienninkunata mas puntaman churayan.

⁸ Jina creikoqkunata rikaqkunaqa, Diosta adoranapaq y yachatsikunapaq wayikunata rurëchö y desgraciakuna pasakunqanchömi yanapakuyan. Reunionkunachö yachatsikur, wawqi paninkunata yanapar y shumaq parlaparpis mëtsika hörakunam kayan. Creikoqkunata rikaqkunata y familiankunatam, llapan shonquntsikwan agradecikunantsik. Tsëkunata rurayanqampita Jehovä yanapëkunantam munantsik. Pëkunapis, wakin wawqi panikunanöllam imakunata puntaman churayänampaq alli rikäyänan, y manam rurëninkunarëkur familiankunata qonqëkuyanmantsu.

9. Filipensis 2:4 y 5 ninqannö, ¿wawqi panintsikkunata imanö rikänapaqtan kallpachakushwan?

⁹ (Leyi Filipensis 2:4, 5). Creikoqkunata rikaqkuna mana karpis, llapantsikmi Jesus ruranqannölla jukkunapa bienninkunata  mas puntaman churanapaq yachakunantsik. Bibliachömi ‘sirwipakoqnö’ këman chanqanta Jesuspaq nin (Filip. 2:7). Bibliachö tsënö ninqampitaqa, ¿imatataq yachakuntsik? Sirwipakoqkunaqa patronninkuna kushishqa kayänantam procurayan. Jehoväpa y wawqi panintsikkunapa sirweqninkuna kashqam, pëkuna alli kayänampaq imatapis mas alli rurëta munantsik. ¿Imanötan tsëta lograshwan? Juk consëjukunata rikärishun.

10. ¿Ima tapukuykunamantan yarpachakushwan?

¹⁰ Imanö kanqëkiman pensë. Kë tapukuykunaman yarpachakuy: “¿Listuku këkä wakinkunapa bienninta puntaman churanäpaq? Edäna wawqita watukanäpaq o edäna panita reunionkunaman apanäpaq niyämaptinqa, ¿imatataq nï? ¿Jinan höraku änikü asamblëakuna rurakänan localta pitsapakunäpaq o Diospita Yachatsikuna Wayita altsapakunäpaq?”. Jehovällatana sirwinapaq änikurqa llapan kapamanqantsikwan, rurëta yachanqantsikwan, tiempuntsikwan y maskunawan tsëta ruranapaqmi änikurqantsik. Tsëmi Pëqa alläpa kushikun, imatapis mana shuyarashpa tsëkunawan wakinkunata yanapanqantsikpita. Peru tsëta rurëchö imallachöpis alliyänantsikta rikarqa, ¿imatataq rurashwan?

11. ¿Imanötan wakinkunapa bienninta puntaman churanapaq Diosman mañakunqantsik yanapamantsik?

¹¹ Llapan shonquykiwan Jehoväta mañakuy. Imallachöpis pishipëkanqëkita rikarnin, alliyänëkipaq mana gänasniki kaptinqa, Jehoväman llapan shonquykiwan mañakuy. Rasumpa kaqta willë, imanö këkanqëkita willë y rurëta munanëkipaq y ruranëkipaq kallpata qoshunëkipaq mañakuy (Filip. 2:13).

12. Bautizakushqa jövinkunaqa, ¿imanötan Diosta sirweqkunachö yanapakuyta puëdiyan?

¹² ¿Jövinllaraq y bautizakushqa wawqiku kanki? Tsëqa, congregacionchö mas yanapakunëkipaq munënikita Jehovä yuritsinampaq mañakuy. Wakin congregacionkunachöqa, creikoqkunata rikaqkunam creikoqkunata rikaqkunata yanapaqkunapitapis mas atska kayan, y wakinqa edänam kayan. Jehoväta sirweqkunaqa masmi mirëkantsik, tsëmi wawqi panikunata cuidëchö creikoqkunata rikaqkunata yanapayänampaq jövinkuna pishin. Imachö o mëchöpis yanapakunëkipaq listu këkarqa, Jehovä munanqanta rurarmi kushishqa kanki, wakinkunata yanapanëkipaq listu këkaqtanömi reqiyäshunki y tsëta rurarmi kushishqa kanki.

13, 14. ¿Imatataq rurashwan wawqi panintsikkunata yanapanapaq? (Jana qaranchö këkaq dibüjuta rikäri).

¹³ Wakinkuna imata wanayanqanta rikë. Hebreu cristiänukunaman cartakurmi, apostol Pablu kënö qellqarqan: “Ama qonqayëtsu alli kaqta rurëta y kayäpushunqëkita wakinkunata rakipëta, porqui tsënö ofrendakunaqa alläpam Diosta kushitsin” (Heb. 13:16). Tsë consëjuqa, ¡alläpam yanapakurqan! Tsë cartata chaskiyanqampita ichik tiempu pasarinqanllachömi, Judëa markachö këkaq cristiänukunaqa wayinkunata, negociunkunata y mana cristiänu kaq familiankunata dejarir jirkakunapa qeshpir ëwakuyarqan (Mat. 24:16). Tsë witsanqa, juknin jukninmi yanapanakuyänan karqan. Kayäpunqanta rakipänakuyänampaq kaqta nir Pablu cartakunqan witsan wiyakushqa karqa, mas fäcilchi karqan juk läduchöpis tsëta rurar sïguiyänampaq.

¹⁴ Itsa wawqi panintsikkunaqa imata wanayanqanta nimäshuntsu. Juk wawqintsik viudu tikrarinqanman pensarishun. ¿Wanantsuraq cocinapäyänanta, juk läduman apayänanta o wayinchö rurapakuykunawan  yanapayänanta? Itsa pitapis mana afanatsita munar willakuyta munantsu. Peru alläpachi kushikunman, imallachöpis yanaparinapaq nishqaqa. Manam wakinkuna yanapayänampaq kaqman pensashwantsu ni yanapanapaq pë nimänataraq shuyarashwantsu. Kënö tapukushun: “Pasanqan desgracia noqata pasëkamaptinqa, ¿imachö yanapayämänantaraq wanäman?”.

15. Wakinkunata yanapëta munarqa, ¿imatataq ruranantsik?

¹⁵ Yachanëpaq nuna kë. Congregacionnintsikchöqa, wakinkunata yanapëta munaq wawqi panikuna kanchi. Pëkunaqa, manam afanëkätsinqantsiktanötsu rikäyan. Tsëpa rantinqa, yanapamänapaq listu këkäyanqantam musyantsik y pëkunanö këtam munantsik. 45 watayoqna creikoqkunata rikaqkuna wawqi Älanmi, mas yachanëpaq kanampaq churapakashqa. Jesus ruranqanman pensëkurmi kënö nin: “Imëka rurëyoq kaptimpis, nunakunaqa Jesuswan juntu këtam munayaq y yanapayänampaq mañakuyaptin pë yanapanampaq kaqtam següru kayaq. Pëkunapaq rasumpa yarpachakunqantam musyayaq. Imapitapis masqa, Jesusnö këta y wakinkuna yachanëpaqtanö, kuyakoqtanö y pëkunaman yarpachakoqtanö rikäyämänantam munä”.

16. ¿Imanötan Salmus 119:59 y 60 ninqan Jesus ruranqannölla ruranapaq yanapamantsik?

¹⁶ Jesusnö llapanchö alli këta mana puëdirqa, manam llakikushwantsu (Sant. 3:2). Yarpäshun, estudiaq jövinqa manam profesornimpita mas yachaq këta puëdintsu. Tsënö karpis, pantanqankunapita yachakur y profesorninnö kanampaq kallpachakurqa masmi alliyanqa. Tsënöllam noqantsikpis, Bibliachö estudianqantsiknö rurar y pantanqantsikkunapita alliyänapaq kallpachakurqa,  Jesus ruranqannölla rurashun (leyi Salmus 119:59, 60).

17, 18. ¿Imachötan yanapamäshun wakinkunapa bienninta mas puntaman churanqantsikqa?

¹⁷ Creikoqkunata rikaq Tim jutiyoq wawqim kënö nin: “Congregacionnïkunachöqa, wakinkunata yanapayänampaq listu këkaq wawqi panikunata rikäyanqampita y pëkunanö kayänampaq kallpachakuyanqampitam, mëtsikaq jövinkuna creikoqkunata rikaqkunapa yanapaqnin këman chäyashqa. Congregacionchö wawqi panikunata yanapayanqanmi, creikoqkunata rikaqkunata yanapan”.

¹⁸ Kë munduchöqa, kikinkunallaman pensaq nunakunam kayan, peru Jehoväta sirweqkunaqa jukläya nunakunam kantsik. Wakinkunata yanapanampaq listu këkanqampitam, Jesusta kuyantsik y pënö kanapaq kallpachakunantsikpaqmi churapakarquntsik. Manam llapanchötsu pë ruranqannö rurashun, peru pë ruranqankunata ‘shumaq y alli qatitaqa’ puëdintsikmi (1 Pëd. 2:21). Jesusnölla wakinkunapa bienninta mas puntaman churashqaqa, Jehoväpa rikëninchö allita rurëkanqantsikpitam kushikushun.