Jack y Marie-Lineqa 1988 watapitam llapan tiempunkunawan Diospita yachatsikuyan. Pëkunaqa mëchöpis rasllam yachakäriyan, tsëmi Francia nacionchö Guadalupi y Guayana Francesa markakunachö yachatsikuyänampaq änikuyashqa. Pëkunata tapupärishun.

¿Imanirtan llapan tiempuykikunawan Jehoväpita yachatsikuyanki?

Marie-Line: Guadalupi markachömi winarqä, tsëchömi mamänï kawanqan witsanqa yachatsikoq kayä. 1985 watachö estudiüta usharirmi, llapan tiempüwan Diospita yachatsikur qallëkurqä.

Jack: Jövin karninqa, llapan tiempunkunawan yachatsikoq wawqi panikunawan yachatsikuymi gustamaq. Tsëmi escuëlaman mana ëwanqä killakunaqa 50 hörakuna yachatsikoq kä. Y wakin semäna ushëkunapis, wawqi panikunawanmi karu markakunaman yachatsikoq ëwayaq kayä. Tsëpitanam lamar kuchunman rikapakoq ëwayaq kayä.

1988 watachömi Marie-Linewan casakuyarqä. Tsëmi pensarqä: “Imapis mana michëkämashqaqa, llapan tiempuntsikwan yachatsikushun” nir. Tsënam Marie-Linewan llapan tiempükunawan Diospita yachatsikur qallëkuyarqä. Juk watallatam, llapan tiempunkunawan yachatsikoqkunapaq escuëlaman invitayämarqan, y ushariptinnam mas yachatsikuyänäpaq niyämarqan. Guadalupi markachömi yachatsikuyarqä, tsëpitanam Guayana Francesa markaman mandarayämarqan.

Atska watakunapa yachatsikuyanqëkichöqa, ¿imatan yanapayäshurqunki yachakäyänëkipaq?

Marie-Line: Guayana Francesa Betelchö yanapakoq wawqikunaqa musyayaqmi Isaïas 6:8 ninqannö rurayanqäta. Tsëmi qayayämarqa kënö niyämaq: “¿Yarpäyankiku Isaïas 6:8 ninqanta?”. Tsëta wiyarqa, musyayarqämi ima niyämänampaq kaqta. Tsëmi kënö niyaq  kayä: “¡Këchömi këkäyä! ¡Noqalläkuna ëwayäshaq!”.

Juk sitiuta yanapakoq ëwarqa manam jaqiyanqäkunamanqa yarparäkuyaqtsu kayä. Tsëpa rantinqa, wawqi panikunata reqiyänäpaqmi kallpachakuyä.

Jack: Juk sitiukunata yanapakoq yarquyanqä witsanqa, wakin amïgükunaqa manam munayaqtsu juk lädupa ëwakuyänäta. Peru Guadalupi markapita ëwakuyaptïmi juk wawqi Mateu 13:38 ninqannö, kënö niyämarqan: “Yachatsikunapaq sitiukunaqa më tsë nacionkunam kayan”. Tsëmi juk lädupa yachatsikoq ëwarqa, yarpäyä mëchöpis yachatsikuyänäpaq kaqta.

Mëmampis chärirqa, tsëchö nunakuna imanö kawakuyanqantam puntataqa rikäyä, pëkunanö kawakuyänäpaq. Y tsë markachö mikuyanqan mikuykuna jukläya kaptimpis, pëkunanöllam mikuyta y imatapis upyëta procurayä. Më tsëchö yanapakuyanqäpitaqa allitam parlëta procurayä.

Marie-Line: Yanapakuyanqä markachö wawqi panikunapitam yachakuyta procurayä. Guayana Francesa markaman tsëraq chäriyashqächö pasanqanta cuentarishqëki: “Alläpa tamyaptinmi, yachatsikoq ëwayänäpaq pasanantaraq shuyäyarqä”. Tsënam juk nana kënö nimarqan: “¡Aku!”. Noqanam mantsakashqa nirqä: “¿Imanö?”. Pënam nimarqan biciclëtäkuna montarkur juknin makïkunawan paräwasnïkuna tsararkur ëwayänäpaq. Tsënö mana rurarqa, manam tamya witsanqa yachatsikuyta puëdïmantsu karqan.

Qamkunaqa 15 markakunachömi yachatsikuyarqunki. ¿Imallatapis cuentarayämankimanku?

Marie-Line: Juk markaman täkoq ëwëqa manam fäciltsu. Peru tsënö kaptimpis, yachatsikunqantsikpita wayintsikman kutirirqa kushishqam jamakuntsik.

Jack: Täräyänäpaq wayiman chärirqa, shumaq kanampaqmi munayanqä colorwan pintaq kä. Tsëtam sucursalchö wawqikunaqa musyayaq, tsëmi raslla juk läduman ëwanäpaq kaptinqa kënö niyämaq: “Jack ama kë kutiqa wayita pintëraqtsu” nir.

Marie-Lineqa, cösasnïkuna alistapakuytaqa allim yachëkun. Pëqa cäjakunaman winarirmi,  kënö churan: “Bäñupaq”, “Cuartupaq” y “Cocïnapaq”. Y cada cäjaman imata winanqantam juk papelman qellqan. Tsënömi mushoq wayïkunachöqa raslla churapakuriyä.

Marie-Line: Imatapis shumaq alistapakur sitiunchö katsirmi, raslla yachatsikoq yarquytaqa puëdiyä.

Llapan tiempuykikunawan yachatsikuyänëkipaqqa, ¿imanötan tiempuykikunata patsätsiyanki? (2 Tim. 4:5).

Marie-Line: Lüniskunaqa jamayä y reunionkunapaqmi yachakuyä. Wakin junaqkunaqa yachatsikoqmi ëwayä.

Jack: Musyayämi ëka hörakuna yachatsikuyänäpaq kaqtaqa, peru manam tsëllamanqa yarparäkuyätsu. Noqakunapaqqa Diospita yachatsikuymi mas alli kaqqa. Tsëmi wayïkunapita yarquyanqäpita hasta kutiyanqäyaq llapan nunakunawan parlëta procurayä.

Marie-Line: Pasyaq ëwarqa juk ishkë tratädukunata aparkurmi ëwayä. Wakin nunakunaqa Jehoväpa testïgun kayanqäta mana musyarpis rikärayämarllam imatapis leyiyänampaq mañayäman. Tsëmi shumaq vistikuyä y alli portakuyä. Nunakunaqa tsëtam masqa rikäyan.

Jack: Puëdiyanqämannömi vecïnükunata yanapayä. Noqaqa patsachö jitaraq basürankunatam ëllü y huërtankunatam limpiä. Tsë ruranqätam vecïnukunaqa rikäyan, tsëmi “Bibliëki kanku nir mañarayäman”.

Qamkunaqa seguïdum karu markakunaman yachatsikoq ëwayarqunki. ¿Yarpäyankiku imallapis pasayäshunqëkita?

Jack: Guayana Francesa markapa wakin sitiunkunaman chëqa manam fäciltsu. Atska kutim semänëparaq ëwayaq kayä feyu nänikunapa. Cuentariyashqëki Saint-Elie markaman ëwayanqäta: Tsëman chäyänäpaqqa atska hörakunam cärruwan y bötiwan ëwayaq kayä. Tsë markachöqa cäsi llapanmi öruta ashirnin trabajayaq. Pëkunaqa leyiyänampaq qarayanqäta gustarninmi wakinqa ichishaq örukunata qarayämaq. Y ampipa videukunata rikäyänampaq churayanqämanqa atskaqmi shayämurqan.

Marie-Line: Camopi markachö Jesus Wanunqampita yachatsikunampaqmi Jacktaqa invitayarqan. Tsëmanqa ëwayäna karqan, chusku hörapam takshalla bötiwan Oyapock mayupa. Tsënö ëwëqa shumaqmi karqan.

Jack: Wallkalla mayu kaptinqa manam fäciltsu bötiwan ëwëqa. Tsë bötiyoq nunaqa böti shumaq ëwanampaqmi mayuta alli reqinan. Ëwayanqä markachöqa 6 Jehoväpa testïgunkunallam kayarqä, peru tsënö kaptimpis Jesus Wanunqan reunionmanqa 50 nunakunanömi shayämurqan. Tsë reunionmanqa taksha markakunapitapis shayämurqanmi. Tsëkunapa pasëqa shumaqmi kashqa.

Marie-Line: Jehovällapaq kawëta munaq jövinkunaqa, noqakunanö kushikuyta puëdiyanmanmi. Tsënö rurashqaqa, Jehovämanmi mas markäkushun o yärakushun. Tsënöpa pasarqa mas clärum rikantsik Jehoväpa yanapakuyninta.

Qamkunaqa jukläya jukläya parlëtam yachakuyarqunki. ¿Fäcilku kashqa qamkunapaq?

Jack: Manam fäciltsu kashqa. Nunakunata yachatsita munarmi jukläya jukläya parlëta yachakuyarqä y sranangtongochö a Täpakoqpita yachatsikunäpaq niyämaptinqa, manam ni juk kutillapis leyishqatsu karqä. Täpakoqpita yachatsikur usharirnam juk wawqita ima yachakunqanta tapurqä, tsënam pëqa kënö nimarqan: “Manam alläpa clärutsu kashqa, peru shumaqmi kashqa”. Wawqikunapitapis masqa wamrakunam imachö alliyänapaq kaqta niyämaq.

Marie-Line: Wakin sitiukunachöqa franceschö, portugueschö y sranangtongochömi Bibliapita yachatsikoq kä. Tsënam juk nana  nimarqan portugueschö yachatsikur qallanäpaq y tsëpitana sranangtongochö. Qallananllachöqa manam musyarqätsu imanir tsënö nimanqanta.

Juk junaqqa, Bibliapita yachatsikur qallarqä sranangtongochömi y tsëpitanam portugueschö. Tsënam portugueschö yachatsikur qallëkaptï, yanaqämaq nanaqa kënö nimarqan: “Marie-Line pëqa manam musyantsu ima nikanqëkita”. Tsëran Brasil nacion warmita sranangtongochö yachëkätsinqäta musyarirqä.

Qamkunataqa më tsëchömi wawqi panikuna kuyayäshunki. ¿Imatatan rurayarqunki pëkunapa alli amïgun kayänëkipaq?

Jack: Proverbius 11:25 kënö nin: “Yanapakuqkunaqa yanapashqam kanqa”. Nunakunata yanapayänäpaqqa mana pensashllapam raslla yanapariyä. Diospita yachakunantsik wayi altsëchö yanapakuptïmi, wakin wawqikunaqa kënö niyäman: “Ama qamqa rurëtsu, wakin wawqikuna altsayätsun” nir. Tsënam noqaqa kënö nirqä: “Noqapis Diospa wayin altsëchö yanapakuyta munämi” nir. Höraqa llapantsikmi jamarita munantsik, peru noqawan warmïqa wakin nunakuna yanapëtam munayä.

Marie-Line: Llapan wawqi panikunata reqiyänäpaqmi procurayä, tsënömi musyayä wamrankunata cuidarnin o escuëlapita ëllurnin yanapayänäpaq kaqta. Tsëmi imanöllapis yanapayänäpaq tiempükunata shumaq patsätsiyä. Tsënömi pitapis yanapayänäpaq listu këkäyä.

Tukuyläya markakunachö Diospita yachatsikurninqa, ¿ima bendicionkunatatan chaskiyarqunki?

Jack: Llapan tiempükunawan Diospita yachatsikuyqa kushitsiyämanmi. Tukuyläya markakunachö yachatsikuy fäcil mana kaptimpis, Jehovä Diospa yanapakuyninwanqa kushishqam yachatsikur puriyarqö.

Jövin karnin soldädu këta mana munaptïmi, llawiyämarqan Guayana Francesa markachö. Manam pensarqätsu kë markaman kutimur llawiranqä carcelchö yachatsikuytaqa. Jehoväqa tukuynöpam bendiciyämashqa.

Marie-Line: Jehoväpita yachatsikuymi noqataqa gustaman. Tsëta rurayanqämi casädu vïdäkunachöpis yanapayämashqa. Höraqa juk familiata mikoq invitayänäpaqmi Jackqa niman. Tsënam noqapis tsënö pensëkanqäta niri.

Jack: Juk ishkë watanam pasarishqa canceryoq kanqäta niyämanqampitaqa. Warmï Marie-Lineqa manam tsëkuna wiyëta munantsu, tsëmi kënö nirqä: “Warmillä warë warätin wanukurqa, jövinllachi wanukuykushaq. Peru Jehovä Diosta sirwikarlla wanukurqa, kawarimuyta puëdishaqmi” (Gen. 25:8).

Marie-Line: Jehoväqa mana pensayanqä cargukunachö yanapakuyänäpaqmi tukuynöpa bendiciyämashqa. Tsëmi, Jehovä mëmampis ëwë niyämaptinqa ëwayänäpaq listu këkäyä.