Bibliachö consëjukunaqa imëpis yanapakunmi
Këchömi yachakushun chusku asuntuchö Biblia ninqan imanö yanapamanqantsikta. Bibliachö consëjukunaqa atskaq nunakunatanam yanapashqa.
1. Casädu vïdapaq
Manam llapan nunakunatsu casädu vïdapaq igual-lla pensayan, y kushishqa kayänampaq casädukuna imata rurayänampaqpis jukta juktam niyan.
BIBLIACHÖ NINQAN: “Llapëkikunam warmikikunata kikikikunatanö kuyayänëki. Tsënöllam casäda warmipis, qowanta o runanta alläpa respetanan” (Efesius 5:33).
IMA NITA MUNANQAN: Teyta Diosmi casädu vïdataqa patsätsirqan. Tsëmi musyan casädukuna kushishqa kayänampaq imata rurayänampaq kaqta (Marcus 10:6-9). Casädu ollqukuna y warmikunaqa, kikinkunallaman pensayänampa rantinmi majankunaman pensayänan. Tsëmi yanapanqa kushishqa kawakuyänampaq. Casädu ollquqa warminta kuyarmi shumaq tratanan y cuidanan. Casäda warminam qowanta o runanta respetarnin ruranqanchö yanapanan y shumaq parlapänan.
BIBLIACHÖ CONSËJUKUNAQA IMËPIS YANAPAKUNMI: Quang jutiyoq nunawan Thï jutiyoq warminqa Vietnam nacionpitam kayan. Pëkunaqa manam casädu vïdankunachö kushishqatsu kayarqan. Quangqa manam warminta llakipaqtsu y mana allim trataq. Pëmi kënö willakun: “Warmï imanö sientikunqanmanqa manam pensaqtsu kä y atska kutim lluta parlapar mana alli tratarqä”. Warmin Thïqa divorciakuytam munarqan. Pëmi kënö willakun: “Manam qowämanqa confiakurqänatsu ni respetarqänatsu”.
Tsëpitanam Bibliata yachakur qallayarqan y Efesius 5:33 textuchö ninqannömi rurëta procurayarqan. ¿Imanötan tsëta rurayanqan yanaparqan? Quangmi kënö willakun: “Bibliachö tsë textuta leyirmi cuentata qokurqä warmïta shumaq tratanäpaq y kuyanäpaq kaqta. Y cuentatam qokurqä wananqanta mana faltatsinäpaq kaqta, cuidanäpaq kaqta y imanö sientikunqantapis cuentaman churanäpaq kaqta. Tsëta ruraptïqa warmï kuyamanmi y respetamanmi”. Thïnam kënö willakun: “Efesius 5:33 textuchö ninqannömi qowäta mas respetanäpaq kallpachakü. Y pë mas kuyamaptinmi següru y tranquïlu sientikü”.
Casädu vïdapaq maslla musyanëkipaqqa, jw.org päginaman yëkurir 2018 wata 2 kaq ¡Musyatsikoq! revistachö “Familiachö kushishqa täkuyänëkipaq” neqchö willakunqanta leyi.
2. Jukkunawan alli kawakunapaq
Ima color kayanqanrëkur, më nacionpita kayanqanrëkur, ollqu pura o warmi pura kakuyanqanrëkur o ima religionpita kayanqanrëkurmi wakintaqa chikiyan.
BIBLIACHÖ NINQAN: “Tukuyläya nunakunata väleqpaq churar respetayë” (1 Pëdru 2:17).
IMA NITA MUNANQAN: Nunakuna ima kastapita kayaptin, më nacionpita kayaptin y warmi pura o ollqu pura kakuyaptimpis, Bibliachöqa manam nintsu pëkunata chikinapaq. Tsëpa rantinqa, Bibliachöqa yachakuntsik llapankunata igualpa rikänapaqmi (Hëchus 10:34). Nunakuna creiyanqanwan o imanö portakuyanqanwan mana acuerdu karpis, llapankunatam respëtuwan shumaq tratanantsik (Mateu 7:12).
BIBLIACHÖ CONSËJUKUNAQA IMËPIS YANAPAKUNMI: Danieltam yachatsiyarqan Asia kinrëpita nunakuna nacionnimpa contran kayanqanta. Tsëmi Asia kinrëpita nunakunata alläpa chikirnin jukkuna jananchöpis qayapaq. Danielmi kënö nin: “Tsëta rurarqa nacionnïta defendikanqätam pensaq kä. Peru manam ni ichikllapis pensarqätsu tsënö ruranqä y tsënö pensanqäqa mana alli kanqanta”.
Tsëpitanam Danielqa Bibliata yachakur qallarqan. Pëmi kënö willakun: “Pensanqätam cambianä karqan. Teyta Diospaqqa mëpita karpis llapan nunakunam igual-lla kayan. Y noqapis Teyta Dios nunakunata rikanqannö rikänäpaqmi yachakurqä”. Kananqa pitapis tsëllaraq reqirqa, ¿imatataq Daniel pensan? Pëmi kënö willakun: “Nunakuna mëpita kayanqanmanqa manam alläpa yarpachakünatsu. Llapan nunakunatam allipa tratä y amïgükunapis mëtsëpitam kayan”.
Tsëpita maslla musyanëkipaqqa, jw.org päginaman yëkurir 2020 wata 3 kaq ¡Despertad! revistachö “¿Tiene cura el prejuicio?” neqchö willakunqanta leyi.
3. Qellë asuntupaq
Kushishqa këta munar y warë warätin alli kawakuyta munarmi, nunakunaqa qellëyoq kayänampaq imëkata rurayan.
BIBLIACHÖ NINQAN: “Imanömi qellë yanapakun, tsënöllam yachaq këpis yanapakun. Peru qellëyoq këpitaqa yachaq këmi mas alli. Imatapis alli yacharqa salvakuytam puëdiyan” (Eclesiastes 7:12).
IMA NITA MUNANQAN: Qellëqa yanapakunmi, peru manam musyantsiktsu kushishqa kanapaq ni warë warätin alli kawakunapaq yanapamänapaq kaqtaqa (Proverbius 18:11; 23:4, 5). Rasumpa kushishqa kanapaq y warë warätin alli kawakunapaqqa, Teyta Diospa Palabran Bibliachö consëjukunatam cäsukunantsik (1 Timoteu 6:17-19).
BIBLIACHÖ CONSËJUKUNAQA IMËPIS YANAPAKUNMI: Indonesia nacionpita Cardu jutiyoq nunam rïcu kanampaq churapakarqan, y lograrqanmi. Pëmi kënö willakun: “Atska qellëyoq karmi mëtsëpa viajaq kä, imëka cuestaqkunata, cärrukunata y wayikunatam ranteq kä”. Peru tsënö kawakunqanqa illaqpitam ushakärirqan. Cardum kënö willakun: “Engañamarmi qellënïta suwapayämarqan. Tsëmi imëkata dejëkur atska watapa trabajar gananqäqa illaqpita ushakärirqan. Rïcu këta munarmi atska watapa trabajarqä, peru tsëpitaqa manam imäpis karqantsu. Tsëmi mana imapaqpis väleqnö sientikurqä”.
Carduqa qellë asuntupaq Bibliachö consëjukunatam cäsukushqa. Tsëmi kananqa qellëyoq këllamannatsu yarparäkun, sinöqa kapunqanllawanmi kushishqa kawakun. Pëmi kënö willakun: “Bibliachö consëjukuna imapitapis mas välinqantam yachakurqä. Kananqa tranquïlum punukü y mas kushishqam kawakü”.
Qellë asuntupaq maslla musyanëkipaqqa, jw.org päginaman yëkurir 2021 wata 3 kaq Täpakoq revistachö “¿Estudiar y qellëyoq karninraqku kushishqa y alli kawakunki?” neqchö willakunqanta leyi.
4. Oqllanakuy asuntupaq
Mëtsikaq nunakunam niyan oqllanakuy asuntuchöqa llapampis allilla kanqanta.
BIBLIACHÖ NINQAN: “Teyta Diosqa këtam munan: limpiu nunakuna kayänëkita y oqllanakur melanëpaqkunata rurëpita cuidakuyänëkita. Limpiu nuna y Diospa rikëninchö alli kayänëkipaqmi, cada ünu cuerpuykikunata dominëta yachayänëki, y ama Teyta Diosta mana reqeq juk nacion nunakunanöqa, oqllanakuyta löcuyëpa y ërayëpa munayëtsu” (1 Tesalonicensis 4:3-5).
IMA NITA MUNANQAN: Bibliachöqa clärum willakun oqllanakuy asuntuta imanö rikänapaq kaqta. ‘Oqllanakur melanëpaqkunata rurë’ nirqa, mana majankunawan oqllanakuyanqampaq, qellëpaqrëkur jukwan jukwan oqllanakuyanqampaq, manaraq casakushqa këkar oqllanakuyanqampaq, ollqupura o warmipura oqllanakuyanqampaq y animalkunawan kakuyanqampaqmi parlëkan (1 Corintius 6:9, 10). Oqllanakuyqa Teyta Diospa qarëninmi, y casakushqa ollquwan warmillapaqmi (Proverbius 5:18, 19).
BIBLIACHÖ CONSËJUKUNAQA IMËPIS YANAPAKUNMI: Australia nacionchö kawaq Kylie jutiyoq shipashmi kënö willakun: “Soltëra karqa pensarqä piwampis oqllanakurqa kushishqa y alli sientikunäpaq kaqtam. Peru manam pensanqänötsu karqan. Manam allitsu sientikurqä y llakishqallam kakoq kä”.
Tsëpitanam Kylieqa Bibliata yachakur qallarqan, y oqllanakuy asuntupaq Bibliachö consëjukunatam cäsukurqan. Pëmi kënö willakun: “Teyta Diospa Palabranchö consëjukunaqa alläpa mana llakikunapaq y sufrinapaqmi yanapakun. Kananqa Jehovä munanqannö kawarmi alli y kushishqana sientikü. Bibliachö consëjukunata cäsukurmi llakikur sufrïnatsu”.
Tsëpita maslla musyanëkipaqqa, jw.org päginaman yëkurir “¿Ima nintaq Bibliachö manaraq casakurnin juntu kawayanqampaq?” neqchö willakunqanta leyi.
Kamakoq Teyta Diosnintsikmi ima alli o mana alli kanqanta musyanapaq yanapamantsik. Höraqa manam fäciltsu oqllanakuy asuntupaq mandakunqanta cäsukuy, peru cäsukunqantsikqa allipaqmi kanqa. Tsëmi yanapamäshun imëpis kushishqa kanapaq.
