1, 2. (1) ¿Imataq yanapamantsik cada junaq alli tsarakunapaq? Entienditsikaramï. (2) ¿Imapitataq kë yachatsikïchö yachakushun?

 JUK pruëbapa pasarirqa, itsa kikintsiklla aguantëta mana puëdinapaq kaqta pensarqantsik. Itsa tsënöqa nirqantsik, alläpa grävi qeshyachö imanö tsarakunqantsikta o mëqan familiantsikpis wanukïkushqa kaptin alläpa mana llakikunapaq imakuna yanapamanqantsikman yarparnin. Cada junaq tsarakunapaq Diospa podernin ‘nunakunapa kallpampita mas puëdeq kallpayoqta’ tikratsimashqantsik kaptin tsarakïta puëdinqantsiktachi rikarqantsik (2 Cor. 4:7-9).

² Jina Satanaspa makinchö këkaq mana alli nunakunapa rurëninkunata mana qatinapaqmi poderninwan Dios yanapamänata wanantsik (1 Juan 5:19). Jina, “puëdeq alläpa mana alli espïritukunawanmi” pelyëkantsik (Efes. 6:12). Tsëkunapa pasëkanqantsikta cuentaman churëkur, ishkë asuntuchö poderninwan Dios imanö yanapamanqantsikta rikärishun. Tsëpitanam Diospa podernin yanapamänapaq imata ruranantsikpaq kaqta yachakushun.

3. Juknöpaqa, ¿imanötaq Diosqa poderninwan yanapamantsik pruëbakunachö alli tsarakunapaq?

³ Problëmakunapa pasashqapis, Diospa poderninqa kallpayoqta tikratsimarnintsikmi llapan rurënintsikkunata cumplinapaq yanapamantsik. Mana allikunapa pasëkarnimpis, ‘Cristupa poderninwan’ Jehoväta sirwir sïguinampaq kaqtam apostol Pabluqa pensarqan (2 Cor. 12:9). Ishkë kaq viäjinchöqa, apostol Pabluqa manam yachatsikunanllapaqtsu kallpachakurqan, sinöqa gastunkunapaq trabajanapaqpis kallpachakurqanmi. Corintu markachöqa Äquilapa y Priscïlapa wayinkunachömi posadakurqan, pëkunaqa carpa wayikunata rurarmi trabajayaq. Pablupis carpa wayikunata rurëta yacharmi, cada semäna pëkunawan atska junaqkunapa trabajarqan (Hëch. 18:1-4). Jehoväpa poderninmi yanaparqan  trabäjunta ruranapaq y Diospita yachatsikunampaq.

4. 2 Corintius 12:7b a 9 textuchö ninqannö, ¿imataq Pablupa qaranchö kasha cuenta karqan?

⁴ (Leyï 2 Corintius 12:7b-9). ‘Cuerpunchö juk kasha’ kanqanta nirqa, ¿imapaqtaq apostol Pabluqa parlëkarqan? Mëqan lädu cuerpuntsikman kasha yakakaptinqa, alläpachi nanamashwan. Kashapaq parlarqa, apostol Pabluqa juk pruëbapa pasëkanqan alläpa sufrikätsinqampaqmi parlëkarqan. Tsëpaqmi “Satanaspa juk angelnin” nirqan, tsë angelmi laqyarnin këkarqan (nötachöqa “maqamar” ninmi). Itsa tsë kashataqa Satanaswan demoniunkunatsu churayäpurqan, juk parlakïchöqa manam pëkunatsu sufrikätsiyarqan. Peru tsë mana alli espïritukunaqa, kasha cuenta juk pruëbapa Pablu pasëkanqantam musyariyarqan y kashata masraq clavaq cuentam, masraq sufritsiyarqan. ¿Imatataq apostol Pablu rurarqan?

5. ¿Imanötaq apostol Pablu mañakunqanta Jehovä contestarqan?

⁵ Qallananllachöqa, apostol Pabluqa tsë pruëbapa pasëkanqanta kasha cuentata jorqaritam munarqan. Kënömi nirqan: “Tsërëkurmi kima kuti [Jehovä] Señorta rogakurqä, tsë kasha noqapita jorqashqa kanampaq”. Tsënö rogakïkaptimpis, manam cuerpumpitaqa tsë kasha yarqurqantsu. ¿Mañakunqanta Jehovä mana contestanqantaku tsëqa rikätsikun? Manam. Pëqa mañakunqanta contestarqanmi. Problëmanta mana altsarnimpis, aguantanampaqmi kallpan yuritsirqan. Y kënömi Jehovä nirqan: “Pishipaq këchömi podernïqa mas rikakun” (2 Cor. 12:8, 9). Poderninwan Jehovä yanapaptinmi, Pabluqa kushishqa y tranquïlu sientikurqan (Filip. 4:4-7).

6. (1) ¿Imanötaq mañakïnintsikta Jehovä contestamunman? (2) ¿Imanötaq Diosman mas markäkunampaq kë pärrafuchö yureq textukuna yanapamantsik?

⁶ ¿Imëllapis apostol Pablunöku Jehoväta mañakurquntsik pruëbakunapita libraramänapaq? Mañakïkashqa problëmantsikkuna mana ushakaptin o itsa mas mana alli tikrakuriptinqa, itsa Jehovä manana kuyamanqantsikta pensashwan.Tsënö pasakuptinqa, apostol Pabluta pasanqanta yarpäshun. Pablu mañakunqanta Jehovä contestanqannömi, noqantsik mañakunqantsiktapis contestamunqa. Itsa problëmantsikkunataqa ushakätsinqatsu, peru tsëkunata aguantanapaqmi poderninwan yanapamäshun (Sal. 61:3, 4). Itsa tsë problëmakunaqa ishkiratsimashwan, peru Jehoväqa manam japallantsiktatsu dejaramäshun (2 Cor. 4:8, 9; Filip. 4:13).

7, 8. (1) ¿Imachötaq Diospa podernin vientuwan igualan? (2) ¿Poderninwan Dios imanö yanapakunqantataq Pëdru entienditsikurqan?

⁷ Jina Jehoväpa poderninqa, ¿imanö mastaq yanapamantsik? Imanömi laqcheqsëkaq lamarchö juk barcu tsaki patsaman chänampaq alli vientu yanapakun, tsënöllam poderninwan Diosqa imëka problëmakunachö alli tsarakunapaq yanapakun, hasta änikunqan shumaq patsata apamunqanyaq.

⁸ Apostol Pëdruqa qochachö pescädukunata tsarirmi trabajaq, tsëmi barcukunata manejëtaqa yachaq. Tsëchi poderninwan Dios imanö yanapakunqanta entienditsikunampaq, lamarchö barcuta vientu imanö yanapanqantawan igualatsirqan. Kënömi escribirqan: “Diospa musyatsikïninkunaqa manam ni imëpis nunapa munënimpitatsu shamurqan, sinöqa nunakunam santu espïritu pushaptin Diospita shamunqankunata parlayarqan”. Kë textuchö “pushaptin” neq palabraqa, griëgu idiömachöqa, “apaptin” o “puritsiptin” ninanmi (2 Pëd. 1:21; nöta).

9. “Apaptin” neq palabrata utilizarqa, ¿imatataq apostol Pëdruqa entienditsikïta munarqan?

⁹ “Apaptin” neq palabrata utilizarqa, ¿imatataq apostol Pëdruqa entienditsikïta munarqan? Hëchus librutaqa Lücasmi qellqarqan,  y barcuta vientu puritsinqampaq parlarqa, griëgu idiömachö tsë palabratanöllam utilizarqan (Hëch. 27:15). Tsëmi Pëdruqa, Bibliata escribeqkunapaq parlarnin, pëkunata poderninwan Dios pushanqanta o apanqanta nirqan. Juk yachaq nuna ninqannöpis, lamarchö barcuta vientu imanö puritsinqanta igualatsirmi shumaq entienditsikurqan. Rasumpa kaqchöqa, imanömi barcuta vientu apaptin tsaki patsaman chärin, tsënöllam Diospa willakoqninkunata y Bibliata escribeq nunakunata poderninwan Dios yanaparqan. Jina tsë yachaq nunallam kënö nirqan: “Diospa willakoqninkunaqa, barcupa toldunkunata pallarkoq cuentam kayarqan”. Jehovänam imëka vientuwannöpis poderninwan yanaparqan. Tsëmi tsë poder yanapaptin, tsë nunakuna Bibliata escribiyarqan.

10, 11. ¿Ima ishkë rurëkunatataq ruranantsik poderninwan Jehovä yanapamänapaq? Juk willakïwan entienditsikaramï.

¹⁰ Kanan witsankunaqa, Jehoväqa mananam podernimpa yanapakïninwan nunakunata Bibliata escribitsinnatsu. Tsënö karpis, sirweqninkunataqa tsë poderninllawanmi yanapëkan. Rikanqantsiknöpis Jehoväqa yanapakïkanllam. Peru poderninwan yanapamänapaqqa, cada ünum ruranantsikpaq kaqkunata rurëkänantsik. ¿Imanötaq tsëta lograshwan?

¹¹ Këllaman pensarishun. Barcuta manejaq nunaqa, lamarchö këkaq vientuta alleq provechanampaqqa ishkë cösaskunatam ruranan. Puntataqa, tsaki patsapitam vientu mas kanqanman barcunta chätsinan, tsëta mana rurarqa, kikinllapitaqa barcuqa manam yarqïta puëdinqatsu. Tsëpitanam barcupa toldunkunata llapan puëdinqanmannö pallarinan. Tsë toldukunata vientu pükaptinllam, barcuqa kikinlla ëwar qallëkunqa. Tsënöllam Jehoväta sirwir sïguinapaqqa, poderninlla yanapamäshun. Tsëpaqqa ishkë cösaskunatam ruranantsik: puntataqa, vientu pükanqanmanmi shäkunantsik, tsë ninanqa, poderninwan Jehovä yanapamänapaq kaq rurëkunatam ruranantsik. Tsëpitanam, barcupa toldunta pallareq cuenta, llapan puëdinqantsikmannö  tsë rurëkunata ruranantsik (Sal. 119:32). Tsëkunata rurashqaqa, contrantsik churakäyaptin y pruëbakuna kaptimpis, podernin yanapamashqam mushoq patsa chämunqanyaq Jehoväta sirwirnin sïguishun.

12. ¿Imapitataq kananqa yachakushun?

¹² Këyaqqa rikärirquntsik, ishkë asuntuchö poderninwan Jehovä imanö yanapamanqantsiktam. Poderninqa kallpayoqtam tikratsimantsik y pruëbakunapa pasanqantsik höram alli tsarakunapaq yanapamantsik. Jina Jehoväta sirwir sïguinapaq y imëyaqpis kawëman chätsikoq nänipita mana yarqukurinapaqmi yanapamantsik. Kananqa, poderninwan Jehovä yanapamänapaq chusku cösaskunata ruranantsik precisanqampita yachakurishun.

13. (1) 2 Timoteu 3:16 y 17 textuchö ninqannö, ¿imanötaq Diospa Palabranqa yanapamantsik? (2) Y tsëpaqqa, ¿imatataq ruranantsik?

¹³ Juk: Diospa Palabrampitam yachakunantsik (leyi 2 Timoteu 3:16, 17). Bibliachö llapan escribirëkaq ‘Diospita shamunqantaqa’ musyantsikmi. Jehoväqa, kikin pensanqanta Bibliaman escribiyänampaq poderninwanmi nunakunata yanaparqan. Tsëmi Bibliata leyishqa y leyinqantsikman yarpachakushqaqa, tsëkunapita yachakunqantsikkuna shonquntsikyaq chärin. Y tsëkunam yanapamäshun pë munanqannö kawakunapaq (Heb. 4:12). Peru llapan kawënintsikchö poderninwan Dios yanapamänapaqqa, Palabran Bibliatam cada junaq estudianantsik y yachakunqantsikkunamanmi yarparänantsik. Tsënöpam Diospa Palabranqa llapan parlanqantsikchö y ruranqantsikchö yanapamäshun.

14. (1) ¿Imanirtaq nintsik reunionkunachö Jehoväpa podernin këkanqanta? (2) ¿Imatataq ruranantsik reunionkunachö Jehoväpa podernin yanapamänapaq?

¹⁴ Ishkë: cristiänu mayintsikkunawanmi Jehoväta adoranantsik (Sal. 22:22). Reunionnintsikkunachöqa, imëka vientu pükaq cuentam Jehoväpa santu espïritun o podernin yanapamantsik (Rev. 2:29). ¿Imanirtaq tsëta nintsik? Reunionnintsikkunachöqa poderninwan Jehovä yanapamänapaqmi mañakuntsik, Bibliapita jorqashqa cancionkunatam cantantsik y poderninwan Jehovä akranqan wawqikunam Bibliapita yachatsikayämun. Jina poderninwan Jehovä yanapaptinmi, panikunaqa imanö yachatsikunapaq kaqta rikätsikayämun. Peru poderninwan Jehovä yanapamänapaqqa, reunionkunachö shumaq parlakurinapaqmi manaraq ëwarnin alleq preparakunantsik. Tsëta rurarmi, imëka barcupa toldunkunata pallarkoq cuenta, reunionkunachö poderninwan Jehovä yanapamänapaq listu këkäshun.

15. Yachatsikunqantsikchö poderninwan Jehovä yanapamänapaqqa, ¿imatataq ruranantsik?

¹⁵ Kima: Diospita yachatsikoqmi yarqunantsik. Yachatsikunqantsikchö Bibliata leyirninqa, poderninwan Dios yanapamänatam permitikantsik (Rom. 15:18, 19). Tsëmi poderninwan mas yanapamänapaqqa, yachatsikoq imëpis yarqunantsik y Palabran Bibliatam utilicëta procuranantsik. Jina Diospita yachatsikoq ëwar nunakunawan mas alli parlakurinapaqqa, Cristiänunö Kawakunapaq y Yachatsikunapaq reunionchö yachakunapaq höjachö, “Imanö yachatsikunapaq” ninqantam utilizänantsik.

16. ¿Jina imatataq ruranantsik poderninwan Jehovä yanapamänapaq?

¹⁶ Chusku: Jehovämanmi mañakunantsik (Mat. 7:7-11; Lüc. 11:13). Jina poderninwan Jehovä yanapamänapaqqa kikintam mañakunantsik. Mañakïnintsikta Dios wiyananta o poderninwan yanapamänataqa, manam carcelpa perqankuna ni kikin Satanaspis michäkïta puëdinqatsu (Sant. 1:17). ¿Imanötaq mañakunantsik poderninwan Jehovä yanapamänapaqqa? Tsëta musyarinapaqqa, amïgunta juk nuna imanö mañakunqanta igualatsikïwan, Diosta mañakïpaq Jesus yachatsikunqampita  masllata yachakurishun, tsë igualatsikïqa Lücas librullachömi yurin. b

17. Lücas 11:5 a 9 y 13 textuchö këkaq Jesuspa igualatsikïninqa, ¿imatataq yachatsimantsik Diosman mañakïpaq?

¹⁷ (Leyi Lücas 11:5-9, 13). Tsë igualatsikïwanqa, Jehoväpa poderninta imanö mañakunapaq kaqtam Jesusqa yachatsikurqan. Tsë igualatsikïchöqa, tsë nuna “kutin kutin qayakunqanrëkurmi”, amïgunqa mañakunqanta makyarqan. Pullan paqasna kaptimpis, amïgun yanapëkunampaq qayakïtaqa manam mantsakurqantsu (Rikäri 2018 wata juliu killa kaq Cristiänunö Kawakunapaq y Yachatsikunapaq reunionchö yachakunapaq höjachö, nota de estudio “persistencia atrevida” nishqanta). ¿Imanötaq Jesusqa tsë willakïta Diosman mañakïtawan igualatsirqan? Kënömi nirqan: “Sïguiyë mañakurnin, y qoyäshunkim; sïguiyë ashirnin, y tariyankim; sïguiyë takakurnin, y kichapuyäshunkim”. ¿Imatataq këpita yachakuntsik? Poderninwan Dios yanapamänapaqqa, kutin kutin mañakunantsik alläpa precisanqantam yachakuntsik.

18. ¿Imanirtaq següru këkantsik poderninwan Jehovä yanapamänapaq kaqta?

¹⁸ Jina tsë igualatsikïqa, poderninwan Jehovä imanir yanapamänapaq kaqta entiendinapaqmi yanapamantsik. Jesus willakunqan igualatsikïchö nunaqa, paqas höra chaq watukaqnin nunatam alli atiendita munarqan. Imallatapis mikunantam munarqan, peru manam ni iman kapurqantsu. Kutin kutin mañakunqanrëkur vecïnun tantan makyanqantam Jesusqa nirqan. ¿Imata yachatsimënintsiktataq munarqan? Vecïnun kutin kutin mañakuptin juk nuna yanapëkaptinqa, ciëluchö këkaq alläpa kuyakoq Teytantsikqa, yanapëkamänapaq kutin kutin mañakushqaqa masraqchi poderninwan yanapëkamäshun. Tsëmi yanapëkamänapaq Jehoväta mañakushqaqa, poderninwan yanapamänapaq kaqta següru këkantsik (Sal. 10:17; 66:19).

19. ¿Imanirtaq Satanasta vencinapaq kaqta següru këkantsik?

¹⁹ Satanasqa imëkanöpam ishkitsimënintsikta tïranqa, peru segürum këkantsik alli tsarakunapaq kaqta. ¿Imanir? Poderninwan Dios ishkë asuntuchö yanapamashqam. Puntataqa, imëka problëmakunachö alli tsarakunapaqmi yanapamantsik. Y ishkë kaqchöqa, barcupa toldunta vientu pükaqnöpis, mushoq patsa chämunqanyaqmi Jehoväpa podernin pëta sirwir sïguinapaq yanapamantsik. Tsëqa, poderninwan Dios imëkanöpa yanapamänapaq kallpachakushun.