Sajoniachö këkaq juk takshalla markachömi yurirqä, kë markaqa Republica Democrätica Alemäna nacionchömi tsë witsanqa këkarqan. Tsë nacionqa comunistam karqan, tsërëkurmi nunakunaqa religionta precisaqpaqtsu churayaq. Wayïchöqa llapäkunam shumaq kawakuyaq kayä, y teytäkunaqa alli kawakunäpaqmi yachatsiyämarqan. Noqaqa manam Diosman creeqtsu kä. Tsëmi 18 watata cumplinqäyaq, Diosman mana crei y comunismu nishqan pensëqa kawënïchö rikakurqan.

¿Imanirtaq comunismu nishqan grüpuchö pensayanqanqa alläpa gustamaq? Porqui llapan nunakuna igualpa rikashqa kayänan pensëqa gustamaqmi. Tsërëkurmi, tsë nacionpa riquëzankunata waktsakuna y rïcukuna igual rakinakurninqa, llapankunapis igual-lla kayänampaq kaqman pensaq kä. Tsëmi comunista grüpuchö jövinkunata yanapar qallëkurqä. 14 watayoq këkarmi, kë täranqantsik Patsa limpiu kanampaq yanapakurqä. Tsëta ruranqäpita agradecikurmi, Aue markachö autoridäkunaqa juk qarëta qoyämarqan. Jövinllaraq këkarnimpis, Alemania nacionpa mas precisaq autoridäkunatam reqirqä. Tsëmi allita rurëkanqäta y shamoq tiempuchöqa alli kawakunäpaq kaqta pensaq kä.

Peru manam noqa pensanqänötsu karqan. Porqui 1989 watachömi Berlin markachö këkaq perqa juchurirqan, y Euröpapa Inti Yarqamunan Läduchö këkaq comunista grüpupis ushakärirqanmi. Kë pasakunqanqa alläpam llakitsimarqan, peru manam tsëllatsu pasakurqan. Ichik tiempu pasariptinllam, comunismu nishqan grüpuchöqa mana allita rurayashqa kayanqanta musyarirqä. Pëkunaqa grüpunta mana yanapaq nunakunatam mana allipa tratayaq. ¡Tsënö pasakïkanqanqa mana creipaqnömi karqan! ¿Manaku comunismu nishqan grüpuqa llapampis igual kayänampaq yachatsikuyaq? ¿Ardëllaku karqan tsënö yachatsikuyanqanqa? Kë pasakunqankunaqa, alläpam yarpakachätsimarqan.

Tsëpita witsëpaqa, müsica toquëta y cuadrukunata pintëmi alläpa gustamaq. Tsëmi universidäman yëkïta munarnin, müsicata yachatsikuyanqanman ëwarqä; müsicata toquëta y cuadrukuna pintëllatanam munarqä. Wamrapita patsë teytäkuna yachatsiyämantaqa mana kaqpaqmi churarqä. Noqaqa lluta kawakurnin gozakïllatam munaq kä, y atskaq chïnakunawanmi kakoq kä. Peru manam müsica, cuadrukunata pintë ni llutanta rurakur  kawakunqäpis yarpachakïnïtaqa ushakätsirqantsu, tsënö sientikunqäqa cuadrukuna pintanqächömi rikakoq. Kënömi tapukoq kä: “¿Imanöraq kawakï kanqa shamoq tiempuchö? ¿Imapaqtaq nuna kawan?” nir.

Kë tapukïkunapa respuestanta tarinqäqa, shonqüyaqmi chärirqan. Müsica toquëta yachatsikuyanqan sitiuchö këkarninmi, estudiaq mayïkunawan täkurirqä y pëkunaqa shamoq tiempupaqmi parlëkäyarqan. Pëkunawan këkaq Mandy * shipashmi shumaq consejaramarqan, pëqa Jehoväpa testïgunmi kanaq. Kënömi nimarqan: “Andreas, kawëpaq y shamoq tiempupaq musyëta munarqa, Bibliapitam alleq yachakunëki”.

Bibliapita yachakïtaqa manam munaqtsu kä, peru kawëpaq y shamoq tiempupaqmi musyëta munarqä. Tsëmi Mandyqa Bibliachö këkaq Daniel librupa 2 kaq capïtulunta rikäratsimarqan, tsëta leyirinqäqa alläpam gustamarqan. Tsëchömi atska puëdeq gobiernukunapaq parlarqan, y tsë gobiernukunata ima pasanampaq kaqta musyëqa, espantakïpaqmi karqan. Tsëpitanam shamoq tiempuchö nunakunawan ima pasakunampaq kaqta, Mandyqa Bibliawan rikäratsimarqan. Tsënöpam unëpita tapukunqäta musyarirqä. Peru ¿pitaq tsë willakïkunata qellqatsirqan? ¿Pitaq shamoq tiempuchö ima pasakunqanta musyarqan? Tsë willakïkunaqa, ¿Dios rasumpa kanqantaku rikätsikun?

Mandyqa, Jorst y warmin Angëlikatam reqitsimarqan. Pëkunaqa Jehoväpa testïgunkunam kayänaq, y Bibliapa willakïnintam shumaq entienditsiyämarqan. Tsë höram cuentata qokurirqä, Testïgukunalla Diospa jutinta imëpis utilizäyanqanta y tsëpita yachatsikuyanqanta (Salmus 83:18; Mateu 6:9). Jinamampis, shumaq patsachö nunakuna mana wanushpa kawakuyänampaq Diosnintsik änikunqantam yacharatsiyämarqan. Salmus 37:9 textuchömi kënö nin: “Jehoväman markäkoqkunaqa patsatam chaskiyanqa”. Llapan nunakuna imëyaqpis kawakïta puëdiyanqanta musyëqa alläpam kushitsimarqan, tsëpaqqa Dios munanqannö kawëtam procurayänan.

Biblia ninqannö kawakïqa manam fäciltsu karqan. Müsica toquëta y cuadrukunata pintëta alläpa yacharmi orgullösu tikrakurirqä, tsëmi humildi kanä y rakcha rurëkunata jaqinäqa fäciltsu karqan. Biblia ninqannö kawayänampaq procuraqkunapaqqa Jehoväqa pacienciakoq, entiendikoq y kuyakoqmi, tsënö kanqampitam pëta alläpa agradecikö.

Diosman mana crei y comunismu nishqan pensëmi, 18 watata cumplinqäyaqqa kawënïchö rikakurqan. Peru tsëpita patsëqa jukläya nunana kanäpaqmi Biblia ninqanqa yanapamashqa. Yachakunqäqa mas kushishqa kanäpaq y shamoq tiempupaq manana yarpachakunäpaqmi yanapamarqan. 1993 watam Jehoväpa testïgun kanäpaq bautizakurirqä, y 2000 watachönam creikoq mayï Tabïthawan casakurirqä. Ishkäkunam llapan tiempükunawan Biblia ninqampita wakinkunata yachatsiyä. Noqa unë kanqänöllam, mëtsikaq nunakuna kayan. Jehoväta reqiyänampaq yanapëqa alläpam kushitsiman.

Jehoväpa testïgunkunawan juntakar qallëkuptïqa, teytäkunaqa mantsakäkuriyarqanmi. Peru kawënïchö yanapamanqantam tiempuwanqa cuentata qokuriyarqan. Kananqa alläpa kushishqam këkä, porqui teytäkunaqa Bibliapitam yachakïkäyan y Testïgunkunapa reunionninkunamanmi ëwëkäyan.

Warmïwan noqaqa, casädukunapaq Biblia yachatsikunqannömi kawëta kallpachakuyä, tsëmi alläpa kushishqa kawakuyä. Respetanakuyänäpaq Biblia ninqanta cäsukuyanqämi, casädu kawënïkunachö yanapëkäyäman (Hebrëus 13:4).

Kananqa manam kawë imanö kanampaq kaqman ni shamoq tiempuman yarparäkurllanatsu kakü. Porqui entëru Patsachö Jehoväpa testïgunkunawanmi, imëka familiäwannö yamë y juknölla kawakuyä. Testïgukunaqa llapäkunapis igualpam rikänakuyä, y unëpitam tsënö kawëtaqa munarqö y ashirqö.