Bibliachö ninqanmi alli decidinapaq yanapamantsik

KICHË

Imatapis decidir concienciantsik nimanqantsikta o jukkuna pensayanqanllata cuentaman churarqa, manam musyashuntsu decidinqantsik allipaq o mana allipaq kanqanta. Bibliachömi willakun imanir tsënö pasanqanta. Kushishqa kanapaq y alli kawakunapaq imata ruranapaq kaqtapis willakunmi. Bibliachö ninqanmi alli decidinapaqpis yanapamantsik.

TEYTA DIOS DIRIGIMÄNATAM WANANTSIK

Bibliachömi Jehovä a Dios nimantsik pë dirigimänata wananqantsikta. Manam kikintsikllaqa vïdantsikta dirigita puëdintsiktsu (Jeremïas 10:23). Tsëmi Palabran Bibliaman alli consëjukunata qellqatsimushqa vïdantsikchö imatapis alli decidinapaq. Pëqa alläpa kuyamarnintsikmi sufrinantsikta ni llakikunantsikta munantsu, tsëmi alli decidinapaq yanapamantsik (Deuteronomiu 5:29; 1 Juan 4:8). Teyta Diosqa alläpa yachaq karnin y Kamamaqnintsik karninmi consejamantsik (Salmus 100:3; 104:24). Tsënö karpis, manam obligamantsiktsu pë munanqannö kawanapaq.

Jehoväqa Adantawan Ëvatam puntata kamarqan, y kushishqa kayänampaqmi imëkata rurarqan (Genesis 1:28, 29; 2:8, 15). Tsëpitanam imata mana rurayänampaq kaqta nirqan, y Jehoväqa cäsukuyänantam shuyararqan. Tsënö kaptimpis, imata rurayänampaq kaqtaqa kikinkunam decidiyänan karqan (Genesis 2:9, 16, 17). Jehoväta cäsukuyänampa rantinmi, Adanwan Ëvaqa kikinkuna munayanqannö kawakuyänampaq decidiyarqan (Genesis 3:6). Tsëpitam nunakunaqa pëkunapaq alli kanqanmannö imatapis decidiyan. Peru, ¿kushishqaku kayan decidiyanqanwan? Manam. Llapantsikmi rikantsik Teyta Diosta mana cäsukurqa, nunakuna yamë ni kushishqa mana kayanqanta (Eclesiastes 8:9).

Mëpita kashqapis o mëchö kawashqapis, Bibliachö ninqanqa alli decidinapaqmi llapantsikta yanapamantsik (2 Timoteu 3:16, 17; rikäri “ Llapan nunakunapaq libru” neq recuadruchö willakunqanta). Rikärishun Palabran Bibliawan Teyta Dios imanö yanapamanqantsikta.

¿Imanirtan nintsik Bibliaqa ‘Teyta Diospa palabran’ kanqanta? (1 Tesalonicensis 2:13). Tsëta musyanëkipaqqa, jw.org päginaman yëkurir ¿Pitaq Bibliata qellqatsirqan? neq videuta rikäri.

¿IMANIRTAN WAKINQA BIBLIAMAN CONFIAKUYANTSU?

Wakinkunam niyan imanö portakunapaq kaqta musyanapaqqa Biblia mana yanapakunqanta. Këkunarëkurmi tsënöqa pensayan:

Nunakuna niyanqan: “Bibliachö ninqanqa contranakunmi”.

Rasumpa kaq: Bibliachö willakunqan contranakoqnö kaptimpis, puntanchö y qepanchö ninqanta leyishqa, ima tiempuchö qellqayanqanta yarpashqa, tsë tiempuchö costumbrikunata, qellqaqkuna imata pensayanqanta y maskunata cuentaman churashqaqa manam contranakuntsu.

Tsënö kanqanta musyanëkipaqqa, jw.org päginaman yëkurir “¿Se contradice la Biblia?” neqchö willakunqanta leyi.

Nunakuna niyanqan: “Bibliata leyeq nunakunapis mana allim portakuyan. Tsëmi alli portakunapaq yanapamanqantsiktaqa creïtsu”.

Rasumpa kaq: Bibliachö consëjukunata mana cäsukurmi nunakunaqa mana alli portakuyan, manam Bibliachö tsënö portakuyänampaq niptintsu. Bibliachöqa unëpitanam willakurqan nunakuna y iglesiakunata dirigeqkunaqa, Bibliachö ninqanta musyarpis juknöpa portakuyänampaq kaqta. Pëkunapa culpanrëkur Bibliapaq “mana allita” parlayänampaq kaqtapis willakurqanmi (2 Pëdru 2:1, 2).

Iglesiakunata dirigeqkuna Bibliachö ninqanta mana cäsukuyanqanta musyanëkipaqqa, jw.org päginaman yëkurir “La religión, ¿un gran negocio?” neqchö willakunqanta leyi.

Nunakuna niyanqan: “Bibliata leyeqkunaqa manam pëkunapita jukläya kaqkunata respetayantsu”.

Rasumpa kaq: Bibliachöqa yachakuntsik llapankunata respetanapaqmi. Tsënö kaptimpis, këkunata rurëqa mana alli kanqantam willakun:

Jukkunapita mas alli kanqantsikta pensë (Filipensis 2:3).
Noqantsikpita jukläya creeqkunata y portakoqkunata mana respetë (1 Pëdru 2:17).
Noqantsiknölla pensayänampaq jukkunata obliguë (Mateu 10:14).

Teyta Diosqa nunakunawan alli karnin y alli kaqllata rurarmi, noqantsikpis tsënölla ruranantsikta munan (Romänus 9:14).

Tsëpita maslla musyanëkipaqqa, jw.org päginaman yëkurir “¿Noqantsiknö pensaqkunallataku respetashwan? ¿Ima nintan Bibliachö?” neqchö willakunqanta leyi.

TEYTA DIOSQA BIBLIAWANMI DIRIGIMANTSIK

Bibliachömi willakun nunakunata Teyta Dios imanö tratanqanta. Bibliata leyirmi musyantsik Diospa rikënimpaq ima alli o mana alli kanqanta, y imata ruranantsikta o mana ruranantsikta munanqanta (Salmus 19:7, 11). Tsëkunata yachakunqantsikmi yanapamantsik cada junaq imatapis alli decidinapaq.

Proverbius 13:20 textuchö ninqanllaman pensarishun, kënömi nin: “Yachaq nunakunawan pureq kaqqa yachaqmi tikranqa, peru juiciunnaq nunakunawan juntakaqqa mana allichömi ushanqa”. Këchö ninqanqa kanampis yanapamantsikmi. Tsënö alli consëjukunatam Bibliachöqa mëtsikata tarintsik (rikäri “ Bibliachö alli consëjukunaqa imëpis yanapamantsikmi” neq recuadruchö willakunqanta).

Capaz kënö pensanki: “¿Imanötan musyäman Bibliachö consëjukuna rasumpa yanapakunqanta?”. Qateqnin kaqchömi yachakushun Bibliachö consëjukuna vïdantsikchö imanö yanapamanqantsikta.

a Jehoväqa Diospa jutinmi (Salmus 83:18).

BIBLIACHÖ ALLI CONSËJUKUNAQA IMËPIS YANAPAMANTSIKMI

Bibliata qellqayanqampitaqa 2.000 watanönam pasarishqa. Tsënö karpis, Bibliachö consëjukunaqa kanampis yanapamantsikmi. Nunakunaqa kushishqa y alli kawakunapaqmi imëkata rurar sïguintsik (Eclesiastes 1:9). Tsëta logranapaqmi Bibliachö consëjukuna yanapamäshun, tsë consëjukunaqa manam imëpis cambianqatsu.

Honrädu këpaq

“Llapanchöpis alli portakuytam munayä” (Hebrëus 13:18).
“Suwakoq nunaqa amana suwakutsunnatsu, tsëpa rantinqa [...] honrädu trabäjuta rurar alli trabajatsun” (Efesius 4:28).

Jukkunawan alli kawakunapaq

“Ama pï nunapis biennimpaq kaqllata ashitsuntsu, sinöqa wakimpa biennimpaq kaqta ashitsun” (1 Corintius 10:24).
“Jukniki juknikikuna aguantanakur sïguiyë y [...] shonqupita perdonanakuyë” (Colosensis 3:13).

Alli decidinapaq

“Pensëta mana yachaq nunaqa, imata niyaptimpis llapantam creikurkun, peru pensëta yachaq nunaqa, imata ruranampaqpis alliran pensan” (Proverbius 14:15).
“Alli pensëta yachaq nunaqa, ima peligruta rikarpis witikunmi, peru pensëta mana yachaq nunaqa, peligruta rikëkarpis manam witikuntsu, tsënöpam sufrin” (Proverbius 22:3).

TÄPAKOQ