1. ¿Imanirtaq Davidqa Jehoväta alabarqan?

 REY Davidmi kënö escribirqan: “Jehoväqa alläpa puëdeqmi tsëmi pëqa alabashqa kanan” (Sal. 145:3). Davidqa Jehoväta kuyaqmi, tsëmi congregacionchö alabanampaq yanaparqan (Sal. 22:22; 40:5). Noqantsikpis Jehovätaqa kuyantsikmi, tsëmi David kënö ninqanwanqa acuerdu këkantsik: “Alabashqa kë Jehovä Diosllä, Israelpa Diosnin imëyaqpis alabashqa kë” (1 Crön. 29:10-13).

2. (1) ¿Imanötaq Jehoväta alabantsik? (2) ¿Imanirtaq wakin wawqikuna y panikunaqa parlakurita mantsayan y imatataq yachakushun?

² Kanan witsampis Jehovätaqa alabëta puëdintsik reunionkunachö parlakurninmi. Peru mëtsikaq wawqikuna y panikunam parlakurita munarpis mantsakurnin parlakuyantsu. ¿Imataq yanapanqa mana mantsakushpa parlakuyänampaq? ¿Ima consëjukunataq llapantsiktapis shumaq parlakurinantsikpaq yanapamäshun? Tsë tapukïkunapa respuestanta manaraq contestarmi, puntataqa yachakurishun reunionkunachö parlakunantsik imanir precisanqanta. Chuskullata rikärishun.

3-5. (1) Hebrëus 13:15 textu ninqannö, ¿imanirtaq reunionkunachö parlakunantsik? (2) Reunionkunachö parlakunapaqqa, ¿yachaq kanantsiktaraqku Jehoväqa shuyaran?

³ Jehoväqa alabanantsiktam munan (Sal. 119:108). Reunionkunachö parlakunqantsikqa Jehoväta juk ofrendata qoy cuentam, y manam pipis noqantsikrëkur tsë ofrendata rurëta puëdintsu (leyi Hebrëus 13:15). ¿Wakinkuna parlakuyanqannö parlakunantsiktaku Jehoväqa shuyaran? Manam.

 ⁴ Jehoväqa musyanmi yachënintsikchö y tiempuntsikchö llapantsikpis igual-lla mana kanqantsikta, tsënö kaptimpis puëdinqantsikmannö parlakunapaq kallpachakunqantsiktaqa alläpam valoran. Rikärishun israelïtakuna qoyanqan ofrendakuna igual-lla mana kaptimpis Jehovä chaskinqanta. Tarita puëdeq kaqkunaqa achkasta o malta cabratam ofrendapaq qoyta puëdiyaq. Y mas waktsa kaqkunaqa juk kullkuta o llullu palumatam ofrendapaq qoyta puëdiyaq. Peru ishkë kullkukunapaq o ishkë llullu palumakunapaq mana tarirqa, tsëqa juk kïlupaq ichikllana pishikaq mas qochqun o mas ñuchun kaq harinatam ofrendapaq qoyaq. Y tsë ofrendakunatapis Jehoväqa chaskeqmi (Lev. 5:7, 11). Harina alläpa mana cuestaptimpis qochqu o ñuchu kaptinqa Jehoväqa valoraqmi tsë ofrendata.

⁵ Jehovä Diosnintsikqa unë witsanchönöllam kanampis reunionkunachö parlakunqantsikta chaskin, y pëqa manam shuyarantsu sirweqnin Apölus o apostol Pablunö alli parlakoq kanantsikta (Hëch. 18:24; 26:28). Peru sïqa munan llapan puëdinqantsikmannö y llapan shonquntsikwan parlakurinantsiktam. Juk kutim juk waktsa viuda ishkë mana alläpa väleq qellëta ofrendapaq qorqan. Peru Jehoväpaqqa alläpa väleqmi karqan, porqui llapan kapunqampitam ofrendapaq churarqan (Lüc. 21:1-4).

6. (1) Hebrëus 10:24, 25 textuchö ninqannöpis reunionchö parlakayämunqanqa, ¿imanötaq yanapamantsik? (2) ¿Imanötaq cristiänu mayintsikkuna parlakayämunqanta valoranqantsikta rikätsikushwan?

⁶ Reunionchö parlakunqantsiwanqa juknintsik juknintsikmi animanakuntsik (leyi Hebrëus 10:24, 25). Llapantsiktam gustamantsik reunionchö entiendipaqnölla parlakayämunqanta wiyëqa, y juk wamra parlakamuptinnäqa masran kushikuntsik. Jina alli preparakurnin yachakuyanqanta shumaq parlakayämuptinnäqa kushikuntsikmi. Parlanqantsik idiömata tsëllaraq yachakïkaqkuna parlakayämoqta wiyarqa alläpam valorantsik (1 Tes. 2:2). ¿Imanötaq parlakayämunqanta valoranqantsikta rikätsikushwan? Tsëtaqa rurëta puëdintsik reunion ushariptin, “shumaqmi parlakaramurqunki y alläpam animamashqa” nir felicitarninmi. Jina juknöpaqa yanapakuntsik, reunionkunachö noqantsikpis parlakurninmi.  Tsëtaqa manam noqantsikllatatsu yanapamäshun, sinöqa wakinkunatapis yanapanqam (Rom. 1:11, 12).

7. ¿Imanötaq reunionkunachö parlakunqantsik yanapamantsik?

⁷ Reunionchö parlakunqantsikqa kikintsiktam yanapamantsik (Is. 48:17). ¿Imanötaq yanapamantsik? Puntataqa, alli preparakunapaqmi yanapamantsik, tsënöpam Diospa palabranta mas yachakunapaq kallpachakushun y yachakunqantsikmannömi kawashun. Ishkë kaqchöqa, reunionkunaqa masmi gustamäshun. Y kima kaqqa, reunionkunachö parlakunqantsikqa yanapamantsik yachakunqantsikta mas yarpänapaqmi.

8, 9. (1) Malaquïas 3:16 textu ninqannö, ¿imanötaq Jehovä rikan reunionkunachö parlakunapaq kallpachakunqantsikta? (2) ¿Tsënö kaptimpis wakimpaqqa fäcilku reunionkunachö parlakuri?

⁸ Parlakurninqa Jehoväman confiakunqantsiktam rikätsikuntsik. Reunionkunachö parlakunapaq kallpachakunqantsiktaqa, Jehoväqa alläpam valoran y wiyanmi (leyi Malaquïas 3:16 b). Jina tsëta ruranqantsikpitam bendicimantsik (Mal. 3:10).

⁹ Tsëmi reunionkunachö parlakunantsikpaqqa valorta qomantsik. Peru tsënö kaptimpis wakinqa itsa mantsakuyanraq reunionkunachö parlakurita. Qampis tsënö sientikurninqa, ama yarpachakïtsu. Porqui Diospa unë sirweqninkunapita, Bibliachö consëjukunapita y mas yanapakïkunapitam yachakushun. Tsëmi reunionkunachö parlakunapaq yanapamäshun.

10. (1) ¿Imanötaq wakinqa sientikuyan parlakïta munayanqan höra? (2) ¿Imanirtaq nintsik reunionkunachö parlakurita mantsakunqantsikqa allipaq kanqanta?

¹⁰ Reunionchö parlëta munanqëki höra itsa alläpa mantsakunki. Peru manam qamllatsu  tsënö mantsakunki, llapantsikmi parlakurita munanqantsik höraqa tsënö sientikuntsik. Itsa tsënö sientikunki preparakunqëkita parlakunqëki höra qonqarinëkipaq kaqta o wakinkunanö alli parlakurita mana puëdinëkipaq kaqta pensarnin. Peru ama yarpachakïtsu, porqui tsënö sientikurqa humildi kanqëkita y wakinkuna qampita mas alli kayanqantam rikätsikïkanki. Y Jehoväqa alläpam kuyan humildi kaqkunata (Sal. 138:6; Filip. 2:3). Peru Jehoväqa munan reunionkunachö pëta alabanantsikta y wawqikunata y panikunata animanantsiktam (1 Tes. 5:11). Pëqa alläpam kuyashunki y reunionkunachö parlakunëkipaqmi yanapashunki.

11. ¿Bibliapa mëqan consëjunkunataq yanapamäshun reunionchö parlakïta mana mantsakunapaq?

¹¹ Bibliachö këkaq consëjukunapita yachakurishun. Parlanqantsik höra imallachöpis llapantsik pantarinqantsiktam Diospa palabranqa nimantsik (Sant. 3:2). Jehoväqa manam shuyarantsu imatapis mana pantashpa parlakunantsikta, ni manam wawqintsik y panintsikkunapis tsëtaqa shuyaräyantsu (Sal. 103:12-14). Porqui pëkunaqa familiantsiknömi kayan y kuyamantsikmi (Mar. 10:29, 30; Juan 13:35). Y entiendiyanmi parlakunqantsik höra munanqantsiknö mana yarqapakunqantsikta.

12, 13. ¿Imatataq yachakuntsik Nehemïaspita y Jonaspita?

¹² Diospa unë sirweqninkunata ima yanapanqampita yachakurishun. Puntataqa Nehemïaspita parlarishun. Pëqa, alläpa puëdeq reypa cortinchömi sirwirqan. Jerusalen markapa perqankuna raqällana kanqanta y punkunkuna ushakashqa këkanqanta musyarirmi alläpa llakikurqan (Neh. 1:1-4). Nehemïasqa, alläpachi mantsakarqan imanir llakishqa këkanqanta rey tapuriptin. Peru manaraq imatapis nirmi pëqa Jehoväman ras mañakurirqan. Tsëta ruranqampitam reyqa Jehoväpa markanta alläpa yanaparqan (Neh. 2:1-8). Nehemïaspitaqa yachakuntsik, imatapis manaraq parlarnin puntataqa Diosman mañakï alläpa precisanqantam. Kananqa Jonasta pasanqampita parlarishun. Nïnivi nunakunata willaq ëwanampaq Jehovä niptinmi, Jonasqa alläpa mantsakarnin juk markata escapakurqan (Jon. 1:1-3). Tsënö karpis Dios yanapaptinmi tsë chaskinqan carguta cumplirqan, y tsë markachö mëtsikaq nunakunatam yanaparqan (Jon. 3:5-10). Noqantsiktapis Jehoväqa Jonastanömi yanapamäshun pëta sirwirnin sïguinapaq. Peru wawqintsikkunata y panintsikkunataqa manam Nïnivi nunakunatanöqa mantsantsiktsu.

¹³ ¿Imataq yanapamäshun reunionkunachö parlakurinantsikpaq, y tsënöpa wawqintsikkunata y panintsikkunata animanapaq? Wakinllata rikärishun.

14. (1) ¿Imanirtaq reunionkunachö parlakurinapaq alli preparakunantsik? (2) ¿Y imëtaq mas alli kanman preparakunantsikpaq?

¹⁴ Reunionkunapaq alleq preparakushun.  Reunionkunachö parlakurinapaq alli preparakurqa, imata ninapaq kaqtam següru kashun (Prov. 21:5). Peru alli preparakunapaqqa manam llapantsikpaqtsu igual-lla tiempuntsikqa kan. Tsëtam kë ejemplukuna rikätsimantsik. 80 watayoq Eloise jutiyoq paniqa, qallanan semänakunallachömi Täpakoq revistanta preparakur qallan. Y kënömi nin: “Tsënö puntallapitana preparakurqa mas kushishqam reunion höra sientikü”. Joy jutiyoq paninam llapan tiempunwan trabajan. Y pëqa preparakun reunionkunapaq juk junaq pishïkaptinmi. Porqui tsëshi yanapan yachakunqanta mana qonqanampaq. Y Ike jutiyoq wawqiqa anciänu y precursormi. Pëmi kënö nin: “Noqapaqqa mas alliqa ichikllapa ichikllapa cada junaq preparakunqämi”.

15. ¿Imanötaq reunionkunapaq preparakunantsik?

¹⁵ ¿Imataq yanapamäshun alli preparakunapaq? Puntataqa Jehovätam mañakunantsik santu espïritunwan yanapamänapaq (Lüc. 11:13; 1 Juan 5:14). Tsëpitanam yachakunapaq kaqpita imata parlanqanta entiendita procuranantsik. Tsëpaqqa tïtulunta, subtïtulunta, fötukunata o dibüjukunata y recuadrukunatam alli rikänantsik. Tsëpitanam cada pärrafuta yachakushun y tsëchö këkaq textukunatapis leyishun. Tsënö preparakurirnam, yachakunqantsikpita mëqanta parlakurinantsikpaq kaqman pensanantsik. Alli preparakushqaqa masmi yarpäshun y parlakuritapis manam mantsakushunnatsu (2 Cor. 9:6).

16. ¿Ima yanapakïkunatataq Jehoväpa markan jorqamushqa, y imanötaq tsëkunata utilicëkantsik?

¹⁶ Jehoväpa markan jorqamunqan yanapakïkunata utilizäshun. Jehoväqa markanwanmi atska yanapakïkunata Internetchö jorqatsimushqa. Tablëtachö o celularchö karpis, JW Library^® nishqan aplicacionchömi reunionkunachö yachakunapaq publicacionkunataqa descarguëta puëdinki. Tsënöpam munanqantsik höra y më tsëchö këkarnimpis leyita o wiyëta puëdishun. Wakinqa tsë aplicacionta utilizäyan trabäjunkunachö o escuëlachö jamayanqan höra o viajëkarnin estudiayänampaqmi. Jina LLAPAN PUBLICACIONKUNA Watchtower^™ nishqan päginachöpis maslla yachakunapaqmi yanapamantsik.

17. (1) ¿Imanirtaq ishkë o masta parlakunapaq preparakunantsik? (2) Jehoväpa amïgun kë: Reunionchö parlakurinëkipaq alli preparakï nishqan videupita, ¿imatataq yachakurqunki?

¹⁷ Puëdirninqa ishkë o masta parlakurinantsikpaq alistashun. ¿Imanirtaq tsëta ruranantsik? Porqui höraqa makintsikta pallarishqapis manam parlakunapaq nimantsiktsu. Porqui itsa wakinkunapis makinkunata pallariyashqa o itsa tiempu kashqanatsu parlakurinantsikpaq. Tsëmi qallanan pärrafukunachö parlakurinapaq mana nimashqaqa, piñakunantsiktsu ni llakikunantsiktsu. Peru masta alistashqa karninqa, jukta mana nimashqapis wakin pärrafukunachöqa parlakurita puëdishunmi.  Jina puëdintsikmi tsëchö textukunata leyinapaq makintsikta pallaritapis. Y puëdirninqa entiendinqantsikmannö parlakunapaqmi alistakïta puëdintsik. c

18. ¿Imanirtaq wallka tiempullachö parlakunantsik?

¹⁸ Wallka tiempullachö parlakushun. Wallkallachö y entiendipaqnölla parlakurinqantsikmi masqa animakun. Tsëmi 30 segundus o mas wallkallachö parlakurita procuranantsik (Prov. 10:19; 15:23). Tsëchömi mas unëna Jehoväta sirweqkuna juk ejemplu kayänan. Atska minütupa y imëkapaq parlakuyaptinqa, wakinqa manam makinkunata pallariyanqanatsu. Itsa pensayanqa pëkunanö parlakurita mana puëdiyänampaq kaqta. Wallkallachö parlakushqaqa, wakinkunapis parlakurita puëdiyanqam. Cada pärrafuchö puntata parlakunantsikpaq nimashqaqa, respuestan kaqllatam contestanantsik y manam maskunataqa. Tsëpitaraqmi maskunapita parlakurita puëdintsik (rikäri “ Ima maskunapitataq parlakurita puëdintsik” neq recuadruta).

19. ¿Reunionchö parlakïta munarqa imatataq ruranantsik?

¹⁹ Mëqan pärrafuchö parlakurinapaq preparakurqa yachatsikamoqta willarishun. Tsëta ruranapaq decidirqa, reunion manaraq qallaptinmi yachatsikamoqta nirinantsik. Y preparakunqantsik pärrafuchöna këkarqa, yachatsikamoq rikämänapaqmi makintsikta raslla y altuta pallarinantsik.

20. ¿Imachötaq igualan reunionkuna y amïguntsikkunawan mikunapaq juntakanqantsik?

²⁰ Reunionkunaqa amïguntsikkunawan juk mikïta mikoq cuentam. Juk amïguntsik wayinchö mikunapaq imallatapis apanapaq nimashqaqa, ¿imataraq rurashun? Itsa yarpachakur qallëkushun, porqui munantsikmi gustayanqankunata apëta. Jina tsënöllam Jehoväpis reunionkunachö yachakunapaq alli yachatsikïkunata alistatsimushqa (Sal. 23:5; Mat. 24:45). Jehoväqa manam alläpataqa mañamantsiktsu, sinöqa puëdinqantsikmannö parlakunantsiktam munan. Tsëpaqqa puntallapitanam alleq preparakunantsik. Tsënöpam wakinkunatapis Dios alistatsimunqankunata shumaq yachakuyänampaq yanapakushun.